Mga Pangutana Gikan sa mga Magbabasa

◼ Human nga nakasala si David ug Bathsheba, nganong namatay ang ilang anak, sanglit ang Deuteronomio 24:16 ug Ezekiel 18:20 nag-ingon man nga ang anak dili mamatay tungod sa kasal-anan sa iyang amahan?

Si David ug Bathsheba mga minyo sa nanapaw sila ug siya namabdos. Ang ilang panapaw dakong sala nga arang kasilotan ug kamatayon sumala sa balaod sa Diyos. (2 Samuel 11:1-5; Deuteronomio 5:18; 22:22) Busa kon gitugotan pa sila sa Diyos nga atubangon sa mga tawo sumala sa Kasugoan, ang anak nga nagtubo sa iyang tagoangkan mamatay unta uban sa iyang inahan. Apan mipili si Jehova sa pag-atiman sa ilang kaso sa lahi nga paagi, kay sa pagkatinuod “ang Maghuhukom sa tibuok yuta” may katungod sa pagbuhat niini.​—Genesis 18:25.

Sa giatubang sa iyang sala, si David midawat: “Ako nakasala batok kang Jehova.” Dayon ang tigpamaba ni Jehova misulti kang David: “Palabyon ni Jehova ang imong sala. Ikaw dili mamatay.” (2 Samuel 12:13) Gikaloy-an si David tungod sa pakigtugon sa Gingharian. Dugang pa, sanglit makabasa man si Jehova sa mga kasingkasing, hayan iyang natimbangtimbang ang tinuod nga paghinulsol ni David ug mihukom nga adunay basehanan sa paghatag kaluoy kang David ug Bathsheba. Apan sila dili makalingkawas sa tanang resulta sa ilang kasal-anan. Sila gisultihan: “Sanglit kay wala ka magpakitag pagtahod kang Jehova pinaagi niining buhata, ang bata mismo, nga matawo kanimo, mamatay gayod.”​—2 Samuel 12:14.

‘Mihatag ug hampak’ ang Diyos sa ilang bata nga dili angayng matawo diha kanila; ang bata nagkasakit ug namatay. Hayan hunahunaon sa tawo karon ang kamatayon sa bata ug mobati nga mapintas ra kaayo ang silot nga gipakanaog. Apan, maayong ibutang sa hunahuna nga kon ang panapaw giatiman ug napamatud-an atubangan sa tawhanong mga maghuhukom ilalom sa Kasugoan, ang tulo (David, Bathsheba, ug ang anak sa iyang tagoangkan) mawad-an unta sa ilang mga kinabuhi. Kon tan-awon nianang kahayaga, ang pagtugot sa Diyos sa duha kanila nga maluwas maoy pagpakitag kaluoy. Lain pa, karong ulahing petsa wala nato mabatoni ang tanang kamatuoran, sama sa impormasyon sa panglawas sa masuso human dayon sa iyang pagkatawo. Apan, atong madawat ang paagi sa pag-atiman sa Diyos sa maong butang, masaligon nga walay pagpinig ang iyang gihimo, maalamon, ug matarong. Sama sa gidawat ni David sa ulahi: “Kay bahin sa matuod nga Diyos, ang iyang dalan hingpit.”​—2 Samuel 22:31; itandi sa Job 34:12; Isaias 55:11.

Kaharmoniya kana sa reaksiyon ni David sa iyang nadunggan ang hukom sa Diyos. Sa nagkasakit ang bata, nagbangotan ug nagpuasa si David. Apan sa miagpas ang kamatayon, gipabilhan ni David nga natapos na kining butanga. (2 Samuel 12:22, 23) Busa, misalig sa paghukom sa Diyos, gilipay ni David si Bathsheba (karon legal nga niyang asawa), nga nagpasalig kaniya nga ang ilang relasyon sa kaminyoon magpadayon. Sa ulahi natawo si Solomon diha kanila ug nahimong manununod ni David.

Ang pag-atiman sa Diyos nianang kasoha kinahanglang dili latawon nga nagkasumpaki diha sa Deuteronomio 24:16 o Ezekiel 18:20.

Ingong bahin sa Kasugoan, ang Diyos nagmando: “Ang mga amahan dili pagapatyon tungod sa mga anak, ni ang mga anak pagapatyon tungod sa mga amahan. Ang tagsatagsa pagapatyon tungod sa kaugalingong sala.” (Deuteronomio 24:16) Kadtong mga giyaha maoy alang sa mga maghuhukom nga Israelinhon nga nag-atiman sa legal nga mga kaso. Ang mga maghuhukom dili makabasa sa mga kasingkasing. Ilang atimanon ang matag tawo sumala sa iyang kaugalingong batasan segun sa napamatud-ang mga kamatuoran.

Maingon man, ang Ezekiel 18:20 nag-ingon: “Ang anak dili magapas-an sa kasal-anan sa amahan, ug ang amahan dili magapas-an sa kasal-anan sa anak. Ang pagkamatarong sa matarong anha kaniya, ug ang pagkadaotan sa daotan anha kaniya.” Ilabinang gipunting niini ang mga edad-edaran. Ang konteksto naghisgot sa usa ka anak nga nakakita sa pagkadaotan sa amahan apan midumili sa pakigbahin niini; hinunoa, gisunod sa anak ang mga hukom ni Jehova ug naglakaw sa Iyang mga kabaloran. Kining matanga sa anak tipigang buhi kon mamatay ang iyang amahan.​—Ezekiel 18:14-17.

Apan, dili ikalimod nga mag-antos ang mga anak sa mga resulta tungod sa mga buhat sa ilang mga ginikanan. Ang mga ginikanan nga usikan o buangbuang mohatag kakabus sa tibuok pamilya. O hunahunaa ang epekto diha sa kabataan kon bilanggoon ang ginikanan tungod sa kriminal nga buhat. Bisan ang mga katalagman nga gipakanaog sa Diyos diha sa mga Israelitas tungod sa ilang pagkadaotan nakaapekto sa mga anak sa maong panahon. (Deuteronomio 28:15, 20-32; Ezekiel 8:6-18; 9:5-10) Busa, giagda sa Diyos ang iyang katawhan: “Pilia ang kinabuhi aron mabuhi ikaw, ikaw ug ang imong kaliwatan, sa paghigugma kang Jehova nga imong Diyos, sa pagsugot sa iyang tingog ug sa pagtapot kaniya; kay siya mao ang imong kinabuhi ug ang gitas-on sa imong mga adlaw.”​—Deuteronomio 30:19, 20.

Busa, ang kaagi ni David ug Bathsheba nagpasiugda ngadto sa mga ginikanan nga ang ilang batasan dakog epekto sa ilang mga anak. Kon ang mga ginikanan ‘mahadlokon sa ngalan sa Diyos, ang adlaw sa pagkamatarong mosidlak’ sa pagpanalangin sa tibuok pamilya.​—Malaquias 4:2.