Bag-ong Programa sa Sirkitong Asembliya

Si Jehova takos pagahimayaon. Sa unsang paagi nato siya mahimaya? Unsang mga pagsulay ang giatubang sa pipila bahin niini? Unsang mga panalangin ang mabatonan niadtong nagahimaya sa Diyos karon? Ang programa sa sirkitong asembliya alang sa 2008 maghatag ug makapatagbawng tubag niining mga pangutanaha. Kini may tema nga “Himoa ang Tanang Butang Alang sa Kahimayaan sa Diyos.” (1 Cor. 10:31) Tagda kon unsay atong makat-onan sa umaabot nga duha ka adlaw sa dagayang espirituwal nga pagtudlo.

Ang magtatan-aw sa distrito ang mopahayag sa mga temang “Nganong Himayaon ang Diyos?” ug “Mahimong Sulondan sa Pagtuman sa mga Kinahanglanon sa Diyos.” Iyang ihatag ang pakigpulong publiko nga, “Kinsa ang Nagahimaya sa Diyos?,” ug ang paniklop nga pakigpulong nga, “Nagkahiusa sa Paghimaya sa Diyos sa Tibuok Kalibotan.” Dumalahon usab niya ang Teokratikanhong Tunghaan sa Ministeryo. Ang magtatan-aw sa sirkito ang mopakigpulong sa mga temang “Magkalipay sa Pagsumbalik-Silaw sa Himaya sa Diyos,” “Paghatag ug Pagtagad sa mga Panginahanglan sa Sirkito,” ug “Pagpabiling ‘Lig-on Diha sa Kamatuoran,’” nga gipasukad sa 2 Pedro 1:12. Dugang pa, atong makat-onan kon sa unsang paagi “Ang Payunir nga Buluhaton Nagahimaya sa Diyos.” Ang “Paghimaya sa Diyos sa Tanang Bahin sa Atong Kinabuhi,” mao ang una sa duha ka makapahinuklog nga mga simposyum. Isaysay niini ang mga kapadapatan sa inspiradong mga pulong nga makaplagan sa 1 Corinto 10:31. Ang simposyum nga “Pagtanyag ug Sagradong Pag-alagad Aron Dayegon si Jehova” maghisgot sa nagkalainlaing bahin sa atong pagsimba. Dunay pagahimoong sumaryo sa Bantayanang Torre ug panaghisgot sa inadlawng teksto sa Dominggo. Anaa usay kahigayonan alang sa bawtismo.

Ang kadaghanan sa katawhan dili moila sa Diyos. Daghan usab ang nalinga pag-ayo sa mga buhat sa tawo inay sa paghunahuna sa kahimayaan ni Jehova. (Juan 5:44) Apan kita kombinsido nga hinungdanon gayod ang pagsunod sa awhag nga “Himoa ang Tanang Butang Alang sa Kahimayaan sa Diyos.” Busa, hikaya nga ikaw makatambong ug makapahimulos sa upat ka sesyon.