Si Jehova Kanunayng Magtaganag Kalingkawasan

Mapasalamaton gyod ang akong pamilya nga gibisita mi sa akong iyaan ug uyoan niadtong 1976. Ang akong uyoan, nga nagtuon uban sa mga Saksi ni Jehova, miingon sa akong ginikanan nga naa siyay bag-ong nakat-onan bahin sa Bibliya. Una, gihisgotan niya kon unsay giingon ni Jesus bahin sa relihiyosong mga lider sa iyang panahon diha sa Mateo kapitulo 23. Dayon, iyang gipasiugda kon sa unsang paagi ang relihiyosong mga lider sa panahon ni Jesus parehas sa relihiyosong mga lider sa modernong panahon. Ang akong mama, nga debotadong Katoliko, dili makatuo nga direktang gisaway ni Jesus ang relihiyosong mga lider. Maong nakadesisyon siya nga personal nga susihon kon unsay giingon sa Bibliya.

Nagpuyo mi sa Lithuania, nga niadtong panahona bahin pa sa kanhing Soviet Union. Kay gilimitahan pag-ayo sa gobyerno ang kagawasan sa pagsimba, gamay ra kaayo ang nanag-iyag Bibliya. Maong nanghulam si Mama ug Bibliya gikan sa simbahan. Gibasa ni niya, ug iyang napamatud-an nga gisaway gyod diay ni Jesus ang relihiyosong mga lider sa iyang panahon tungod sa ilang pagkasalingkapaw. Nakapainteres to pag-ayo kang Mama, ug nakahunahuna siya kon unsa pa kahay laing gitudlo sa Bibliya. Maong mikuha siyag literatura gikan sa Saksi nga nag-Bible study sa akong uyoan.

Wala madugay, misugod ug tambong ang among pamilya sa mga tigom sa kongregasyon sa mga Saksi ni Jehova. Kay gidili ang ilang buluhaton, lainlain ang lokasyon sa kada tigom. Usahay himoon ni diha sa duol nga lasang. Nabawtismohan si Mama ingong Saksi niadtong 1978, dungan nako ug sa akong kaluha nga si Danguolė. Kinse anyos mi niadtong panahona. Pipila ka tuig sa ulahi, nabawtismohan pod ang akong papa.

Si Jehova Mitaganag Kalingkawasan Panahon sa Akong Pagkabatan-on

Usa ka bulan human sa among bawtismo, gilutos mi ni Danguolė diha sa eskuwelahan. Panahon sa usa ka espesyal nga event diha sa awditoryum sa eskuwelahan, namatikdan sa mga maestra nga wala mi motindog para sa nasodnong awit sa Soviet tungod sa among Kristohanong neyutralidad. Gihatag sa mga maestra ang among ngalan ngadto sa prinsipal. Iyang gipahibalo ang secret police, nga nailhan ingong KGB, nga sa ulahi mibisita sa among pamilya ug misukitsukit namo.

Kinahanglan pod namong suklan ni Danguolė ang presyur nga motuo sa propaganda sa mga ateyista. Pananglitan, dihang 16 anyos mi, giasayn ang among klase nga magsulat ug essay bahin sa tema nga “Kon Nganong Dili Ko Motuo sa Diyos.” Kay dili man ko uyon sa tema, akong gisulat ang “Nagtuo Ko sa Diyos” sa papel ug gibutang kini diha sa akong lamesa. Pagkakita sa maestra sa papel, nasuko siya ug misingka, “Sige, isulat kon nganong nagtuo kag Diyos!” Nalipay kong gitugotan ko nga mosulat bahin sa akong mga gituohan, ug mao pod nay gibuhat sa akong igsoon. Dihang nakita sa duha ka batan-ong babaye ang among gisulat, ila pong gisulat kon nganong nagtuo sila sa Diyos. Usa lang ni sa daghang higayon diin akong nakita nga si Jehova “magtaganag kalingkawasan” sa lisod nga mga situwasyon.—1 Corinto 10:13.

Sulod sa usa ka bulan, gipahulam mi sa responsableng mga brader ug kopya sa librong From Paradise Lost to Paradise Regained, nga gipatik sa mga Saksi ni Jehova. Sa akong nahibaloan, adtong panahona, kining libroha naa ray upat o lima ka kopya sa tibuok nasod. Nakaingon mi ni Danguolė, “Maayo untag atoa na lang ning libroha no?” Pero kay di man lagi puwede, gihimo na lang namo kon unsay kinamaayohan—gimanomano namog kopya ang libro! Sakit kaayo to sa kamot, pero puwerte namong lipaya nga naa na mi kopya aning libroha aron mapalig-on ang among pagtuo.

Pagka-1982, wala madugay human ko mag-19 anyos, gisentensiyahan kog duha ka tuig nga pagkapriso kay dili ko magsundalo. Naglisod ko sa prisohan nga kauban ang mga kriminal. Pero mapasalamaton ko nga makauban nako usahay ang ubang Saksi nga naa sa mao ra nga prison camp. Nakompleto nako ang akong sentensiya, pero dili to ang kataposang higayon nga napriso ko.

Gipanalanginan ug Matinumanong Asawa

Paggawas nako sa prisohan niadtong 1984, nailaila nako si Lidija, ang guwapa ug mahunahunaon sa espirituwal nga sister nga taga-Ukraine, ug nagminyo mi. Human sa among kasal, mibiya si Lidija sa Ukraine ug sa Lithuania mi mipuyo. Kay siya ug ang iyang pamilya Saksi ni Jehova man, grabe pod siyang gilutos sa nag-eskuwela pa siya. Panahon sa maong mga pagsulay, napalig-on gyod siya sa mga eksperyensiya niadtong nakalahutay sa mga concentration camp sa Nazi o niadtong gipugos ug pabalhin sa Siberia.

Niadtong 1980, gidili pa gihapon ang mga Saksi ni Jehova sa Lithuania. Maong kon naay Saksi nga kaslon, gamiton ni nga kahigayonan aron ipahigayon ang duha ka adlaw nga kombensiyon. Mao nay nahitabo sa among kasal. Lipay kaayo ang mga bisita namo sa among kasal, ug nakadungog pod mig daghang pakigpulong, miawit ug mga kanta, ug nakakita pa ganig upat ka gidrama nga estorya sa Bibliya diin nag-costume ang mga entrante sa drama. Sa akong nahinumdoman, mga 450 ka tawo ang nanambong, apil ang among mga paryente gikan sa tibuok Soviet Union. Nanambong pod ang wala imbitaha nga mga membro sa KGB, nga nailhan sa pipila ka igsoon!

Nakabalik sa Korte

Kon ang usa ka Saksi dili mouyon sa mga polisiya sa Soviet human siya mapriso, usahay prisohon siyag balik sa gobyerno. Maong usa ka tuig human sa among kasal, gihusay ko pag-usab sa korte. Naa ko sa korte samtang si Lidija, nga mabdos, naa sa duol nga ospital. Wala ko tugoti nga bisitahon siya panahon sa husay. Pero dihay adlaw nga nakaadto ko sa ospital dihang nag-break ang korte ug miduol ko sa bentana sa iyang kuwarto. Iyang giablihan ang bentana, ug nakahigayon mi sa pagdinasigay. Espesyal kaayo to para namo. Anang adlawa, gisentensiyahan kog tulo ka tuig nga pagkapriso.

Makapasubo nga human sa duha ka adlaw, nakuhaan si Lidija. Miingon siya nga grabe ang emosyon nga iyang gibati nga mora siyag gipikas sa kasakit. Gawas pa sa pag-atubang ani, nag-adjust pod si Lidija sa kinabuhi sa bag-ong nasod ug sa pagpuyo uban sa akong ginikanan nga dili kaayo makamaong moestorya sa iyang pinulongan nga Ukrainian o Russian. Pero si Lidija bug-os gihapong misalig kang Jehova, ug naningkamot pod ang akong ginikanan nga atimanon ug suportahan siya niining lisod kaayo nga panahon.

Si Jehova Padayong Mitaganag Kalingkawasan

Ang akong nakat-onan sa una nakong pagkapriso nakatabang nako dihang napriso ko sa ikaduhang higayon. Usa nga nakatabang nako nga makalahutay mao ang pagsangyaw. Pananglitan, dihang mobiyahe paingon sa prisohan, magdasok diha sa mga sakyanan ug tren ang mga piniriso. Usahay, 15 ngadto sa 20 ka tawo ang pugson ug paigo sa gamayng lugar nga para lang sa lima o unom ka tawo. Pahimuslan nako ni nga mga biyahe aron maestorya ang akong kaubang mga piniriso bahin sa mensahe sa Bibliya. Akong ipatin-aw kon nganong neyutral ko sa giyera ug politika ug mao ni rason kon nganong gidakop ug gipriso ko. Sultihan pod nako sila kon nganong para nako makataronganon ang pagtuo nga naay Diyos.

Didto ko gipriso sa Marijampolėa panahon sa akong sentensiya. Sa akong nahibaloan, ako ray Saksi nga nasagol sa 2,000 ka mangtas nga kriminal. Kausa ra ko grabeng nakulatahan, pero komon na para sa mga piniriso ang hulgaon, kulatahon, ug patyon pa gani. Bisag dili maayo ang kahimtang, naningkamot ko nga dasigon ang mga naguol ug magpakitag kaluoy, kay dili ni sagad maeksperyensiyahan sa mga piniriso.

Diha sa prisohan, presyuron pod mi sa mga membro sa KGB. Ambot kon nganong nahibalo sila kon unsay giestoryahan sa akong pamilya diha sa among balay, pero ila kong sultihan bahin ani. Tuison nila ang giingon sa akong pamilya, nga mora bag nag-away sila ug wala magkahiusa. Wala gyod ko motuo sa KGB pero ayha na nako napamatud-an kon unsa gyoy giingon sa akong pamilya dihang nakagawas na ko sa prisohan.—Mateo 10:16.

Dihay higayon nga gihangyo sa usa ka sister ang iyang silingan, guwardiya nga amigo kaayo niya, nga sekretoan kog hatag ug gamayng Russian nga Bibliya. Sa gabii, kopyahon nako ang pipila ka bersikulo sa Wali sa Bukid ni Jesus diha sa gamayng papel aron pagkaugma, samtang nagtrabaho ko sa prison factory, balikbalik nakong mabasa ang mga bersikulo dihang walay magtan-aw. Tungod ana, na-memorize nako ang Wali sa Bukid ni Jesus sa Russian, bisag dili ko Russian. Sa ulahi, nakit-an sa mga guwardiya ang Bibliya ug giembargo ni. Pero adtong tungora, na-memorize na nako kon unsay giingon ni Jesus.

Maayo pod kaayong suporta si Lidija nako, kay halos kada adlaw ko niyang padalhan ug makapadasig nga sulat. Pero kaduha sa usa ka bulan ra ko puwedeng mosulat niya. Bisan pa ana, miingon siya nga ang akong mga sulat nagpasalig niya sa tulo ka importanteng butang: buhi ko, maunongon ko kang Jehova, ug gimahal gihapon nako siya.

Si Jehova Mitaganag Kalingkawasan Pinaagi sa Pag-ampo

Dihay higayon nga usa ka grupo sa mga piniriso ang namugos sa mga opisyales sa prisohan nga pauswagon ang kahimtang sa pagtrabaho. Hangtod dili matuman ang ilang gusto, dili sila manarbaho. Siyempre, kini nga mga piniriso grabeng gisilotan tungod sa ilang pagrebelde. Dayon ang mga opisyal sa prisohan nagpahibalo nako ug sa uban nga kami ang bag-ong grupo nga mopuli sa trabaho sa mga rebelde.

Kon mobalibad ko, silotan ko pag-ayo. Pero kon ako ning dawaton, isipon kong traydor sa mga piniriso ug manimalos sila nako. Basin ila kong kulatahon o dunggabon hangtod mamatay. Napresyur kaayo ko. Mora kog naipit, ug wala ko kabalo kon unsay akong buhaton. (2 Cronicas 20:12) Maong kadaghan kong nagpakiluoy kang Jehova alang sa tabang.

Sa wala damha, gitapok mi sa akong orihinal nga kauban sa trabaho sa prisohan aron adtoon ang manager. Dili mi amigo aning tawhana; kauban ra gyod mi sa trabaho. Pero nangusog siya nga magpabilin lang ko sa akong orihinal nga grupo. Nagtinubagay sila sa manager tungod adto. Ang manager nailhan nga mobarog gyod sa iyang opinyon. Pero nahuwasan gyod ko kay gitugotan ko niyang magpabilin sa akong orihinal nga grupo. (2 Pedro 2:9) Sa pila ka tuig nga napriso ko, wala pa gyod koy nakit-an nga piniriso nga naningkamot pag-ayo aron tabangan ang laing piniriso. Nakat-onan nako ani nga eksperyensiya nga puwedeng gamiton ni Jehova ang bisan kinsa sa pagtabang nato ingong tubag sa atong mga pag-ampo.

Si Jehova Mitaganag Kalingkawasan Para Kang Lidija

Dili sayon ang kinabuhi ni Lidija samtang napriso ko. Kinahanglan siyang mangitag trabaho. Pero tungod sa akong pagkapriso, kadaghanang amo dili modawat niya kay mahadlok silang magkaproblema sa KGB. Sa ulahi, nakakita ra siyag trabaho nga kinahanglan siyang mo-duty ug 12 ka oras kada adlaw aron atimanon ang 30 ka bata. Kapoy gyod kaayo to! Pero gihatagan siya ni Jehova ug kusog aron makatrabaho kada adlaw. Gawas pa ana, ang mga igsoon mobiyaheg gatosan ka kilometro gikan pa sa Lithuania aron hupayon siya, makig-uban niya, ug dalhan siyag Russian nga mga publikasyon. Wala gyod siya mobating nag-inusara.

Nag-alagad Kang Jehova Ingong Pamilya

Paggawas nako sa prisohan, nakatabang ko sa pag-organisar sa sekretong paghubad sa atong mga publikasyon ngadto sa Lithuanian. Pipila ka tuig sa ulahi, nahugno ang Soviet Union ug ang atong buluhaton sa Lithuania legal nga narehistro. Sa ngadtongadto, nakabaton tag opisyal nga Lithuanian translation office. Bisag kinahanglan kong mobiyaheg usag tunga ka oras gikan sa among balay, nalipay ko nga makatabang sa paghubad. Ug gihimo nako ni kada semana sulod sa lima ka tuig.

Pagka-Agosto 1997, gidapit mi ni Lidija nga moalagad sa sangang buhatan sa mga Saksi ni Jehova sa Lithuania, nga nailhan ingong Bethel. Lipay kaayo mi sa imbitasyon. Naa mi duha ka anak nga babaye, ang nuybe anyos nga si Oksana ug ang singko anyos nga si Svajūnė. Gihatagan mig tulo ka adlaw aron mobalhin sa usa ka apartment duol sa Bethel ug i-enroll si Oksana sa bag-ong eskuwelahan.

Giunsa namo pagbalanse ang among mga responsibilidad? Sayo sa buntag, mobiyahe ko paingon sa Bethel, unya moapas si Lidija inigmakalakaw na ang mga bata paingon sa eskuwelahan. Dayon mounag uli si Lidija aron naay tawo sa balay inig-abot sa mga bata.

Lingaw kaayo mi kada Biyernes sa gabii. Magluto mi, manghinlo, mag-family worship, ug maglingawlingaw. Manglaag mi sa bukid, sa dagat, ug sa ubang Bethel sa Europe aron makita sa among mga anak ang kalalangan ni Jehova ug maeksperyensiyahan ang atong internasyonal nga panag-igsoonay. Proud kaayo mi ni Lidija sa among mga anak, nga nag-regular payunir pagka-15 anyos nila. Karon, si Oksana ug ang iyang bana nga si Jean-Benoit nag-alagad sa Lithuanian remote translation office, samtang si Svajūnė ug ang iyang bana nga si Nicolas nag-alagad sa France Bethel.

Ingong magtiayon, kami ni Lidija nahimong “usa ka unod” kay ang pag-alagad kang Jehova mao kanunay ang pinakaimportante para namong duha. (Efeso 5:31; Ecclesiastes 4:12) Bisag ‘gipiit mi pag-ayo’ ug gilutos sulod sa daghang katuigan, wala gyod mi biyai o miabot sa punto nga ‘dili na mi makalihok.’ (2 Corinto 4:8, 9) Balikbalik namong nakita nga si Jehova mitaganag kalingkawasan, ug kombinsido mi nga kanunay gyod na niyang himoon.