Ang Diyos ba Nagabuhat Diha sa “Hiwi” nga mga Paagi?

“DEUS ESCREVE CERTO POR LINHAS TORTAS” (“MAAYONG MOSULAT ang Diyos nga naggamit ug hiwi nga mga linya”) maoy usa ka panultihon sa Brazil. Kana nagsugyot nga ang Diyos kanunayng naghimog hustong butang apan usahay sa paaging daw hiwi para sa tawo. Pananglitan, sa dihang ang usa mamatay nga anaa pa sa kinahupngang bahin sa iyang kinabuhi, daghan ang moingon, ‘Ang Diyos nagtawag kaniya sa langit.’ Kon ang usa mag-antos ug depekto sa lawas o mag-atubang ug katalagman, ang uban moingon, ‘Pagbuot kana sa Diyos.’ Sanglit ang kamatayon, pisikal nga mga sakit, ug ubang mga hinungdan sa kaguol gibasol man ngadto sa Diyos, ang maong mga ekspresyon magpasabot nga ang Diyos ‘hiwi nga mosulat,’ nga naghimo siyag mga butang sa paaging dili masabtan sa tawo.

Nganong daghang relihiyosong tawo nagtuo nga ang Diyos maoy responsable sa kamatayon ug mga kalisod? Kining mga pagtuoha sagad gipasukad sa sayop nga pagsabot sa pipila ka teksto sa Bibliya nga dili ikapadapat niining puntoha. Sa daklit atong tan-awon ang pipila niini.

● ”Kinsay nagbuhat sa amang o sa bungol o sa tin-awg panan-aw o sa buta? Dili ba ako, si Jehova?”​—Exodo 4:11.

Nagpasabot ba kini nga ang Diyos maoy mabasol niadtong tanang nag-antos sa nagkadaiyang mga depekto? Dili. Dili kini uyon sa personalidad sa Diyos. Ang Bibliya nagsugilon kanato: “Ang tanang linalang sa Diyos maayo.” (1 Timoteo 4:4) Dili siya mabasol kon ang usa nahimugsong buta, amang, o bungol. Gitinguha lamang niya ang maayo alang sa iyang kalalangan, kay siya maoy Tinubdan sa “matag maayong gasa ug matag hingpit nga hatag.”​—Santiago 1:17.

Ang mabasol mao ang atong unang mga ginikanan, si Adan ug Eva, nga pinaagi sa ilang pagpili misupak batok sa Diyos ug nawad-an sa ilang kahingpitan ug busa sa ilang katakos sa pagpatunghag hingpit nga mga anak. (Genesis 3:1-6, 16, 19; Job 14:4) Samtang ang ilang mga anak nagminyo ug nanganak, dugang ug dugang pagkadili-hingpit, lakip ang mga depekto sa lawas, nagsugod pagtungha taliwala sa mga tawo. Bisag si Jehova nga Diyos wala magpahinabo niini, gitugotan niya kining mahitabo. Busa, siya makaingon sa iyang kaugalingon ingong “nagbuhat” sa amang, sa bungol, ug sa buta.

● ”Kanang hiwi nga pagkabuhat dili na matul-id.”​—Ecclesiastes 1:15.

Diyos ba ang naghiwi sa mga butang? Dili gayod. Ang Ecclesiastes 7:29 nag-ingon: “Tul-id nga gihimo sa Diyos ang tawo, apan sila mismo ang naghimog daghang plano.” Ang Contemporary English Version nagbatbat niining bersikuloha: “Kita matinud-anon kaayo sa dihang gilalang kita sa Diyos, apan karon duna kitay tinuis nga mga hunahuna.” Inay sundon ang matarong nga mga sukdanan sa Diyos, ang mga lalaki ug babaye, sa dakong bahin, kinabubut-ong mipili sa pagsubay sa ilang kaugalingong mga plano, mga laraw, mga lalang, o mga dalan​—ngadto sa ilang kadaotan.​—1 Timoteo 2:14.

Dugang pa, segun sa giingon ni apostol Pablo, tungod sa sala sa tawo, “ang kalalangan gipailalom sa pagkawalay-pulos.” (Roma 8:20) Ug kining kahimtanga “dili na matul-id” sa tawhanong mga paningkamot. Pinaagi lamang sa langitnong pagpanginlabot nga ang pagkahiwi ug pagkawalay-pulos sa tawhanong mga kalihokan mahanaw.

● ”Tan-awa ang buhat sa matuod nga Diyos, kay kinsay makatul-id sa iyang gihimong hiwi?”​—Ecclesiastes 7:13.

Sa laing pagkasulti, si Haring Solomon misukna: ‘Kinsa taliwala sa katawhan ang makatul-id sa mga depekto ug mga pagkadi-hingpit nga gitugotan sa Diyos?’ Walay mausa, kay dunay rason kon nganong gitugotan ni Jehova nga Diyos kining mga butanga nga mahitabo.

Busa, si Solomon nagrekomendar: “Sa adlaw nga maayo pamatud-ing ikaw anaa sa pagkamaayo, ug sa adlaw sa katalagman sabta nga ang matuod nga Diyos nagbuhat bisan niini sa ingon gayod nga paagi, sa katuyoan nga ang mga tawo dili unta makakaplag ug bisan unsang butang sunod kanila.” (Ecclesiastes 7:14) Ang usa ka tawo angayng magpabili sa adlaw sa dihang maayo ang dagan sa mga butang ug ipakita ang iyang pagpabili pinaagig pagbanaag sa kaayo. Angay niyang isipon ang usa ka maayong adlaw isip gasa gikan sa Diyos. Apan unsa na man kon ang adlaw magdalag katalagman? Maayo kon ang tawo ‘mosabot,’ nga mao, moila, nga ang Diyos nagtugot sa katalagman nga mahitabo. Nganong gibuhat niya ang ingon? Si Solomon miingon: “Sa katuyoan nga ang mga tawo dili unta makakaplag ug bisan unsang butang sunod kanila.” Unsay ipasabot niini?

Ang kamatuoran nga gitugotan sa Diyos nga kita moatubang sa mga kangaya ug mga kalisdanan magpahinumdom kanato nga dili kita makasulti kon unsay anaa sa umaabot. Ang katalagman mahimong modangat sa matarong ug sa daotan. Walay mga eksepsiyon. Kini angayng magpaamgo kanato sa importansiya sa pagsalig, dili sa atong kaugalingon, kondili sa Diyos, nga maghinumdom nga “ang Diyos gugma.” (1 Juan 4:8) Bisag dili nato masabtan ang pipila ka mga butang karon, kita makasalig nga human nga magmalamposon na ang tanang butang, kon unsay gitugotan sa Diyos magsilbig mapuslanong katuyoan alang sa tanang nalangkit.

Bisag unsay iyang gitugotan dili gayod moresulta sa walay-kataposang kadaot sa mga tawong tul-id ug kasingkasing. Gitin-aw kini ni apostol Pedro sa dihang nagkomento bahin sa pag-antos nga naagoman sa mga isigkamagtutuo sa iyang panahon: “Human kamo makaantos sa makadiyot, ang Diyos sa tanang dili-takos nga kalulot, kinsa mitawag kaninyo ngadto sa iyang walay-kataposang himaya kahiusa kang Kristo, mismo magahuman sa inyong pagbansay, siya magpalig-on kaninyo, siya magpakusgan kaninyo.”​—1 Pedro 5:10.

Panahon sa Pagtul-id sa mga Butang

Si Jehova naghatag kanatog kusog sa paglahutay sa atong presenteng mga pagsulay. Nagsaad usab siya sa ‘pagbag-o sa tanang butang.’ (Pinadayag 21:5) Oo, maoy iyang katuyoan nga ang iyang langitnong Gingharian sa di madugay magpasig-uli sa maayong panglawas niadtong nag-antos sa mga balatian ug magdumala sa pagkabanhaw sa mga patay. Kanang kagamhanana maghanaw usab sa usa kansang mga dalan baliko gayod​—si Satanas nga Yawa. (Juan 5:28, 29; Roma 16:20; 1 Corinto 15:26; 2 Pedro 3:13) Pagkadakong panalangin unya niana alang sa mahinadlokon-sa-Diyos nga mga tawo sa tibuok yuta sa dihang ang panahon sa Diyos sa pagtul-id sa mga butang moabot na!

[Picture Credit Line sa panid 28]

Job Hearing of His Ruin/​The Doré Bible Illustrations/​Dover Publications