KAMPANILYA

Usa ka metal nga instrumento nga kasagaran pormag-peras o samag kopa nga walay sulod, ug mobagting kon hampakon.

Ang unang paghisgot sa mga kampanilya diha sa Bibliya maoy labot sa pag-alagad sa tabernakulo diha sa basahon sa Exodo, diin ang Hebreohanong pulong nga pa·ʽamohnʹ makita sa pito ka beses. Ang sidsid sa lubos-asul nga kupo sa hataas nga saserdote gitaoran ug bulawang mga kampanilya nga gisal-angsal-angan ug mga granada nga asul, purpura, ug sanag-pula nga materyales.​—Ex 28:33-35; 39:​25, 26.

Sa Zacarias 14:20 ang Hebreohanong pulong nga metsil·lahʹ gigamit sa pagtumong sa mga kampanilya nga gitaod diha sa mga sangon sa mga kabayo. Kini naggikan sa lintunganayng pulong nga nagkahulogang “mosanting” o mobagting. (1Sa 3:11) Sanglit ang mga kampanilya sa kabayo pagakulitan sa mga pulong nga “Ang pagkabalaan iya ni Jehova,” nga ang samang mga pulong makaplagan usab diha sa “sinawng plaka” nga gitaod sa purong sa hataas nga saserdote sa Israel, kini magpakita nga ang tanan mapahinumdoman sa pagpahinumdom sa pagkabalaan ni Jehova.​—Ex 39:​30, 31; itandi ang Zac 14:21.