Bag-ong Programa sa Adlawng Espesyal nga Asembliya

Ang adlawng espesyal nga asembliya sugod sa Pebrero 2000 adunay tema niini nga: “Pagsusi sa Lawom nga mga Butang sa Diyos.” (1 Cor. 2:10) Unsang bililhong mga butang ang atong makat-onan?

Sa ilang pagpangagpas alang sa kahibalo, daghang tawo ang wala marepreskohi sa ilang nakaplagan. Ang Bibliya nagpalagsik kanato, ingon sa ipakita sa magtatan-aw sa sirkito sa iyang bahin nga nag-ulohag “Pagsusi sa Pulong sa Diyos Makapahayahay.” Ang nagaduaw nga mamumulong mohisgot sa kalangkitan tali sa pagsusi sa lawom nga mga butang sa Diyos ug pagsangyaw sa maayong balita samtang iyang hisgotan ang pangutana nga “Unsaon Nimo Paglantaw ang Pagsangyaw sa Gingharian?”

Sa unsang paagi makatabang ang mga ginikanan sa ilang mga anak sa pagkalot nga lawom sa Pulong sa Diyos? Ang praktikal nga mga sugyot itagana diha sa bahin nga “Isilsil ang Pulong sa Diyos sa Inyong mga Anak.” Ang Kristohanong mga batan-on maimpluwensiyahan sa maayong paagi pinaagig pakig-uban sa hamtong sa espirituwal nga mga tawo diha sa kongregasyon. Ang mga panig-ingnan kon sa unsang paagi sila maapektahan sa ikaayo ipasiugda diha sa bahin nga “Mga Batan-on nga Nagkat-on Gikan sa mga Tigulang.”

Nganong kita kinahanglang makugihong mosusi sa natagong espirituwal nga bahandi niining panahona? Si Jehova maoy Tigbutyag ug mga tinago. Ang nagaduaw nga mamumulong mosaysay kon unsay gibutyag ni Jehova sa karaan ug modernong mga panahon diha sa pakigpulong nga “Si Jehova Padayong Nagabutyag sa Lawom nga mga Butang.” Mopalig-on kini sa atong determinasyon sa pagpadayon sa “pagsusi sa lawom nga mga butang sa Diyos.”

Pagplano karon sa pagtambong. Kadtong buot nga magpasimbolo sa ilang dedikasyon kang Jehova pinaagi sa bawtismo kinahanglang mopahibalo sa nagadumalang magtatan-aw sa sayo nga maarangan. Ang atong mainitong tinguha sa pagsusi sa Pulong sa Diyos palig-onon pinaagi sa atong madungog. Busa ayawg sipyata kining espesyal nga adlaw sa espirituwal nga instruksiyon!