Ipakita ang Personal nga Interes—Pinaagi sa Pagtan-aw Gayod sa Mata
1 Sa dihang magsangyaw sa publiko ug sa balay-balay, kasagarang motan-aw kita sa mata sa mga tawo sa dili pa kita mosugod pagsulti. Nianang daklit nga gutlo, makamatikod kita kon unsay ilang pagbati bahin sa atong pagkaanaa dinha ug kon maayo ba o dili ang ilang buot binase sa ilang panagway. Sa susamang paagi, sila daghan ug masabtan bahin kanato. Usa ka babaye miingon niini bahin sa pagduaw sa usa ka Saksi: “Ang akong mahinumdoman bahin sa iyang mapahiyomong nawong mao ang kamalinawon. Naikag ako.” Kadto nagbukas sa dalan aron ang babaye mamati sa maayong balita.
2 Ang pagtan-aw gayod sa mata sa uban maoy usa ka epektibong paagi nga mosangpot sa pagpamatuod sa dihang magsangyaw sa dalan o magsangyaw diha sa ubang publikong mga dapit. Usa ka brader magbantay sa mga mata niadtong moduol kaniya. Sa dihang magkatinan-away na sila, siya mopahiyom ug unya motanyag sa mga magasin. Tungod sa paggamit sa maong paagi, siya nakapahimulos ug daghang maayong mga kabildohay ug nakapahimutang ug daghang literatura.
3 Sabta ang mga Pagbati sa Uban: Ang pagpadayon sa pagtan-aw sa mata motabang kanato sa pagkasabot sa mga pagbati sa uban. Pananglitan, kon ang usa dili makasabot kanato o dili mouyon sa atong nasulti, kana kasagarang madayag diha sa iyang nawong. Kon siya puliki o naghigwaos na, kana atong masabtan pinaagi sa pagtan-aw sa iyang panagway. Unya kita makapasibo o makapamubo sa atong presentasyon. Ang pagkasensitibo sa mga pagbati sa uban maoy maayong paagi sa pagpasundayag sa atong personal nga interes kanila.
4 Sinseridad ug Kombiksiyon: Diha sa daghang kultura, ang pagtan-aw sa usa ka tawo diha sa mata giisip nga ebidensiya nga ang usa maoy sinsero. Matikdi ang gitubag ni Jesus sa dihang misukna ang iyang mga tinun-an: “Kinsa ba gayod diay ang maluwas? Ang Bibliya nagtaho: “Mitan-aw kanila sa nawong, si Jesus miingon kanila: ‘Sa mga tawo kini imposible, apan sa Diyos ang tanang butang posible.’” (Mat. 19:25, 26) Sa walay duhaduha ang kombiksiyon diha sa mga mata ni Jesus nakadugang ug gibug-aton sa iyang mga pulong. Sa samang paagi, ang pagtan-aw gayod sa mata sa usa ka tawo motabang kanato nga ipahayag ang mensahe sa Gingharian uban ang sinseridad ug kombiksiyon.—2 Cor. 2:17; 1 Tes.1:5.