“Dili Ko Interesado”
1 Kana ang kasagarang reaksiyon sa mga tawo maylabot sa atong mensahe diha sa pipila ka dapit. Unsay makatabang kanato nga dili mawad-an ug kadasig kon makaatubang kitag kawalay-interes diha sa atong teritoryo? Unsay atong himoon aron mainteres ang mga tawo sa maayong balita?
2 Hupti ang Kalipay: Mahuptan nato ang kalipay kon atong hinumdoman ang hinungdan kon nganong daghan ang walay interes. Ang mga tawo nga gitudloan bahin sa teoriya sa ebolusyon o gimatuto diha sa usa ka katilingban nga dili motuo ug Diyos lagmit walay pagpabili sa Bibliya. Ang uban mahimong nalibog bahin sa pagkasalingkapaw nga ilang nakita diha sa relihiyon. Alang sa uban, ang ilang kawalay-interes lagmit nagbanaag sa ilang kahigawad ug kawalay-paglaom. (Efe. 2:12) Ang uban ‘walay pagtagad’ tungod kay sila nabug-atan sa mga kabalaka sa kinabuhi.—Mat. 24:37-39.
3 Bisan pa sa negatibong reaksiyon sa uban, kita magmalipayon sa atong ministeryo, kay kita nahibalo nga ang atong mga paningkamot maghimaya kang Jehova. (1 Ped. 4:11) Dugang pa, ang pagpakigsulti bahin sa kamatuoran, bisan ngadto sa mga tawo nga wala magpabili niana, magpalig-on sa atong pagtuo. Atong paningkamotan nga lantawon ang mga tawo diha sa teritoryo sumala sa paglantaw ni Jehova kanila. Siya naluoy sa mga taga-Nineve nga wala “mahibalo sa kalainan tali sa ilang tuong kamot ug sa ilang wala.” (Jon. 4:11) Ang mga tawo diha sa atong teritoryo nagkinahanglan sa maayong balita! Busa, kinahanglang dili kita mohunong kondili mangita kitag mga paagi aron mapukaw ang ilang interes sa mensahe sa Bibliya.
4 Hisgoti ang Lokal nga mga Gikabalak-an: Tingali imong mahisgotan sa imong introduksiyon ang mga gikabalak-an diha sa inyong dapit ug hangyoon ang tagbalay sa pagpahayag sa iyang hunahuna. Paminawa ang iyang isulti, dayon ipakita kaniya ang makapahupay nga mensahe sa Bibliya agig tubag sa iyang mga gikabalak-an. Human sa usa ka lokal nga trahedya, usa ka Saksi nagpahayag sa iyang sinserong pahasubo diha sa matag balay. “Dihadiha, nakig-estorya na ang mga tawo,” matod niya. “Daghan akog naestorya niadtong adlawa tungod kay nagpakita akog interes sa ilang mga kinabuhi.”
5 Ang matag problema nga giatubang sa katawhan pagasulbaron sa Gingharian sa Diyos. Paningkamoting mahibaloan ang labawng gikabalak-an sa tagbalay. Lagmit tugotan ka niya sa pagpatin-aw sa mensahe sa paglaom nga anaa sa Bibliya. Kon dili, basin andam ra siyang maminaw “sa lain na usab nga panahon.”—Buh. 17:32.