Mga Batan-on Nangutana . . .

Nganong Lisoron Ko ang Akong Kaugalingon Alang sa Uban?

“KANSANG kaayohan ang mauna sa imong kinabuhi?” Ang usa ka reporter sa Pagmata! nangutana niini sa usa ka grupo sa mga batan-on sa usa ka dalan nga daghag tawo. “Ang akong kaugalingon,” matud ni Mike. “Ako magtinguha sa ‘numero uno’ nga una, kataposan, ug kanunay.” Ang 17-anyos nga Susie miingon: “Kon bahin na sa kaayohan sa akong pamilya, o akoa, ang akoa ang mauna.”

Ikasubong isulti, kasagaran ang maong mga pagbati. Ang usa ka librong gitawag The Postponed Generation nagsugilon bahin sa usa ka pagtuon sa 1,125 ka estudyante diin duha ka sosyologo misulay sa pagsusi kon kaha ang mga batan-on ilabinang mabalak-on sa ilang kaugalingon o sa katilingban. Ang mga resulta? Duolag 80 porsiento napamatud-ang “nag-atiman sa ilang kaugalingon, nga walay pagkamabination o obligasyon sa katilingban.”

Nan, dili katingad-an nga diyutay ra ang andam magpalisod sa ilang kaugalingon alang sa uban, nga magpasamok o mobuhat sa dili kasagaran alang sa lain gawas sa ilang kaugalingon. Ang mga librong sama sa The Art of Selfishness ug Looking Out for Number One nahimong himalitan kaayo, nga nagsilbing labaw rag diyutay sa mga plano sa pag-ugmad sa mahunahunaon-sa-kaugalingon nga kagawian. Sumala sa gitagna sa Bibliya, ang mga tawo karong adlawa maoy “mga mahigugmaon sa ilang kaugalingon.”​—2 Timoteo 3:1, 2.

Bisan pa niana, sa unsang paagi ikaw mosanong sa mga panginahanglan sa uban? Kon, pananglitan, andam ka nang mopahiluna ug motan-aw sa imong paboritong programa sa telebisyon ug si Mama o Papa mosugo nimo sa pag-adto sa tindahan, ikaw ba masuko o mayugot? Mosinta ka ba sa ideya sa pagbuhat sa mga buluhaton sa balay, pagpakig-ambit sa sinina o puy-anan uban sa usa ka igsoong lalaki o babaye, o yanong pagtabang sa lain sa dihang kini ‘dili kombenyente’? Nan panahon na sa paghimog pila ka kausaban. Apan ngano? Ug labi pang hinungdanon, sa unsang paagi?

Ang Sinugdanan sa Kahakog

Ang balaod sa Diyos alang sa iyang katawhan mao: “Higugmaon mo ang imong silingan sama sa imong kaugalingon.” (Mateo 22:39) Kini nagkahulogang kita obligado nga mahimong matinagdanon, dili-mahakogon, sensitibo sa mga panginahanglan sa uban. Bisan pa niana, kita dili kanunay makakab-ot sa maong masidlakong mithi, ug ang Bibliya nagatabang nato sa pagsabot ngano. Sa Genesis 8:21 kini nagaingon: “Ang kiling sa kasingkasing sa tawo maoy daotan sukad sa iyang pagkabata.”

Ang atong katigulangan nga si Adan walay pagtagad kon unsay epekto diha sa uban sa iyang masukolong buhat. Nan, dili angay kitang matingala nga kita, ang iyang mga anak, matawong may hakog nga kinaiya. (Itandi ang Salmo 51:5.) Kini katingad-anan nga madayag sa pagkabata pa. Ang magasing Parents miingon: “Ang tanang batang nagakamang pa maoy mahunahunaon-sa-kaugalingon. . . . Sila maikag kanimo apan sa diha lamang nga ikaw may ginabuhat alang kanila.” Kon dili sumpoon, ang kahakog tingali mahimong mapinadayonong taras.

Ang laing taras nga nagababag sa usa sa paglisod sa iyang kaugalingon alang sa uban mao ang pagkatapolan. (Proverbio 21:25) Sa pagkamatuod, kon maghari ang pagkatapolan, ang usa momugnag kataw-anang mga pasangil sa paglikay sa pagbuhat sa mga butang. Nagaingon ang Proverbio 22:13: “Ang tapolan nagaingon: ‘Adunay leyon sa gawas! Sa tunga sa mga plasa ako pagapatyon!’”

Kon Unsay Nalangkit sa Pagtabang sa Uban

Ang sambingay sa mahigalaong Samarianhon nga natala sa Lucas 10:29-37 nagapakita nga ang pagtabang sa uban tingali maglangkit sa tinuod nga pagsakripisyo-sa-kaugalingon. Sa pagtubag sa pangutana, “Kinsa ba ang tinuod kong silingan?” si Jesus misugilon bahin sa usa ka Hudiyo nga gibunalan sa mga tulisan ug gibiyaan kay abig patay na. Bisan pa sa rasanhong mga suliran nga naglungtad tali sa mga Hudiyo ug mga Samarianhon, ang usa ka tawong Samarianhon natukmod sa paglisod sa iyang kaugalingon alang sa nabiktima sa panulis. Giatiman niya ang mga samad sa tawo, nga migamit sa bino ug lana gikan sa iyang kaugalingong balon nga pagkaon. Dayon gihinay niya pagsakwat ang tawo aron isakay sa iyang hayop ug gidala siya ngadto sa usa ka abotanan. Gibayran niya ang tag-iya sa abotanan sa bili sa duha ka adlaw nga suhol ug misaad sa pagbayad sa dugang galastohan.

Kining makapatandog nga ilustrasyon nagbaton sa diwa kon unsay kahulogan sa paglisod sa kaugalingon alang sa uban: ang paghimo sa inisyatibo, paghimo sa kaugalingon nga silingan sa uban. Kini nagalangkit sa pagkaandam mosakripisyo sa panahon, kusog, ug salapi. Hisgotan nato ang pila ka paagi sa pagbuhat niini.

Paglisod sa Imong Kaugalingon Alang sa Inyong Pamilya

Ang imong labing suod nga mga silingan mao ang mga sakop sa inyong pamilya​—mga ginikanan, mga igsoong lalaki, mga igsoong babaye. Bisan pa niana, basin mobati ka nga kadtong labing suod kanimo angay mosabot sa imong okupadong kinabuhi ug dili mohimog hinobrang mga panginahanglan kanimo. Bisan pa niana, ang Bibliya nagatambag: “Magmaabiabihon sa usag usa nga walay pagbagulbol.” (1 Pedro 4:9) Sulayi ang pagtan-aw sa maorag mga kalisod nga basin mosangpot, dili ingong mga kasamok, kondili ingong higayon sa paglig-on sa bugkos sa pamilya.

Si Eddie nahinumdom: “Ang eskedyul ni Mama kasagarang makapaluya kaniya. Apan dili gayod ako malimot sa iyang hitsura sa pagbukas sa pultahan ug pagkakita nga nahugasan na ang mga plato, nalimpiyohan na ang salog, ug naandam na ang lamesa alang sa pangaon. Angkonon ko nga gusto ko untang modulag besbol nianang mga higayona, apan ang paglisod sa akong kaugalingon nakatabang sa pagpasuod sa among pamilya.” Makahunahuna ka bag pila ka paagi sa paglisod sa imong kaugalingon alang sa mga sakop sa inyong pamilya?

Pagkahimong Silingan sa Isigka-Kristohanon

Matud ni apostol Pablo: “Sa pagkamatuod, samtang kita may maayong panahon alang niana, buhaton nato ang maayo sa tanan, apan ilabina na ngadto niadtong kaubanan nato sa pagtuo.” (Galacia 6:10) Ang dakong kalipay mosangpot sa dihang moalagad ka sa isigka-Kristohanon.​—Buhat 20:35.

Ang 16-anyos nga Chris, pananglitan, maoy usa sa mga Saksi ni Jehova. Siya malipay nga magpasugosugo sa usa ka tigulang nga sakop sa lokal nga kongregasyon. Sa usa ka okasyon siya mitelepono kaniya alang sa tabang. Ang elebetor sa iyang apartment naguba, ug kay dili makasaka sa lima ka hut-ong sa hagdan, siya dili makasaka. Sa pag-abot, si Chris miingon: “Sakay sa akong bukobuko, ug dad-on ko ikaw sa itaas kon mosugot ka.” Sila misaka abot sa ikalimang andana! Makapakapoy? Walay pagduhaduha. Apan si Chris gigantihan dili lamang sa pasalamat sa iyang tigulang nga higala apan sa kahibalo nga ang iyang mga lihok nakapahimuot sa Diyos!

Hinuon, dili kinahanglang mohulat ka sa maong makapaukyab nga mga situwasyon sa pagpakita sa imong kabalaka. Pananglitan, sa wala pa ug sa human sa Kristohanong mga tigom, ang pila ka batan-on lagmit magtapok, nga ipahigawas ang mga tigulang. Kini supak sa tambag sa Bibliya nga “magpakitag pagkamahunahunaon” sa mga tigulang. (Levitico 19:32) Usahay, ang mahigalaong komosta o mubong pakig-estorya mao lang ang gikinahanglan sa paglipay sa usa ka tigulang. ‘Apan malisdan ko nga makigsulti sa mga tigulang,’ tingali motutol ka. ‘Kami walay gikahiusahan.’

Si Doug, nga karon nagaalagad nga ansiano sa Kristohanong kongregasyon, mahimuot nga mahinumdom: “Sa edad 19 ang labing suod kong mga higala edaran na nga mahimong akong mga ginikanan o mga apohan. Dako gayod ang ilang naamot sa akong espirituwal nga pagtubo!” Nganong dili nimo lisoron ug diyutay ang imong kaugalingon ug tinoon nga makighigala sa pila ka tigulang, tingali sa imong sunod Kristohanong tigom? Kasagarang imong makaplagan nga kamo labi pang daghag gikahiusahan kay sa imong naamgohan! Ug sama kang Doug, imong makaplagan nga makakat-on ka gikan sa ilang bililhong kasinatian sa kinabuhi.

Pagtabang “Niadtong Tagagawas”

Sa Colosas 4:5 si apostol Pablo miingon: “Magpadayon kamo sa paglakaw diha sa kaalam ngadto sa mga tagatagawas, nga magapalit sa higayon alang sa inyong kaugalingon.” Ang mga Saksi ni Jehova nagapakitag kabalaka alang sa uban pinaagi sa pagwali sa mensahe sa Bibliya. (Mateo 24:14) Ang mga batan-on nga nagaisip nga seryoso sa ilang obligasyon atubangan sa Diyos madasig sa pagbatog labing bug-os nga bahin sa maong buluhaton kutob sa mahimo.

“Gigamit ko ang akong kaugalingon sa buluhatong pagwali tungod sa akong gugma kang Jehova,” matud ni Tamitha. Bisan pag 11 anyos lamang, siya nagagugol ug daghang oras kada bulan sa buluhatong pagwali. “Ang pagwali nagahatag usab kanakog higayon sa pagpakitag gugma alang sa akong mga silingan.” Inay sa pagpangitag dakong-sapi nga mga trabaho, ang libolibong Kristohanong batan-on naghimong karera sa pag-alagad sa uban ingong bug-os-panahong mga magwawali, nga kasagaran nagatrabahong inoras sa pagbuhi sa ilang kaugalingon. Ang uban miboluntaryo aron mahimong mga misyonaryo o mga trabahante sa lainlaing mga sangang-buhatan sa Watch Tower Society.

Makaganansiya Ka Pinaagi sa Paghatag

“Ang mga tawo nagakinahanglan sa ubang tawo alang sa ilang maayong panglawas,” matud sa magasing American Health. Giangkon gani sa mga tigdukiduki nga ang mga tawong nagalisod sa ilang kaugalingon alang sa uban makabatog mga kaayohan sa panglawas. Si Jesu-Kristo, hinuon, mipunting sa laing kaayohan, nga miingon: “Panghatag kamo, ug kamo pagahatagan sa mga tawo.” (Lucas 6:38) Ang tawong mahinatagon makaangkon sa pagmahal sa uban; sa tino siya mahimong dumadawat sa pagkamahinatagon mismo!​—Itandi ang Proverbio 11:25.

Busa himoa ang pagpanghatag, paglisod sa imong kaugalingon alang sa uban. Sa dihang ang imong mahakogong kinaiya mopadayag, hinumdomi nga ang Pulong sa Diyos nagaingon: “Pasagding ang matag usa magapangita, dili sa iyang kaugalingong kaayohan, apan sa iya sa laing tawo.” (1 Corinto 10:24) Sa pagbuhat niana maangkon nimo dili lamang ang pakighigala sa uban kondili ang pag-uyon sa Labing Hataas nga Diyos.

[Hulagway sa panid 18]

Ang paglisod sa atong kaugalingon alang sa uban mohatag dakong kalipay