Ang Hunahuna sa Bibliya

Unsa ka Bug-os ang Pagpasaylo sa Diyos?

“Gibati nako nga ang Diyos dili gayod mopasaylo sa akong kasal-anan. Dili gayod siya buot kanako tungod sa akong nahimo.”​—Gloria.

SI Gloria wala maglisod sa pagsulti sa uban nga si Jehova makapasaylo sa ilang kasal-anan.a Apan sa dihang namalandong siya sa iyang kasaypanan, si Gloria mibating hinukman. Ang pasaylo ni Jehova daw dili makab-ot.

Ang pag-ila sa sayop nga buhat o dalan sa kinabuhi makahasol sa konsensiya. “Ako naluya gumikan sa paghilak sa tibuok adlaw,” misulat si David human siya makasala. “Ang akong kusog bug-os nga mibiya.” (Salmo 32:3, 4, Today’s English Version; itandi ang Salmo 51:3.) Ikalipay, si Jehova malipay sa pagpahigawas sa sayop. Siya “andam nga mopasaylo.”​—Salmo 86:5; Ezekiel 33:11.

Bisan pa niana, si Jehova makakita sa kasingkasing. Ang iyang pagpasaylo dili ipasikad sa emosyon lamang. (Exodo 34:7; 1 Samuel 16:7) Ang makasasala kinahanglang dayag nga moila sa iyang sayop, mopakitag tinuod nga pagbasol, ug mosalikway sa iyang daotang kurso ingon nga usa ka butang nga mangil-ad ug dulumtanan. (Salmo 32:5; Roma 12:9; 2 Corinto 7:11) Niana lamang nga ang makasasala mapasaylo ug makasinati ug “mga panahon sa kahayahay” gikan ni Jehova.​—Buhat 3:19.

Apan bisan human sa paghinulsol, ang pipila mobati gihapong hinukman. Kinahanglan bang sila magpas-an sa kabug-at sa sala hangtod sa hangtod? Unsang paglipay ang makaplagan sa Bibliya alang niadtong naghinulsol sa ilang kasal-anan ug nagbiya niana apan gihasol gihapon sa konsensiya?​—Salmo 94:19.

Pagkuha sa Kabug-at

Kay naguol tungod sa iyang kasaypanan, si David miampo kang Jehova: “Tan-awa ang akong kasakit ug akong pag-antos, ug ipahigawas ang tanan kong kasal-anan.” (Salmo 25:18) Dinhi si David mihangyo nga si Jehova mobuhat ug labaw pa kay sa pagpasaylo. Siya mihangyo nga si Jehova “magpahigawas” sa iyang kasal-anan, nga siya magkuha o magpas-an niana, magdala niana sa layo. Ang sala adunay grabeng mga sangpotanan, ug walay duhaduha alang kang David kini naglakip sa kabug-at sa gihasol nga konsensiya.

Matag tuig ang mga Israelinhon dayag nga gipahinumdoman nga si Jehova magkuha sa kasal-anan sa nasod. Sa Adlaw sa Pagtabon-sa-Sala ang hataas nga saserdote magabutang sa iyang kamot ibabaw sa ulo sa usa ka kanding, magasugid sa kasal-anan sa katawhan ibabaw niana, ug unya ipadala ang kanding ngadto sa kamingawan. Si bisan kinsang atua didto makakita sa pagkuha sa kasal-anan sa nasod.​—Levitico 16:20-22.

Busa ang mga tawo nga naghinulsol sa ilang kasal-anan makabatog kahupayan. Ang kalihokan sa Adlaw sa Pagtabon-sa-Sala naghulagway sa mas dako pang tagana sa pagkuha sa sala​—ang halad-lukat ni Jesu-Kristo. Si Isaias matagnaong misulat bahin kang Jesus: “Siya mismo nagpas-an sa sala sa daghang tawo.” (Isaias 53:12) Busa, ang nangaging kasal-anan dili kinahanglang magpabug-at sa konsensiya. Apan si Jehova ba mahinumdom niining kasal-anana sa ulahing panahon?

Pagpapas sa Utang

Sa iyang modelong pag-ampo, si Jesus miingon: “Pasayloa kami sa among mga utang.” (Mateo 6:12) Ang Gregong pulong nga gihubad dinhi nga “pasayloa” maoy porma sa berbo nga nagkahulogan ug “pagbuhi.” Busa, ang pagpasaylo sa sala gipakasama sa pagbuhi, o pagpapas, sa utang.​—Itandi ang Mateo 18:23-35.

Si Pedro mipalapad niini sa dihang siya miingon: “Busa, paghinulsol ug pamalik aron mapala ang inyong kasal-anan.” (Buhat 3:19) Ang “pagpala” nagkahulogan ug pagtangtang, o pagpapas. Nagsugyot kana ug pagpapas sa sinulat nga talaan, nga nagpapas sa kanhing mga utang.​—Itandi ang Colosas 2:13, 14.

Busa, kadtong naghinulsol dili kinahanglang mahadlok nga ang Diyos mangayog bayad sa utang nga iyang gipapas. Siya nag-ingon: “Ang imong kasal-anan dili nako pagahinumdoman.” (Isaias 43:25; Roma 4:7, 8) Unsay kahulogan niini alang sa mahinulsolong makasasala?

Pagwagtang sa Mansa

Pinaagi ni propetang Isaias, si Jehova miingon: “Bisan pag ang inyong kasal-anan mapula, sila pagapapution ingon sa niyebe; bisan pag sila mapula sama sa lubos-pula nga panapton, sila mahimong sama sa maputing balhibo sa karnero.”​—Isaias 1:18.

Ang mga paningkamot sa pagwagtang sa nakadukot nga mansa gikan sa sinina sa kasagaran maoy kawang. Ang labing maayong mahimo mao nga ang mansa mohanap apan sa gihapon makita. Pagkamakapahupay nga si Jehova makakuha sa kasal-anan nga ingon ka dayag sa pula o lubos pula ug papution kini ingon sa niyebe.​—Itandi ang Salmo 51:7.

Busa, ang mahinulsolong makasasala dili kinahanglang mobati nga siya magdala sa mansa sa tibuok niyang kinabuhi. Si Jehova dili lamang magpahanap sa kasaypanan, nga magpahinabo sa mahinulsolong usa sa pagkinabuhi sa walay kataposang kaulawan.​—Itandi ang Buhat 22:16.

Pagpaluyo Gikan sa Uban

Bisan pag si Jehova magkuha sa kabug-at, magpapas sa utang, ug magwagtang sa mansa sa sala, ang mahinulsolong usa usahay tingali hasolon sa konsensiya. Si Pablo misulat mahitungod sa usa ka mahinulsolong makasasala sa kongregasyon sa Corinto kinsa gipasaylo sa Diyos apan “gidaog sa hilabihang kaguol [“naguol kaayo nga bug-os nawad-ag paglaom,” TEV].”​—2 Corinto 2:7.

Sa unsang paagi natabangan kining tawhana? Si Pablo mipadayon: “Ako nagtambag kaninyo sa pagpalig-on sa inyong gugma kaniya.” (2 Corinto 2:8) Ang pulong nga gigamit ni Pablo alang sa “pagpalig-on” maoy legal nga termino nga nagkahulogan ug “paghimong balido.” Oo, ang mga mahinulsolon nga nakabaton sa kapasayloan ni Jehova nagkinahanglan usab ug pagbalido, o timaan sa pag-uyon, gikan sa isigka-Kristohanon.

Masabot, kini tingali nagkinahanglag panahon. Ang mahinulsolong usa kinahanglang magwagtang sa kaulawan gumikan sa iyang sala ug magtukod ug makapadaning talaan sa pagkamatarong. Kinahanglang mapailobon siyang moantos sa mga pagbati ni bisan kinsa nga sa personal naapektahan sa iyang kanhing kasaypanan. Kasamtangan, siya mahimong makasalig sa bug-os nga pagpasaylo ni Jehova, sama kang David: “Ingon sa pagkahalayo sa sidlakan gikan sa kasadpan, sa mao nga gilay-on gipahilayo ni [Jehova] kanato ang atong kalapasan.”​—Salmo 103:12.

[Footnote]

[Picture Credit Line sa panid 18]

Pagbalik sa Anak nga Mausikon ni Rembrandt: Scala/​Art Resource, N.Y.