Si Jehova Nagahatag ug Gahom
1 Ingong katawhan ni Jehova, kita gihatagag asaynment sa pagwali sa maayong balita samtang nagahupot sa atong panggawi nga “maayo taliwala sa mga nasod.” (Mat. 24:14; 1 Ped. 2:12) Tungod sa makuyaw nga mga panahon ingon man sa atong kaugalingong mga kahuyangan ug mga kasaypanan, dili gayod nato mapalampos kining buluhatona sa atong kaugalingon. (2 Tim. 3:1-5) Pagkamalipayon nato nga makalantaw kang Jehova sa panabang!
2 Si apostol Pablo milahutay sa daghang pagsulay. (2 Cor. 11:23-27) Giunsa niya pagbuntog kini ug nagtuman sa iyang tinudlong buluhaton? Si Jehova naghatag kaniyag “gahom nga labaw sa kasarangan.” (2 Cor. 4:7) Si Pablo miila nianang maong langitnong panabang sa dihang siya misulat: “Sa tanang butang ako adunay kusog tungod kaniya nga nagahatag ug gahom kanako.” (Filip. 4:13) Si Jehova magatabang kanato sa samang paagi. Sa unsang paagi mabatonan nato kining maong pag-abag?
3 Pinaagig Pag-ampo nga Walay Hunong: Si Jesus nag-awhag kanato sa ‘padayon nga pagpangayo, pagpangita, ug pagpanuktok,’ ug dili molunga. (Luc. 11:5-10) Ang atong pagkamapinadayonon sa pag-ampo nagapasundayag kang Jehova sa kalalom ug kamainiton sa atong tinguha, ug sa katiunay sa atong motibo. (Sal. 55:17; 88:1, 13; Roma 1:9-11) Si Pablo miila sa kahinungdanon sa pagkamapinadayonon sa pag-ampo sa dihang siya nag-awhag kanato sa “pag-ampo nga walay hunong.” (1 Tes. 5:17) Ang pag-ampo mao ang usa sa pangunang mga paagi nga mabatonan nato ang tabang ni Jehova.
4 Pinaagig Pagsunod sa Teokratikanhong Pagtultol: Ang “teokrasiya” nagapasabot nga pagmando sa Diyos, kinsa maoy gugma. Kini nagalangkit sa pagdawat sa mahigugmaong awtoridad ni Jehova ug pagsunod sa iyang mga pahimangno diha sa dagko ug gagmay nga mga desisyon. “Ang kasaligan ug mabuot nga ulipon” nagahawas sa teokratikanhong pagmando niining yutaa. (Mat. 24:45-47) Ang kooperasyon uban sa organisasyon nga gigamit sa “ulipon” maoy hinungdanon kon buot natong makabaton sa panalangin ni Jehova. (Itandi ang Hebreohanon 13:17.) Si Jehova magaganti sa atong pagkamaunongon ug pagkaandam pinaagig pagtagana sa gahom nga atong gikinahanglan sa tukmang panahon.—Heb. 4:16.
5 Pinaagig Padayong Suod sa Atong mga Igsoon: Ang gugma mao ang nagapailang timaan sa mga tinun-an ni Jesus. (Juan 13:34, 35) Tungod sa nagkadaiyang mga personalidad, ang panagkabingkil mahimong motungha taliwala kanato tungod sa personal nga mga kalainan. Kita kinahanglang magmabination uban ang kalumo, bukas nga magapasaylo sa usag usa. (Efe. 4:32) Kini magpaposible sa pagpabiling suod sa atong mga igsoon sa pagtuo ug madasig sa ilang malig-ong paglahutay ubos sa pagsulay. “Kay nahibalo nga ang samang mga butang maylabot sa mga pag-antos ginapahinabo diha sa tibuok kapunongan sa [atong] mga igsoon,” kita may hinatag-Diyos nga kusog sa pagsagubang sa susamang mga pagpit-os.—1 Ped. 5:9.
6 Pinaagig Paghupot ug Maayong Naandan nga Paagi sa Personal nga Pagtuon: Ang paglig-on sa atong mga hunahuna ug mga kasingkasing sa espirituwal makapaarang nato sa pagbuntog sa atake ni Satanas. (1 Ped. 5:8) Ang usa ka eskedyul sa personal nga pagtuon makapauswag sa atong diyosnong kahibalo. Makakuha kitag kaayohan gikan niini sa dihang nagaatubang sa adlaw-adlawng mga hagit. Si Pablo nagpasiugda nga ang “tukmang kahibalo” nagadula ug hinungdanong bahin sa pagbaton ug kaluwasan. (1 Tim. 2:3, 4) Kinahanglang batonan nato ang espirituwal nga pagkaon nga makanunayon.
7 Ang tanang butang nga atong gikinahanglan aron magpabiling malig-on gitagana pinaagi sa Kristohanong kongregasyon. Ang tibuok-kasingkasing nga pagsuportar sa mga kalihokan niini magagarantiya nga kita “manglakaw ug dili mangaluya.”—Isa. 40:29-31.