Moises nga May Sungay—Usa ka Artistikong Katingad-anan

KON nakabisita ka na sa Italya, tingali nakakita ka sa kang Michelangelo nga iladong estatuwa ni Moises nga naglingkod nga karon anaa sa Simbahan sa St. Peter in Chains, sa Roma. Pagkakatingalahan tan-awon ang ika-16 nga siglong iskultura, kay gilarawan niini si Moises nga dunay mga sungay nga mituybo sa iyang ulo! Sa pagkamatuod, ubay-ubayng mga tiglilok naglarawan kang Moises nga sungayan. Ngano man? Ang Bibliya naghatag ba ug basehanan alang niini nga ideya?

Ang Latin Vulgate nga hubad sa Bibliya nagsugilon kanato nga human sa pagpakigsulti sa Diyos diha sa Bukid sa Sinai, ang nawong ni Moises “nasungayan.” (Exodo 34:29, 30, 35; itandi ang Douay Version.) Ang Vulgate napopular sa dakong bahin sa Kakristiyanohan ug busa naimpluwensiyahan sa paagi sa pagsabot sa mga kasulatan.

Apan, ang Hebreohanong gihubad “nasungayan” nagkahulogan usab nga ‘misidlak’ o ‘misilak.’ (Tan-awa ang potnot sa Douay Version diha sa Exodo 34:29.) Sumala sa Theological Wordbook of the Old Testament, ang pulong “nagpasabot sa porma sa usa ka sungay[mga] inay sa tinuod nga sungay.” Ug kon tan-awon sa letrato, ang sidlak sa adlaw sa aktuwal parehas sa mga sungay.

Ang kamatuoran nga ang nawong ni Moises misidlak mapatin-aw, kay mao pay pag-agi sa himaya ni Jehova. (Exodo 33:22; 34:6, 7) Gilig-on kini ni Pablo nga mao ang tukma nga pagsabot, nga nagsulat mahitungod “sa himaya“ ni Moises, dili sa iyang “mga sungay.”—2 Corinto 3:7.

Busa ang tukmang pagsabot sa Biblikanhong terminolohiya motultol sa dugang matuhopong kahibalo sa taho sa Bibliya. Busa, ang mga sungay sa iladong estatuwa ni Michelangelo kang Moises sa yano maoy usa ka artistikong katingad-anan nga nagagikan sa dugay nang natul-id nga sayop nga paghubad.

[Picture Credit Line sa panid 7]

Gipasukad sa Short History of Art