Bag-ong Programa sa Adlawng Espesyal nga Asembliya

“Pagpakahingkod Diha sa mga Kagahom sa Pagsabot” mao ang tema sa programa sa adlawng espesyal nga asembliya sugod sa Pebrero 2001. (1 Cor. 14:20) Nganong hinungdanon alang kanato nga motambong? Nagkinabuhi kita sa kalibotan nga puno sa pagkadaotan. Aron masuklan kini, kinahanglang ugmaron nato ang atong mga kagahom sa espirituwal nga pagsabot aron mabuntog nato ang daotan pinaagig maayo. Mao kana ang ikatabang kanato nga buhaton sa programa sa adlawng espesyal nga asembliya.

Sa pangbukas nga sesyon, hisgotan sa magtatan-aw sa sirkito ang “Mga Tabang Aron Mahimong Hingkod sa Pagsabot sa Bibliya.” Iyang ipakita kanato kon sa unsang paagi mahimong lig-on diha sa Kristohanong pagtuo. Ipasiugda sa nagaduaw nga mamumulong kon sa unsang paagi ang aktuwal nga paggamit, o pagpadapat, sa mga prinsipyo sa Bibliya hinungdanon sa pag-ugmad sa hait nga pagsabot, samtang iyang hisgotan ang temang “Panalipdi ang Espirituwalidad Pinaagi sa Pagbansay sa Imong mga Kagahom sa Pagsabot.”

Kinahanglang ugmaron usab sa mga batan-on ang mga kagahom sa pagsabot. Kini pagahisgotan sa mga bahin nga “Kon Nganong Magpakabata sa Daotan” ug “Mga Batan-on nga Nagbaton ug Pagsabot Karon.” Patalinghogi ang mga batan-on nga mosugid kon unsay ilang gibuhat sa pagpalig-on sa ilang kaugalingon sa espirituwal nga paagi aron ilang makontrolar ang bisan unsang kamausisaon bahin sa daotang mga kalihokan sa kalibotan ug malikayan ang suliran.

Sa unsang paagi atong makaplagan ang kinadak-ang kalipay sa kinabuhi? Ang nagaduaw nga mamumulong mosaysay niini diha sa paniklop nga pakigpulong nga “Kaayohan Gumikan sa Pagpadapat sa mga Prinsipyo sa Bibliya Uban ang Pagsabot.” Mohatag siya ug mga panig-ingnan aron ipakita nga ang pagpadapat sa Pulong sa Diyos motabang kanato sa pagbuntog sa mga suliran, paghimog mga desisyon, ug pagpahimulos gayod gikan sa ginatudlo ni Jehova kanato.

Kadtong nagtinguha sa pagpasimbolo sa ilang dedikasyon sa Diyos pinaagi sa bawtismo sa tubig didto sa asembliya angayng mopahibalo sa nagadumalang magtatan-aw sa sayo nga maarangan. Markahi dayon ang imong kalendaryo sa dihang ipahibalo ang petsa sa adlawng espesyal nga asembliya, ug paghimog tinong mga plano aron makabenepisyo gikan niining dagayang programa. Ayawg sipyata ang bisan unsang bahin sa adlawng espesyal nga asembliya! Mopalig-on kini kanimo sa paglahutay niining daotang sistema ug magpabiling matinumanon kang Jehova.