Himayaa ang Balaang Ngalan ni Jehova!
“Ang akong baba magasulti sa pagdayeg kang Jehova; ug ipahimaya sa tanan nga unod ang iyang balaang ngalan ngadto sa panahong walay tino, bisan sa walay kataposan.”—SALMO 145:21.
1, 2. (a) Sa unsang paagi gihagit ni Satanas ang pagmando sa Diyos? (b) Unsang mga pangutana ang gibangon mahitungod sa Salmo 145:11-21?
SI Jehova sa pagkamatuod mao ang Soberano sa Uniberso. Apan gihagit ni Satanas ang pagkamatarong ug ang pagkatinuod sa pagmando sa Diyos. (Genesis 2:16, 17; 3:1-5) Gihagit usab sa Yawa ang integridad sa tanang mga alagad sa Diyos sa langit ug sa yuta. (Job 1:6-11; 2:1-5; Lucas 22:31) Busa si Jehova nagtugot ug panahon alang sa tanang intelehenting mga linalang nga makakita sa daotang bunga sa pag-alsa batok sa iyang pagmando ug sa pagpakita kon diin sila nagabarog diha niining mga isyuha.
2 Ang Salmo 145 motabang kanato sa pagbarog nga malig-on alang sa pagmando sa Diyos. Sa unsang paagi? Unsay giingon ni David bahin sa pagkahari ni Jehova? Ug sa unsang paagi gitagad sa Diyos ang mga dumadapig niini? Ang makatabang nga mga tubag makita diha sa Salmo 145:11-21.
Hisgoti ang Pagkahari ni Jehova
3. Kon ang pagkahari ni Jehova hiligugmaon kanato, unsay atong buhaton?
3 Ang pagmando ni Jehova hinungdanon kaayo alang kang David, kinsa miingon: “Mahitungod sa himaya sa imong pagkahari sila magahisgot, ug bahin sa imong gahom sila managsulti, aron nga ang imong mga buhat nga gamhanan igapadayag ngadto sa mga anak sa tawo ug ang himaya sa pagkahalangdon sa iyang pagkahari.” (Salmo 145:11, 12) Ang mga tawo mohisgot ug mga butang nga makapainteres kanila. Sa ingon niana mohisgot ang usa ka tawo bahin sa iyang pamilya, sa iyang balay, sa iyang mga pananom. “Ang maayong tawo magapagulag maayo gikan sa maayong bahandi sa iyang kasingkasing,” miingon si Jesus. (Lucas 6:45) Kon ang pagmando sa Diyos bililhon sa atong kasingkasing, kita moampo sa iyang Gingharian nga moabot, ug atong isugid sa uban ang hustisya, kalinaw, ug pagkamatarong nga mangibabaw ubos sa pagmando niini. Atong dayegon si Jehova ingon nga “Hari sa walay kataposan,” ug atong ipahayag ang bahin sa kapahayagan sa iyang pagkasoberano pinaagi sa Mesiyanikong Gingharian diha sa mga kamot sa iyang pinalanggang Anak, si Jesu-Kristo. (Pinadayag 15:3; Isaias 9:6, 7) Pagkadakong pribilehiyo ang pagpahayag bahin sa langitnong himaya sa pagkahari ni Jehova, nga sa dili madugay ikapabanaag diha sa katahom sa usa ka yutan-ong paraiso nga puno sa hingpit malipayong mga linalang!—Lucas 23:43.
4. Kanus-a nga kita may panahon sa pagsulti bahin sa “pagkagamhanan,” ni Jehova ug sa unsang paagi kita gipalig-on sa maong kalihokan?
4 Ang pagpabili moagda usab kanato nga mosulti mahitungod sa “pagkagamhanan” ni Jehova. Bisan tuod “siya hataas sa gahom,” siya dili moabusar niana. (Job 37:23) Iyang gigamit ang iyang gahom sa paglalang sa yuta ug sa katawhan ug gamiton kini sa paglaglag sa daotan. Kita adunay higayon sa pagsulti bahin sa pagkagamhanan sa Diyos sa dihang atong imantala ang maayong balita. Ug dili ba kita mapasalamaton nga kining kinalabwang Tinubdan sa kalig-on nagahatag kanato ug gahom sa pagbuhat niining buluhatona? (Isaias 40:29-31) Oo, ingong mga Saksi ni Jehova, kita ginapalig-on diha sa balaang pag-alagad pinaagi sa kusog ug espiritu sa Diyos. Mao lamang kining paagiha nga ginamantala ang mensahe sa Gingharian nga may katingalahang kalamposan sa tibuok nga yuta.—Salmo 28:7, 8; Zacarias 4:6.
5. Sanglit daghan man ang wala mahibalo bahin sa “gamhanang mga buhat” ni Jehova, unsa may atong buhaton?
5 Kinahanglang atong ipahibalo ngadto sa mga anak sa mga tawo ang “gamhanang mga buhat” ni Jehova, sama sa pag-asoy sa mga Israelinhon ngadto sa ilang mga anak mahitungod sa paagi sa pagluwas sa Diyos kanila gikan sa pagkaulipon sa Ehipto. (Exodo 13:14-16) Ang mga tawo naghimog mga monumento alang sa mga tawong kansang mga buhat giisip nila nga dungganon, apan pilay nahibalo mahitungod sa gamhanang mga buhat sa Diyos? Ingon sa pagkapahayag sa usa ka eskolar niini: “Ilang ikulit ang mga buhat sa ilang mga bayani diha sa mga tumbaga, apan ang mahimayaong mga buhat ni Jehova gisulat diha sa balas, ug inigtaob sa kapanahonan kini igabanlas ra gikan sa presenteng panumdoman.” Kadtong mga buhata sa pagkamatuod wala mabanlas, bisan tuod nga sila wala hisayri sa kadaghanan. Busa diha sa atong balay-ug-balay nga buluhaton, sa dihang nagadumala sa pagtuon sa Bibliya, ug diha sa ubang mga okasyon, madasigon natong ipahayag ang gamhanang mga buhat sa Diyos.
6. (a) Unsang okasyona sa katuigang milabay nga ang madasigong espiritu sa atong pagtuman sa ministeryo gipahayag ug maayo? (b) Sa diwa, unsay giingon niadtong 1922 bahin sa pagmantala sa Gingharian?
6 Atong imantala usab ang himaya sa pagkahari sa Diyos. Ang kadasig alang sa maong pag-alagad sa Gingharian sa pagkamatuod nakita sa dihang, sa 1922, si J. F. Rutherford, ang kanhi presidente sa Watch Tower Society, mipakigpulong sa mga kombensiyonista sa Cedar Point, Ohio, ug miingon: “Sukad sa 1914 ang Hari sa himaya mikuha sa iyang gahom . . . Ang gingharian sa langit haduol na; ang Hari nagmando na; ang imperyo ni Satanas nagakapukan; minilyon karong buhi dili na gayod mamatay. Motuo ka ba niana? . . . Nan balik ngadto sa kanataran, O kamong mga anak sa labing hataas nga Diyos! Isul-ob ang inyong hinagiban! Magmalinaw sa hunahuna, magmatukawon, magmaaktibo, magmaisogon. Magmatinumanon ug mahimong tinuod nga mga saksi sa Ginoo. Sulong diha sa pagpakiggubat hangtod ang tanang timaan sa Babilonya malaglag. Imantala ang mensahe sa tanang dapit. Ang kalibotan kinahanglang mahibalo nga si Jehova mao ang Diyos ug nga si Jesu-Kristo mao ang Hari sa mga hari ug Ginoo sa mga ginoo. Kini mao ang adlaw sa tanang adlaw. Tan-awa, ang Hari nagmando na! Kamo mao ang iyang mga tinugyanan sa publisidad. Busa imantala, imantala, imantala, ang Hari ug ang iyang gingharian.”
7. Unsay angay natong bation mahitungod sa atong kalihokan ingong mga magmamantala sa Gingharian?
7 Pagkadako sa kalipay sa ‘pagpalandong diha sa ngalan sa Diyos,’ sa pagsugilon sa uban mahitungod sa iyang pagmando, ug sa pagmantala sa Mesiyanikong Gingharian sa iyang pinalanggang Anak! (Malakias 3:16) Ingong mga magmamantala sa Gingharian ug mga dumadapig, atong pakamahalon ang atong pribilehiyo sa pagwali sa maayong balita ug sa pagpaliso sa mga kasingkasing sa uban ngadto sa Diyos, kang Kristo, ug sa Gingharian. Sa sulod kanato, angay nga adunay nagadilaab nga tinguha sa pagsugilon sa uban mahitungod sa mahimayaong katahom sa pagkahari ni Jehova.—Itandi ang Jeremias 20:9.
8. (a) Pinaagi sa unsa gihawasan ang pagmando ni Jehova karong adlawa? (b) Nganong ikaingon nga ang Diyos may dominyo “ngadto sa tanang kaliwatan”?
8 Kita angay mapalihok sa pagpalanog sa Gingharian sa Diyos uban ang dakong kadasig, kay si David sunod miingon: “Ang imong pagkahari maoy usa ka pagkahari sa panahong walay tino, ug ang imong dominyo magapadayon ngadto sa tanang kaliwatan.” (Salmo 145:13) Samtang ang mga pagpalandong sa salmista bahin sa pagkahari ni Jehova nagpadayon, giusab niya ang pronombre nga “iya” ngadto sa “imo,” direktang nagpunting sa iyang mga pulong sa pag-ampo ngadto sa Diyos. Siyempre, ang pagmando ni Jehova ingon sa gihawasan diha sa Mesiyanikong Gingharian dili makapuli sa walay kataposang pagkahari sa Diyos. Sa pagkamatuod, sa dihang ang masinundanong katawhan mahibalik na ngadto sa kahingpitan, itugyan ni Kristo ang Gingharian ngadto sa iyang Amahan. (1 Corinto 15:24-28) Busa ang Diyos adunay dominyo “ngadto sa tanang kaliwatan.” Si Jehova mao ang Hari sa dihang si Adan gilalang ug may dominyo ibabaw sa matarong nga katawhan sa walay kataposan.
9. Diha sa Salmo 145, unsay ikaingon bahin sa usa ka bersikulo nga gisugdan sa Hebreohanong letra nga nun?
9 Niining akrostiko nga salmo, gikuha sa Masoretic nga teksto ang usa ka bersikulo nga nagsugod sa Hebreohanong letrang nun. Apan sumala sa Gregong Septuagint, sa Syriac nga Peshitta, ug sa Latin Vulgate, ang usa ka Hebreohanong manuskrito mabasa: “Si Jehova matinumanon sa tanan niyang mga pulong, ug sa pagkamahigugmaon maluluton [o, “maunongon”] sa tanan niyang mga buhat.” (New World Translation of the Holy Scriptures—With References, potnot) Ang Diyos motuman sa tanang iyang mga saad ug siya sa maunongon, mahigugmaon, ug maluluton ngadto sa tanan kinsa nagapabili sa iyang kaayo.—Josue 23:14.
Ang Tabang ni Jehova Dili Mapakyas
10. Sa unsang paagi ang Diyos ‘nagasapnay’ kanato?
10 Ang Haring Walay Kataposan dili motalikod sa kahimtang sa iyang mga alagad. Busa, si David nakaingon: “Si Jehova nagasapnay niadtong nangapukan, ug nagabangon niadtong tanang nanghiumod.” (Salmo 145:14) Sukad sa mga adlaw ni Abel, gitabangan ni Jehova ang Iyang mga magsisimba. Kon kita pasagdan, kita mangatumba sa makadaghan ilalom sa atong mga palas-anon. Kita kulang sa igong kusog sa pagpas-an sa tanang mga kalisdanan sa kinabuhi ug sa paglutos nga modangat kanato ingong katawhan sa Diyos, apan si Jehova mosapnay kanato. Ang porma sa Hebreohanong berbo nga gigamit dinhi nagpasabot nga ang Diyos sa kanunay ‘mosapnay kanato.’ Mahinumdoman nga si Juan Bawtista ug ang kaugalingong Anak sa Diyos mitabang sa pagbangon sa nangahulog nga mga makasasala sa moral. Sa dihang naghinulsol kining mga indibiduwala ug nahimong mga alagad ni Jehova, ilang natagamtam ang kahibulongang panalangin sa balaang tabang.—Mateo 21:28-32; Marcos 2:15-17.
11. Sa unsang paagi si Jehova ‘nagabangon sa tanang nanghiumod’?
11 Makapalipay nga masayod nga ‘si Jehova nagabangon sa tanang nanghiumod’ tungod sa nagkalainlaing mga pagsulay. Iyang gipasaya ang mga nangawad-ag paglaom sa atong taliwala, nagalipay sa atong mga nagmagul-anon, ug nagatabang kanato sa pagsulti sa iyang pulong nga maisogon kon kita pagalutoson. (Buhat 4:29-31) Dili gayod niya itugot nga mabug-atan kita sa atong mga luwan kon modawat lamang kita sa iyang tabang. (Salmo 55:22) Busa, sama sa “anak nga babaye ni Abraham” kinsa “nagtikuko” apan giayo sa pisikal ni Jesus, atong angay “himayaon ang Diyos” sa dihang siya nagabangon kanato sa espirituwal. (Lucas 13:10-17) Ang mga dinihogan nga nanghiumod sa pagkaulipon sa Babilonya mapasalamaton sa dihang gibangon sila sa Diyos sa 1919, ug nagabangon sa iyang mapabilhong “ubang mga karnero” sukad sa 1935.—Juan 10:16.
12. Sa unsang paagi nga “ang tanang mga mata nagatan-aw nga malaomon” sa Diyos?
12 Si Jehova dili gayod mopakyas sa iyang katawhan, ingon sa sunod nga gipatin-aw ni David pinaagi sa pag-ingon: “Ang tanang mga mata nagatan-aw nga malaomon kanimo, ug ginahatagan mo sila ug makaon sa matag panahon. Imong ginabuklad ang imong mga kamot ug ginatagbaw mo ang tinguha sa tagsatagsa ka buhing butang.” (Salmo 145:15, 16) Kini ingon sa daw ang mga mata sa tanang buhing mga linalang nagaliso sa ilang paglaom ngadto sa Soberano sa Uniberso. Ang mga manulonda nagalantaw sa Diyos alang sa padayong kinabuhi. Ug sama sa usa ka bata nga nagalantaw sa ginikanan alang sa mga butang gikinahanglan, kita nagalantaw sa atong langitnong Amahan. Sa pagkamatuod, gikan kaniya ang mga tawo ug hayop managsamang nagadawat ug pagkaon. Walay lain ang makatagbaw sa ilang mga panginahanglan. Ang Diyos naghatag kanila sa “ilang pagkaon sa matag panahon,” sa ato pa, kon kini gikinahanglan.
13. Sa unsang paagi nga si Jehova ‘nagabuklad sa iyang kamot ug nagatagbaw sa tinguha sa tagsatagsa ka buhing butang’?
13 Ang Diyos ‘nagabuklad sa iyang kamot ug nagatagbaw sa tinguha sa tagsatagsa ka buhing butang.’ (Salmo 104:10-28) Matuod, ang pipila ka mga hayop nangamatay tungod sa kakulang sa pagkaon. Daghang mga tawo ang gigutom tungod kay nangahimong mga biktima sa kahakog, pagdaogdaog, ug pag-abuso sa kahinguhaan. Dugang pa, gitagna ni Jesus nga ang “kagutmanan” mahimong usa ka bahin “sa ilhanan” sa iyang presensiya niining kataposang mga adlaw. (Mateo 24:3, 7) Apan walay usa niini ang nahitabo tungod kay si Jehova dalo o wala motagana. Hunahunaa ang kaliboan ka minilyong mga linalang nga gipakaon! Dugang pa, kini nga salmo nagatagana ug pasalig nga ubos sa pagmando sa Gingharian, sa dihang ang ‘tawo dili momando sa tawo alang sa iyang kadaotan,’ ang Diyos magatagbaw sa atong materyal ug espirituwal nga mga panginahanglan. (Ecclesiastes 8:9; Isaias 25:6) Bisan karon, kita dili unta angay magutman sa espirituwal nga pagkaon, kay ang Diyos nagatagana niini nga madagayaon sa matag panahon pinaagi “sa matinumanon ug maalamong ulipon.” (Mateo 24:45-47; 1 Pedro 2:2) Sa espirituwal nga pagkasulti, ang mga Saksi ni Jehova mao ang pinakaon-ug-maayo nga katawhan sa yuta. Ikaw ba nagpakita ug lalom nga pagpabili alang sa maong mga gasa?
Si Jehova Nagabantay Niadtong Nahigugma Kaniya
14. Nganong si David nakaingon nga “si Jehova matarong sa tanan niyang mga dalan ug maunongon sa tanan niyang mga buhat”?
14 Ang atong binuang tingali ‘modaot sa atong dalan’ ug mohatag kanato ug kalisod, apan dili gayod nato basolon ang Diyos tungod niini nga kalisdanan. (Proverbio 19:3) Gipakita ni David kon ngano sa dihang siya miingon: “Si Jehova matarong sa tanan niyang mga dalan ug maunongon sa tanan niyang mga buhat.” (Salmo 145:17) Ang Diyos nagalihok kanunay diha sa matul-id, matarong, ug sa maluluy-ong paagi. Ilabinang makita ang iyang kaluoy diha sa iyang pagtagana ug kaluwasan pinaagi sa halad lukat ni Jesus. (Buhat 2:21; 4:8-12) Si Jehova usab “maunongon sa tanan niyang mga buhat,” kanunay nga matinumanon, mahigugmaon, ug dili-mapihigon. Ingong mga “manunundog sa Diyos,” nan, kinahanglang kita magmatul-id, matarong, maluluy-on, dili-mapihigon, ug maunongon.—Efeso 5:1, 2; Deuteronomio 32:4; Salmo 7:10; 25:8; Isaias 49:7; Buhat 10:34, 35.
15. Sa unsang paagi kita ‘nagasangpit sa Diyos diha sa pagkamatinud-anon,’ ug unsay misangpot sa atong pagbuhat niini?
15 Sanglit ang Diyos matarong ug maunongon, kita mapasuod kaniya. Dugang pa, si David nagpasalig kanato: “Si Jehova haduol kanilang tanan nga nagasangpit kaniya, sa tanan nga nagasangpit kaniya sa pagkamatinud-anon.” (Salmo 145:18) Sa magpabawtismo ingong dedikadong mga magtutuo, kita nagasangpit sa ngalan ni Jehova. (Buhat 8:12; 18:8; Roma 10:10-15) Sanglit kita nagapasuod man sa Diyos, siya masuod kanato. (Santiago 4:8) Kita “nagasangpit kaniya diha sa pagkamatinud-anon” tungod kay atong ginabuhat kana diha sa matinund-anon nga paagi, pinaagi ni Jesu-Kristo. Ug si Jehova magpabiling haduol kon kita mosimba kaniya “uban ang espiritu ug kamatuoran,” magapasundayag ug “pagtuo nga walay pagminaot,” ug ‘padayon nga malig-on ingon nga daw nakakita sa Usa nga dili makita.’ (Juan 4:23, 24; 1 Timoteo 1:5; Hebreohanon 11:27) Sa ingon ang atong pag-ampo dili mahimong walay kapuslanan o mag-inusarang moatubang sa kalibotan ni Satanas, apan padayon natong tagamtamon ang balaang tabang ug paggiya. (Salmo 65:2; 1 Juan 5:19) Pagkadako niana nga kasegurohan!
16. Ngano ug sa unsang paagi si Jehova ‘nagahatag sa tinguha niadtong may kahadlok kaniya’?
16 Kita adunay matuod nga kasegurohan, usab, tungod sa ubang mga butang nga gibuhat ni Jehova alang kanato. Miingon si David: “Iyang ihatag ang ginatinguha niadtong may kahadlok kaniya, ug iyang patalinghogan ang ilang pagpangayog tabang, ug iyang pagaluwason sila.” (Salmo 145:19) Si Jehova ‘mohatag sa atong ginatinguha’ tungod kay kita adunay lalom nga pagtahod sa Diyos ug may maayong kahadlok nga dili-makapahimuot kaniya. (Proverbio 1:7) Ang atong masinundanong kasingkasing motukmod kanato nga magpahinungod ngadto kang Jehova, ug ang atong tinamdan mao, “Pasagdi nga matuman ang imong kabubut-on.” Sanglit maoy iyang kabubut-on nga imantala ang balita sa Gingharian, iyang ihatag ang atong mga tinguha sa pagbuhat nianang buluhatona. (Mateo 6:10; Marcos 13:10) Ang Diyos ‘mohatag sa atong ginatinguha’ tungod kay kita wala moampong mahakugon apan nagapangayog mga butang sumala sa iyang kabubut-on. Siya motagana sa kon unsay uyon sa iyang kabubut-on ug alang sa atong kaayohan.—1 Juan 3:21 22; 5:14, 15; itandi ang Mateo 26:36-44.
17. Nganong kita makaseguro nga ang atong “pagpangayog tabang” patalinghogan sa Diyos?
17 Ingong maunongong mga Saksi ni Jehova, kita usab makaseguro nga ang atong “pagpangayog tabang” patalinghogan. Ang Diyos nagluwas kang David gikan sa katalagman ug nagluwas kang Jesus, nagbanhaw pa gani kaniya gikan sa patay. Ubos sa pag-atake sa kaaway, ilabina sa panahon sa pag-atake ni Gog, kita makaseguro nga si Jehova magaluwas kanato. (Ezekiel 38:1–39:16) Sa pagkamatuod, sa bisan unsang panahon sa kasamok, sama kang David kita masaligong makaampo: “Kaloy-i intawon ako, O Jehova, kay ako ania sa kalisod. . . . Ako nakadungog sa daotang mga taho sa daghan, kahadlok sa tanang kiliran. Kon sila mag-usa sa pakigbatok kanako, nanaglaraw sila sa pagkuha sa akong kalag. Apan ako—misalig kanimo, O Jehova. Miingon ako: ‘Ikaw ang akong Diyos.’”—Salmo 31:9-14.
18. Sa unsang paagi kita makabenepisyo sa pagkahibalo nga si Jehova ‘nagabantay sa tanan nga nahigugma kaniya’ apan ‘magalaglag sa daotan?’
18 Si Jehova nga Diyos andam gayod kanunay sa pagtabang kanato. Sama sa giingon ni David: “Si Jehova nagabantay sa tanan nga nahigugma kaniya, apan pagalaglagon niya ang tanang daotan.” (Salmo 145:20) Oo, kon atong gihigugma ang Diyos, siya magapanalangin ug magabantay kanato. (Numeros 6:24-26) Iyang ‘silotan ug dako ang mapahitas-on’ apan nagapanalipod sa iyang mapaubsanong mga alagad, dili magtugot nga may mahitabo nga mohatag ug permanenteng kadaot kanila. Sanglit si Jehova uban kanato, kinahanglang magmaisogon kita. (Salmo 31:20-24; Buhat 11:19-21) ‘Walay hinagibang gibuhat batok kanato ang molampos.’ (Isaias 54:17; Salmo 9:17; 11:4-7) Mao kanay naagoman niadtong nagapamatuod sa ilang gugma alang sa Diyos ingong iyang matinumanon dedikadong mga alagad. Ingong grupo, ang mga Saksi ni Jehova luwas nga makalabang sa “dakong kasakitan” nga ipadangat diha sa mga daotan. (Pinadayag 7:14) Ug pagkadako sa panalangin unya ang paghusay sa dakong isyu sa unibersohanong pagkahari ni Jehova ngadto sa “tanang nahigugma kaniya”!
Magpadayon sa Pagdayeg sa Balaang Ngalan ni Jehova
19. Nganong ang atong mga baba magasulti ug “pagdayeg kang Jehova?”
19 Gitapos ni David kining makapatandog nga salmo uban sa mga pulong: “Ang akong baba magasulti sa pagdayeg kang Jehova; ug ipapagdayeg sa tanan nga unod ang iyang balaang ngalan ngadto sa panahong walay tino, bisan sa walay kataposan.” (Salmo 145:21) Ingong mga Saksi ni Jehova, atong gipabilhan ang pagkagamhanan sa Diyos, kaayo, mabinationg pagkahari, dili-mapakyas nga pagpaluyo, ug malahutayong pagbantay. Busa, sama kang David, ang atong baba magasulti sa mga pagdayeg sa Diyos. Kita mapalihok sa paghatag kaniya sa bug-os nga debosyon, magapasalamat kaniya sa iyang daghang mga panalangin, ug dayegon ang iyang “matahom nga ngalan.”—1 Cronicas 29:10-13; Exodo 20:4-6.
20. Uban sa kinabuhing walay kataposan sa unahan, kinahanglang unsa ang atong determinasyon karon?
20 Sanglit si Jehova nagapanalangin kanato sa adlaw-adlaw, kita sa kanunay magadayeg kaniya, o magasulti ug maayo bahin kaniya. Atong isangyaw ang maayong balita nga madasigon sa pagdayeg sa Diyos, isugid sa uban nga sa dili madugay ‘ang tanang unod magadayeg sa iyang balaang ngalan.’ Pagkatahom unya nga mabuhi sa dihang ang tanang molupyo sa yuta—oo, ang tanang intelihenting mga linalang sa uniberso—magaawit sa pagdayeg ngadto sa atong langitnong Amahan! (Salmo 148:1-13) Dalayegon si Jehova tungod sa pagpadayag sa iyang ngalan ug sa paghatag kanato sa pribilehiyo nga mahimong iyang mga Saksi. (Salmo 83:18; Isaias 43:10-12) Hinaot nga kita magalihok sa paagi nga takos niadtong kinsa nagahupot nianang ngalana nga balaan ug nagaampo nga mapabalaan kana. (Lucas 11:2) Atong alagaron ang Diyos nga maunongon, aron nga diha sa iyang bag-ong sistema, ang atong tingog madunggan diha sa kuro niadtong nagadayeg sa balaang ngalan ni Jehova sa walay kataposan.
Unsay Imong mga Komento?
◻ Unsay atong buhaton kon ang pagkahari ni Jehova hiligugmaon alang kanato?
◻ Diha sa unsa gihawasan ang pagkahari sa Diyos karong adlawa?
◻ Sa unsang paagi si Jehova ‘nagabangon sa tanang nanghiumod’?
◻ Diha sa unsang paagi ang Diyos ‘nagabuklad sa iyang kamot ug nagatagbaw sa tinguha sa tagsatagsa ka buhing butang’?
◻ Sa unsang paagi madayeg nato ang balaang ngalan ni Jehova?
[Hulagway sa panid 17]
Niadtong 1922 ang mga pulong nga ‘imantala ang Hari ug ang Gingharian’ nakadasig sa mga dumadapig sa pagkahari ni Jehova alang sa dugang nga buluhaton