Kita mga Saksi sa Tanang Panahon
1. Unsay atong makat-onan sa asoy bahin pagpamatuod ni Jesus sa usa ka babaye diha sa atabay?
1 Si Jesus nagbaktas sulod sa daghang oras. Siya gikapoy ug giuhaw. Samtang namalit ug pagkaon ang iyang mga tinun-an, siya milingkod sa usa ka atabay sa gawas sa siyudad sa Samaria aron mopahulay. Si Jesus wala moadto sa Samaria aron mosangyaw; siya miagi lang dinhi sa iyang panaw paingon sa Galilea aron ipadayon ang iyang ministeryo didto. Bisan pa niana, iyang gipahimuslan ang kahigayonan nga makapamatuod sa usa ka babaye nga nagkalos ug tubig. (Juan 4:5-14) Ngano? Si Jesus wala gayod mohunong sa pagkahimong “matinumanon ug matuod nga saksi” ni Jehova. (Pin. 3:14) Atong masundog si Jesus pinaagi sa pagkahimong Saksi ni Jehova sa tanang panahon.—1 Ped. 2:21.
2. Sa unsang paagi mahimo kitang andam sa pagpamatuod sa di-pormal nga paagi?
2 Magmaandam: Mahimo kitang andam sa pagpamatuod sa di-pormal nga paagi kon magdala kitag mga literatura. Daghang magmamantala ang magdaladala ug mga tract ug magpaambit niana ngadto sa mga tindera, tigbantay sa gasolinahan, ug sa uban pa nga ilang mahimamat sa tibuok adlaw. (Eccl. 11:6) Giseguro sa usa ka tigbiyahean nga sister nga kanunay niyang madala ang iyang gamayng Bibliya ug ang librong Gitudlo sa Bibliya sa iyang gamayng bag, ug siya maningkamot nga makasugod ug panaghisgot sa iyang mga katapad.
3. Sa unsang paagi nato masugdan ang usa ka panaghisgot?
3 Pagsugod ug Usa ka Panaghisgot: Sa dihang magpamatuod sa di-pormal nga paagi, dili kinahanglang maghisgot dayon ug mga ulohan sa Bibliya. Diha sa atabay, wala dayon ipaila ni Jesus sa babaye ang iyang kaugalingon nga siya mao ang Mesiyas. Igo lang siyang nangayog tubig nga mainom, ug kana maoy nakapukaw sa interes sa maong babaye. (Juan 4:7-9) Nakaplagan sa usa ka sister nga ang susamang paagi nakatabang kaniya nga makasugod ug usa ka panaghisgot sa dihang gipangomosta siya bahin sa iyang pagsaulog sa usa ka partikular nga pangilin. Imbes moingon nga wala siya magsaulog niana tungod kay siya usa sa mga Saksi ni Jehova, siya mitubag, “Nakadesisyon ko nga dili mosaulog niana.” Kasagaran ang nangutana gustong mahibalo kon ngano, nga tungod niini ang sister nakasangyaw.
4. Nganong makapadasig kanimo ang giingon sa Mateo 28:18-19?
4 Bisag natapos na ni Jesus ang iyang madasigong ministeryo dinhi sa yuta, siya interesado gayod gihapon sa buluhatong pagsangyaw nga ginahimo karon. (Mat. 28:18-20) Busa, sama sa atong Ehemplo nga si Jesus, kita maoy mga Saksi nga andam mopahayag sa dayag sa atong pagtuo sa tanang panahon.—Heb. 10:23.