Pangutana

◼ Unsang mga publikasyon ang angay natong tun-an uban sa mga bag-ohan sa dili pa sa ilang bawtismo?

Sa dili pa ang usa ka tawo makapahinungod sa iyang kinabuhi ngadto kang Jehova ug magpabawtismo, siya kinahanglang mokuha ug tukmang kahibalo. (Juan 17:3) Siya mokuhag impormasyon nga iyang gikinahanglan pinaagi sa pagtuon ug duha ang brosyur nga Unsay Gikinahanglan sa Diyos Kanato? ug ang librong Kahibalo nga Motultol sa Kinabuhing Walay Kataposan. Sa kadaghanang kaso ang Gikinahanglan nga brosyur ang unang pagatun-an. Apan, kon ang pagtuon gisugdan diha sa librong Kahibalo, ang brosyur nga Gikinahanglan angayng pagatun-an human nga makompleto ang libro. Nganong gikinahanglan kini?

Ang Gikinahanglan nga brosyur nagtagana ug kinatibuk-ang sumaryo sa pangunang mga pagtulon-an sa Bibliya. Kon unang tun-an, kini mohatag sa estudyante sa usa ka paninugdang pagsabot sa mga kinahanglanon sa pagpahimuot kang Jehova. Kon tun-an nga ulahi, kini magsilbi ingong usa ka maayong repaso kon unsay nahisgotan diha sa Kahibalo nga libro. Sa bisan asa nga kahimtang, dasiga ang estudyante sa pagpangita sa nagapaluyong mga kasulatan ug sa pagpalandong niana. Paneguroa nga ipasiugda ang mga hulagway, kay kini epektibo kaayong mga tabang sa pagtudlo.​—Tan-awa ang Enero 15, 1997, Bantayanang Torre, mga panid 16-​17.

Sa dihang nakompleto na sa estudyante sa Bibliya ang pagtuon sa duha ka publikasyon, siya tingali makaarang sa pagtubag sa tanang pangutana nga ang mga ansiyano morepaso kaniya sa pagpangandam alang sa bawtismo. Kon mao, hayan dili na kinahanglang dumalahan ug pormal nga pagtuon uban kaniya sa bisan unsang ubang publikasyon, bisan tuod ang konduktor kinahanglang mopadayon sa pagpakitag aktibong kaikag sa iyang pag-uswag.​—Tan-awa ang Enero 15, 1996, Bantayanang Torre, mga panid 14, 17.