Paggahin ug Panahon Alang sa Teokratikanhong mga Tagana
1 Si Jehova mahinatagon sa pagtuman sa iyang saad aron mabatonan sa iyang mga alagad karon ang iyang kaalam. (Isa. 55:1; Dan. 12:4; Roma 11:33; 1 Cor. 2:8-10) Kita ba nagapakitag pagpabili pinaagig paggahin ug panahon alang sa iyang programa sa pagtudlo kanato diha sa kamatuoran?
2 Nagakinahanglan kini ug panlimbasog ug pugong-kaugalingon aron igahin ang bililhong panahon alang sa personal nga pagtuon ug pangandam sa tigom. Apan dili ba ato mang bation nga dagayang nagantihan sa dihang pahimuslan ta ang panahon sa matag semana para sa teokratikanhong edukasyon? (Efe. 5:15-17) Unsa man ang pipila sa mga tagana ni Jehova sa pagtudlo kanato?
KON UNSA ANG IYANG NAHIKAY
3 Una, atong nabatonan ang Bibliya ingong atong lintunganay nga teksbok. Ang maayo kaayong programa sa pagbasa sa Bibliya gihikay sa matag semana. Kita ba naganunot niana?
4 Aduna pa bay ubang gikinahanglan, o ang pagbasa ba sa Bibliya igo na? (Sant. 1:5, 6) Atong gikinahanglan usab ang organisasyon nga gigamit ni Jehova sa pagsuplay kanato uban sa kadagaya sa espirituwal nga pagkaon, nga gitagana pinaagig mga basahon sa Bibliya, mga miting sa kongregasyon, mga sirkitong asembliya, ug distritong mga kombensiyon.—Mat. 24:45.
5 Ang lain pa sa mga tagana ni Jehova mao ang mahigugmaong mga magbalantay. (Buh. 20:28) Kita ba alisto sa pagpadapat gilayon sa mga sugyot nga gihatag nila? Ang mahunahunaong mga ansiyano nagatuon nga makugihon aron padayong makanunot sa kapunongan. (2 Tim. 2:15) Ang tanan kanato makabenepisyo gikan sa ilang kasinatian ug panahon nga ilang gigugol alang sa atong kaayohan.
PAGTABANG SA ATONG MGA ANAK UG SA UBAN
6 Ang pagtudlo sa atong mga anak diha sa kamatuoran sa linain hinungdanong bahin sa teokratikanhong edukasyon. Ang mahanasong pagtagana ug “disiplina ug pagdumala-hunahuna” hinungdanon kaayo. (Efe. 6:4) Sagad kini magbutyag sa kalainan tali sa ilang pag-uswag ngadto sa espirituwal nga pagkahamtong o sa bug-os nga pagbiya sa kamatuoran. Gikinahanglan ang panahon alang niini nga instruksiyon. Wala kini ing kapuli.
7 Ang mga bag-ohan kinahanglang mabuligan sa pag-apresyar sa panginahanglang mogahin ug panahon alang sa ilang senemanang pagtuon sa Bibliya. Ato gayod silang dasigon nga mangandam pag-ayo sa matag pagtuon. Kon ato silang ayohon sa pagtudlo, sila sa di madugay mahimong maikagon sa pag-ambit uban kanato diha sa buluhatong pagsangyaw. Ang teokratikanhong edukasyon dili man mohunong uban “sa paninugdang mga butang.” (Heb. 5:12–6:3) Buot ta silang tabangan nga “mouswag sa pagkahamtong.” Kini nagakinahanglan ug panahon.
8 Hinaot nga atong himoong determinasyon sa paggahin ug panahon aron bug-os pahimuslan ang tanang teokratikanhong mga tagana nga gihimo sa atong Dakong Maglalalang alang kanato. Kini magpaarang kanato sa padayong pag-uswag subay sa dalan sa kinabuhing walay kataposan.—Isa. 30:20, 21; Filip. 3:13-16.