Gamitag Maayo ang Bibliya
1. Unsay imong mahimo sa pagpangandam alang sa ministeryo sa kanataran?
1 Bisag unsa pa ang literatura nga giplanohan natong itanyag diha sa ministeryo, mapuslanon gayod ang pagpilig makapukaw-sa-hunahunang teksto nga ipaambit niadtong buot maminaw. (Heb. 4:12) Ang pagpilig teksto nga gigamit diha sa publikasyon nga imong itanyag mahimong motultol ngadto sa epektibong pagtanyag sa publikasyon. Sa pipila ka dapit, nakaplagan sa mga magmamantala nga makaayo ang pagbitbit sa Bibliya sa dihang moduol sa usa ka tawo o sa dihang mamalaybalay.
2. (a) Sa unsang paagi atong masugdan ang atong presentasyon pinaagig usa ka teksto? (b) Unsang Kasulatanhong mga ulohan nga mainteres ang mga tawo diha sa teritoryo?
2 Sugdi Pinaagig Usa ka Teksto: Ang ubang mga magmamantala magsugod sa ilang presentasyon pinaagig pagpangutana sa tagbalay ug usa ka yanong punto-debistang pangutana bahin sa teksto sa Bibliya nga ila dayon nga basahon. Kini daling motultol sa pagtagad ngadto sa Pulong sa Diyos. Epektibo kaha kining mosunod nga mga pasiuna diha sa inyong teritoryo?
◼ “Kon aduna kay gahom sa pagbuhat niini, himoon mo ba kining maong mga kausaban?” Basaha ang Pinadayag 21:4.
◼ “Nganong nagkinabuhi man kita niining makuyaw nga mga panahon?” Basaha ang 2 Timoteo 3:1-5.
◼ “Nagtuo ka ba nga ang atong komunidad mahimong mas maayong dapit nga kapuy-an kon sundon sa tanang tawo kining tambaga?” Basaha ang Mateo 7:12.
◼ “Nagtuo ka ba nga ang imong mga anak makatagamtam sa mga kahimtang nga gihubit dinhi?” Basaha ang Salmo 37:10, 11.
◼ “Nagtuo ka ba nga may adlaw nga moabot gayod nga matuman kining mga pulonga?” Basaha ang Isaias 33:24.
◼ “Sinati ka ba sa kausaban sa kagamhanan nga gihisgotan dinhi?” Basaha ang Daniel 2:44.
◼ “Gusto ba nimong suknaon ang Diyos niining pangutanaha?” Basaha ang Job 21:7.
◼ “Posible ba natong makita pag-usab ang atong namatay nga mga minahal?” Basaha ang Juan 5:28, 29.
◼ “Nahibalo ba ang mga patay kon unsay ginahimo sa mga buhi?” Basaha ang Ecclesiastes 9:5.
3. Sa unsang paagi atong matabangan ang mga tawo nga makasabot sa mga teksto sa Bibliya nga atong basahon?
3 Ipatin-aw, Iilustrar, Ipadapat: Sa dihang ang usa ka tawo gustong makig-estorya, ayawg dalidalia ang panaghisgot. Gahinig panahon nga ikapatin-aw, ikailustrar, ug ikapadapat ang teksto nga imong basahon aron iyang masabtan kana. (Neh. 8:8) Sa dihang ang mga tawo makasabot ug makadawat kon unsay gitudlo sa Pulong sa Diyos, kini makahatag ug talagsaong mga kausaban sa ilang mga kinabuhi.—1 Tes. 2:13.
4. Sa unsang paagi atong magamit ug maayo ang Bibliya sa mga balikduaw?
4 Padayong gamitag maayo ang Bibliya samtang imong ugmaron ang interes. Magamit nimo ang mao gihapong paagi sa dihang mohimog mga balikduaw: (1) Pagpili ug haom nga teksto. (2) Pagsukna ug yanong punto-debistang pangutana mahitungod sa maong teksto. Dayon basaha kana. (3) Ipatin-aw, iilustrar, ug ipadapat kana. Paningkamoting madugangan ang kahibalo sa maong tawo bahin sa Pulong sa Diyos sa matag higayon nga ikaw moduaw. Sa di madugay ikaw magdumalag pagtuon sa Bibliya!