Tabangi ang mga “Nakiling sa Pagdawat sa Kamatuoran”

1. Unsay managlahi nga reaksiyon sa mga tawo sa mensahe nga atong ginasangyaw? (Buhat 13:​47, 48; 16:​14, 15)

DAGHANG tawo sa unang siglo ang midawat dayon sa kamatuoran sa unang higayon nga ila ning nadungog. (Basaha ang Buhat 13:​47, 48; 16:​14, 15.) Karon sab, naay mga tawo nga nalipay dihang nadunggan nila ang maayong balita sa unang higayon. Naa poy uban nga sa primero walay interes sa mensahe sa Gingharian pero sa ulahi midawat niini. Unsay angay natong buhaton dihang makakita tag mga tawo nga “nakiling sa pagdawat sa kamatuoran”?

2. Sa unsang paagi ang atong paghimog tinun-an parehas nianang pagpananom?

² Ang atong paghimog tinun-an parehas sa pagpananom. Ibutang ta nga ang usa ka tawo nananom ug mga prutas. Kon ang mga bunga sa usa ka punoan hinog na, iya na ning pupoon. Pero padayon pod niyang atimanon ang ubang mga punoan nga hilaw pa ang mga bunga. Sa samang paagi, dihang makakita tag tawo nga andam modawat sa atong mensahe, gusto dayon nato siyang tabangan nga mahimong tinun-an sa Kristo. Pero padayon pod natong tabangan kadtong mga tawo nga nagkinahanglan pag panahon nga makita ang bili sa atong mensahe. (Juan 4:​35, 36) Importanteng mahibalo ta kon ang usa andam na bang modawat sa atong mensahe o dili pa, aron mahibalo pod ta kon unsaon siya pagtabang. Karon, atong hisgotan kon unsaon nato pagtabang ang mga tawo nga nagpakita dayon ug interes sa unang pagpakig-estorya pa lang. Hisgotan pod nato kon unsaon nato sila pagtabang nga padayong mouswag.

KON UNSAON PAGTABANG ANG MGA TAWO NGA NAGPAKITA DAYON UG INTERES

3. Unsay puwede natong himoon kon ang atong gisangyawan nagpakita dayon ug interes? (1 Corinto 9:26)

³ Kon makasangyaw tag tawo nga interesado, gusto nato siyang tabangan nga makasubay dayon sa dalan paingon sa kinabuhi. Maong sa unang pagpakig-estorya pa lang, ato dayon siyang tanyagan ug pagtuon sa Bibliya ug imbitahon sa atong mga tigom.—Basaha ang 1 Corinto 9:26.

4. Paghatag ug eksperyensiya sa usa nga midawat dayon ug pagtuon sa Bibliya.

⁴ Tanyagi ug pagtuon. Ang uban nga atong maestorya ganahan dayong magpa-Bible study. Pananglitan, usa ka Huwebes, dihay babaye sa Canada nga miduol sa literature cart ug mikuhag brosyur nga Mabuhi Ka Hangtod sa Hangtod! Gisultihan sa sister nga nagbantay sa cart ang babaye nga puwede siyang magtuon sa Bibliya gamit ang maong brosyur. Ang babaye nainteres dayon ug nagbayloay silag contact number. Niana mismong adlawa, gi-text sa babaye ang sister bahin sa study. Dihang ang sister miingon nga mobisita siya niya pagka-weekend, ang babaye mihangyo: “Puwede ba ugma? Libre ra ko.” Nag-Bible study sila pagkaugma dayon, sa adlawng Biyernes. Ang babaye mitambong sa tigom sa unang higayon niana mismo nga weekend, ug paspas kaayo ang iyang pag-uswag.

5. Unsay atong himoon kon nakita nato nga ang atong gisangyawan dili pa andam modawat ug pagtuon sa Bibliya? (Tan-awa sab ang mga hulagway.)

⁵ Siyempre, dili ta makadahom nga ang tanan parehas sa maong babaye nga gusto dayong magpa-Bible study. Ang uban nagkinahanglan pa tingalig dugang panahon aron maugmad ang ilang interes. Basin kinahanglan una tang makig-estorya nila bahin sa topiko nga ilang ganahan. Pero kon padayon nato silang pakitaan ug kaayo, basin sa dili madugay, mosugot ra pod sila nga magpa-Bible study. Unsay atong isulti dihang magtanyag ug pagtuon sa Bibliya? Kini nga pangutana gisukna ngadto sa pipila ka igsoon nga epektibo sa pagsugod ug mga pagtuon sa Bibliya.

6. Unsay puwede natong isulti aron mapadayon ang atong panaghisgot uban sa interesado?

⁶ Ang mga magmamantala ug mga payunir nga gipangutana bahin sa pagsugod ug pagtuon sa Bibliya miingon nga sa ubang mga lugar, maayong dili gamiton ang mga termino nga “pagtuon,” “Bible study,” o “tudloan ka.” Sila miingon nga mas maayong mogamit ug mga pulong nga “pagpakig-estorya,” “panaghisgot,” ug “pagkat-og dugang bahin sa Bibliya.” Aron mapadayon ang inyong panag-estorya, puwede pod kang moingon, “Abi nimo, naa baya sa Bibliya ang tubag sa imong importanteng mga pangutana,” o “Ang Bibliya dili lang kay basta libro sa relihiyon; makatabang pod ni nato sa praktikal nga paagi.” Puwede pod kang moingon: “Dili ra ni magdugay; mga 10 ngadto sa 15 minutos lang, naa na kay makat-onan nga importante.” Ayaw gamita ang mga pulong nga “mag-eskedyul” o “kada semana,” aron dili niya bation nga naa siyay obligasyon.

7. Kanus-a nakita sa uban nga ang atong gitudlo maoy kamatuoran? (1 Corinto 14:​23-25)

⁷ Imbitaha sila sa tigom. Sa panahon ni apostol Pablo, ang uban nakombinsir sa kamatuoran sa una pa lang nilang pagtambong sa tigom. (Basaha ang 1 Corinto 14:​23-25.) Mao pod nay kasagarang mahitabo karon. Mas paspas ang pag-uswag sa mga interesado kon motambong na sila sa mga tigom. Kanus-a nimo sila angayng imbitahon? Ang leksiyon 10 sa librong Mabuhi Ka Hangtod sa Hangtod! naghisgot bahin sa atong mga tigom, pero dili kinahanglang hulaton nimo nga moabot mo niana nga leksiyon ayha nimo siya imbitahon sa pagtambong. Sa una pa lang ninyong panag-estorya, puwede na nimo siyang imbitahon sa weekend nga tigom. Tingali imong isulti niya ang ulohan sa pakigpulong publiko o ang usa ka punto gikan sa Pagtuon sa Bantayanang Torre nianang semanaha.

8. Dihang imbitahon nato ang mga interesado, unsay puwede natong isulti bahin sa atong mga tigom? (Isaias 54:13)

⁸ Dihang imbitahon nimo ang usa ka interesado, sultihi siya nga ang atong mga tigom sa Kingdom Hall lahi sa ginahimo sa mga simbahan nga iya tingaling ginatambongan. Dihay Bible study nga mitambong sa Pagtuon sa Bantayanang Torre sa unang higayon, ug iyang giingnan ang sister nga nag-study niya, “Nailhan lagi mo tanan sa nagdumala?” Ang sister miingon nga naningkamot ta nga mailhan ang mga ngalan sa tanan diha sa kongregasyon, sama nga nahibalo ta sa ngalan sa atong mga kapamilya. Ang Bible study nabag-ohan kay sa ilang relihiyon, kasagaran nila wala magkailhanay. Kon bahin pod sa katuyoan sa atong mga tigom, lahi pod ni sa naandan sa kadaghanang relihiyon. (Basaha ang Isaias 54:13.) Nagtigom ta aron simbahon si Jehova, mokat-on gikan niya, ug magdinasigay sa usag usa. (Heb. 2:12; 10:​24, 25) Tungod ana, ang atong mga tigom organisado ug naa gyod kay makat-onan, dili kay rituwal o seremonya lang. (1 Cor. 14:40) Ang atong mga Kingdom Hall hayag, simple, ug walay daghang dekorasyon aron makapokus ta sa pagkat-on. Ug wala tay gisuportahan nga bisan unsang partido sa politika kay neyutral ta. Wala pod ta nagahisgot o nagadebate bahin sa politika. Makatabang tingali kon imong ipakita daan sa imong study ang video nga Unsay Ginahimo Diha sa Kingdom Hall? aron mahibalo siya kon unsay iyang madahom sa atong mga tigom.

9-10. Dihang imbitahon nato ang usa ka interesado, unsay atong isulti aron dili siya mahadlok nga motambong sa tigom? (Tan-awa sab ang hulagway.)

⁹ Ang uban mahadlok nga motambong sa atong mga tigom kay basig pugson sila nga mobalhin ug relihiyon. Pasaligi ang interesado nga ganahan ta nga naay mga bisita nga motambong sa atong mga tigom, ug nga wala nato sila ginapresyur nga mobalhin ug relihiyon. Ginadapit nato ang mga pamilya, apil na kadtong naay gagmayng bata. Sa atong mga tigom, wala nato ginalain ang mga bata. Hinuon ang mga ginikanan ug ang mga bata mag-uban aron mokat-on. Niining paagiha, mahibalo ang mga ginikanan kon kinsay kauban sa ilang mga anak ug kon unsay ginatudlo kanila. (Deut. 31:12) Wala pod ta magpasag mga sibot o mangolektag mga amot. Hinuon, gisunod nato ang sugo ni Jesus: “Kamo nakadawat nga walay bayad, panghatag nga walay bayad.” (Mat. 10:8) Puwede pod nimong sultihan ang interesado nga dili kinahanglang magsul-ob siyag mahalon nga sinina, kay ang Diyos nagatan-aw sa kasingkasing, dili sa atong panagway.—1 Sam. 16:7.

¹⁰ Kon motambong ang interesado, paningkamoti nga mobati siya nga nalipay gyod ta sa iyang pagtambong. Ipailaila siya sa mga ansiyano ug sa mga igsoon. Kon komportable siya sa tigom, lagmit ganahan siyang mobalik. Kon wala siyay Bibliya, i-share ang imong Bibliya aron masundan niya ang ginaingon sa mamumulong ug ang ginahisgotan sa pagtuon.

DIHANG MASUGDAN NA ANG PAGTUON SA BIBLIYA

11. Unsaon nimo pagpakita nga gitahod nimo ang oras ug eskedyul sa tagbalay?

¹¹ Unsay angay nimong hinumdoman dihang magdumala kag pagtuon sa Bibliya? Tahora ang oras ug ang eskedyul sa tagbalay. Pananglitan, kon nakigsabot ka kon unsang orasa mo mag-study, tumana ang inyong gikasabotan, bisan pag ang mga tawo sa inyong lugar naanad tingali sa paglangaylangay. Basin mas maayo pod nga mubo ra ang inyong unang pagtuon. Ang ubang eksperyensiyadong magmamantala misugyot nga dili ra ni dugayon, bisag ganahan pa tingaling maminaw ang tagbalay. Ug ayaw pagsigeg estorya. Hatagig higayon ang tagbalay nga masulti ang iyang gihunahuna ug gibati.—Prov. 10:19.

12. Unsa gyoy atong tumong sa sugod pa lang sa atong pagtuon?

¹² Sa sugod pa lang, angay nga himoon na nimong tumong nga matabangan ang imong Bible study nga makaila kang Jehova ug Jesus ug makakat-on sa paghigugma nila. Mahimo nimo ni pinaagi sa pagpasiugda sa Pulong sa Diyos imbes sa imong kaugalingon ug sa imong kahibalo sa Bibliya. (Buh. 10:​25, 26) Si apostol Pablo maoy maayong ehemplo niining bahina. Sa iyang pagpanudlo, iyang gipasiugda si Jesu-Kristo, nga maoy gigamit ni Jehova aron tabangan ta nga makaila ug mahigugma Niya. (1 Cor. 2:​1, 2) Gipakita pod ni Pablo kon unsa ka hinungdanon ang pagtabang sa bag-ong mga tinun-an nga makaugmad ug maayong mga hiyas, nga gipakasama sa bulawan, plata, ug mahalong mga bato. (1 Cor. 3:​11-15) Kini nga mga hiyas naglakip sa pagtuo, kaalam, pagsabot, ug kahadlok kang Jehova. (Sal. 19:​9, 10; Prov. 3:​13-15; 1 Ped. 1:7) Sundoga ang paagi sa pagpanudlo ni Pablo pinaagi sa pagtabang sa imong mga Bible study nga maugmad ang lig-ong pagtuo ug masuod sa ilang mahigugmaong langitnong Amahan.—2 Cor. 1:24.

13. Sa unsang paagi makapakita tag pailob ug pagsabot samtang magtabang ta sa mga interesado? (2 Corinto 10:​4, 5) (Tan-awa sab ang hulagway.)

¹³ Sundoga ang paagi ni Jesus sa pagpanudlo pinaagi sa pagpakitag pailob ug pagsabot. Ayaw pangutan-a ang imong study bahin sa mga butang nga dili siya ganahang estoryahan o makapaulaw niya. Kon nalisdan siyag sabot sa usa ka punto, baliki na lang nig hisgot sa sunod nga higayon. Imbes pugson siya nga dawaton ang usa ka pagtulon-an nga dili pa siya andam modawat, hatagi siyag panahon nga matisok ni sa iyang kasingkasing. (Juan 16:12; Col. 2:​6, 7) Sa Bibliya, ang bakak nga mga pagtulon-an gipakasama sa “lig-ong naparilan nga mga butang.” Ang orihinal nga pulong nga gigamit dinhi nagtumong sa usa ka kuta nga kinahanglang gub-on o pukanon. (Basaha ang 2 Corinto 10:​4, 5.) Pero imbes nga pukanon dayon ang maong kuta nga mahagsaan na hinuon ang imong study, tabangi una siya nga himoon si Jehova ingong iyang bag-ong Kuta ug makakat-on sa pagsalig Niya.—Sal. 91:9.

DIHANG ANG MGA INTERESADO MOTAMBONG NA SA TIGOM

14. Unsay angay natong pagtratar sa mga interesado nga motambong sa atong mga tigom?

¹⁴ Gusto ni Jehova nga trataron nato ang tanang tawo sa mahigugmaong paagi, bisag unsa pay ilang kultura, kagikan, o kahimtang sa kinabuhi. (Sant. 2:​1-4, 9) Busa unsaon nato pagpakita ug gugma niadtong mga interesado nga motambong sa atong mga tigom?

15-16. Sa unsang paagi matabangan nato ang mga interesado nga mobating komportable sa atong mga tigom?

¹⁵ Ang uban motambong sa atong mga tigom kay gusto nilang mahibaloan kon unsay atong ginahimo sa Kingdom Hall, o kay naa silay kaila sa laing lugar nga maoy nagdasig nila nga motambong. Maong maningkamot gyod ta nga duolon sila. Gusto natong ipabati kanila nga nalipay ta nga mitambong sila, pero dili ra pod nato pasobrahan ang atong reaksiyon kay basin mahimo na hinuon silang dili komportable. Tapari sila ug i-share ang imong Bibliya ug mga tun-anan, o kaha hatagi silag kaugalingong kopya niini. Konsideraha pod ang ilang pagbati. Pananglitan, dihay lalaki nga mitambong sa Kingdom Hall nga naka-casual rag sinina, ug iyang giingnan ang brader nga naulaw siya sa iyang gisul-ob. Gipasaligan siya sa brader nga dili ra mabalaka kay ang mga Saksi ni Jehova normal ra nga mga tawo; parehas ra pod sila sa uban. Wala gyod malimti sa lalaki ang gihimo sa brader, ug sa ngadtongadto siya miuswag ug nabawtismohan. Pero hinumdomi ni: Dihang makig-estorya ka sa mga bisita sa dili pa o human sa tigom, angay nimo silang pakitaan ug personal nga interes, pero ayaw pagsukitsukit bahin sa personal nga mga butang.—1 Ped. 4:15.

¹⁶ Naa pay laing paagi nga mapabati nato sa atong mga bisita nga nalipay ta nga mitambong sila. Pananglitan, dihang maghisgot ta bahin sa mga dili Saksi o sa ilang mga tinuohan, gusto natong magpakitag pagtahod diha sa atong mga ginasulti, mga komento, o mga bahin sa tigom. Likayan nato ang sakit o makainsulto nga mga pulong, nga mora bag nakamenos ta nila. (Tito 2:8; 3:2) Pananglitan, dili gyod nato tamayon ang ilang tinuohan. (2 Cor. 6:3) Ang mga brader nga nagahatag ug mga pakigpulong publiko ilabinang angayng mag-amping niining bahina. Mapakita pod niini nga mga brader nga ilang gihunahuna ang mga dili Saksi nga nanambong pinaagi sa pagpatin-aw sa mga pulong o mga pagtulon-an nga dili nila masabtan.

17. Unsay atong tumong dihang makakita tag mga tawo nga “nakiling sa pagdawat sa kamatuoran”?

¹⁷ Ang atong buluhaton nga paghimog tinun-an dinalian kaayo, ug padayon tang naningkamot sa pagpangita sa mga tawo nga “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Kon makita nato sila, dili ta angayng magduhaduha nga tanyagan sila ug pagtuon sa Bibliya o imbitahon sila sa tigom. Pinaagi ana, matabangan nato sila nga makasugod na sa pagsubay sa “dalan padulong sa kinabuhi.”—Mat. 7:14.