“Unya Iyang Gihatagan Usab ang Iyang Bana”
SI Adan presente ba sa dihang ang bitin nakigsulti kang Eva ug naglimbong kaniya sa pag-alsa batok sa Diyos? Ang Bibliya wala magpaila niini. Ang Genesis 3:6 nagtaho nga si Eva “mikuhag bunga, ug gikaon kini. Unya iyang gihatagan usab ang iyang bana sa diha nga nakauban niya.” Apan, ang ubang mga maghuhubad sa Bibliya naghatag ug lahi nga hunahuna. Ang King James Version naghubad sa tekso sa mosunod: “Siya mikuhag bunga niini, ug mikaon, ug gihatagan niya usab ang iyang bana kauban niya; ug siya mikaon.”
Ang Hebreohanong berbo nga gihubad nga “gihatagan” anaa sa imperfect tense ug nalangkit sa linain nga porma sa panumpay nga “ug” [Hebreohanon, waw], busa nagpaila ug temporaryo o lohiko nga pagkasunodsunod. Busa, ang New World Translation naghubad sa daghang pagtungha sa waw, nga nagsumpay sa sunodsunod nga mga hitabo sa Genesis 3:6, dili lamang uban sa “ug” kondili usab sa ubang transisyonal nga mga pulong, sama sa “busa,” “sa ingon niana,” ug “unya.” Busa ang New World Translation adunay malig-ong basehanan alang sa ibabaw nga paghubad.
Si Adan ba nagtan-aw lamang sa kokabildo sa iyang asawa ug sa bitin, namati sa kabakakan ug mabutangbutangong mga pulong sa dili-makitang rebelde sa likod sa bitin? Makaiikag, gisalikway sa Alemang eskolar sa Bibliya nga si J. P. Lange kining ideyaha ug mikomento: “Ang presensiya sa usa ka tawo sa panahon sa lihok sa tintasyon, bisan ang iyang pagpakahilom, dili gayod mahanduraw.” Ug sa nagbatbat sa mga pulong “kauban niya,” ang Hudiyohanong komentarista nga si B. Jacobs naghisgot nga kini “wala [magpasabot] kon kinsa ang nagtindog sa tapad niya (sa panahon sa miagi nga lihok o samtang siya nagkaon).”
Ang pakigsulti ni Eva uban sa bitin nagbutyag nga ang iyang bana nagpahibalo kaniya bahin sa sugo sa Diyos sa dili pagkaon gikan sa kahoy. (Genesis 3:3) Busa ingong ulo ni Eva, nasunod ni Adan ang responsabilidad sa pagkaulo. Gisalikway sa Yawa ang kahikayan sa Diyos bahin sa pagkaulo ug sa abtik nga paagi gipahimuslan ang kamatuoran sa pag-inusara ni Eva. Siya sa ulahi mitubag: “Ang bitin—mao ang naglimbong kanako ug busa mikaon ako.” (Genesis 3:13) Si Eva nalimbongan tungod kay siya mituo sa bakak, apan kini wala magpakamatarong sa iyang kasal-anan. Kining pasidaan nga pananglitan nagailustrar nga kita wala gayoy katarongan sa pagbuhat ug daotan diha sa mga mata ni Jehova.—1 Timoteo 2:14.