Ang Kinadak-ang Kampanya sa Pagsangyaw nga Gihimo sa Kalibotan Sukad!
Kapin na sa 100 ka tuig nga ang mga Saksi ni Jehova naorganisar aron sa pagmantala sa maayong balita. (1 Cor. 9:23) Niining kinadak-ang kampanya sa pagsangyaw, atong ginapaambit ang mensahe sa Gingharian sa gatosan ka pinulongan. Kini nakaabot sa kapin sa 230 ka kayutaan. (Mat. 24:14) Apan nganong hinungdanon man kining buluhatona? Ug sa unsang paagi kini napalampos sa tibuok kalibotan?
Ang video nga Jehovah’s Witnesses—Organized to Share the Good News detalyadong motubag sa maong mga pangutana pinaagi sa pagpakita sa nagkalainlaing bahin sa atong internasyonal nga buluhaton. Samtang tan-awon nimo ang maong video, tagda kining mga pangutanaha: (1) Sa unsang paagi ang atong buluhaton giorganisar ug gigiyahan? (2) Sa unsang paagi ang mga Departamento sa Writing, Translation Services, Art, ug Audio/Video Services nakatabang sa pagpakaylap sa maayong balita? (3) Nganong daghan man ang atong giimprenta ug gipadala nga mga literatura? (Juan 17:3) (4) Pila ka literatura ang ginaimprenta kada tuig? (5) Unsay napalampos sa atong binase sa Bibliya nga mga publikasyon? (Heb. 4:12) (6) Unsay ginahimo aron matagan-an ug espirituwal nga mga panginahanglan ang mga buta ug mga amang? (7) Sa unsang paagi gisuportahan sa pinansiyal ang atong buluhaton? (8) Sa unsang paagi kita makapahimulos sa mga buluhaton sa Hospital Information Services, Service Department, ug sa Convention Department? (9) Ingong usa sa mga Saksi ni Jehova, sa unsang paagi ang maong video nakapalalom sa imong pagpabili sa (a) paningkamot nga ginahimo sa organisasyon ni Jehova sa pagwali? (b) kapin sa 100 ka pamilyang Bethel sa tibuok kalibotan? (c) pagbansay nga gitagana alang sa mga magtatan-aw ug mga misyonaryo? (d) kahinungdanon sa pagkonsiderar sa teksto matag adlaw ug sa pagpangandam sa senemanang panagkatigom? (e) mga kaayohan sa pagtambong sa Kristohanong panagkatigom? (f) kahimtang sa Paraisong yuta? (Isa. 11:9) (g) personal nga pagpakig-ambit sa buluhatong pagpangani?—Juan 4:35.
Unsang positibong sanong ang imong nakita human nimo ipatan-aw ang maong video sa imong mga paryente, kaubanan, balikduaw, ug mga gidumalahag pagtuon sa Bibliya? Nan, ayaw paglangan sa pagpaambit niini maingon man usab sa maayong balita ngadto sa uban.—Mat. 28:19, 20.