Buhatang Maayo ug Madayeg!

¹ “Sila adunay kalinaw taliwala nila nga wala gayod nako makita sa ubang mga tawo.” “Makalilipay nga ania kining grupoha.” Kini masanglitanon sa daghang positibong mga komento nga nadawat gikan sa mga tumatan-aw human sa distritong mga kombensiyon sa miaging tuig, nga nagpasiugda sa atong maayong reputasyon ingong usa ka organisasyon. (Prov. 27:2; 1 Cor. 4:9) Sa kataposan, ang maong pagdayeg mahiadto kang Jehova. (Mat. 5:16) Ang laing talagsaong kahigayonan sa pagdayeg sa Diyos ania karon sa atong atubangan didto sa “Mga Magtutudlo sa Pulong sa Diyos” Distritong Kombensiyon niining tuiga.

² Matag tuig atong madawat ang malulotong mga pahinumdom bahin sa angayng panggawi didto sa kombensiyon. Ngano? Tungod kay samtang padayong nagakadunot ang tinamdan, panapot, ug panggawi sa kalibotan, kita nagdumili sa pagsundog sa ilang pamatasan. Dili nato buot nga ang atong maayong reputasyon madaot. (Efe. 2:2; 4:17) Padayon natong hinumdoman ang mosunod nga mga pahimangno.

³ Buhatang Maayo​—Didto sa Kombensiyon: Makadayeg ang mga maniniid sa dihang makita nila nga ang atong mga batan-on nagagawi nga matinahoron ug masinugtanon. (Efe. 6:​1, 2) Mga ginikanan, palihog dumalaha ang inyong mga anak didto sa kombensiyon aron sila dili makabalda sa uban. Panahon sa mga sesyon, tudloi sila kon unsaon sa pagkuhag yanong mga nota ug maminaw. Sa panahon nga wala ing mga sesyon, dili sila tugotang magdagandagan nga walay nagbantay, sanglit ang lugar nga atong gigamit giisip nga usa ka dakong Kingdom Hall panahon sa kombensiyon.

⁴ Sa makausa pa gidasig namo nga magdala ang tanan ug kaugalingon nilang paniudto sa kombensiyon sa kada adlaw. Kini makahatag ug maayong kahigayonan sa pagrelaks sa tingpaniudto ug paggugol ug dugang panahon sa pagpakig-uban sa mga igsoon gikan sa nagkalainlaing mga kongregasyon. Kon ang tanang igsoon magdalag kaugalingon nilang paniudto inay kay mamalit ug pagkaon gikan sa mga namaligya sa gawas o sa mga restawran, kini dili mopadasig sa pipila niining mga namaligya nga magtapok palibot sa mga ganghaan paingon sa pasilidad sa kombensiyon, nga magpahuot ug dili maayong tan-awon. Pagdala lang ug yanong pagkaon, dili daghan, aron mahimo kining kaonon diha sa inyong mga lingkoranan nga dili mag-okupar ug dakong luna. Niining paagiha ang uban dili kaayo mabalda.

⁵ Agig pagtahod sa espirituwal nga lamesa ni Jehova, walay kalihokan sa negosyo ang kinahanglang himoon ni bisan kinsang nanambong. Dili husto alang ni bisan kinsang igsoon ang pagpahimulos sa kombensiyon aron ipasiugda ang iyang mga kalihokan sa negosyo, o magbaligyag mga butang, sama sa mga hapin sa libro o mga T-shirt, mga paypay, o mga kalendaryo nga gipatik ang ngalan sa kombensiyon diha niana.

⁶ Kon ang matag igsoon maghipos sa iyang kaugalingong basura diha sa hustong mga sudlanan o sa pagdala niini sa balay, kini magpasayon sa pagmentinar sa kahinlo sa pasilidad sa kombensiyon. Sa dili pa mobiya inigkahapon, magmaabtik sa pagpunit sa bisan unsang papel o ubang mga butang nga mahimong nalabay sa hawanan. Kinahanglang tudloan sa mga ginikanan ang ilang mga anak nga dili maglabay ug basura diha sa salog kondili hiposon kana sa hustong paagi. Kon ikaw makaboluntaryo kadiyot sa pagtabang sa paghinlo sa pasilidad human sa mga sesyon matag adlaw, kini pabilhan gayod ug dako sa mga igsoon nga naasayn sa departamento sa paghinlo.

⁷ Buhatang Maayo​—Pinaagi sa Atong Panapot ug Pamostura: Human sa usa sa distritong mga kombensiyon sa miaging tuig, ang editor sa mantalaan sa usa ka dakong siyudad misulat: “Labaw sa uban pang mga butang, ang pamatasan sa mga Saksi mismo mao ang labing talagsaon. Pagkamakapadasig nga makita ang daghang tawo nga naggawi sa ilang kaugalingon nga may dignidad ug pagtahod. Nga nagsul-ob sa ilang kinamaayohang sapot sa Dominggo, gatosan ka pamilya nga naghawas sa daghang rasanhon ug etnikong mga kagikan ang hilom nga nagganayan ngadto sa tigomanan. Ang ilang panggawi maoy lahi kaayo sa kadaghanan sa panon sa katawhan nga magtapok sa tigomanan. Sa pagkatinuod, ang mga Saksi dakog kalainan sa kadaghanang panon sa katawhan sa kinatibuk-an. Komon na lang kaayo nga makita ang law-ay nga panggawi sa mga tawo. . . . Sa pagkatinuod, ang pundok sa mga Saksi makapalagsik.” Hinaot dili nato tugotan nga ang atong panapot ug pamostura o ang atong panggawi modaot sa bisan unsang paagi sa espirituwal nga atmospera sa kombensiyon.​—Filip. 1:10; 1 Tim. 2:​9, 10.

⁸ Buhatang Maayo​—Didto sa Bawtismo: Ang mga kandidato sa bawtismo buot nga magtagad niining okasyona uban ang dakong dignidad. Ang pagsul-ob ug kasarangang humdonon magpakitag pagpabili sa kasagrado sa maong okasyon. Makaayo gayod alang sa mga nagdumala sa pagtuon sa Bibliya ang pagsubli uban sa ilang mga estudyante sa dili pa motambong sa kombensiyon ang “Mga Pangutana Gikan sa mga Magbabasa” sa Abril 1, 1995, gula sa Ang Bantayanang Torre.

⁹ Ang atong kaligdong ug diyosnong panggawi magpamatuod sa atong Kristohanong mga pagtulon-an ug magpasayon alang sa matinud-anog-kasingkasing nga mga tawo sa pag-ila sa kamatuoran. Busa, kita “magpadayon sa pagbuhat ug maayo” ug madayeg samtang magtambong sa “Mga Magtutudlo sa ­Pulong sa Diyos” Distritong Kombensiyon.​—Roma 13:3.