Ang Pagsangyaw Nagkinahanglag Pagkamalahutayon
1. Nganong si apostol Pablo usa ka maayong panig-ingnan sa pagkamalahutayon diha sa ministeryo?
1 Sulod sa kapig 30 ka tuig, si apostol Pablo nagmatagbawon sa iyang buluhaton ingong usa ka ebanghelisador. Siyempre, siya nakaatubang ug daghang kalisdanan sa iyang ministeryo. (2 Cor. 11:23-29) Apan si Pablo wala mohunong sa pagsangyaw. (2 Cor. 4:1) Siya nahibalo nga si Jehova maghatag kaniyag kusog aron makalahutay. (Filip. 4:13) Maylabot sa iyang panig-ingnan, si Pablo makaingon: “Mahimong mga tigsundog kanako, ingon nga ako nagsundog kang Kristo.”—1 Cor. 11:1.
2. Unsang mga pagsulay sa matag adlaw ang giatubang sa daghan karon, ug unsay makatabang kanila sa paglahutay?
2 Paglahutay sa mga Pagsulay Karon: Matag adlaw, daghan sa atong mga igsoon ang nakaagom ug pagbiaybiay, pagsupak, o kawalay-pagtagad sa mga membro sa pamilya, mga kauban sa trabaho, o mga eskolmet. (Mat. 10:35; Juan 15:20) Lagmit nakasinati ka usab niana. Gawas pa, tingali nag-antos ka sa usa ka balatian, o basin adlaw-adlaw kang nakigbisog sa mga kabaldahan ug tentasyon. Kita makabatog kusog pinaagi sa pagpamalandong sa mga panig-ingnan sa mga isigka-Kristohanon karon nga nakaatubang ug nakalahutay sa mga pagsulay.—1 Ped. 5:9.
3. Unsang mga tagana ang gihimo ni Jehova aron kita makapabiling lig-on?
3 Kita makabaton ug gahom sa paglahutay sa atong ministeryo pinaagi sa pagsul-ob sa “kompletong armadura gikan sa Diyos.” (Efe. 6:10-13, 15) Gikinahanglan usab ang pag-ampo aron makalahutay. (2 Cor. 6:4-7) Aron kita magmalamposon sa atong pagpakigbugno batok kang Satanas ug sa iyang kalibotan, kinahanglang sundon nato ang mga pahinumdom sa Diyos. (Sal. 119:24, 85-88) Sama sa usa ka bata nga kanunayng nagabasa sa sulat nga gipadala kaniya sa iyang mahigugmaong amahan, ang atong pagbasa sa Bibliya sa adlaw-adlaw makapasuod kanato kang Jehova. Kita makabatog kaalam sa pagbuntog sa mga pagsulay pinaagi sa regular nga personal nga pagtuon. Sa pagbuhat niana atong gitugotan ang panghunahuna sa Diyos nga mag-impluwensiya sa atong mga desisyon ug kana makapalig-on sa atong integridad.—Prov. 2:10, 11.
4. Unsa nga mga panalangin ang atong maangkon kon kita magmalahutayon diha sa atong ministeryo?
4 Ang Paglahutay Magdalag mga Panalangin: Sama kang Pablo, ang atong pagkamalahutayon sa atong ministeryo makapalipay sa kasingkasing ni Jehova ug magdalag mga panalangin kanato ug sa uban. (Prov. 27:11) Hinaot nga magmadeterminado kita nga molahutay sa ministeryo, aron mapamatud-an nga ang atong pagtuo lig-on ug “labi pang bililhon kay sa bulawan nga madugta ra bisan tuod nga nasulayan na kini pinaagig kalayo.”—1 Ped. 1:6, 7.