Magmaya Diha Kang Jehova!
“Pagmaya kanunay diha sa Ginoo. Sa makausa pa ako magaingon, Pagmaya!”—FILIPOS 4:4.
1. Nganong kita mahibulong kon unsay gipasabot ni Pablo sa dihang siya miingon nga ang mga Kristohanon kinahanglang magmaya kanunay?
KARONG mga adlawa, ang mga katarongan sa pagmaya daw diyutay ra. Ang mga tawo nga hinimo sa abog, bisag tinuod nga mga Kristohanon, makaatubang ug mga kahimtang nga magpahinabog kaguol—sama sa pagkawalay-trabaho, dili-maayong panglawas, kamatayon sa mga minahal, mga suliran sa personalidad, o pagsupak gikan sa dili-magtutuong mga membro sa pamilya o kanhing mga higala. Busa unsaon nato pagsabot ang tambag ni Pablo nga, “Pagmaya kanunay”? Tungod sa dili-maayo ug masulayong mga kahimtang nga kitang tanan makigbisog, posible pa ba kini? Ang paghisgot sa konteksto niining mga pulonga motabang kanato sa pagtin-aw sa kahimtang.
Magmaya—Ngano ug sa Unsang Paagi?
2, 3. Unsa ang importansiya sa kangaya, ingon sa giilustrar sa mga kaso ni Jesus ug sa karaang mga Israelinhon?
2 “Pagmaya kanunay diha sa Ginoo. Sa makausa pa ako magaingon, Pagmaya!” Kini tingali magpahinumdom kanato sa mga pulong nga gitumong sa mga Israelinhon mga 24 ka tuig kanhi: “Ang kangaya ni Jehova mao ang imong kuta,” o sumala sa hubad sa Moffatt: “Ang pagmaya diha sa Walay-kataposan mao ang imong kusog.” (Nehemias 8:10) Ang kangaya nagtaganag kusog ug maoy sama sa usa ka kuta diin ngadto niana ang usa makadangop alang sa kahupayan ug panalipod. Ang kangaya nakatabang bisan gani sa hingpit nga tawo nga si Jesus sa paglahutay. “Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.” (Hebreohanon 12:2) Tin-aw, ang pagmaya bisan pa sa mga kalisdanan maoy hinungdanon alang sa kaluwasan.
3 Sa wala pa mosulod sa Yutang Saad, ang mga Israelinhon gisugo: “Magkalipay ka sa tanan nga kaayohan nga gihatag ni Jehova nga imong Diyos kanimo ug sa imong panimalay, ikaw ug ang Levihanon ug ang dumuloong nga anaa sa taliwala nimo.” Ang mga sangpotanan sa pagkapakyas sa pag-alagad kang Jehova uban ang pagmaya mahimong grabe. “Kining tanang tunglo moabot kanimo ug magalutos kanimo ug modangat kanimo hangtod nga ikaw malaglag . . . tungod kay wala ka mag-alagad kang Jehova nga imong Diyos uban sa pagmaya ug kangaya sa kasingkasing tungod sa kadagaya sa tanang butang.”—Deuteronomio 26:11; 28:45-47.
4. Nganong kita hayan nga mapakyas sa pagmaya?
4 Busa, kinahanglanon diay nga magmaya ang dinihogang nahibilin karong adlawa ug ang ilang “ubang karnero” nga mga kauban! (Juan 10:16) Si Pablo, pinaagi sa pagsubli sa iyang tambag, “sa makausa pa ako moingon,” nagpasiugda sa kahinungdanon sa pagmaya tungod sa tanang kaayo nga nabuhat ni Jehova kanato. Kita ba nagmaya? O tuman ba kaayo kita ka puliki sa matag-adlaw nga rutina sa kinabuhi nga usahay makalimot kita sa daghan natong katarongan sa pagmaya? Ang mga suliran ba nagpatongpatong na pag-ayo nga kini sila nakasalipod na sa atong pagtutok sa Gingharian ug sa mga panalangin niini? Tugotan ba nato ang ubang mga butang—pagsupak sa mga balaod sa Diyos, pagsalikway sa balaang mga prinsipyo, o pagpasagad sa Kristohanong mga katungdanan—nga mohikaw kanato sa atong kangaya?
5. Nganong malisdan ang dili-makataronganong tawo sa pagmaya?
5 “Ipaila ang inyong pagkamakataronganon ngadto sa tanang tawo. Haduol na ang Ginoo.” (Filipos 4:5) Ang usa ka dili-makataronganong tawo kulang sa pagkatimbang. Tingali mapakyas siya sa pag-atiman sa iyang panglawas sa hustong paagi, nga wala-kinahanglanang nagapailalom sa iyang lawas sa sobra nga kabug-at o kabalaka. Tingali wala siya makakat-on sa pagdawat sa iyang mga limitasyon ug sa pagkinabuhi uyon niana. Tingali taas ra kaayo ang iyang mga tumong ug unya mosulay sa pagkab-ot niana bisan unsa pay mahitabo. O gamiton tingali niya ang iyang mga limitasyon ingong pasangil sa paghinayhinay o sa pagtinapolan. Nawad-an sa pagkatimbang ug nahimong dili makataronganon, malisdan siya sa pagmaya.
6. (a) Unsay angayng makita sa kaubang mga Kristohanon diha kanato, ug kanus-a lamang nga ingon niini ang kahimtang? (b) Sa unsang paagi ang mga pulong ni Pablo sa 2 Corinto 1:24 ug Roma 14:4 motabang kanato nga mahimong makataronganon?
6 Bisan pag ang mga magsusupak mag-isip kanato nga mga panatiko, angay nga makita kita kanunay sa kaubang mga Kristohanon nga makataronganon. Ug sila makahimo niana kon kita timbang ug dili magdahom ug kahingpitan gikan sa atong kaugalingon o kaha gikan sa uban. Labaw sa tanan, kinahanglang likayan nato nga magpahamtang ug mga palas-anon sa uban nga lapas sa kon unsay gisugo sa Pulong sa Diyos. Si apostol Pablo nag-ingon: “Dili nga kami mao ang mga agalon sa inyong pagtuo, kondili kami mga isigkamagbubuhat alang sa inyong kangaya.” (2 Corinto 1:24) Ingong usa ka Pariseo kanhi, nasayod pag-ayo si Pablo nga ang estriktong mga lagda nga ginahatag ug ginapatuman niadtong anaa sa awtoridad magwagtang sa kangaya, samtang ang makatabang nga mga sugyot nga ginahatag sa kaubang mga magbubuhat makapauswag niana. Ang kamatuoran nga “ang Ginoo haduol na” angay magpahinumdom sa makataronganong tawo nga dili nato ‘hukman ang sulugoon sa balay sa lain. Ngadto sa iyang kaugalingong agalon siya magbarog o mapukan.’—Roma 14:4.
7, 8. Nganong ang mga Kristohanon kinahanglang magdahom nga adunay mga suliran, apan sa unsang paagi posible nga makapadayon sila sa pagmaya?
7 “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.” (Filipos 4:6) Kita karon nakasinati sa “makuyaw nga mga panahong lisod sagubangon” nga gisulat ni Pablo. (2 Timoteo 3:1-5) Busa ang mga Kristohanon kinahanglang magdahom nga mag-atubang sila ug mga suliran. Ang mga pulong ni Pablo nga “pagmaya kanunay” wala magsalikway sa posibilidad nga ang usa ka maunongong Kristohanon tingali may panagsang pagbati sa pagkawalay-paglaom o kaluya. Sa kaugalingong kahimtang ni Pablo, siya matinud-anong miangkon: “Kami ginapiit sa tanang paagi, apan dili hagip-ot nga dili na makalihok; kami nalibog, apan dili bug-os nga walay kalingkawasan; kami ginalutos, apan wala biyaing nag-ungaw sa kapildihan; kami nangatumba, apan wala malaglag.” (2 Corinto 4:8, 9) Hinunoa, ang kangaya sa usa ka Kristohanon nagahupay ug sa ngadtongadto nagabuntog sa lumalabay nga kabalaka ug kaguol. Kini naghatag ug gikinahanglang kusog aron mopadayon nga may determinasyon, nga dili gayod makalimot sa daghang katarongan sa pagmaya.
8 Sa dihang motungha ang mga suliran, bisan unsa kana, ang mangayaong Kristohanon mapainubsanong maghangyo sa tabang ni Jehova pinaagi sa pag-ampo. Siya dili magpadala sa hilabihang kabalaka. Human mabuhat kon unsay makataronganong mahimo niya aron sa pagsulbad sa suliran, iyang itugyan ang sangpotanan diha sa mga kamot ni Jehova nga kaharmoniya sa pagdapit nga: “Itugyan mo kang Jehova ang imong palas-anon, ug siya magasapnay kanimo.” Kasamtangan, ang Kristohanon padayon nga magpasalamat kang Jehova tungod sa tanan Niyang kaayo.—Salmo 55:22; tan-awa usab ang Mateo 6:25-34.
9. Sa unsang paagi ang kahibalo sa kamatuoran maghatag ug kalinaw sa hunahuna, ug unsang maayong epekto niini diha sa usa ka Kristohanon?
9 “Ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:7) Ang kahibalo sa kamatuoran sa Bibliya magpagawas sa hunahuna sa Kristohanon gikan sa kabakakan ug motabang kaniya sa pag-ugmad ug maayo nga mga laraw sa panghunahuna. (2 Timoteo 1:13) Busa siya natabangan sa paglikay sa sayop o dili-maalamong mga kinaiya nga makadaot sa malinawong relasyon sa uban. Inay maluya tungod sa inhustisya ug pagkadaotan, iyang ibutang ang iyang pagsalig kang Jehova sa pagsulbad sa mga suliran sa katawhan pinaagi sa Gingharian. Ang maong kalinaw sa hunahuna magabantay sa iyang kasingkasing, magahupot nga putli sa iyang mga motibo, ug magagiya sa iyang hunahuna sa dalan sa pagkamatarong. Ang putli nga mga motibo ug hustong panghunahuna, sa baylo, magtagana ug daghang katarongan sa pagmaya, bisan pa sa mga suliran ug mga pagpit-os nga gipahinabo sa magubot nga kalibotan.
10. Ang tinuod nga kalipay masinati lamang pinaagi sa pagsulti o paghunahuna mahitungod sa unsa?
10 “Sa kataposan, mga igsoon, bisan unsang mga butang matuod, bisan unsang mga butang nga ugdang talagdon, bisan unsang mga butang matarong, bisan unsang mga butang putli, bisan unsang mga butang hiligugmaon, bisan unsang mga butang nga ginaingong maayo, bisan unsang pagkahamili nga anaa ug bisan unsang dalayegong butang nga anaa, padayong isipa kining mga butanga.” (Filipos 4:8) Ang usa ka Kristohanon dili mahimuot sa pagsulti ug paghunahuna mahitungod sa daotang mga butang. Kini awtomatikong nagsalikway sa kadaghanang kalingawan nga gitanyag sa kalibotan. Walay makahupot sa Kristohanong kangaya kon iyang pun-on ang iyang hunahuna ug kasingkasing sa mga bakak, binuang nga mga panistis, ug mga butang nga dili matarong, imoral, dili maayog kinaiya, madinumtanon, ug salawayon. Sa yanong pagkasulti, walay makakaplag ug tinuod nga kangaya pinaagi sa pagpuno sa iyang hunahuna ug kasingkasing sa kahugawan. Sa dunot nga kalibotan ni Satanas, pagkamakapalig-on ang pagkahibalo nga ang mga Kristohanon adunay daghan kaayong butang nga hunahunaon ug hisgotan!
Daghan Kaayong Katarongan sa Pagmaya
11. (a) Unsay dili pakamenoson, ug nganong dili? (b) Unsay epekto sa pagtambong sa usa ka internasyonal nga kombensiyon diha sa usa ka delegado ug sa iyang asawa?
11 Sa dihang magahisgot sa mga katarongan sa pagmaya, dili nato kalimtan ang atong internasyonal nga panag-igsoonay. (1 Pedro 2:17) Bisan tuod ang nasodnon ug etnikong mga pundok sa kalibotan nagpahayag ug hilabihang pagdumot sa usag usa, ang katawhan sa Diyos nasuod pag-ayo diha sa gugma. Ang ilang panaghiusa ilabinang makita diha sa internasyonal nga mga kombensiyon. Bahin sa usa nga gihimo niadtong 1993 sa Kiev, Ukraine, usa ka delegado gikan sa Tinipong Bansa misulat: “Ang mga luha sa kalipay, ang magilakong mga mata, ang walay kataposang paggaksanay nga daw pamilya, ug ang mga pangomosta nga gipadala latas sa natad nga dulaanan pinaagi sa mga pundok nga nagpakayab sa mabulokong mga payong ug mga panyo maoy mga pamatuod sa teokratikanhong panaghiusa. Ang among mga kasingkasing mapagarbohon kaayo sa nahimo ni Jehova sa milagrosong paagi diha sa tibuok-kalibotang panag-igsoonay. Kini nakatandog kaayo sa akong asawa ug kanako ug nagdugang ug bag-ong kahulogan sa among pagtuo.”
12. Sa unsang paagi ang Isaias 60:22 natuman gayod sa atong atubangan?
12 Pagkamakapalig-on alang sa mga Kristohanon karong adlawa ang pagkakita sa mga tagna sa Biblya nga natuman gayod sa ilang atubangan! Tagda, pananglitan, ang mga pulong sa Isaias 60:22: “Ang usa nga diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako mismo, si Jehova, magapadali niini sa iyang panahon.” Sa pagkatukod sa Gingharian niadtong 1914, 5,100 lamang—usa nga diyutay—ang aktibong nagsangyaw. Apan sulod sa milabayng lima ka tuig, ang gidaghanon sa tibuok-kalibotang panag-igsoonay nagauswag sa aberids nga gidaghanon nga 5,628 ka bag-ong bawtismadong mga Saksi matag semana! Niadtong 1993, ang kinatas-ang ihap nga 4,709,889 ka aktibong mga ministro nakab-ot. Hunahunaa lang! Kini nagkahulogan nga “ang usa nga diyutay” sa 1914 sa literal hapit nang mahimong “usa ka libo”!
13. (a) Unsay nagakahitabo sukad sa 1914? (b) Sa unsang paagi ang mga Saksi ni Jehova nagatuman sa prinsipyo sa mga pulong ni Pablo sa 2 Corinto 9:7?
13 Sukad niadtong 1914 ang Mesiyanikong Hari nagahari sa taliwala sa iyang mga kaaway. Ang iyang pagmando gipaluyohan sa andam nga tawhanong mga sumusunod kinsa nagaamot ug panahon, kusog, ug salapi aron sa pagpadayon sa tibuok-kalibotang pagsangyawng buluhaton maingon man sa internasyonal nga kampaniya sa pagpanukod. (Salmo 110:2, 3) Ang mga Saksi ni Jehova nagamaya nga ang amot nga salapi ginahimo aron mahuman kining maong mga kalihokan, bisan tuod ang salapi panagsa ra kaayong hisgotan sa ilang mga tigom.a (Itandi ang 1 Cronicas 29:9.) Ang tinuod nga mga Kristohanon dili na kinahanglang aghaton sa paghatag; ilang giisip nga usa ka pribilehiyo ang pagpaluyo sa ilang Hari sa gilapdon nga gitugot sa ilang mga kahimtang, ang matag usa “sumala sa iyang gikahukom diha sa iyang kasingkasing, dili nga kontragusto o pinugos.”—2 Corinto 9:7.
14. Unsang kahimtang taliwala sa katawhan sa Diyos ang nahimong dayag sukad niadtong 1919, nga nagahatag kanila ug unsang katarongan sa pagmaya?
14 Ang gitagna nga pagpasig-uli sa matuod nga pagsimba taliwala sa katawhan sa Diyos miresulta sa paglalang sa usa ka espirituwal nga paraiso. Sukad niadtong 1919 kana mauswagong mikaylap hangtod sa mga utlanan niini. (Salmo 14:7; Isaias 52:9, 10) Ang resulta? Ang matuod nga mga Kristohanon nakasinati ug “kasadya ug pagmaya.” (Isaias 51:11) Ang misangpot nga maayong bunga maoy pamatuod kon unsay mapalampos sa balaang espiritu sa Diyos pinaagi sa dili-hingpit nga mga tawo. Ang tanang pagdayeg ug pasidungog iya ni Jehova, apan unsay labaw pang pribilehiyo kay sa mahimong kaubang magbubuhat sa Diyos? (1 Corinto 3:9) Si Jehova gamhanan kaayo nga ipahinabo niya ang mga bato, kon kinahanglanon, nga mosinggit sa mensahe sa kamatuoran. Bisan pa niana, siya wala mogamit niining paagiha kondili, hinuon, nagapalihok sa andam nga mga linalang nga hinimo sa abog sa pagtuman sa iyang kabubut-on.—Lucas 19:40.
15. (a) Unsang modernong mga hitabo ang maikagon natong ginabantayan? (b) Unsang hitabo ang atong gipaabot nga may pagmaya?
15 Tugob sa katingala, ang mga alagad ni Jehova karon nagabantay sa mga hitabo sa kalibotan samtang kini nagalangkit sa talagsaong mga tagna sa Bibliya. Ang mga nasod naningkamot pag-ayo—apan napakyas—sa pagkab-ot ug malungtarong kalinaw. Ang mga hitabo nagpugos kanila sa paghangyo sa Hiniusang Kanasoran nga organisasyon nga molihok diha sa masamok nga mga dapit sa kalibotan. (Pinadayag 13:15-17) Kasamtangan, ang katawhan sa Diyos nagalantaw na uban ang dakong kahinam sa usa sa labing mangayaong mga hitabo nga mahitabo sukad masukad, usa nga nagakahiduol kada adlaw. “Magmaya kita ug magngaya sa hilabihan, ug ihatag nato kaniya ang himaya, tungod kay ang kasal sa Kordero miabot na ug ang iyang asawa nakaandam na sa iyang kaugalingon.”—Pinadayag 19:7.
Pagsangyaw—Usa ka Kabug-at o Usa ka Kangaya?
16. Iilustrar kon sa unsang paagi ang pagkapakyas sa pagbuhat kon unsay nakat-onan makawala sa kangaya sa usa ka Kristohanon.
16 “Ang mga butang nga inyong nakat-onan ingon man nadawat ug nadungog ug nakita may kalabotan kanako, buhata kini sila; ug ang Diyos sa kalinaw magauban kaninyo.” (Filipos 4:9) Pinaagi sa pagbuhat kon unsay ilang nakat-onan, ang mga Kristohanon makadahom sa pagdawat sa mga panalangin sa Diyos. Usa sa labing hinungdanong mga butang nga ilang nakat-onan mao ang panginahanglan sa pagsangyaw sa maayong balita ngadto sa uban. Sa pagkamatuod, kinsay makapahimulos ug kalipay sa hunahuna o magmangayaon kon ihikaw niya ang impormasyon gikan sa matinud-anog kasingkasing nga mga tawo kansang kinabuhi nagadepende sa pagpaminaw niana?—Ezekiel 3:17-21; 1 Corinto 9:16; 1 Timoteo 4:16.
17. Nganong ang atong pagsangyawng kalihokan kanunayng usa ka tuboran sa kangaya?
17 Pagkamakalilipay nga makita ang samag-karnerong katawhan nga andam nga mokat-on mahitungod kang Jehova! Sa pagkatinuod, kadtong nagaalagad uban ang hustong motibo kanunayng makakaplag sa pag-alagad sa Gingharian ingong tuboran sa kangaya. Kini tungod kay ang pangunang katarongan sa pagkahimong Saksi ni Jehova mao ang pagdayeg sa Iyang ngalan ug pagbayaw sa Iyang posisyon ingong Soberanong Magmamando. (1 Cronicas 16:31) Ang tawo nga nagaila niining kamatuorana magmaya bisan dihang ang mga tawo dili-maalamong mosalikway sa maayong balita nga iyang gidala. Siya nasayod nga ang pagsangyaw sa mga dili-magtutuo sa pila ka adlaw matapos; ang pagdayeg sa ngalan ni Jehova magapadayon hangtod sa hangtod.
18. Unsa ang nagpalihok sa usa ka Kristohanon sa pagbuhat sa kabubut-on ni Jehova?
18 Ang matuod nga relihiyon magpalihok niadtong nagtuman niana sa pagbuhat sa mga butang nga gikinahanglan ni Jehova, dili tungod kay kinahanglan nilang buhaton, kondili tungod kay buot nila. (Salmo 40:8; Juan 4:34) Daghang tawo ang nalisdan sa pagsabot niini. Usa ka babaye kas-a miingon sa usa ka Saksi nga miduaw kaniya: “Abi nimo, angay kang dayegon. Dili gayod ako mamalaybalay nga magasangyaw bahin sa akong relihiyon sama sa imong ginabuhat.” Mapahiyomong mitubag ang Saksi: “Nasabtan nako ang imong gibati. Sa wala pa ako mahimong usa sa mga Saksi ni Jehova, dili ko nimo mapaadto sa ubang mga tawo nga maghisgot bahin sa relihiyon. Apan karon buot ko.” Ang babaye naghinuktok sa makadiyut ug unya mihinapos: “Dayag nga ang inyong relihiyon may ikahatag nga wala sa akoa. Tingali kinahanglan kong magsusi.”
19. Nganong panahon na karon sa pagmaya sukad masukad?
19 Ang 1994 nga tinuig nga teksto, nga makita sa atong mga Kingdom Hall, padayong nagpahinumdom kanato: “Sumalig kang Jehova sa bug-os mong kasingkasing.” (Proverbio 3:5) May mas dako pa bang katarongan sa pagmaya kay sa pagkahimong makabutang sa atong pagsalig kang Jehova, ang atong kuta kang kinsa kita makadangop? Ang Salmo 64:10 misaysay: “Magmaya ang matarong diha kang Jehova ug modangop diha kaniya.” Dili kini panahon sa pagduhaduha o sa pag-undang. Ang matag bulan nga nagalabay nagapaduol kanato sa katumanan sa gipangandoy sa mga alagad ni Jehova nga makita sukad pa sa mga adlaw ni Abel. Karon na ang panahon sa pagsalig kang Jehova uban sa tibuok natong kasingkasing, nga nasayod nga daghan kaayo kitag mga katarongan sa pagmaya kay sukad masukad!
[Footnote]
a Sa mga kombensiyon ug kas-a sa usa ka bulan diha sa mga kongregasyon, ang usa ka mubo nga kuwenta basahon nga nagapakita kon pila ang nadawat nga boluntaryong mga amot maingon man ang mga galastohan. Usahay magpadala ug mga sulat nga nagpahibalo kon giunsa paggamit ang maong mga amot. Busa ang tanan gipahinumdoman sa pinansiyal nga kahimtang sa tibuok-kalibotang buluhaton sa mga Saksi ni Jehova.
Unsaon Nimo Pagtubag?
◻ Ngano, sumala sa Nehemias 8:10, nga kita kinahanglang magmaya?
◻ Sa unsang paagi ang Deuteronomio 26:11 ug 28:45-47 nagpakita sa kahinungdanon sa pagmaya?
◻ Sa unsang paagi ang Filipos 4:4-9 motabang kanato nga kanunayng magmaya?
◻ Unsang katarongan sa pagmaya ang gihatag sa 1994 tinuig nga teksto kanato?
[Hulagway sa panid 16]
Ruso ug Alemang mga Saksi nagmaya nga nahimong bahin sa usa ka internasyonal nga panag-igsoonay
[Hulagway sa panid 17]
Ang pag-ambit sa kamatuoran sa uban maoy usa ka hinungdan sa pagmaya