Maghigugmaay pa Kaha ang Tanang Tawo sa Usag Usa?

MAO pay pag-ingon sa usa ka abogado nga aron mapahimuslan ang “kinabuhing walay-kataposan,” kinahanglang higugmaon nato ang Diyos sa bug-os nga kasingkasing ug higugmaon ang atong mga silingan sama sa atong kaugalingon. Gidayeg ni Jesus ang abogado ug giingnan siya: “Ikaw mitubag nga husto; ‘padayona kini sa pagbuhat ug ikaw makabaton ug kinabuhi.’” (Lucas 10:​25-​28; Levitico 19:​18; Deuteronomio 6:5) Apan ang lalaki, nga buot pamatud-an ang iyang kaugalingon nga matarong, misukna: “Kinsa sa pagkatinuod ang akong silingan?”

Sa walay duhaduha ang abogado nagdahom nga si Jesus moingon, “Ang imong kaubang mga Hudiyo.” Apan miasoy si Jesus ug sugilanon bahin sa buotang Samaritano, nga nagpakitang ang mga tawo nga ang mga nasyonalidad lahi sa atoa atong mga silingan usab. (Lucas 10:​29-​37; Juan 4:​7-9) Panahon sa iyang ministeryo gipasiugda ni Jesus nga ang paghigugma sa Diyos ug paghigugma sa atong silingan mao ang labing hinungdanong mga sugo sa atong Maglalalang.​—Mateo 22:​34-​40.

Apan, duna bay grupo sa mga tawo nga nahigugma gayod sa ilang mga silingan? Posible ba gayod nga ang tanang tawo maghigugmaay sa usag usa?

Unang Siglong Milagro

Giingnan ni Jesus ang iyang mga sumusunod nga sila mailhan pinaagi sa gugma nga molatas sa rasanhon, nasodnon, ug sa tanang ubang mga utlanan. Siya miingon: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” Dayon siya midugang: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”​—Juan 13:​34, 35; 15:​12, 13.

Ang mga pagtulon-an ni Jesus bahin sa gugma, nga gipalig-on pinaagi sa iyang panig-ingnan, maoy nagpahinabo ug unang siglong milagro. Ang iyang mga sumusunod misundog sa ilang Agalon, nga nakakat-on sa paghigugma sa usag usa sa paagi nga nakadanig kaylap nga pagtagad ug pagdayeg. Si Tertullian, usa ka magsusulat sa ikaduha ug ikatulong mga siglo K.P., nagkutlo sa mga dili Kristohanon nga nagdayeg sa mga sumusunod ni Jesus: ‘Tan-awa ra god nahigugma gayod sila sa usag usa ug andam pa gani sila nga mamatay alang sa usag usa.’

Sa pagkatinuod, si apostol Juan misulat: “Nailalom kita sa obligasyon nga itugyan ang atong mga kalag alang sa atong mga igsoon.” (1 Juan 3:16) Gitudloan pa ngani ni Jesus ang iyang sumusunod sa paghigugma sa ilang mga kaaway. (Mateo 5:​43-45) Unsay resulta sa dihang ang mga tawo mahigugma gayod sa uban sumala sa gitudlo kanila ni Jesus nga buhaton?

Usa ka propesor sa political science namalandong nianang pangutanaha pinasikad sa mabatonang ebidensiya. Busa siya misukna, ingon sa natala sa The Christian Century: “Mahanduraw ba ni bisan kinsa si Jesus nga naglabay ug mga granada sa iyang mga kaaway, naggamit ug masinggan, naggunit ug flamethrower, naghulog ug mga bombang nukleyar o naglansad ug ICBM nga makapatay o makaangol ug libolibong inahan ug kabataan?”

Sa pagtubag, ang propesor miingon: “Ang pangutana tinuod nga baligho kaayo nga dili na kinahanglang tubagon.” Busa mipatungha siyag pangutana: “Kon dili makahimo niini si Jesus tungod kay sukwahi kini sa iyang kinaiya, nan sa unsang paagi mahimo nato kini ug magpabiling matinumanon kaniya?” Busa, dili kita angayng mahibulong sa neyutral nga baroganan nga nabatonan sa unang mga sumusunod ni Jesus, nga dokumentado kaayo sa daghang libro sa kasaysayan. Tagda lamang ang duha ka pananglitan.

Ang Our World Through the Ages, ni N. Platt ug M. J. Drummond, nag-ingon: “Lahi kaayo ang pamatasan sa mga Kristohanon kay nianang sa mga Romano. . . . Sanglit si Kristo nagsangyawg pakigdait, nagdumili sila sa pagsundalo.” Ug ang The Decline and Fall of the Roman Empire, ni Edward Gibbon, nag-ingon: “[Ang unang mga Kristohanon] midumili sa pag-ambit sa bisan unsang aktibong bahin diha sa sibil nga administrasyon o sa militaryong depensa sa imperyo. . . . Imposible nga ang mga Kristohanon, nga walay pagbiya sa mas sagradong katungdanan, mahimong mga sundalo.”

Unsa na man Karon?

Ang samag-Kristong gugma gibuhat ba ni bisan kinsa karon? Ang Encyclopedia Canadiana nag-ingon: “Ang buluhaton sa mga Saksi ni Jehova maoy pagpabuhi ug pagpalig-on pag-usab sa kanhiayng Kristiyanidad nga gihimo ni Jesus ug sa iyang mga tinun-an . . . Ang tanan managsoon.”

Unsay ipasabot niana? Nagpasabot kana nga walay gitugotan ang mga Saksi ni Jehova​—walay rasa, nasyonalidad, ni etnikong kagikan​—nga magtukmod kanila sa pagdumot sa ilang mga silingan. Ni mopatay sila ni bisan kinsa, kay mahulagwayon na nilang gisalsal ang ilang mga espada sa pagkahimong mga punta sa daro ug ang ilang mga bangkaw ngadto sa mga galab, segun sa gitagna sa Bibliya nga himoon sa tinuod nga mga alagad sa Diyos.​—Isaias 2:4.

Dili ikatingala nga ang editoryal sa Sacramento Union sa California miingon: “Husto ang pag-ingon nga kon ang tibuok kalibotan magkinabuhi sa pagtulon-an sa mga Saksi ni Jehova matapos gayod ang pag-ula sa dugo ug pagdumot, ug ang gugma magahari”!

Sa susama, usa ka magsusulat sa magasing Ring sa Hungaria miingon: “Ako nakapanghinapos nga kon ang mga Saksi ni Jehova lamang ang magpuyo sa yuta, ang gubat mahanaw, ug ang buluhaton lamang sa mga polis mao ang pagpadagan sa trapiko ug pag-isyu ug mga pasaporte.”

Sa Italyanong magasin sa simbahan nga Andare alle genti, usa ka Romano Katolikong madre misulat nga nagdayeg sa mga Saksi: “Nagdumili sila sa bisan unsang dagway sa kapintasan ug sa walay pagsukol nag-antos sa daghang pagsulay nga gipahamtang kanila tungod sa ilang mga pagtulon-an . . . Pagkalahi gayod unta sa kalibotan kon kitang tanan momata usa ka buntag niana nga hugot nga midesisyon nga dili na moapil pag-usab sa gubat, bisan unsa pay dangatan o rason, sama sa mga Saksi ni Jehova!”

Ang mga Saksi namatikdan nga maoy mouna pagtabang sa ilang mga silingan. (Galacia 6:10) Sa iyang librong Women in Soviet Prisons, usa ka taga-Latvia miingon nga grabe siyang nasakit samtang nagtrabaho sa prisohan sa Potma sa tungatunga sa mga tuig 1960. “Sa akong tibuok nga pagkasakit [ang mga Saksi] maoy kugihang mga nars. Wala na ako mangandoyg mas maayong pag-atiman, ilabina ilalom sa mga kahimtang sa kampo.” Siya midugang: “Gibati sa mga Saksi ni Jehova nga maoy ilang katungdanan ang pagtabang sa matag usa, way sapayan sa relihiyon o nasyonalidad.”

Di pa dugay ang publikong prensa sa Republika sa Czech nakamatikod sa maong panggawi sa mga Saksi sa mga kampong konsentrasyon. Nagkomento sa dokumentaryong “The Lost Home,” nga gimugna sa Brno, ang mantalaang Severočeský deník miingon: “Takos sa pagtagad nga bisan kining kasaligang mga katalirongan [ang Czech ug Hudiyong Slovak nga mga nakalabang buhi] madayegong mipamatuod pabor sa mga binilanggo gikan sa taliwala sa mga Saksi ni Jehova. ‘Maisogon sila kaayo nga mga tawo, nga kanunayng nagtabang kanamo sa bisan unsang paagi nga ilang mahimo, bisan tuod nameligrong patyon,’ komento sa daghan. ‘Giampo nila kami, nga maorag sakop kami sa ilang pamilya; gidasig nila kami nga dili molunga.’”

Apan, unsa na man ang bahin sa paghigugma niadtong aktuwal nga nagdumot kanimo? Posible ba kana?

Gugma Nagmadaogon Ibabaw sa Pagdumot

Ang pagtulon-an ni Jesus bahin sa gugma sa mga kaaway maoy pagsunod sa proverbio sa Bibliya: “Kon ang nagdumot kanimo gigutom, hatagi siyag tinapay nga makaon; ug kon siya giuhaw, hatagi siyag tubig nga mainom.” (Proverbio 25:​21; Mateo 5:44) Maylabot sa positibong epekto sa pagdawat ug mahigugmaong pagtagad gikan kanilang kanhi giisip nga mga kaaway, usa ka itom nga babaye nga di pa dugay nahimong usa ka Saksi ni Jehova misulat: “Usahay ang akong kasingkasing manginit ngadto sa punto sa di-kapugngang mga luha sa pagkasinati sa tim-os nga gugma sa puti nga mga Saksi, mga tawong di pa dugay kanhi ako untang mapatay sa walay pagpanagana aron sa pagpalambo sa kawsa sa rebolusyon.”

Usa ka Saksing Pranses nag-asoy nga ang usa ka silingan nagsumbong sa iyang inahan ngadto sa Gestapo panahon sa Gubat sa Kalibotan II. “Ingong resulta, ang akong inahan migugol ug duha ka tuig sa mga kampong konsentrasyon sa Alemanya, diin hapit siyang mamatay,” misaysay ang anak nga babaye. “Human sa gubat, ang Pranses nga polisya buot nga mopirma si Mama sa usa ka papeles nga magsumbong sa krimen ning bayhana ingong usa ka kunsabo sa Aleman. Apan midumili ang akong inahan.” Sa ulahi, ang silingan nahiagom sa makamatayng kanser. Ang anak nga babaye miingon: “Gigahin ni Mama ang daghang oras sa paghimo sa kataposang mga bulan sa iyang kinabuhi nga haruhay kutob sa maarangan. Di gyod nako malimtan kining kadaogan sa gugma ibabaw sa pagdumot.”

Walay duhaduha, makakat-on ang mga tawo sa paghigugma sa usag usa. Ang kanhing mga magkaaway​—Tutsi ug Hutu, mga Hudiyo ug Arabo, mga Armeniano ug Turko, mga Hapon ug Amerikano, mga Aleman ug Ruso, mga Protestante ug Katoliko​—ang tanan gihiusa pinaagi sa kamatuoran sa Bibliya!

Sanglit milyonmilyong tawo nga kanhi naghambin ug pagdumot karon naghigugmaay na sa usag usa, seguradong ang tibuok kalibotan sa katawhan makahimo niini. Ugaling, di ikapangulipas nga ang dako tibuok-kalibotang kausaban gikinahanglan kon ang tanang tawo maghigugmaay sa usag usa. Sa unsang paagi modangat kana nga kausaban?

[Mga hulagway sa panid 7]

Mga puti ug itom sa Habagatang Aprika

Mga Hudiyo ug Arabo

Hutu ug Tutsi

Sa masambingayong paagi, ang mga Saksi nakasalsal na sa ilang mga espada ngadto sa mga punta sa daro