Unsa Unyay Imong Umaabot?

KON ang Diyos nga Labing Gamhanan nasayod sa tanan, nahibalo sa tanang kagahapon, presente, ug umaabot, dili ba ang tanang butang gimbut-an nga mahitabong eksakto ingon sa nakita nang daan sa Diyos kanila? Kon nakitang daan sa Diyos ug gibaod ang dalan ug kataposang dulnganan sa matag tawo, tinuod bang ikaingon nga kita libre sa pagpili sa dalan sa atong kinabuhi, sa atong umaabot?

Kini nga mga pangutana gidebatehan sulod sa kasiglohan. Ang panagbangi sa gihapon nagbahin sa pangunang mga relihiyon. Ang katakos ba sa Diyos sa pagkahibalong daan sa umaabot uyon sa tawhanong kagawasan sa pagpili? Asa man kita mangita sa mga tubag?

Minilyon ka tawo sa tibuok yuta mouyon nga ang Diyos nakigkomunikar sa katawhan pinaagi sa iyang nasulat nga Pulong nga gipamulong pinaagi sa iyang mga tigpamaba, ang mga propeta. Pananglitan, ang Koran naghisgot sa mga pinadayag ingong gikan sa Diyos: ang Taurāh (Torah, ang Balaod, o lima ka basahon ni Moises), ang Zabūr (ang mga Salmo), ug ang Injīl (ang Ebanghelyo, Kristohanon Gregong Kasulatan, o “Bag-ong Tugon”), maingon man usab ang gibutyag ngadto sa mga propeta sa Israel.

Sa Kristohanon Gregong Kasulatan, atong mabasa: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang.” (2 Timoteo 3:16) Tin-aw, ang bisan unsang giya o kahayag nga atong dawaton kinahanglang magsumikad sa Diyos mismo. Nan dili ba maalamon nga susihon ang mga sinulat sa mas unang mga propeta sa Diyos? Unsay ilang gibutyag mahitungod sa atong umaabot?

Umaabot nga Gisulat nga Abante

Si bisan kinsa nga nakabasa sa Balaang Kasulatan nahibalo nga kini nasudlan sa gatosan ka tagna. Ang maong makasaysayanhong mga hitabo sama sa pagkalumpag sa karaang Babilonya, ang pagtukod pag-usab sa Jerusalem (ikaunom hangtod sa ikalimang siglo W.K.P.), ug ang pagtungha ug pagkapukan sa karaang mga hari sa Medo-Persia ug Gresya ngatanan gitagna nga detalyado. (Isaias 13:​17-19; 44:​24–45:​1; Daniel 8:​1-7, 20-22) Ang katumanan sa maong mga tagna mao ang usa sa kinalig-onan nga mga pamatuod nga ang Balaang Kasulatan sa pagkamatuod maoy Pulong sa Diyos, tungod kay ang Diyos lamang ang may gahom sa pagkakita daan ug sa pagtino kon unsay mahitabo sa umaabot. Niini nga diwa ang Balaang Kasulatan nagrekord gayod sa umaabot nga gisulat nga abante.

Ang Diyos mismo nagpahayag: “Ako ang Balaang Usa ug wala nay laing Diyos, ni adunay sama kanako; ang Usa nga nagasugid sa kataposan gikan sa sinugdan, ug gikan sa karaang panahon sa mga butang nga wala pa mahimo; ang Usa nga nag-ingon, ‘Ang akong tambag magpadayon, ug himoon ko ang tanang butang nga akong kahimut-an’ . . . Ako kining gisulti; ako usab kining pagapahinaboon. Ako kining gilaraw, ako usab kining pagahimoon.” (Isaias 46:​9-11; 55:​10, 11) Ang mismong ngalan nga gipaila sa Diyos ngadto sa iyang karaang mga propeta maoy Jehova, nga nagkahulogan sa literal nga “Iyang Gipahinabo.”a (Genesis 12:​7, 8; Exodo 3:​13-15; Salmo 83:18) Ang Diyos nagbutyag sa iyang kaugalingon ingong ang Usa nga Tigtuman sa iyang pulong, ang Usa nga kanunayng nagpahinabo sa katumanan sa iyang mga katuyoan.

Busa, ang Diyos nagagamit sa iyang gahom sa pagkahibalong daan sa pagtuman sa iyang mga katuyoan. Sagad niyang gigamit kana sa pagpasidaan sa daotan bahin sa umaabot nga paghukom maingon man usab sa paghatag ug paglaom sa kaluwasan sa iyang mga alagad. Apan ang Diyos mogamit ba niini nga gahom nga way limitasyon? Aduna bay ebidensiya sa Balaang Kasulatan bahin sa mga butang nga ang Diyos wala mahibalong daan?

Ang Diyos ba Nahibalong Daan sa Tanang Butang?

Ang tanang argumentong nagpaluyo sa predestinasyon gibase sa pagdahom nga tungod kay dili ikapangulipas nga ang Diyos adunay gahom sa pagkahibalong daan ug pagtino sa umaabot nga mga hitabo, siya gayod nahibalong daan sa tanang butang, apil na ang umaabot nga mga lihok sa matag indibiduwal. Bisan pa niana, kini ba nga pagdahom makataronganon? Ang gibutyag sa Diyos sa iyang Balaang Kasulatan nagpakita nga lahi.

Pananglitan, ang Kasulatan nag-ingon nga “ang Diyos nagsulay kang Abraham” pinaagi sa pagsugo kaniya nga ihalad ang iyang anak nga si Isaac ingong usa ka halad-nga-sinunog. Sa dihang ihalad na unta ni Abraham si Isaac, gipugngan siya sa Diyos ug miingon: “Karon naila ko nga ikaw mahadlokon sa Diyos kay wala ka magdumili sa imong anak, ang imong bugtong anak, gikan kanako.” (Genesis 22:​1-12) Mosulti kaha ang Diyos niana kon siya nahibalong daan nga si Abraham mosugot niini nga sugo? Kadto ba usa ka matinud-anong pagsulay?

Dugang pa, ang karaang mga propeta nagtaho nga ang Diyos sublisubling misulti nga ‘nagbasol’ sa butang nga iyang gibuhat o gihunahunang pagabuhaton. Pananglitan, ang Diyos miingon nga siya “nagbasol [gikan sa Hebreohanong na·chamʹ] nga iyang gihimong hari si Saul sa Israel.” (1 Samuel 15:​11, 35; itandi ang Jeremias 18:​7-10; Jonas 3:10.) Tungod kay ang Diyos hingpit, kini nga mga bersikulo wala magpasabot nga ang Diyos nasayop sa pagpili kang Saul nga mahimong unang hari sa Israel. Hinunoa, kana nagpasabot nga ang Diyos nasubo nga si Saul nawad-ag pagtuo ug wala motuman. Ang paggamit sa Diyos sa maong pulong sa paghisgot sa iyang kaugalingon mahimong walay hinungdan kon siya nahibalong daan sa mga lihok ni Saul.

Ang samang pulong makita diha sa labing karaan sa Kasulatan diin, sa paghisgot sa mga adlaw ni Noe, kini nag-ingon: “Si Jehova nagbasol nga iyang gibuhat ang mga tawo sa yuta, ug siya nasubo sa iyang kasingkasing. Dayon si Jehova miingon: ‘Pagalaglagon ko gikan sa nawong sa yuta ang mga tawo nga akong gibuhat . . . tungod kay ako nagbasol nga gibuhat ko sila.’” (Genesis 6:​6, 7) Dinhi usab, kini nagpaila nga ang mga lihok sa tawo wala gimbut-i daan sa Diyos. Ang Diyos nagbasol, nasubo, ug nasakitan pa gani, dili tungod kay ang iyang kaugalingong mga lihok sayop, apan tungod kay kaylap na ang pagkadaotan sa tawo. Ang Maglalalang nagbasol nga kinahanglang laglagon ang tanang katawhan gawas kang Noe ug iyang pamilya. Ang Diyos nagpasalig kanato: ‘Ako walay kalipay sa kamatayon sa daotan.’​—Ezequiel 33:​11; itandi ang Deuteronomio 32:​4, 5.

Busa ang Diyos ba nahibalong daan ug nagbaod pa nga makasala si Adan, maingon man usab ang daotang mga sangpotanan nga ipahinabo niini sa tawhanong pamilya? Ang atong nahisgotan nagpakita nga kini dili gayod tinuod. Dugang pa, kon ang Diyos nahibalong daan niining tanan, siya unta ang nahimong tagmugna sa kasal-anan sa dihang iyang gibuhat ang tawo, ug ang Diyos unta sa tinuyo maoy hinungdan sa tanang pagkadaotan ug pag-antos sa tawo. Tataw, dili kini uyon sa kon unsay gibutyag sa Diyos diha sa Kasulatan mahitungod sa iyang kaugalingon. Siya usa ka Diyos sa gugma ug hustisya nga nagdumot sa pagkadaotan.​—Salmo 33:​5; Proverbio 15:​9; 1 Juan 4:8.

Ang Duha ka Dulnganan sa Tawo

Ang Balaang Kasulatan wala magbutyag nga ang atong indibiduwal nga umaabot sa usa ka paagi gitino nga abante, o gimbut-an daan, sa Diyos. Hinuon, ang gibutyag niini mao nga ang Diyos nagtagna nang daan sa duha lamang ka posibleng dulnganan sa tawo. Naghatag ang Diyos sa matag tawo sa kagawasan sa pagpili nga mamili kon haing dulnganan ang buot niya. Ang propetang si Moises dugay na kanhi mideklarar ngadto sa mga Israelinhon: “Gibutang ko sa imong atubangan ang kinabuhi ug kamatayon, . . . ug pilia ang kinabuhi aron ikaw mabuhi, ikaw ug ang imong kaliwatan, sa paghigugma kang Jehova nga imong Diyos, sa pagsugot sa iyang tingog ug sa pagtapot kaniya; kay siya mao ang imong kinabuhi ug ang gitas-on sa imong mga adlaw.” (Deuteronomio 30:​19, 20) Ang propeta sa Diyos nga si Jesus daang mipasidaan: “Sulod kamo agi sa sigpit nga ganghaan; tungod kay lapad ug luag ang dalan padulong ngadto sa kalaglagan, ug daghan ang mga nanagpanulod agi niini; samtang sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang mga nakakaplag niini.” (Mateo 7:​13, 14) Duha ka dalan, duha ka dulnganan. Ang atong umaabot nag-agad sa atong kaugalingong mga lihok. Ang pagsugot sa Diyos nagkahulogan ug kinabuhi, ang pagsupak kaniya nagkahulogan ug kamatayon.​—Roma 6:23.

Ang Diyos “nagasulti sa katawhan nga silang tanan sa bisan diin angay managhinulsol. Tungod kay siya nakatakda na ug adlaw nga iyang ginatuyo nga hukman ang gipuy-ang yuta sa pagkamatarong.” (Buhat 17:​30, 31) Maingon nga ang kadaghanan sa katawhan sa adlaw ni Noe mipili sa pagsupak sa Diyos ug gilaglag, sa susama karong adlawa ang kadaghanan wala mosugot sa mga sugo sa Diyos. Bisan pa niana, wala pa tinoa sa Diyos kon kinsa ang pagalaglagon ug kon kinsa ang pagaluwason. Sa pagkamatuod, ang pulong sa Diyos nag-ingon nga siya “wala magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Bisan ang daotan kaayong mga tawo makahimo sa paghinulsol, mahimong masinugtanon, ug makahimog mga kausaban nga gikinahanglan aron maangkon ang pabor sa Diyos.​—Isaias 1:​18-20; 55:​6, 7; Ezequiel 33:​14-16; Roma 2:​4-8.

Alang niadtong mga masinugtanon, nagsaad ang Diyos ug kinabuhing walay kataposan sa usa ka malinawong paraiso, usa ka yuta nga nahinloan sa tanang pagkadaotan, kabangisan, ug gubat, usa ka kalibotan nga wala nay kagutmanan, pag-antos, sakit, ug kamatayon. (Salmo 37:​9-11; 46:​9; Isaias 2:​4; 11:​6-9; 25:​6-8; 35:​5, 6; Pinadayag 21:4) Bisan ang patay pagabanhawon ug pagahatagan ug kahigayonan sa pag-alagad sa Diyos.​—Daniel 12:​2; Juan 5:​28, 29.

“Bantayi ang usa nga walay ikasaway ug tan-awa ang matarong,” nag-ingon ang salmista, “kay ang umaabot niana nga tawo magmalinawon. Apan ang mga malapason mismo pagalaglagon sa tingob; ang umaabot sa daotang katawhan pagaputlon gayod.” (Salmo 37:​37, 38) Unsa unyay imong umaabot? Nagaagad ang tanan kanimo. Ang magpapatik niini nga magasin malipay sa pagsuplay kanimo ug dugang impormasyon nga magpaarang kanimo nga maseguro nimo ang usa ka malipayon, malinawong umaabot.

[Mga footnote]

[Blurb sa panid 6]

Ang Diyos nagagamit sa iyang gahom sa pagkahibalong daan sa pagpatuman sa iyang mga katuyoan

[Blurb sa panid 8]

Ang Diyos “wala magatinguha nga adunay malaglag apan nagatinguha nga makakab-ot ang tanan sa paghinulsol.” 2 Pedro 3:​9

[Hulagway sa panid 7]

Kon ang Diyos nahibalong daan nga si Abraham kinabubut-ong mohalad sa iyang anak, kadto ba usa ka matinud-anong pagsulay?