Tabangi ang Uban nga Mahimong mga Higala sa Diyos

¹ Karon, ang mga tawo gikan sa tanang kanasoran ginatudloan sa mga dalan ni Jehova. (Isa. 2:2, 3) Apan, aron sila “magapamunga uban ang paglahutay,” kinahanglang higugmaon nila si Jehova. (Luc. 8:15; Mar. 12:30) Kon wala kanang gugmaha, sila walay kalig-on sa pagbarog sa daotang mga impluwensiya o walay kaisog sa pagbuhat kon unsay husto. Ang usa ka paagi sa pagtabang sa uban sa pag-ugmad ug maayong relasyon uban kang Jehova mao ang pagdasig kanila sa pagpauswag sa ilang pagpabili sa iyang mga hiyas. Dasiga sila sa pagpamalandong sa mga impormasyon nga anaa sa librong Pakigsuod Kang Jehova.

² Imong Panig-ingnan: Ang imong mga lihok makaimpluwensiyag dako sa kasingkasing sa mga ginatun-an sa Bibliya. Kon ilang makita nga imong gipabilhan ang imong pagpakighigala kang Jehova ug kon ilang makita kon sa unsang paagi kini nakaimpluwensiya sa imong kinabuhi, sila madasig sa pag-ugmad usab sa maong personal nga relasyon. (Luc. 6:40) Sa pagkatinuod, ang atong panig-ingnan kasagarang adunay mas dakong impluwensiya sa uban kay sa atong gisulti.

³ Ang usa ka hinungdanong paagi nga matudloan sa mga ginikanan ang ilang mga anak sa paghigugma kang Jehova maoy pinaagi sa ilang panig-ingnan. (Deut. 6:4-9) Usa ka magtiayon nga gustong magmatuto sa ilang mga anak diha sa kamatuoran nagpakitambag sa mga ginikanan nga nagmalamposon sa pagmatuto sa ilang mga anak. Ang bana miingon: “Kadaghanan kanila nag-ingon nga ang mga ginikanan kinahanglang magpakitag maayong panig-ingnan sa ilang mga anak.” Busa, pinaagi sa ilang katibuk-ang paagi sa pagkinabuhi, ang mga ginikanan mahimong panig-ingnan sa ilang mga anak kon unsay kahulogan sa pagkahimong “higala ni Jehova.”—Sant. 2:23.

⁴ Kinasingkasing nga Pag-ampo: Makatabang ka usab sa uban nga mahimong higala ni Jehova pinaagi sa pagtudlo kanila sa pag-ampo nga kinasingkasing. Mahimong ipasiugda mo kanila ang sulondang pag-ampo ni Jesus, maingon man ang daghang tim-os nga mga pag-ampo nga narekord diha sa Kasulatan. (Mat. 6:9, 10) Matudloan mo usab ang imong mga anak ug ang imong mga gitun-an sa Bibliya kon unsaon pag-ampo pinaagi sa imong mga pag-ampo. Sa dihang ilang madunggan ang imong kinasingkasing nga pag-ampo, ilang masabtan ang imong pagbati kang Jehova. Dasiga sila sa ‘paglahutay sa pag-ampo’ kon makaagom silag mga pagsulay. (Roma 12:12) Sa dihang masinati nila ang tabang ni Jehova sa panahon sa panginahanglan, sila mosalig kaniya ug ilang higugmaon siya ingong tinuod nga higala.—Sal. 34:8; Filip. 4:6, 7.