Hupti ang Maayong Panggawi nga Naghimaya sa Diyos

¹ Bisan asa kita, ang atong panggawi, panapot, ug pamostura mohatag pamatuod bahin kanato ug sa Diyos nga atong gisimba. Kini ilabinang mamatikdan diha sa dagkong mga panagkatigom sa katawhan sa Diyos, diin daghang tawo ang makapaniid kanato. Sa dihang kita maoy mga sulondan, ang ngalan ni Jehova mahimaya. (1 Ped. 2:12) Apan, ang dili maayong taras o di-maampingon nga mga lihok sa bahin sa pipila lamang makapasipala sa ngalan sa Diyos ug sa iyang katawhan. (Eccl. 9:​18b) Ang paghinumdom nga pinaagi sa atong panggawi ang mga tagagawas mohukom sa atong organisasyon ug sa Diyos nga atong gisimba angayng magpahunahuna kanato maylabot sa ‘paghimo sa tanang butang alang sa kahimayaan sa Diyos.’​—1 Cor. 10:31.

² Hustong Pamatasan Diha sa Kombensiyon: Bisan unsa pa nga matang sa pasilidad ang gigamit, kinahanglang lantawon kana ingong usa ka dakong Kingdom Hall sa panahon sa kombensiyon. Ang tukmang panapot ug pamostura angayng madayag sama sa panahong kita motambong sa mga tigom sa atong lokal nga kongregasyon. Sa panahon ug pagkatapos sa mga sesyon sa kombensiyon, ang mga igsoong lalaki ug babaye kinahanglang dili magsul-ob ug di-kasarangan o maurog nga mga sapot, nga nagbanaag sa espiritu sa kalibotan ug maghimo kanatong lisod mailhan ingong maayong pagkalahi. Ang mga igsoong babaye kinahanglang mag-amping nga ang estilo ug gitas-on sa ilang mga sayal ug mga sinina sa kasarangan haom. (1 Tim. 2:​9, 10) Kon nagtambong man sa kombensiyon, nagpuyo sa usa ka hotel, nagkaon diha sa restawran, o namalit sa tindahan, kita kinahanglang kanunayng magpabanaag nga kita mga ministro sa Diyos, nga dili maghatag ug bisan unsang hinungdan sa pagkapandol.​—2 Cor. 6:3.

³ Ang bawtismo himoon sa Sabado sa buntag diha sa kombensiyon. Ang Abril 1, 1995, Bantayanang Torre, panid 30, naghubit sa tinamdan nga kinahanglan natong ipasundayag nianang okasyona. Kini nag-ingon nga kita “kinahanglang mag-isip sa bawtismo uban ang tukmang kaugdang. Dili kini panahon sa lanog emosyonal nga mga pahayag, sa salosalo, o sa hudyaka. Apan dili usab kini usa ka magul-anong panahon.” Dili gayod haom alang kanilang bawtismohanan nga magsul-ob ug kulang kaayo ug mahulmaong humdonon, lalaki man o babaye. Busa, ang tanan kinahanglang magpabanaag sa kaugdang ug sa kalipay sa Kristohanong bawtismo.

⁴ Pagdalag Imong Kaugalingong Pagkaon Ngadto sa Kombensiyon: Ang Sosyedad naghangyo nga kitang tanan magdala sa atong kaugalingong mga paniudto ngadto sa kombensiyon matag adlaw. Kadaghanang mga igsoon misunod niini nga direksiyon ug nakakaplag nga pagkahuman sa programa alang sa pahulay sa udto, sila makalingkod uban sa ilang mga pamilya ug mangaon sa ilang gidala alang sa adlaw. Daghan ang miingon nga ang kahigayonan sa pagpahayahay panahon sa pahulay sa udto ug paggugol ug dugang panahon uban sa ilang mga igsoon nakapalipay. Usa ka katarongan sa pagsubli niini nga instruksiyon mao nga among namatikdan nga ang pipila ka igsoon mibiya sa awditoryum aron mopalit ug pagkaon gikan sa mga namaligya sa dalan ug sa fast-food nga mga luna sa duol. Kon ang tanang igsoon magdala sa ilang kaugalingong paniudto inay kay mopalit gikan sa gawas nga mga namaligya, kini magpaminghoy niini nga mga namaligya sa pagpundok palibot sa mga ganghaan paingon sa pasilidad sa kombensiyon, nga magpahuot ug dili maayong tan-awon.

⁵ Dili Panahon Alang sa mga Kalihokan sa Negosyo: Sanglit ang mga dapit sa kombensiyon mahimong usa ka dakong Kingdom Hall sulod sa tulo ka adlaw, kinahanglang walay kalihokan sa negosyo ang himoon ni bisan kinsang motambong. Dili husto alang ni bisan kinsang igsoon sa pagpahimulos sa kombensiyon aron ipasiugda ang iyang mga kalihokan sa negosyo, o magbaligyag mga butang, sama sa mga hapin sa libro o mga T-shirt, mga paypay, o mga kalendaryo nga gipatik ang ngalan sa kombensiyon diha niana.

⁶ Pagmentinar sa Kahinlo sa mga Dapit sa Kombensiyon: Kon ang matag igsoon molabay sa iyang kaugalingong basura diha sa hustong mga sudlanan o modala niana sa balay, mopasayon kini sa pagmentinar sa kahinlo sa pasilidad sa kombensiyon. Kon imong mamatikdan ang bisan unsang papel nga gilabay sa hawanan, magmaabtik sa pagpunit niana. Kinahanglang tudloan sa mga ginikanan ang ilang mga anak nga dili maglabay ug basura diha sa salog kondili ilabay kana sa hustong dapit. Kon ikaw makaboluntaryo makadiyot sa pagtabang sa paghinlo sa pasilidad human sa mga sesyon matag adlaw, kini pabilhan gayod ug dako.

⁷ Si Pedro nagpahinumdom kanato bahin sa kon ‘unsa gayong matanga sa mga tawo angay nga kita mao diha sa balaang mga buhat sa panggawi ug mga buhat sa diyosnong pagkamahinalaron.’ (2 Ped. 3:11) Hinaot ang atong mga pulong ug mga buhat didto sa “Mga Magtutuman sa Pulong sa Diyos” Distritong Kombensiyon makatabang sa matinud-anog-kasingkasing nga mga maniniid nga makaila ug makasimba sa atong dakong Diyos, kinsa takos sa tanang pasidungog ug himaya.​—1 Cor. 14:​24, 25.