Gibuksan ni Jehova ang Kasingkasing sa Daghan

NABAWTISMOHAN ko mga usa ka bulan human patya si Trujillo niadtong 1961. Nianang panahona, nagtuon kog abogasiya sa usa ka unibersidad. Gusto ni Papa nga mahimo kong abogado, pero para nako mas importante ang espirituwal nga edukasyon. Busa miundang kog eskuyla bisan pag supak si Papa. Wala madugay, giasayn ko ingong espesyal payunir.

Usa sa akong mga asaynment mao ang La Vega, diin halos tanang molupyo maoy debotadong Katoliko. Wala gyoy midawat sa kamatuoran. Dihang mopakigpulong ko, ang akong kaubang payunir ray akong mamiminaw. Pero gipalig-on ko ni Jehova pinaagi sa personal nga pagtuon, pagtambong sa mga asembliya, ug tim-os nga pag-ampo. Sa pag-ampo, mangutana ko kang Jehova kon may maporma ba gyod kahang kongregasyon sa La Vega. Malipay kong moingon nga karon duna nay 6 ka Kingdom Hall, 14 ka kongregasyon, ug kapig 800 ka magmamantala sa maong dapit.

Gikasal mi sa akong asawa nga si Ángela sa 1965, ug sa 1981 gitawag mi sa Bethel. Dihang gibawtismohan ko, 681 ray magmamantala sa nasod. Pero karon, duna nay kapin sa 36,000 ka magmamantala, ug linibo ang motambong sa mga asembliya. Makapahingangha gyong hunahunaon kon giunsa pagbukas ni Jehova ang kasingkasing sa daghang tawo ngadto sa kamatuoran.