Pagsugid nga Mitultol sa Pagkaayo sa Espirituwal
“SA DIHANG ako naghilom ang akong mga bukog nagabok sa akong pag-agulo sa tibuok adlaw. Kay sa adlaw ug sa gabii mabug-at ang imong kamot sa ibabaw nako. Ang kaumog sa akong kinabuhi nailisan ingon sa uga nga kainit sa ting-init.” (Salmo 32:3, 4) Kining maong makatandog nga mga pulong lagmit nagpakita sa hilabihang emosyonal nga kasakit nga gibati ni Haring David sa karaang Israel, kasakit nga iyang nahiagoman tungod sa paglilong inay kay sa pagsugid sa seryosong sala.
Si David maoy usa ka tawo nga may talagsaong mga katakos. Usa siya ka maisog nga manggugubat, batid nga estadista, magbabalak, ug maghohoni. Bisan pa niana, siya misalig, dili sa iyang mga katakos, kondili sa iyang Diyos. (1 Samuel 17:45, 46) Siya gihulagway ingong usa ka tawo kansang kasingkasing maoy ‘bug-os uban kang Jehova.’ (1 Hari 11:4) Apan ang usa ka sala nga iyang nahimo salawayon gayod, ug lagmit mao kanay iyang gihisgotan sa Salmo 32. Daghan ang atong makat-onan pinaagi sa pagsusi sa mga panghitabo nga mitultol sa iyang sala. Mailhan nato ang mga lit-ag nga angayng likayan ug makita ang panginahanglan sa pagsugid sa atong mga sala aron mapasig-uli ang atong relasyon uban sa Diyos.
Nakasala ang Usa ka Maunongong Hari
Ang nasod sa Israel nakiggubat batok sa mga Ammonhanon, apan si David nagpabilin sa Jerusalem. Usa ka gabii samtang nagpasiyo sa ibabaw sa atop sa iyang palasyo, iyang nakita ang usa ka maanyag nga babaye nga naligo didto sa kasikbit nga balay. Siya wala magpugong sa iyang kaugalingon apan nagbaton ug daotang pangibog kaniya. Sa pagkasayod nga siya si Bat-seba, ang asawa ni Urias nga usa ka sundalo taliwala sa iyang panon, si David nagpatawag kaniya, ug siya nanapaw kaniya. Wala magdugay si Bat-seba nagpahibalo kang David nga siya nagsabak.—2 Samuel 11:1-5.
Si David dili na makalingkawas. Kon mabutyag ang ilang sala, kamatayon ang silot nga ipahamtang kanilang duha. (Levitico 20:10) Busa gihimo niya ang usa ka laraw. Ang bana ni Bat-seba, si Urias, iyang gipatawag gikan sa gubat. Human nga bug-os magpakisayod kaniya bahin sa gubat, gisugo ni David si Urias nga mopauli sa iyang balay. Gituohan ni David nga pinaagi niini si Urias mopatim-aw nga maoy amahan sa anak ni Bat-seba.—2 Samuel 11:6-9.
Sa kahigawad ni David, si Urias wala moduaw sa iyang asawa. Si Urias miingon nga dili gayod siya makaako nga mopauli samtang gisagubang sa kasundalohan ang mga kalisdanan sa pagpakiggubat. Kon ang usa ka sundalong Israelinhon makiggubat, ang mga lalaki dili makigsekso, bisan sa ilang kaugalingong mga asawa. Sila kinahanglang magpabiling hinlo sa seremonyal nga paagi. (1 Samuel 21:5) Unya gidapit ni David si Urias sa usa ka pagpangaon ug gihubog siya, apan dili gihapon siya gusto nga mopauli ngadto sa iyang asawa. Ang matinumanong panggawi ni Urias nagkondenar sa grabeng sala ni David.—2 Samuel 11:10-13.
Misamot pagkabitik si David gumikan sa mga sangpotanan sa iyang sala. Kay nawad-ag paglaom nakakita siyag usa lamang ka solusyon. Gipabalik niya si Urias sa panggubatan dala ang usa ka sulat ngadto sa heneral sa kasundalohan nga si Joab. Tataw ang tuyo sa maong mubong sulat: “Ibutang ninyo si Urias atubangan sa kinabangisan nga talay sa pagpakiggubat, ug manibog kamo gikan kaniya, ug siya pagahampakon ug mamatay.” Pinaagi sa maong sulat, daw nalilong sa gamhanang hari ang iyang mga gihimo, nga gipapatay si Urias.—2 Samuel 11:14-17.
Sa dihang natapos na ang yugto sa pagbangotan ni Bat-seba alang sa iyang bana, si David nakigminyo kaniya. Milabay ang panahon, ug natawo ang ilang anak. Sulod niining mga panghitaboa, si David nagpakahilom lamang bahin sa iyang mga sala. Tingali gipakamatarong niya sa iyang kaugalingon ang iyang mga nahimo. Wala ba mamatay si Urias sa dungganong paagi diha sa gubat ingon sa nahitabo sa uban? Dugang pa, dili ba iya mang gisupak ang iyang hari pinaagi sa pagdumili sa pag-adto sa iyang asawa? Ang ‘malimbongon nga kasingkasing’ mogamit sa tanang matang sa pangatarongan aron pakamatarongon ang sala.—Jeremias 17:9; 2 Samuel 11:25.
Kasaypanan nga Mitultol sa Pagpakasala
Sa unsang paagi si David, nga usa ka mahigugmaon sa pagkamatarong, mainklinar sa pagbuhat ug daotan pinaagi sa pagpanapaw ug pagbuno? Ang mga binhi sa iyang sala tatawng natisok sulod sa usa ka yugto sa panahon. Kita tingali matingala kon nganong wala mouban si David sa iyang mga tawo, aron tabangan sila sa ilang pagpakiggubat batok sa mga kaaway ni Jehova. Sa kasukwahi, si David nagparelaksrelaks lang didto sa iyang palasyo, nga wala gani maghunahuna sa mga kabalaka bahin sa gubat aron mawagtang ang iyang daotang tinguha alang sa asawa sa usa ka matinumanong sundalo. Karong adlawa, usa ka proteksiyon alang sa tinuod nga mga Kristohanon nga aktibong malangkit sa espirituwal nga mga pangagpas uban sa ilang mga kongregasyon ug makig-ambit nga makanunayon sa buluhatong pag-ebanghelyo.—1 Timoteo 6:12.
Ang hari sa Israel gisugo sa paghimo ug usa ka kopya sa Balaod ug sa pagbasa niana sa matag adlaw. Gihatag sa Bibliya ang katarongan niini: “Aron siya makakat-on sa pagkahadlok kang Jehova nga iyang Diyos aron sa pagtuman sa tanang pulong niini nga balaod ug niini nga mga regulasyon pinaagi sa pagbuhat kanila; aron ang iyang kasingkasing dili magmapahitas-on ibabaw sa iyang mga igsoon ug aron siya dili motipas gikan sa sugo ngadto sa tuo o sa wala.” (Deuteronomio 17:18-20) Malagmit nga wala sunda ni David kana nga sugo sa dihang nakahimo siya niining grabeng mga sala. Ang makanunayong pagtuon ug pagpamalandong sa Pulong sa Diyos tinong makatabang sa pagpanalipod kanato nga dili makahimog sala niining malisod nga mga panahon.—Proverbio 2:10-12.
Dugang pa, ang kataposang sugo sa Napulo ka Sugo espesipikong nag-ingon: “Dili ka magtinguha sa asawa sa imong isigkatawo.” (Exodo 20:17) Niadtong tungora si David nakabatog ubay-ubayng mga asawa ug mga puyopuyo. (2 Samuel 3:2-5) Apan wala kana magpanalipod kaniya sa pagtinguha sa laing maanyag nga babaye. Kini nga asoy nagpahinumdom kanato sa kaseryoso sa mga pulong ni Jesus: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:28) Inay nga tugotang magpabilin ang maong daotang mga tinguha, angay kitang magmaalisto sa paghanaw niini gikan sa atong hunahuna ug kasingkasing.
Paghinulsol ug Kaluoy
Ang prangkang asoy sa Bibliya bahin sa sala ni David tinong wala mahisulat aron sa pagtagbaw sa daotang seksuwal nga mga tinguha sa usa ka tawo. Ang maong rekord naghatag kanatog kahigayonan aron masaksihan ang gamhanan ug makapatandog nga pagpasundayag sa usa sa talagsaong mga hiyas ni Jehova—ang iyang kaluoy.—Exodo 34:6, 7.
Human manganak si Bat-seba ug usa ka anak nga lalaki, gipadala ni Jehova si Natan aron sukmatan si David. Kini maoy usa ka buhat sa kaluoy. Kon si David wala adtoa ug padayong nagpakahilom, posible nga siya motig-a sa pagpakasala. (Hebreohanon 3:13) Ikalipay, si David misanong sa kaluoy sa Diyos. Ang maayo kaayo ug tin-aw nga mga pulong ni Natan nakatandog sa tanlag ni David, ug siya mapainubsanong miangkon nga siya nakasala batok sa Diyos. Sa pagkatinuod, ang Salmo 51, nga naghisgot sa sala ni David maylabot kang Bat-seba, gitagik human sa iyang paghinulsol ug pagsugid sa iyang grabeng sala. Hinaot nga dili nato tugotan ang atong kasingkasing nga motig-a kon kita makahimog seryosong sala.—2 Samuel 12:1-13.
Gipasaylo si David, apan wala siya mapahigawas sa disiplina o sa mga sangpotanan sa iyang sala. (Proverbio 6:27) Mahitabo ba kahang siya dili disiplinahon? Kon pasagdan lang sa Diyos ang sala sa usa ka tawo, ang iyang mga sukdanan mahimong dili na katuohan. Siya mahimong walay kapuslanan sama sa Hataas nga Saserdoteng si Eli, nga naghatag ug dili mapig-ot nga pagbadlong sa iyang daotang mga anak ug nagtugot kanila nga magpadayon ang ilang daotang mga binuhatan. (1 Samuel 2:22-25) Bisan pa niana, wala takpi ni Jehova ang Iyang mahigugmaong-kalulot alang sa usa nga mahinulsolon. Ang iyang kaluoy, sama sa makapalagsik, bugnaw nga tubig, motabang sa nakasala nga makaantos sa mga sangpotanan sa iyang sala. Ang kainit sa pagpasaylo sa Diyos ug ang makapalig-ong asosasyon uban sa mga isigkamagsisimba makapasig-uli sa espirituwalidad sa usa nga nakasala. Oo, pinasukad sa lukat ni Kristo, ang mahinulsolon makatagamtam “sa bahandi sa dili-takos nga kalulot sa [Diyos].”—Efeso 1:7.
“Usa ka Putling Kasingkasing” ug “Usa ka Bag-ong Espiritu”
Human sa pagsugid ni David, wala siya magpadaog sa pagbati sa pagkawalay-kapuslanan. Ang mga pamulong diha sa mga salmo nga iyang gisulat bahin sa iyang pagsugid nagpakita sa kahupayan nga iyang gibati ug sa iyang determinasyon sa pag-alagad nga matinumanon sa Diyos. Pananglitan, tagda ang Salmo 32. Sa bersikulo 1, atong mabasa: “Malipayon siya kansang kalapasan gipasaylo, kansang sala gitabonan.” Bisan unsa pa ka seryoso ang sala, may malipayon gihapong resulta kon sinsero ang usa ka tawo sa iyang paghinulsol. Ang usa ka paagi nga ikapakita kining maong pagkasinsero mao ang pagdawat sa tanang responsibilidad sa imong mga nahimo, ingon sa gibuhat ni David. (2 Samuel 12:13) Siya wala magpakamatarong sa iyang kaugalingon sa atubangan ni Jehova o mosulay sa pagbasol sa uban. Ang bersikulo 5 nag-ingon: “Sa kataposan gisugid ko kanimo ang akong sala, ug wala ko taboni ang akong kasaypanan. Miingon ako: ‘Isugid ko kang Jehova ang akong mga kalapasan.’ Ug ikaw mismo nagpasaylo sa pagkadaotan sa akong mga sala.” Ang tim-os nga pagsugid sa sala makahatag ug kahupayan, sa ingon ang usa ka tawo dili na hasolon sa iyang tanlag tungod sa iyang nangaging kasaypanan.
Human mangayog pasaylo kang Jehova, mihangyo si David: “Buhati ako ug putli nga kasingkasing, Oh Diyos, ug ibutang sa akong kahiladman ang usa ka bag-ong espiritu, usa nga malig-on.” (Salmo 51:10) Ang paghangyo ug “putli nga kasingkasing” ug “usa ka bag-ong espiritu” nagpakita nga si David nakaamgo sa masalaypong kiling diha kaniya ug nga gikinahanglan niya ang tabang sa Diyos sa paghinlo sa iyang kasingkasing ug sa paghimog pagbag-o. Inay nga magpadaog sa pagkaluoy sa kaugalingon, siya determinado sa pagpadayon sa iyang pag-alagad sa Diyos. Siya miampo: “Oh Jehova, bukhon mo unta kining akong mga ngabil, aron ang akong baba makapahayag sa imong pagdayeg.”—Salmo 51:15.
Unsa ang sanong ni Jehova sa sinsero nga paghinulsol ug hugot nga paningkamot ni David nga moalagad kaniya? Siya naghatag kang David niining mainitong pasalig: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” (Salmo 32:8) Kini ang pasalig sa personal nga pagtagad ni Jehova sa mga pagbati ug mga panginahanglan sa mahinulsolon. Mihimog tikang si Jehova sa paghatag kang David ug mas hait nga salabotan, ang katakos sa pagkakita saylo pa sa panggawas nga dagway sa mga butang. Kon makaatubang ug tentasyon sa umalabot, maila na niya ang mga sangpotanan sa iyang mga lihok ug ang epekto niini ngadto sa uban, ug siya makahimo sa paglihok nga maalamon.
Kini nga panghitabo sa kinabuhi ni David magsilbing pangpadasig sa tanan nga nakahimog seryosong sala. Pinaagi sa pagsugid sa atong sala ug pagpakitag sinsero nga paghinulsol, mabatonan nato pag-usab ang labing bililhong kabtangan, ang atong relasyon uban kang Jehova nga Diyos. Ang temporaryong kasakit ug kaulaw nga tingali atong antoson mas arang-arang pa gayod kay sa tumang kasakit nga atong bation gumikan sa pagpakahilom, o sa mapait nga sangpotanan sa pagtugot sa atong kaugalingon nga mahimong tig-a sa atong pagkamasuklanon. (Salmo 32:9) Hinunoa, atong matagamtam ang mainit nga pagpasaylo sa usa ka mahigugmaon, maluloy-on nga Diyos, “ang Amahan sa malumong mga kaluoy ug ang Diyos sa tanang paghupay.”—2 Corinto 1:3.
[Hulagway sa panid 31]
Gituohan ni David nga makaikyas sa mga sangpotanan sa iyang sala pinaagi sa pagpapatay kang Urias