Mga Pangutana Gikan sa mga Magbabasa

Duna bay mahimo kon ang usa ka nagmaluyahon nga dinihogang Kristohanon dili gayod makatambong sa pagsaulog sa kongregasyon sa Panihapon sa Ginoo?

Oo. Dunay mahimo ug angayng himoon agig konsiderasyon sa usa ka dinihogang Kristohanon nga nagmaluyahon ug tingali naglubog sa banig ug busa dili makatambong sa dihang saulogon sa kongregasyon ang Memoryal sa kamatayon ni Kristo. Sa ingon niana nga kahimtang, makahimog kahikayan ang lawas sa mga ansiyano aron dunay usa ka ansiyano o laing hamtong nga Kristohanong lalaki nga makadalag simbolikong tinapay ug bino ngadto sa isigkamagtutuo niana mismong gabhiona sa dili pa mosubang ang adlaw.

Depende sa mga kahimtang, ang nagaduaw nga ansiyano o laing igsoong lalaki makahimog mugbong mga komento ug makabasag haom nga mga teksto. Iyang masundog ang sumbanan nga gipakita ni Jesus sa dihang Iyang gisugdan ang Panihapon sa Ginoo. Pananglitan, mahimong basahon ang Mateo 26:26 ug ihatag ang tinapay nga walay lebadura human sa pag-ampo. Sunod, ang nagaduaw nga igsoon makabasa sa Mateo kapitulo 26, mga bersikulo 27 ug 28, ug dayon ihatag ang bino human sa laing pag-ampo. Makahimog mugbo nga mga komento bahin sa kahulogan sa matag emblema, ug kinahanglang mohatag ug paniklop nga pag-ampo.

Siyempre, kinahanglang himoon ang tanang makataronganong paningkamot aron makatambong sa pagsaulog sa kongregasyon sa Panihapon sa Ginoo. Apan unsa may mahimo ilalom sa usa ka talagsaong kahimtang diin ang usa ka dinihogang Kristohanon may grabeng sakit, naospital, o sa ubang hinungdan dili makasaulog sa Memoryal human sa pagsalop sa adlaw sa Nisan 14? Ang maong dinihogan makapadapat sa sumbanan diha sa Moisesnong Balaod ug makasaulog niini sa pribado 30 ka adlaw sa ulahi.—Numeros 9:9-14.