Likayi ang Pangagpas sa “mga Butang nga Walay-Bili”
1 Usa sa popular nga paagi sa komunikasyon karon mao ang E-mail. Bisan tuod ug nahiangay ang pagpaambit sa personal nga mga eksperyensiya ug mga hunahuna taliwala sa pamilya ug mga higala pinaagi niini, unsang “mga butang nga walay-bili” ang mahimong nalangkit sa way-limite nga paggamit sa E-mail?—Prov. 12:11.
2 Mga Pasidaan Maylabot sa E-Mail: Giangkon sa pipila nga gibati nilang adunay mas maayong komunikasyon uban sa organisasyon ni Jehova sa dihang makadawat silag gituohan nilang lab-as nga impormasyon pinaagi sa E-mail. Mahimong naglakip kini sa mga eksperyensiya, mga pahibalo bahin sa mga hitabo sa Bethel, mga taho sa mga katalagman o paglutos, ug bisan gani ang kompidensiyal nga impormasyon nga gipahibalo diha sa mga Kingdom Ministry School. Ang uban morag maikagon kaayo sa pagpadala sa maong mga mensahe, nga naglaom nga mao ang unang makabutyag sa maong impormasyon ngadto sa ilang mga higala.
3 Usahay, ang impormasyon ug mga eksperyensiya mahimo nang gituis o gipasobrahan. O tingali tungod kay maninguha nga makapakignat sa pagbati, ang pipila mipatunghag sayop nga impresyon. Kadtong madalidalion sa pagbutyag sa maong mga butang kasagarang wala mahibalo sa tinuod gayod nga nahitabo. (Prov. 29:20) Sa pipila ka kaso, bisag dili katuohan ang estorya, gipasa kini ingong makaiikag nga balita. Ang maong di-tukma o nagapahisalaag nga mga taho susama ra sa “bakak nga mga sugilanon,” nga wala magpalambo sa tinuod nga diyosnong pagkamahinalaron.—1 Tim. 4:6, 7.
4 Kon imong ipasa ang impormasyon nga mapamatud-ang di-tukma, aduna kay tulubagon sa kasubo o kalibog nga mahimong ipahinabo niini. Sa dihang nakadawat si David ug gipasobrahang taho nga gipamatay ang tanan niyang mga anak nga lalaki, iyang “gigisi ang iyang mga besti” tungod sa kaguol. Apan, ang tinuod mao nga usa lang sa iyang mga anak nga lalaki ang namatay. Makapaguol na kaayo kana, apan ang maong paghinobra nakadugang sa kaguol ni David. (2 Sam. 13:30-33) Dayag nga dili nato buot mohimog bisan unsa nga makapahisalaag o makapaluya sa atong mga igsoon.
5 Tinudlong Kanal-Galamiton sa Diyos: Hinumdomi nga ang atong langitnong Amahan nagtudlog kanal-galamiton sa komunikasyon, ang “matinumanon ug maalamong ulipon.” Ang maong “ulipon” adunay responsabilidad sa pagtino kon unsang impormasyon ang mabatonan sa panimalay sa pagtuo, maingon man ang “hustong panahon” sa paghatag niini. Kining espirituwal nga pagkaon mabatonan lamang pinaagi sa teokratikanhong organisasyon. Kita angayng motutok kanunay sa tinudlong kanal-galamiton sa Diyos alang sa kasaligang impormasyon, dili nganha sa hugpong sa mga tiggamit sa Internet.—Mat. 24:45.
6 Mga Web Site sa Internet: Kita adunay opisyal nga Web site sa Internet: www.watchtower.org. Igo na kining maong site sa paghatag ug impormasyon sa publiko. Dili na kinahanglang andamon ni bisan kinsang tawo, komite, o kongregasyon ang usa ka Web page bahin sa mga Saksi ni Jehova. Ang pipila nagbutang sa mga kaundan sa atong mga publikasyon uban sa tanang kasulatan ug bug-os nga mga reperensiya ug nagtanyag pa ganig mga kopya sa mga materyal sa kombensiyon nga nangayo lamang ug mga donasyon. Nalangkit man ang negosyo o wala, ang maong buhat sa paggama ug pag-apod-apod sa mga publikasyon sa mga Saksi ni Jehova diha sa elektronikong mga dokumento maoy paglapas sa mga balaod sa katungod sa sinulat. Bisan tuod giisip kini sa pipila nga pag-alagad sa mga igsoon, wala kini uyoni ug angayng hunongon.
7 Ang paghupot ug maayong panghukom ug panghunahuna sa dihang mogamit ug elektronikong mga himan sa komunikasyon magpaneguro nga ang atong mga hunahuna mapuno sa “bililhon ug maanindot nga mga manggad.”—Prov. 24:4.