MGA BATAN-ON NANGUTANA
Unsay Kinahanglan Nakong Himoon Human sa Bawtismo?—Bahin 1: Ipadayon ang Imong Espirituwal nga Rutina
Ang importanteng mga butang, sama sa balay o sakyanan, kinahanglang atimanon pag-ayo. Ingon ana pod ang imong relasyon sa Diyos. Sa unsang paagi maatiman nimo ang imong relasyon sa Diyos human sa imong bawtismo?
Niining artikuloha
Padayong tun-i ang Pulong sa Diyos
Ang giingon sa Bibliya: “Padayon mong mamunga sa tanang maayong buhat ug mouswag sa tukmang kahibalo sa Diyos.”—Colosas 1:10.
Kahulogan: Human sa bawtismo, kinahanglang padayon nimong basahon ang Bibliya ug hunahunaon pag-ayo ang imong mga nakat-onan.—Salmo 25:4; 119:97.
Ang imong madahom: Naa tingali mga panahon nga dili ka ganahang magtuon. Basig maghunahuna ka nga dili lang gyod ka hilig magtuon.
Ang imong mahimo: Tun-ig maayo ang mga topic sa Bibliya nga nakapainteres nimo. Paghimog imong personal nga rutina sa pagtuon—kanang dili ra pod ka mabug-atan. Sa imong pagtuon, tumong nimo nga mas molalom pa ang imong gugma kang Jehova ug sa iyang Pulong. Makabenepisyo ka sa ingon ana nga paagi sa pagtuon ug malingaw pod ka.—Salmo 16:11.
Tip: Aron makabenepisyo ka pag-ayo sa imong pagtuon, pangitag hilom nga lugar nga dili ka maestorbo.
Niay dugang tabang
Basaha:
“Sa Unsang Paagi Matabangan Ko sa Bibliya?—Bahin 2: Himoang Makalingaw ang Pagbasag Bibliya”
Tan-awa:
I-download:
Padayong mag-ampo kang Jehova
Ang giingon sa Bibliya: “Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat.”—Filipos 4:6.
Kahulogan: Ang komunikasyon uban sa Diyos nagpasabot nga maminaw ka niya dihang magbasa ka sa iyang Pulong ug makig-estorya ka niya dihang mag-ampo ka. Sa imong mga pag-ampo, puwede kang mangayog tabang sa Diyos sa imong mga panginahanglan ug magpasalamat sa mga panalangin nga imong nadawat.
Ang imong madahom: Usahay, mobati tingali ka nga morag balikbalik na lang ang imong mga pag-ampo. Basin magduhaduha pa gani ka kon naminaw ba gyod si Jehova nimo o kon gusto ba siyang maminaw nimo.—Salmo 10:1.
Ang imong mahimo: Sa tibuok adlaw, paghunahuna kon unsay mga puwede nimong iampo. Kon dili pa itugot sa imong kahimtang nga makaampo kag taas, hinumdomi lang nga mag-ampo ka bahin ana sa laing mga oras anang adlawa. Gawas sa imong mga gikabalak-an, iampo pod ang panginahanglan sa uban.—Filipos 2:4.
Tip: Kon ang imong mga pag-ampo morag balikbalik na lang, iampo kana kang Jehova. Gusto niyang mamati sa tanan nimong gikabalak-an, apil na ang bahin sa imong mga pag-ampo.—1 Juan 5:14.
Niay dugang tabang
Basaha:
I-download:
Padayong i-share ang imong mga nakat-onan sa Bibliya
Ang giingon sa Bibliya: “Tagda kanunay ang imong kaugalingon ug ang imong pagpanudlo. … Kay sa pagbuhat niini maluwas nimo ang imong kaugalingon ug kadtong maminaw nimo.”—1 Timoteo 4:16.
Kahulogan: Kon imong i-share ang imong mga nakat-onan sa Bibliya ngadto sa uban, molig-on pod ang imong pagtuo. Ingong resulta, mahimong maluwas nimo ang kinabuhi niadtong maminaw nimo ug ang kinabuhi pod nimo.
Ang imong madahom: Usahay, basig wala kay ganang mo-share sa imong mga nakat-onan sa Bibliya. Basig mahadlok pa gani ka nga himoon na, ilabina sa eskuwelahan.
Ang imong mahimo: Ayawg tugoti ang negatibong mga pagbati, sama sa kahadlok, nga makaapektar sa imong mga desisyon. Si apostol Pablo misulat: “Bisan kon [isangyaw nako ang maayong balita] nga supak sa akong kabubut-on, gitugyanan gihapon kog buluhaton.” (1 Corinto 9:16, 17) Naay mga panahon nga nalisdan pod si Pablo sa pagsangyaw, pero gihimo gihapon na niya kay nahibalo siya nga iya nang responsibilidad.
Tip: Kon mosugot ang imong ginikanan, pangitag igsoon nga makatabang nimo—kanang maayog ehemplo sa ministeryo.—Proverbio 27:17.
Niay dugang tabang
Padayon sa pagtambong sa Kristohanong mga tigom
Ang giingon sa Bibliya: “Hunahunaon nato ang usag usa aron magdinasigay sa pagpakitag gugma ug sa paghimog maayong mga buhat, nga dili pasagdan ang atong mga panagkatigom.”—Hebreohanon 10:24, 25.
Kahulogan: Ang pangunang rason nga motambong tag mga tigom mao ang pagsimba kang Jehova. Pero naa pay dugang kaayohan ang pagtambong sa mga tigom. Una, madasig ka sa mga igsoon sa kongregasyon. Ikaduha, madasig nimo sila dihang motambong ka ug mohatag sa imong bahin o komento.—Roma 1:11, 12.
Ang imong madahom: Usahay, basig maglatagaw ang imong hunahuna, maong dili ka makabenepisyo sa importanteng mga impormasyon nga gitudlo panahon sa tigom. O basig maghunahuna ka nga dili lang sa motambong sa mga tigom tungod sa mga kalihokan nimo sa eskuwelahan o sa ubang mga hinungdan.
Ang imong mahimo: Bisag naa kay mga himoonon sa eskuwelahan, paningkamot nga motambong pirme sa mga tigom. Himoang tumong nga naa kay makat-onan sa mga tigom. Maayo pod kon mokomento ka. Human sa tigom, pasalamati ang bisan usa ka igsoon sa iyang komento o bahin.
Tip: Pangandam sa dili pa motambong. I-download ang JW Library® app, ug gamita ang “Meetings” tab aron makita nimo kon unsay hisgotan sa matag tigom.
Niay dugang tabang