Ang Diyos ba Mamati Dihang Ikaw Mag-ampo?

ANG punoang ehekutibo mao ang modesider kon iya bang itudlo ang usa ka butang o siya mismo ang moatiman niana. Sa susama, ang Soberanong Magmamando sa uniberso adunay kapilian sa pagtino sa sukod sa iyang personal nga pagpakiglangkit sa bisan unsang butang. Ang Kasulatan nagtudlo nga ang Diyos mipili sa paglangkit sa iyang kaugalingon diha sa atong mga pag-ampo ug busa nagatudlo kanato nga itumong kini ngadto kaniya.​—Salmo 66:19; 69:13.

Ang pagpili sa Diyos niining butanga nagbutyag sa iyang personal nga interes diha sa mga pag-ampo sa iyang tawhanong mga alagad. Imbes paluyahon ang iyang katawhan gikan sa pagduol kaniya uban ang tanang panghunahuna ug pag-atiman, siya nagtambag kanila: “Pag-ampo kamo nga walay paghunong,” “lumahutay kamo sa pag-ampo,” “itugyan ninyo kang Jehova ang inyong palas-anon,” “itugyan ninyo ang inyong kabalaka ngadto sa [Diyos].”​—1 Tesalonica 5:17; Roma 12:12; Salmo 55:22; 1 Pedro 5:7.

Kon ang Diyos dili gustong mamati sa mga pag-ampo sa iyang mga alagad, siya dili unta maghikay alang niana aron sa pagduol kaniya ug sa pagdasig sa libreng pagbuhat niana. Nan, kining pagpili sa Diyos sa paghimo sa iyang kaugalingon nga daling maduol sa iyang katawhan, maoy usa ka katarongan sa pagsalig nga siya nagapamati. Oo, iyang ginatagad ang mga pag-ampo sa matag usa sa iyang mga alagad.

Dili angay kalimtan mao ang kamatuoran nga ang Bibliya tin-aw nga nag-ingon nga ang Diyos nagapatalinghog sa pag-ampo. Si apostol Juan, pananglitan, misulat: “Kini mao ang atong nabatonang pasalig kaniya, nga, kon mangayo kitag bisan unsa sumala sa iyang kabubut-on, siya mamati gayod kanato.” (1 Juan 5:14) Si Haring David naghisgot kang Jehova nga Diyos ingong ang “Tigpatalinghog sa pag-ampo” ug masaligong miingon: “Siya nakadungog sa akong tingog.”​—Salmo 55:17; 65:2.

Busa samtang ang buhat sa pag-ampo sa walay duhaduha may kaayohan, ang Kasulatan nagpakita nga labaw pa ang nalangkit sa dihang ang usa ka tawong matarong magaampo. Adunay usa nga nagapatalinghog. Ang nagapatalinghog mao si Jehova.​—Santiago 5:16-18.

Mga Pag-ampo nga Gipamatian

Ang Bibliya daghag mga asoy sa mga tawong kansang mga pag-ampo, sa pagkatinuod, gipamatian, ug gitubag sa Diyos. Ang ilang mga kasinatian tin-aw nga nagpamatuod nga ang mga kaayohan sa pag-ampo maoy saylo pa sa makaayong epekto sa pagtino ug sa pagpahayag sa mga hunahuna sa usa. Sila maoy saylo pa sa personal nga mga paningkamot sa usa ka tawo nga nahiuyon sa iyang mga pag-ampo.

Pananglitan, sa dihang giatubang sa panagkunsabo ni Absalom sa pag-ilog sa pagkahari sa Israel, si Haring David miampo: “Palihog, himoa nga binuang ang tambag ni Ahithophel [magtatambag ni Absalom], O Jehova!” Dili gamay nga hangyo, kay “ang tambag ni Ahithophel . . . matarong sama sa tambag nga gihatag sa usa ka tawo nga nagpakisayod mahitungod sa pulong sa matuod nga Diyos. Mao kini ang pagtan-aw sa tambag ni Ahithophel.” Human niadto wala sunda ni Absalom ang gisugyot nga plano ni Ahithophel sa pagpukan kang Haring David. Ngano man? “Si Jehova ang nagbuot nga pakyason ang tambag ni Ahithophel bisag maayo, aron makapahamtang ug katalagman si Jehova kang Abasalom.” Tin-aw, ang pag-ampo ni David gipamatian.​—2 Samuel 15:31; 16:23; 17:14.

Sa susama, human nangamuyo si Ezekias sa Diyos nga siya mamaayo sa iyang sakit nga ikamatay, siya naayo. Kini ba maoy tungod sa sikolohikal nga mga kaayohan kang Ezekias ingong resulta sa iyang pag-ampo? Dili gayod! Ang mensahe ni Jehova kang Ezekias, ingon sa gihatag sa propetang si Isaias, mao: “Nakadungog ako sa imong pag-ampo. Nakita ko ang imong mga luha. Ania ako nagaayo kanimo.”​—2 Hari 20:1-6.

Si Daniel, kansang pag-ampo gitubag sa ulahi kay sa iyang gidahom, gipasaligan sa manulonda ni Jehova: “Ang imong mga pulong gipamatian.” Ang mga pag-ampo sa uban, sama kang Ana, sa mga tinun-an ni Jesus, ug sa opisyal sa mga sundalo nga si Cornelio, gitubag sa mga paagi nga dili ikapasidungog sa tawhanong katakos lamang. Nan, ang Bibliya tin-aw nga nagtudlo nga ang mga pag-ampo nga nahiuyon sa balaang kabubut-on ginadawat, ginapamatian, ug ginatubag sa Diyos.​—Daniel 10:2-14; 1 Samuel 1:1-20; Buhat 4:24-31; 10:1-7.

Apan sa unsang paagi pagatubagon sa Diyos ang mga pag-ampo sa iyang matinumanong mga alagad karong adlawa?

Mga Tubag sa mga Pag-ampo

Ang mga pag-ampo nga gihisgotan sa itaas gitubag sa dramatikanhon, milagroso nga mga paagi. Apan, palihog ibutang sa hunahuna, nga bisan sa panahon sa Bibliya, ang kadaghanan sa mga tubag sa mga pag-ampo dili dayon mamatikdan. Tungod kay kini nalangkit sa paghatag ug moral nga kalig-on ug kadan-agan, nakahimo sa mga alagad sa Diyos sa paghupot ug usa ka matarong nga dalan. Ilabina alang sa mga Kristohanon, ang mga tubag sa mga pag-ampo nalangkit sa mga butang nga sa panguna maoy espirituwal, dili talagsaon o gamhanang mga buhat.​—Colosas 1:9.

Busa ayawg pagkawala sa paglaom kon ang imong mga pag-ampo dili kanunay matubag sa paagi nga maoy imong pagdahom o gusto. Pananglitan, imbes kay wagtangon ang pagsulay, tingalig pilion sa Diyos nga hatagan ka ug “gahom nga labaw sa kasarangan” aron makaantos niana. (2 Corinto 4:7; 2 Timoteo 4:17) Dili gayod nato pakamenoson ang bili sa maong gahom, ni kita mohinapos nga si Jehova wala gayod motubag sa atong mga pag-ampo.

Palandonga ang kahimtang mismo sa Anak sa Diyos, si Jesu-Kristo. Sa iyang kabalaka nga dili unta mamatay ingong usa ka dayag nga tigpasipala, si Jesus miampo: “Amahan, kon buot mo, kuhaa kining kopa gikan kanako.” Kini ba nga pag-ampo mauyonong gitubag sa Diyos? Oo, ingon sa gipamatud-an sa Hebreohanon 5:7. Wala palikaya ni Jehova ang iyang Anak sa panginahanglang mamatay diha sa kahoy sa pagsakit. Hinunoa, “usa ka manulonda gikan sa langit mitungha kaniya ug nagpalig-on kaniya.”​—Lucas 22:42, 43.

Usa ba ka dramatikanhon, milagrosong tubag? Alang sa kadaghanan kanato, kadto mao gayod! Apan alang kang Jehova nga Diyos, ang tuboran sa maong gahom, dili kadto usa ka milagro. Ug si Jesus, gikan sa iyang sayosayong kinabuhi sa langit, sinati sa nangaging mga hitabo sa dihang ang mga manulonda mipakita sa mga tawo. Busa ang pagtungha sa usa ka manulonda wala nay dramatikanhong epekto alang kaniya kay kanato. Bisan pa, kining maong manulonda, nga dayag nakaila ni Jesus sa personal gikan sa Iyang una-tawhanong paglungtad, mitabang sa paglig-on Kaniya alang sa pagsulay nga taliabot.

Sa pagtubag sa mga pag-ampo sa iyang matinumanong mga alagad karon, nagahatag kanunay si Jehova sa gikinahanglang kalig-on aron makalahutay. Kini nga pagpaluyo mahimong pinaagig pagdasig gikan sa isigkamagsisimba mga kanunay natong ikauban sa personal. Aduna bay usa kanato nga buot mosalikway niana nga pagdasig, tingalig mohinapos nga sanglit ang atong mga isigkaalagad wala man makasinatig mga pagsulay nga sama sa atoa, wala sila sa kahimtang sa paglig-on kanato? Mahimong ingon usab unta niana ang paglantaw ni Jesus sa manulonda nga mipakita kaniya. Hinunoa, iyang gidawat ang pagdasig ingong tubag ni Jehova sa iyang pag-ampo ug busa nakahimo sa pagtuman nga matinumanon sa kabubut-on sa iyang Amahan. Kita usab buot modawat nga mapasalamaton sa kalig-on nga ihatag ni Jehova sa pagtubag sa atong mga pag-ampo. Hinumdomi, usab, nga ang maong mga yugto sa mapailobong paglahutay sagad pagasundan ug dili-matukib nga mga panalangin.​—Ecclesiastes 11:6; Santiago 5:11.

Magmasaligon nga ang Diyos Nagapamati

Ayaw gayod wad-a ang pagsalig sa pagkaepektibo sa pag-ampo kon ikaw dili dayon tubagon. Ang mga tubag sa pipila ka pag-ampo, sama sa personal nga kahupayan gikan sa kapit-os o sa dugang nga kaakohan diha sa pag-alagad sa Diyos, tingali kinahanglang ihulat hangtod sa panahong matino sa Diyos nga maoy husto ug labing maayo. (Lucas 18:7, 8; 1 Pedro 5:6) Kon ikaw nag-ampo bahin sa usa ka butang nga dulot mong gikabalak-an, ipakita sa Diyos pinaagi sa imong pagkamapinadayonon nga ang imong tinguha maoy kinasingkasing, ang imong motibo maoy putli ug tinuod. Si Jacob nagpakita niining espirituha sa dihang, human sa iyang grabe ug dugaydugay nga pakigbugno sa usa ka manulonda, siya miingon: “Dili ko ikaw buhian hangtod panalanginan mo ako.” (Genesis 32:24-32) Kita kinahanglang magbaton sa samang pagsalig nga kon kita magpadayon sa paghangyo, atong madawat ang panalangin sa nahaigong panahon.​—Lucas 11:9.

Usa ka kataposang hunahuna. Usa ka hamiling pribilehiyo nga pamatian sa Soberano sa uniberso. Tungod niini, kita ba mainampingong mamati sa dihang si Jehova nga Diyos, pinaagi sa iyang Pulong, makigsulti kanato bahin sa iyang mga kinahanglanon? Samtang ang atong mga pag-ampo mas mopasuod kanato sa atong Maglalalang, buot natong hatagan ug seryosong pagtagad ang tanang butang nga iyang isulti kanato.

[Hulagway sa panid 6]

Ang Diyos nagapamati sa mga pag-ampo. Kita ba nagapamati

kaniya pinaagi sa iyang Pulong?