Militanteng Ateyista Nahimong Alagad sa Diyos

INGONG batan-on, nadismaya ko sa gubot kaayo nga kasaysayan sa relihiyon. Wala sab ko makasabot kon nganong wala taposa sa Diyos ang kakabos ug inhustisya o kon nganong daghang relihiyosong tawo ang wala magsunod sa Bibliya. Busa nahimo kong ateyista, nga nagtuong masulbad ang mga problema sa kalibotan kon usbon ang sistema sa politika.

Sa 1962, nagsugod kog basa sa Pagmata! nga magasin. Dayon sa 1963, misugot kong mag-Bible study uban sa mga Saksi ni Jehova. Dako kaayog epekto ang akong nakat-onan. Nasabtan nako nga may katuyoan ang Diyos para sa katawhan ug dili siya ang mabasol sa kapintasan nga gihimo sa lainlaing relihiyon. Duha ka bulan gikan sa akong pagtuon, ginasulti na nako sa uban nga pulihan sa Gingharian sa Diyos kining daotang sistema. Nabawtismohan ko sa 1964 ug natudlo ingong espesyal payunir pagka-1966. Nagtuo ko nga giluwas sa kamatuoran ang akong kinabuhi, kay kadaghanan sa akong mga kaubang militante kaniadto ang gipriso, pintas nga gipatay, o kinahanglang molayas sa nasod. Nagpasalamat ko kang Jehova nga gikan sa usa ka way paglaom nga ateyista, iya kong gihimong alagad ug gisaaran ug matarong nga bag-ong kalibotan.