Imo Bang Gigamit ang Tanang Bahin Niini?

¹ “Naghinamhinam na gyod ko sa pagtanyag niini sa kanataran!” Mao kanay gisulat sa usa ka sister human siya makabasa sa Enero 1, 2008 nga Bantayanang Torre. Imo bang gihatagag pagtagad ang mga artikulo nga regular nga mogula diha sa edisyon para sa publiko, ug nakakita ka bag maayong mga paagi sa pagtanyag niini sa pagsangyaw?

² “Kon Unsay Atong Makat-onan Kang Jesus”: Tingali imong nakita nga makatabang kining artikuloha sa pagsugod ug mga pagtuon sa Bibliya. Kon wala ka pa makahimo niana, sulayi pagbasa ang ulohan sa artikulo ngadto sa tagbalay ug dayon ipakita kaniya kon unsay giingon ni Jesus mahitungod niana diha sa unang parapo. Kon siya interesado, paningkamot nga mapadayon ang inyong panaghisgot pinaagi sa paggamit sa mga sub-ulohan nga gisulat ingong makapainteres nga mga pangutana. Pakomentoha siya. Isaysay sa mubo ang mga hulagway nga nalangkit sa punto nga inyong gihisgotan, ug ipadayon sa sunod parapo. Mahimo ninyong kobrehan ang katunga sa maong artikulo ug ipadayon ang nahibiling bahin inig-balik nimo. Paningkamot nga mapadayon ang pagtuon diha sa librong Gitudlo sa Bibliya.

³ “Sekreto sa Kalipay sa Pamilya”: Kining artikuloha, nga mogula kada tulo ka bulan, gidisenyo aron tabangan ang mga bana, asawa, ug mga ginikanan sa pagpadapat sa mga prinsipyo sa Bibliya sa dihang motungha ang mga problema nga makadaot sa pamilya. Magamit usab nimo kining mga artikuloha sa pagtabang sa mga taga-gawas aron ilang makita nga maalamon ang mga tambag sa Bibliya.​—2 Tim. 3:16, 17.

⁴ Mga Artikulo Alang sa mga Batan-on: Ang mga artikulo nga “Alang sa Atong mga Batan-on” gidisenyo aron mapamalandong sa magbabasa ang mga asoy sa Bibliya. Mahimo nimong gamiton kining mga artikuloha sa pagtabang sa mga batan-on nga imong masangyawan aron ilang makita nga mapuslanon gayod ang pagtuon sa Pulong sa Diyos. (Sal. 119:9, 105) Kon ang imong maestorya usa ka ginikanan, ipakita ang artikulo nga “Tudloi ang Inyong mga Anak,” nga mogula kada duha ka bulan. Kining mga artikuloha makatabang sa mga bata nga makakat-on gikan sa mga karakter sa Bibliya. Nakasulay ka na ba sa pagbasa niini ngadto sa imong mga anak?

⁵ Uban Pang mga Artikulo: Kada bulan, ang artikulong “Among mga Magbabasa Nangutana” maghisgot ug usa ka pangutana nga lagmit isukna sa mga tawo nga dili Saksi. Mahimo usab nimo kining gamiton sa dihang magtanyag kag mga magasin sa pagpamalaybalay. Ang artikulo nga “Sulat Gikan sa . . .” maoy detalyadong mga taho nga naghisgot sa mga hagit nga giatubang sa mga misyonaryo ug sa uban pa diha sa pagsangyaw. Kining mga artikuloha makatabang aron makita sa mga interesado nga ang maayong balita gisangyaw karon sa tibuok yuta ingong katumanan sa ilhanan sa presensiya ni Kristo.​—Mat. 24:3, 14.

⁶ Ang binulan nga artikulong “Pakigsuod sa Diyos,” nga gipasukad sa pagbasa sa Bibliya sa Tunghaan sa Teokratikanhong Ministeryo, lagmit magtukmod sa usa ka tawo sa pagkat-on bahin kang Jehova. Ang mga artikulo nga “Sundoga ang Ilang Pagtuo,” nga mogula kaupat sa usa ka tuig, gidisenyo aron tabangan ang mga magbabasa nga makita kon sa unsang paagi mihimog mga desisyon, nagpakitag pagtuo, ug miatubang sa mga kalisdanan ang mga karakter sa Bibliya.

⁷ Malipay gayod kita sa pagkadawat matag bulan sa Bantayanang Torre nga magamit nato sa kanataran! Busa, tun-an gayod nato ang kaundan niini ug gamiton ang tanang bahin niini diha sa ministeryo.