Ang Estorya sa Ministeryo ni Jesus—Luyo sa Kamera

Ang usa sa gikahinaman pag-ayo sa mga Saksi ni Jehova niining tuiga mao ang Episode 1 sa Ang Estorya sa Ministeryo ni Jesus. Minilyon na ang nakakita ani. Ug una pa lang ni sa 18 ka episode! Unsang mga paningkamot ang gihimo sa mga igsoon aron molampos ni nga proyekto, ug sa unsang paagi ka nakatabang?

Pag-atiman sa Tanang Apil sa Proyekto

Sa sangang buhatan sa Australasia, diin sagad gi-shooting ang Ministeryo ni Jesus nga serye, naay mga 50 ngadto sa 80 ka tawo sa kada esena.a Ang tanang apil sa proyekto andaman ug paniudto, snack, ug panihapon. Abante kaayong giplano ang andamon nga pagkaon para nila. “Mamalit mi sa lainlaing suplayer aron makakuha mig maayog klase nga mga pagkaon ug makabarato,” miingon si Esther, nga nagboluntaryo sa Food Service Department. “Usab-usabon pod namo ang gidaghanon sa among andamon nga pagkaon aron maseguro nga wala gyoy mausik.” Kada adlaw, mga ₱200 (mga $4)b ang magasto para sa pagkaon sa kada tawo.

Dili lang pagkaon ang gikinahanglan sa mga igsoon nga apil ani nga proyekto. Kinahanglan pod nila ang proteksiyon. Ngano? Kay sagad kon ting-init ug maayo ang panahon sa Australia, taas pod ang lebel sa ultraviolet radiation gikan sa adlaw. Aron dili kaayo mabulad ug maluya sa kainit, ang kugihang mga boluntaryo magbutang ug mga tolda aron naay kasilongan ug kapabugnawan ang mga igsoon nga tua didto. Ila pong seguroon nga naay igong suplay sa sunscreen, payong, ug tubig nga magamit dayon sa mga igsoon. Si Kevin, nga naa sa Audio/Video Services, miingon: “Kadaghanan ani nga mga boluntaryo maoy mga Bethelite nga wala magpuyo sa Bethel. Mapainubsanon kaayo sila ug malipayon nilang ginahimo ang ilang mga asaynment. Di gyod ni molampos nga proyekto kon wala sila!”

Pag-shooting sa Lainlaing Lokasyon

Ang ubang esena dili realistiko tan-awon kon adto mag-shooting sa sangang buhatan, sa studio man o sa hinimo nga set didto. Tungod ana, kinahanglan silang mag-shooting sa laing lokasyon. Aron masundog ang mga esena sa panahon sa Bibliya diin walay mga linya sa koryente, sementadong mga dalan, ug modernong mga balay, ang mga igsoon nga apil sa proyekto sagad kinahanglang mobiyahe ug layo. Ang ilang mga costume, props, ug equipment kinahanglang andamon, ibiyahe, unya hiposon ug tarong inig-abot sa lokasyon. Sa dili pa mag-shooting, seguroon sa mga assistant production coordinator nga naay mga generator, tubig nga mainom, ug CR didto. Ang tanang apil sa proyekto ginapaestar sa balay sa maabiabihong mga igsoon, sa mga trailer nga gihimong temporaryong puy-anan, sa mga hotel, o sa gagmayng balay nga ginapaabangan.

Ang pag-shooting sa lainlaing lokasyon dakog gasto, dugay mahuman, ug kapoy kaayo para sa tanang apil sa proyekto. Maong sa 2023, giaprobahan sa Nagamandong Lawas ang pagpalit ug video wall nga mikantidad ug mga ₱140 million ($2.5 million) nga magpakita ug realistikong background para sa shooting. Ang video wall tin-aw kaayo ug naa poy mga lighting nga mausab-usab aron mohaom sa esena sa screen, maong ang video mora gyod ug gi-shooting sa gawas. Tungod ana, sagad di na kaayo ta makagastog dako sa pag-shooting sa lainlaing lokasyon. Si Darren, nga membro sa Komite sa Sangang Buhatan sa Australasia, miingon: “Ang pag-shooting gamit ang video wall nakatabang nga dili kaayo kapoyon ang mga apil sa proyekto ug puwede pa ganing balikbalikon ug shooting ang lainlaing esena. Pananglitan, kon mag-shooting mi sa gawas, naa ra mi pipila ka minuto aron makuha ang pagsalop sa adlaw. Pero sa video wall, puwede namong mabalikbalik ug pakita ang pagsalop sa adlaw hangtod nga naa na mi pinakanindot nga kuha.”

“Gibati Nako nga Morag Wala Koy Gisakripisyo”

Daghan kaayong boluntaryo ug mga igsoon nga apil sa drama ang gikinahanglan sa kada episode sa Ministeryo ni Jesus. Unsay ilang gibati sa tanang paningkamot sa mga igsoon aron maatiman sila?

Si Amber, nga mibiyaheg kapin sa 700 kilometros (435 ka milya) gikan sa iyang balay sa Melbourne aron motabang sa proyekto, miingon: “Pag-abot gyod dayon nako sa airport, giabiabi ko sa mga igsoon sa Bethel. Daghang Bethelite ang nagdapit nako nga mangaon o mag-tea uban nila. Panahon sa shooting, buotan kaayo silang tanan nako maong mibati kong komportable ug gipabilhan. Daghan kaayo kog nadawat nga panalangin. Gibati nako nga morag wala koy gisakripisyo!”

Si Derek, nga nagtrabaho sa production team, miingon: “Daghan kaayong department ang mitabang namo sukad sa pagsugod ani nga proyekto. Mapasalamaton ko sa tanang igsoon nga nagsakripisyo sa ilang panahon, materyal nga mga butang, ug kusog para ani. Buotan kaayo sila ug andam gyong motabang. Gipanalanginan gyod ming tanan ni Jehova. Kombinsido ko nga importante para niya dili lang ang resulta sa among trabaho kondili kon giunsa namo ni paghimo.”

Salamat kaayo sa inyong pagsuportar niini nga proyekto pinaagi sa inyong mga donasyon, apil na kadtong gihimo pinaagi sa donate.jw.org.