GEORGIA
Nagsige na lag Basa ang Akong Bana!
Marina Kopaliani
NATAWO 1957
NABAWTISMOHAN 1990
MUBONG IMPORMASYON Si Marina ug ang iyang bana nga si Badri kugihan kaayong mosangyaw bisag nagpadako sa ilang duha ka anak nga lalaki. Sa ulahi, si Badri nahimong membro sa Komite sa Nasod ug namatay nga matinumanon niadtong 2010.
NAILAILA namo sa akong bana ang mga Saksi didto sa balay sa among silingan niadtong 1989. Giestadihan ni Brader Givi Barnadze ang among silingan, pero wala siyay Bibliya kay lisod kaayo ning mabatonan sa Georgia niadtong panahona.
Ganahan kaayo mi sa among nakat-onan ug gusto namong makabaton ug personal nga kopya sa Bibliya. Dihang nakita sa akong bana ang iyang igsoon, iya ning giingnan nga nangita siyag Bibliya. Nalipay kaayo ang akong bana dihang miingon ang iyang igsoon nga bag-o ra siyang nakapalit ug Bibliya sa pinulongang Georgian ug iya ning iregalo kaniya.
Pag-uli ni Badri sa balay, milingkod dayon siya ug gibasa ang Bibliya hangtod nagabhian. Pagmata niya pagkaugma, nagbasa na pod siya. Pag-uli nako gikan sa trabaho, naabtan na sab nako siya sa lamesa nga naggunit ug Bibliya. Nagsige na lang siyag basa! Maong giingnan nako siya nga mobakasyon sa trabaho aron iya ning mahuman. Wala madugay, nabasa ra gyod niya ang tibuok Bibliya.
Dihang giestadihan mi ni Brader Barnadze sa librong Ang Kamatuoran nga Motultol sa Kinabuhing Dayon, gamit na namo ang among kaugalingong Bibliya. Tayming kaayo to kay wala miy kopya sa librong Kamatuoran ug wala pod siyay kopya sa Bibliya! Paglabayg mga usa ka tuig, nagpabawtismo mi ni Badri.