Nganong Angay Mahadlok Kita sa Diyos?
“KAHADLOKI ninyo ang Diyos ug kaniya ihatag ninyo ang himaya, kay nahiabot na ang takna sa iyang paghukom.” (Pinadayag 14:7) Kining makapukawng mga pulong unang nadungog sa tigulang nga si apostol Juan diha sa usa ka panan-awon. Nga gipamulong sa usa ka manulonda nga naglupad sa tunga sa langit, kana gitumong ilabina ngadto sa mga tawong nagapuyo niining panahon sa kataposan, ang unang yugto sa “adlaw sa Ginoo.”—Pinadayag 1:10.
Apan alang sa pipila maorag dili gayod kini haom! Daghan ang nagaduhaduha gani sa pag-lungtad sa Diyos, unsa pa kayha nga mahadlok Kristohanon, ang ideya sa pagkahadlok sa Diyos daw kinaraan. Sila makadawat sa paghigugma sa Diyos. Apan ang pagkahadlok kaniya daw labaw nga timaan sa Edad Media. Kini ba ang pag-isip nimo niana?
Pagkahadlok ni Jesus sa Diyos
Kon mao, palandonga kon unsay kahulogan nga mahimong Kristohanon. Sumala sa Bibliya, ang pagka Kristohanon nagalangkit sa pagsunod gayod sa mga lakang ni Jesu-Kristo. (1 Pedro 2:21) Karon, bisan tuod walay pagduhaduha nga gihigugma ni Jesus ang Diyos, gitin-aw kaayo sa Bibliya nga siya nahadlok usab kaniya. Si Isaias, sa pagpamulong nga matagnaon bahin ni Jesus, miingon nga siya magbaton sa “espiritu sa kahibalo ug sa kahadlok kang Jehova.” (Isaias 11:2) Hinuon, makaiikag nga kining kahadloka wala makapabug-at kang Jesus. Angay dili nato isipon kini nga sama sa pagkahadlok sa usa ka bata sa mapintas nga amahan o sa ginsakpan nga malisang sa daugdaogan nga hari. Ngani, gitagna usab ni Isaias bahin kang Jesus: “Adunay iyang kalipay sa pagkahadlok kang Jehova.” (Isaias 11:3) Sa unsang paagi malipay ka diha sa pagkamay gikahadlokan?
Ang kamatuoran mao, sa Bibliya ang pulong “kahadlok” dunay daghang bulok sa kahulogan. Anaa ang pisikal nga kahadlok o kalisang nga atong bation kon adunay buot mohimo natog kadaot. Busa, ang Israelinhong kasundalohan ”nahadlok sa labihan” kang Goliat. (1 Samuel 17:23, 24) Unya anaa ang kahadlok sa makapakurat nga butang wala dahoma o wala hisayri, sama sa gibati ni Zacarias sa dihang kalit giatubang sa manulonda ni Jehova sa templo. (Lucas 1:11, 12) Ugaling, ang kahadlok nga gibati ni Jesus alang sa iyang Amahan dili sama sa bisan hain niana.
Hinunoa, ang orihinal nga Hebreohanon ug Gregong mga pulong nga gigamit sa Bibliya dakong pagtahod ug pagkahingangha sa Diyos. Kana ang diyosnong kahadlok nga nabatonan ni Jesus ug gidasig sa manulonda nga ugmaron sa tanan karong adlawa. Kining matinahorong pagkahingangha, o kahadlok, makagamot diha sa atong kasingkasing kon palandongon nato ang kusog ug gahom ni Jehova ug itandi kana sa atong bug-os nga pagkagamay mismo. Kana motubo inigpalandong nato sa iyang gamhanang mga buhat, ug maugmad usab kini pinaagi sa mainampoong paghinumdom sa kamatuoran nga siya mao ang Supremong Maghuhukom, nga may gahom sa paghatag ug kinabuhi ingon man pagsilot pinaagi sa walay-kataposang kamatayon.
Ang maong kahadlok bililhon tungod kay kana nagapugong kanato sa pagbuhat sa daotan ug sa pagpakawaybili sa Diyos, ingnon ta. Motabang kana nato sa paglikay sa tinamdan sama sa: ‘Pasayloon ako sa Diyos. Siya nasayod nga ako huyang,’ kon atubangon kita sa tentasyon ug basin mopadaog inay makigbisog. Sumala sa ginasulti kanato sa Proverbio 8:13: “Ang pagkahadlok kang Jehova nagkahulogan sa pagdumot sa daotan.” Ug ang Proverbio 16:6 nagadugang: “Sa kahadlok kang Jehova ang usa mopahilayo sa daotan.” Si Adan ug Eva napakyas sa pagpadayag niining tukma, maayong kahadlok kang Jehova sa dihang sila misupak kaniya. Ang sangpotanan? Gibati nila ang lain, negatibong matang sa kahadlok ug mitago gikan sa iyang presensiya. Si Adan miingon: “Nadungog ko ang imong tingog sa tanaman, apan ako nahadlok.”—Genesis 3:10.
Lahi kang Adan ug Eva, si Job maoy usa ka tawo nga nagpabiling matinumanon kang Jehova bisan pa sa labing grabeng pagsulay. Ngano? Si Jehova mismo miingon nga si Job maoy ‘usa ka tawo nga nahadlok kaniya ug busa nagpahilayo sa daotan.’ (Job 1:8; 2:3) Karong adlawa kinahanglang tinoon nato nga si Jehova makasulti sa samang butang mahitungod kanato! Ang kahadlok sa Diyos tukma, ug kinahanglan kini nga bahin sa atong panghunahuna.
Kahadlok sa Diyos ug Kahadlok sa Tawo
Ang pagkahadlok sa Diyos maoy kinaiyanhong pagbati nga mohatag kanato sa samang matang sa kasegurohan nga ginahatag sa usa ka amahan nga nagadasig ug halalom nga pagtahod ngadto sa iyang mga anak. Ang maong kahadlok motabang usab sa pagwagtang sa dili maayo, negatibong kahadlok sa tawo, nga maoy usa ka lit-ag. (Proverbio 29:25) Ang usa nga wala makakat-on niini nga pagtulon-an mao si Urias, ang anak ni Shemaias, kinsa nagwali sa Jerusalem uban ni Jeremias una sa 607 W.K.P. Lahi kang Jeremias, gitugotan ni Urias nga malit-agan siya sa kahadlok sa hari. Mihunong siya sa pagwali ug mipahawa gikan sa iyang asaynment. Sa kataposan, nasakpan siya sa hari ug gipapatay siya. (Jeremias 26:20-23) Sa unsang paagi malikayan unta ni Urias kadtong makapasubong dulnganan? Pinaagi sa pag-ugmad sa kahadlok kang Jehova nga mas kusganon kay sa iyang kahadlok sa tawo.
Si Jesus, tapos sa pagkabanhaw ug pagkayab niya sa langit, nagtambag sa iyang mga sumusunod: “Ayag ninyo kahadloki ang mga butang hapit na ninyong pagaantoson.” (Pinadayag 2:10) Gipasundayag sa kasaysayan ang panginahanglan sa maong tambag, sanglit ang mga Kristohanon—gikan sa Romanong mga arena ngadto sa mga kampong konsentrasyong Nazi—nakaatubang ug makalilisang nga mga kahimtang. Sa unsang paagi sila nakabuntog sa kahadlok nga gisulayan sa ilang mga kaaway sa pagdasig? Pinaagi sa pagpadapat sa mga pulong ni Jesus: “Ayaw ninyo kahadloki kadtong nagapatay sa lawas ug tapos niana wala nay mahimo. Apan igapaila ko kaninyo kon kinsa ang inyong kahadlokan: Kahadloki ninyo siya nga tapos sa pagpatay may gahom sa pagtambog ngadto sa Gehenna.”—Lucas 12:4, 5.
Sa Salmo 19:9 kita gitudloan: “Ang kahadlok kang Jehova maputli, nagapabilin sa walay kataposan. Ang hudisyal nga mga hukom ni Jehova matuod; sila napamatud-an nga matarong.” Busa walay pagkanegatibo bahin sa kahadlok sa Diyos. Kini maputli ug mapanalipdanon ug maghimo sa usa ka alagad sa Diyos nga mas lig-on kay sa iyang mga kaaway. Sama kang Jesus, ang usa ka Kristohanon makakaplag ug katagbawan sa maong kahadlok sa samang paagi nga siya magpahimulos sa tanang ubang panalangin gikan kang Jehova.—Isaias 11:3.
Busa, bug-os haom nga ang manulonda magaawhag sa tanang tawo karong adlawa nga mahadlok sa Diyos. Kon wala ang tukmang diyosnong kahadlok, lagmit mopadaog kita sa daotang mga hilig o mopadaog sa kahadlok sa tawo. Kon ugmaron nato ang tukmang matang sa kahadlok, matabangan kita sa paglihok nga maalamon. “Ang pagkahadlok kang Jehova mao ang sinugdanan sa kaalam.” (Proverbio 9:10; Salmo 111:10) Matuod, angay higugmaon nato ang Diyos sa bug-os natong kasingkasing, kalag, hunahuna, ug kusog. (Marcos 12:30) Ug kinahanglang kita mahingangha usab kaniya, nga magatahod kaniya, o, sa mga pulong sa manulonda, “kahadloki ninyo ang Diyos ug kaniya ihatag ang himaya, tungod kay miabot na ang takna sa iyang paghukom”—Pinadayag 14:7.
[Hulagway sa panid 30]
Kon si Urias nakabaton pag lalom nga kahadlok kang Jehova, ang kahadlok sa tawo dili unta makalit-ag kaniya