Unsay Akong Himoon Kon Pirmeng Ubos ang Akong Grado?

“Ang uban nakong klasmet moeskuwela ra nga walay daladalang libro ug maminaw rag music sa ilang headphone samtang nagtudlo ang titser. Unya matingala sila kon nganong ubos ang ilang grado. Pero naa poy uban nga parehas nako, nga nagtuon pag-ayo pero ubos gihapon ug grado sa eksam. Ambot kon nganong ubos gihapon kog grado. Makalagot kaayo nang usa ka semana kang sigeg pulaw sa pagtuon, unya ubos gihapon ang imong grado.”​—Yolanda.

Parehas ba kag gibati ni Yolanda? Tinuod, makapaguol gyod kon ubos ang imong grado​—o pirme na lang ubos ang imong grado.

Ang pipila ka batan-on dili na maningkamot nga patas-on ang ilang grado. Ang uban moundang pa ganig eskuwela. Bisag kini ang ginahimo sa uban, naay maayong paagi aron masulbad nimo ni nga problema. Sayra ang unom ka paagi aron motaas ang imong grado.

• Ang imong mahimo

• Ang giingon sa ubang batan-on

Ang imong mahimo

• Sulod pirme sa klase. Tingali maghunahuna ka nga mao man gyod nay angayng himoon, pero kon magsige kag absent sa klase, maapektohan gyod ang imong grado.

  “Sa eskuwelahan, kasagaran sa mga mo-absent kadtong nagbalewala sa ilang mga grado. Dili gyod maayo ang resulta.”​—Matthew.

  Prinsipyo sa Bibliya: “Kon unsay gipugas sa usa ka tawo, mao pod ang iyang anihon.”​—Galacia 6:7.

• Paningkamot nga makabenepisyo sa klase. Siyempre, maayo nga presente ka sa klase, pero makabenepisyo lang ka kon maminaw ka pag-ayo. Isulat ang importanteng mga punto sa subject. Sabta ang giingon sa imong titser. Kon tugotan ka, pangutana panahon sa klase.

  “Pirme kong mangutana sa klase kay akong namatikdan nga ipatin-aw pag maayo sa titser ang topiko kon nahibalo siya nga naa pay estudyante nga wala makasabot.”​—Olivia.

  Prinsipyo sa Bibliya: “Angay mong mamati pag-ayo.”​—Lucas 8:18.

• Ayawg pangopya o pangodigo. Dili kini maayo, ug dili pod ni makatabang nimo nga makakat-on.

  “Kon naa kay wala masabti, ayawg pangopya sa tubag sa uban. Kon mangopya ka, wala nimo tabangi ang imong kaugalingon. Imbes makakat-on ka kon unsaon pagsulbad ug mga problema, magsalig na hinuon ka sa uban.”​—Jonathan.

  Prinsipyo sa Bibliya: “Ang tagsatagsa angay nga magsusi sa iyang kaugalingong binuhatan. Kon maayo kini, makapasigarbo siya sa iyang nahimo.”​—Galacia 6:4, Maayong Balita Biblia.

• Unaha ang imong asaynment. Kon posible, himoa ang imong asaynment ayha ang ubang buluhaton​—ilabina ang paglingawlingaw.a Kon mahuman kag himo sa imong asaynment, mas ma-enjoy nimo ang imong libreng oras!

  “Ginahimo dayon nako ang akong asaynment, ug nakatabang ni nga motaas ang akong grado. Inig-uli nako, sagad gusto kong motagpilaw o maminaw ug music. Pero naningkamot ko nga unahon ang akong mga asaynment ayha mopahulay.”​—Calvin.

  Prinsipyo sa Bibliya: ‘Seguroa ang mas importanteng mga butang.’​—Filipos 1:10.

• Pangayog tabang. Ayawg kaulaw sa pagpangayog tabang sa uban. Pangayog tambag sa imong ginikanan. Pangayog tabang sa imong titser aron motaas ang imong grado. Sa ubang kahimtang, puwede sab kang magpa-tutor.

  “Pangayog tabang sa imong titser aron masabtan nimo ang subject ug motaas ang imong grado. Seguradong malipay ang imong titser sa imong paningkamot nga makapasar ug tabangan ka niya.”​—David.

  Prinsipyo sa Bibliya: “Naay kalamposan kon daghan ang magtatambag.”​—Proverbio 15:22.

• Pangitag kahigayonan nga motaas ang imong grado. Sa ubang nasod, ang mga eksam naay bonus nga mga pangutana nga makapataas sa grado. Puwede sab kang mohangyo nga mohimog dugang project nga makadugang sa imong grado. Kon dili ka makapasar sa eksam, basin puwede kang mohangyo nga moeksam pag-usab kon tugotan ka.

  

  “Kon gusto nakong motaas ang akong grado sa usa ka subject, kinahanglan nga naa koy himoon. Mangutana ko sa akong mga titser kon puwede ba kong mohimog dugang asaynment o kon puwede nakong usbon ang uban nakong test aron motaas ang akong grado.”​—Mackenzie.

  Prinsipyo sa Bibliya: “Ang tanang paghago naay kaayohan.”​—Proverbio 14:23.