Nganong Moalagad Kang Jehova?

“ANG adlaw ni Jehova haduol na! Ang ‘dakong kasakitan’ haduol na, ug ikaw dili makalabang-buhi niana kon dili ka moalagad sa Diyos.” Kon adunay mosulti nimo niana, unsay imong reaksiyon?​—Sofonias 2:2, 3; Mateo 24:21.

Tinuod, angay gayod nga atong ibutang sa hunahuna ang adlaw ni Jehova, ug ang pagkalabang-buhi sa haduol nga dakong kasakitan nagadepende sa matinumanong pag-alagad sa Diyos. Apan kini bang kamatuorana mao ang pangunang mga katarongan kon nganong mohatag kita ug balaang pag-alagad kang Jehova nga Diyos? Nganong nagaalagad ka kang Jehova?

Kinahanglan ang Hustong Motibo

Kon ang tawo dili moalagad sa Diyos nga may hustong motibo, siya tingali mohunong kon dili matuman ang iyang ginapaabot sulod sa usa ka yugto sa panahon. Pananglitan, ang ubang mga tawo naglaom nga mobalik si Jesu-Kristo sa 1843 o sa 1844, mga petsa nga milabay nga wala matuman ang ilang mga paglaom. Makaiikag niining bahina mao ang gisulat ni George Storrs, magpapatik sa Bible Examiner ug sa ulahi nakaila ni Charles Taze Russell, unang presidente sa Watch Tower Society. Diha sa Bible Examiner sa Septiyembre 1846, si Storrs misulat:

“Ang obligasyon sa pag-alagad sa Diyos nahasandig diha sa mas labaw kay sa yanong kamatuoran nga ang adlaw hapit nang matapos. . . . Ang reaksiyon nga mahitabo kon ang tuig ’46 ug ’47 mahimong molabay, nga dili makakita sa ikaduhang pag-abot, makapahigawad nga dili gayod mahanduraw. Napamatud-an kini sa hitabo​—ang buot kong ipasabot ang hitabo sa tuig ’43 ug ’44. Hain na ang kadaghanan niadtong karon kinsa, nangangkon, nga ‘napukaw sa pag-alagad sa Diyos’ sumala sa nahiangay tungod niana nga singgit nga panahon na alang sa pag-abot sa Ginoo? Ug ang lanog nagaingon​—HAIN!!! Mga usa lamang gikan sa napulo niadtong napukaw sa pag-alagad sa Diyos ang naglakaw gihapon sa paghimaya sa ilang Kristohanong pangangkon. Nganong dili? Sila napadasig sa sayop nga mga motibo. Ang ilang pagkahakog mao ang dakong butang nga gikaikagan ug gikalipayan. Sila sama ra sa makasasala nga naghunahuna nga siya hilimatyon na diha sa higdaanan o diha sa bagyo sa dagat. Kon siya mamatay man ugaling, siya mahimong usa ka Kristohanon. Kon siya nahibalo nga halayo siya sa peligro, dili siya gihapon magpakabana.”

Pag-alagad nga May Hustong mga Motibo

Ang pagkahakog ug kahadlok sa kalaglagan tingali mopalihok sa uban sa pagtuman sa kabubut-on ni Jehova sa minakina nga paagi. Ang uban tingali nadani kaayo sa paglaom sa kinabuhi diha sa Paraiso nga sila moalagad sa Diyos tungod lamang nianang katarongana. Bisan pa, kon ang mga tawong napalihok tungod lang sa maong mga motibo nagtuo nga ang adlaw ug ang dakong kasakitan ni Jehova dili pa kaayo duol, sila tingali dili gustong moalagad sa Diyos nga madasigon.

Sa pagkamatuod, dili hakog ang pagkalipay sa mga saad ug sa mga gitagnang mga panalangin sa Diyos. Maoy iyang tinguha nga kita magmalipayon bahin sa mga palaaboton nga gibutang sa atong atubangan ingong mga sumusunod sa iyang Anak, si Jesu-Kristo. “Pagkalipay kamo diha sa paglaom,” miingon si apostol Pablo, nga midugang: “Lahutaya ang kasakitan. Padayon kamo sa pag-ampo.” (Roma 12:12) Inubanan sa pag-ampo, “ang kalipay ni Jehova” magatabang kanato sa paglahutay sa mga pagsulay ug sa mapailobong paghulat sa katumanan sa mga saad sa Diyos. (Nehemias 8:10) Kasamtangan, kita adunay daghang katarongan sa pag-alagad kang Jehova. Unsa ang pipila niini?

Katungdanan ug Pribilehiyo

Ingong Soberano sa Uniberso, si Jehova takos ug nagapangayo ug bug-os nga debosyon. (Exodo 20:4, 5) Busa ang matag Kristohanon adunay samang sukod sa obligasyon sa Diyos bisag ang dakong kasakitan magsugod ugma, sunod tuig, o sa ulahi. Siya obligado sa pag-alagad kang Jehova nga dili-mahakogon tungod sa paghigugma sa Diyos uban sa iyang bug-os kasingkasing, kalag, hunahuna, ug kusog. (Marcos 12:30) Ang ubang unang mga Kristohanon naghunahuna nga haduol na ang adlaw ni Jehova, apan wala moabot ang ilang gihulat, ug sila nangamatay nga wala makakita nianang hitaboa. (1 Tesalonica 5:1-5; 2 Tesalonica 2:1-5) Kon sila matinumanon hangtod sa kamatayon, hinunoa, kadtong dinihogang mga sumusunod ni Kristo sa ulahi makadawat sa ganti sa usa ka pagkabanhaw ngadto sa langitnong kinabuhi.​—Pinadayag 2:10.

Ang bawtismadong mga Saksi ni Jehova moalagad kaniya sa pagkamatinumanon tungod kay sila kinabubut-ong midawat sa obligasyon sa pagtuman sa iyang kabubut-on. Hunahunaa lang! Sama sa balaang mga manulonda, kita makatuman sa kabubut-on sa Soberano sa Uniberso. (Salmo 103:20, 21) Gipakahamili kaayo ni Jesus ang maong pribilehiyo nga siya nakaingon: “Ang akong pagkaon mao ang pagtuman sa kabubut-on sa nagpadala kanako ug sa pagtapos sa iyang buluhaton.” (Juan 4:34) Kon kita adunay samang espiritu, kita madasigong magapahayag sa kadayeganan ni Jehova ug sa pagsulti sa uban bahin sa iyang mga katuyoan, sumala sa gipadayag diha sa Kasulatan. Niining paagiha, kita usab may pribilehiyo sa pagtabang sa uban sa espirituwal. Ug siyempre, ang pagtuman sa kabubut-on sa Diyos tungod sa gugma alang kaniya maoy usa ka kahibulongang pribilehiyo, bisag kanus-a pa magsugod ang adlaw ni Jehova.

Ang Pagkamapasalamaton Mohatag ug Panukmod

Ang pagkamapasalamaton alang sa gugma sa Diyos sa pagtagana sa halad lukat sa iyang Anak angay usab mopalihok kanato sa pag-alagad kang Jehova. Sa usa ka higayon kita nahibulag gikan kang Jehova nga Diyos tungod sa sala. Apan, si Jesus miingon: “Kay gihigugma gayod sa Diyos ang kalibotan [sa katawhan] nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing walay kataposan.” (Juan 3:16) Si Jehova ang mihimog unang lakang niining bahina, sumala sa gisulat ni Pablo: “Nagapadayag ang Diyos sa iyang kaugalingong gugma kanato pinaagi niini, nga bisan sa makasasala pa kita, si Kristo nagpakamatay alang kanato.” (Roma 5:8) Ang pagkamapasalamaton alang niining pagpasundayag sa gugma sa Diyos angay mopalihok kanato sa pag-alagad kaniya sa bug-os nga kasingkasing.

Ang apresasyon alang sa espirituwal ug materyal nga mga tagana ni Jehova nagahatag kanato ug dugang katarongan sa pag-alagad kaniya nga matinumanon. Ang Pulong sa Diyos maoy usa ka seguradong giya​—usa ka kahayag sa atong alagianan. Ang mga basahon nga gitagana pinaagi sa “matinumanon ug maalamong ulipon” makatabang kanato sa pagpahiuyon sa atong mga kinabuhi diha sa kabubut-on sa Diyos. (Mateo 24:45-47; Salmo 119:105) Ug tungod kay atong unang gipangita ang Gingharian, tagan-an usab kita ni Jehova sa materyal nga paagi. (Mateo 6:25-34) Ginapakita ba nimo ang imong apresasyon alang niining mga butanga?

Ang pagkamapasalamaton alang sa hinatag-sa-Diyos nga kagawasan gikan sa bakak nga relihiyon maoy laing katarongan sa pag-alagad kang Jehova nga matinumanon. Ang relihiyosong bigaon nga Babilonyang Bantogan “nagalingkod sa daghang katubigan,” nga nagkahulogang “katawhan ug mga panon ug kanasoran ug mga pinulongan.” (Pinadayag 17:1, 15) Bisan pa, siya wala maglingkod ibabaw sa mga alagad ni Jehova, nga nagaimpluwensiya ug nagakontrolar kanila sa relihiyosong paagi. Pananglitan, ilang gisalikway ang bakak nga relihiyosong doktrina nga ang tawhanong kalag dili-mamatay. Sila nahibalo nga ang tawo gilalang nga “usa ka buhi nga kalag,” nga ang patay “walay kahibalo sa bisan unsa,” ug nga adunay pagkabanhaw. (Genesis 2:7; Ecclesiastes 9:5, 10; Buhat 24:15) Busa sila dili mahadlok ni mosimba sa patay. Ang pagkamapasalamaton ba alang sa maong espirituwal nga kagawasan magapasalikway kanimo sa apostasiya ug sa pagtapot sa putli nga pagsimba kang Jehova?​—Juan 8:32.

Ang apresasyon alang sa adlaw-adlaw nga pagpaluyo ni Jehova angay magapadako sa atong determinasyon sa pag-alagad kaniya nga maunongon. Ang salmistang David miingon: “Dalayegon si Jehova, nga sa matag adlaw maoy nagapas-an sa atong lulan.” (Salmo 68:19) Sa laing bahin ang salmista miingon: “Kon ako pagabiyaan sa akong amahan ug sa akong inahan, si Jehova ang magadawat kanako.” (Salmo 27:10) Oo, ang tawo nga matinumanong nagaalagad kang Jehova makahimo sa pagtugyan sa iyang mahulagwayong palas-anon, sama sa mga suliran ug mga pagsulay, diha sa Diyos. Ikaw ba nagapakitag apresasyon alang sa walay-pagkapakyas nga pagpaluyo ni Jehova pinaagi sa pag-alagad kaniya nga matinumanon?​—Salmo 145:14.

Himayaa si Jehova ug ang Iyang Pagkahari

Ang tinguha sa paghimaya kang Jehova angay usab mopukaw kanato sa pag-alagad kaniya. Ang langitnong mga linalang gipadayag nga nagahimaya sa Diyos uban sa mga pulong: “Takos ikaw, Jehova nga among Diyos, sa pagdawat sa himaya ug dungog ug gahom, kay ikaw mao ang nagbuhat sa tanang butang, ug tungod sa imong pagbulot-an milungtad ug nangahimo sila.” (Pinadayag 4:11) Gihimaya ni Haring David ang Diyos pinaagi sa pag-ingon: “Imo, Oh Jehova, ang pagkadako ug ang gahom ug ang katahom ug ang kahamili ug ang kahalangdon . . . Imo ang gingharian, Oh Jehova . . . Ang mga bahandi ug ang dungog gikan kanimo, ug ikaw maoy nagagahom ibabaw sa tanang butang . . . Oh among Diyos, kami nagapasalamat kanimo ug nagadayeg sa imong matahom nga ngalan.” (1 Cronicas 29:10-13) Ingong mga alagad ni Jehova, dili ba bation natong obligado kita sa paghimaya kaniya sa pulong ug sa buhat samtang nagahulat sa katumanan sa iyang mga saad?​—1 Corinto 10:31.

Ang kusganong pangagda sa pagsulti bahin sa Gingharian sa Diyos maoy laing panukmod sa pag-alagad kang Jehova. Kanang maayo nga motibo maayo kaayong pagkapahayag diha sa mga pulong sa salmista: “Ang tanan mong mga buhat nagadayeg kanimo, Oh Jehova, ang imong mga maunongon nagapasidungog kanimo. Sila mosulti mahitungod sa himaya sa imong pagkahari, ug mohisgot sa imong pagkamakagagahom, aron ipadayag ngadto sa mga anak sa tawo ang imong gamhanang mga buhat ug ang himaya sa katahom sa iyang pagkahari. Ang imong pagkahari maoy pagkahari nga walay kataposan, ug ang imong gingharian molungtad sa tanang kaliwatan.” (Salmo 145:10-13) Ang pagpahayag sa mensahe sa Gingharian mao ang kaakohan sa Kristohanon ug ang labing hinungdanong buluhaton nga ginahimo sa atong adlaw. (Mateo 24:14; 28:19, 20) Ikaw ba adunay nagadilaab nga tinguha sa paghimaya kang Jehova ug sa pagsulti sa uban mahitungod sa iyang Gingharian?

Ang pagbalaan sa ngalan ni Jehova ug ang pagbayaw sa iyang pagkasoberano bililhon kaayo kanato nga kita buot moalagad kaniya nga matinumanon. Kita mahimong moampo alang sa pagbalaan sa ngalan ni Jehova ug sa pagbayaw sa iyang pagkasoberano. (Mateo 6:9) Kita molihok uyon sa atong mga pag-ampo pinaaagi sa regular nga pagpakigbahin sa Kristohanong ministeryo ug sa pagpakaylap sa kamatuoran bahin sa hinungdanon kaayong mga butang.​—Ezekiel 36:23; 39:7.

Kalipay ug Katagbawan

Pinaagi sa pag-alagad kang Jehova nga matinumanon, kita makabaton ug katagbawan sa paghimo sa iyang kasingkasing nga malipayon ug nagapamatuod sa Yawa nga bakakon. Bisag bakak nga nangangkon si Satanas nga nagaalagad ang mga tawo sa Diyos tungod sa hakog nga mga katarongan, ang atong maunongong pag-alagad kang Jehova, nga gihatag tungod sa gugma, nagpamatuod nga bakak ang pangangkon sa tigtamay. (Job 1:8-12) Kini nagahatag kanato ug maayong katarongan sa pagpadayon sa pagbuhat sa giingon diha sa Proverbio 27:11: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.” Dugang pa, kon kita maunongong nagaalagad kang Jehova bisan pa sa tanan nga himoon ni Satanas sa pagbabag kanato, ang atong dalan sa pagpabiling maunongon hayan makapalig-on sa isigkamagtutuo.​—Filipos 1:12-14.

Ang kalipay ug katagbawan sa pagpakigbahin sa espirituwal nga ani angay magapalihok kanato sa pag-alagad kang Jehova nga matinumanon. Si Jesus nalipay sa pagtabang sa mga tawo, ilabina sa espirituwal nga mga paagi. Nag-ingon ang Mateo 9:35-38: “Gisuroy ni Jesus ang tanang mga siyudad ug mga balangay, nagpanudlo sulod sa ilang mga sinagoga ug nagwali sa maayong balita sa gingharian ug nag-ayo sa tanang matang sa balatian ug sakit. Ug sa pagkakita sa panon sa katawhan, siya naluoy kanila, tungod kay sila gisamaran ug nagkatibulaag sama sa karnero nga walay magbalantay. Unya miingon siya sa iyang mga tinun-an: ‘Oo, daghan kaayo ang anihon, apan diyutay ra ang mga mamumuo. Busa, hangyoa ang Agalon sa anihon nga magpadala siya ug mga mamumuo ngadto sa iyang anihon.’” Kon ang buluhaton sa pagpangani magdugay pa kay sa atong gidahom, kini magahatag kanato ug dugang higayon sa pagkaplag kalipay ug katagbawan sa pagtabang sa uban sa espirituwal. Kini maoy usa usab ka paagi sa pagpakita sa gugma sa silingan nga maoy gipaabot diha kanato.​—Mateo 22:39.

Nganong Moalagad Ka sa Diyos?

Atong nahisgotan ang pipila lamang sa daghang mapugsanong mga katarongan sa pag-alagad kang Jehova nga matinumanon. Maayo nga hatagan ug mainampoon nga pagpalandong ang atong personal nga mga katarongan sa pag-alagad sa Diyos, kay ang matag usa kanato magapanubag man kaniya. (Roma 14:12; Hebreohanon 4:13) Ug kadtong magpadayon sa pagbaton lamang ug hakog nga mga motibo dili makatagamtam sa pag-uyon sa Diyos.

Unsay malaoman kon maoy atong gihatagag unang pagtagad ang pagbalaan sa ngalan ni Jehova ug nagahatag ug balaang pag-alagad sa Diyos nga walay mahakogong mga motibo? Aw, panalanginan kita ni Jehova ug ang atong ministeryo! (Proverbio 10:22) Kita usab makadawat ug kinabuhing dayon tungod kay kita nakaalagad kang Jehova nga matinumanon.

[Hulagway sa panid 9]

Libolibo ang nag-alagad kang Jehova sa Hapon

[Hulagway sa panid 10]

Nag-alagad kang Jehova diha sa Côte d’Ivoire

[Picture Credit Line sa panid 8]

SIX SERMONS ni George Storrs (1855)