Kapitulo 16

Ang Pagpili nga Nagapasalig sa Kinabuhi sa Matuod nga Kalinaw ug Kasegurohan

1. Kon kita magahimo sa hustong pagpili, unsang kalinaw ug pagsalig ang atong mabatonan karon?

PAGKADAKUNG kangaya nga mabatonan ang matuod nga katuyoan sa kinabuhi, sa pagkasayod kon asa ikaw nagapaingon! Ug pagkamakapahupay sa hunahuna ug kasingkasing nga nagasumikad sa kapihoan nga wala nay mas maayong kurso nga posibleng imong batonan pa! Ang maong kalinaw ug pagsalig imong mabatonan, apan lamang kon ikaw magahimo sa hustong pagpili karon.

2. Sa unsang paagi ang atong pagkaila kang Jehova ug sa iyang mga katuyoan makatabang kanato maylabot sa atong pagpanglantaw sa kinabuhi?

² Ang ebidensiya maoy matin-aw nga kita dili makatutok niining kalibutan ingon nga tuboran sa matuod nga kalinaw ug kasegurohan. Ang komersiyal, relihiyoso, ug politikal nga mga sistema, apil ang ‘United Nations’ uban sa mga proklamasyon niini sa ‘kalinaw ug kasegurohan,’ dili makapatungha niana. Busa, ang Bibliya nagatultol kanato ngadto kang Jehova nga Diyos ingon nga bugtong Tuboran sa matuod nga kalinaw ug kasegurohan. Pinaagi sa atong pag-ila kaniya ug sa iyang mga katuyoan makatabang kanato sa pagsabut nganong ania kita dinhi sa yuta ug ngano ang mga butang mao kana karon. Atong natun-an ang dakung isyu nga nagalangkit sa unibersohanong pagkasoberano ni Jehova, ug kon sa unsang paagi nagaapektar kana sa matag usa kanato. Atong matun-an ang pagtimbang sa pagkahusto ug sa kaalam sa atong mga tumong, ug kita makabaton sa kasaligan moral nga mga suntoan nga subayon sa kinabuhi. Sa dihang nagaatubang sa balatian, pagkatigulang, o kamatayon, kita adunay makapahupay nga paglaum sa kinabuhi sa usa ka matarung, mahimsog nga bag-ong kahikayan, bisan pinaagi sa usa ka pagkabanhaw gikan sa mga minatay, kon kinahanglanon.

3. Ngano si Jehova mao ang usa kang kansa ipahaluna ang tanan tang paglaum?

³ Dili kahibulongan, nan, nga ang Isaias 26:4 nagaawhag: “Magsalig kang Jehova, kamong katawhan, alang sa tanang mga panahon, kay kang Jah Jehova anaa ang Bato sa mga panahon nga walay katinoan.” Wala nagausab, labing gamhanan, ug walay katapusan, si Jehova sa pagkamatuod mao ang usa kang kansa magapahaluna sa tanan natong mga paglaum. Buot ba nimong magapahimulos sa iyang paggiya ug panalipud dili lamang alang sa presente apan alang sa tanang panahon sa umaabut sa iyang gisaad nga Bag-ong Kahikayan? Kon mao, unsa man ang kinahanglan buhaton nimo?

4. Sa pagbaton sa pabor ni Jehova, unsa ang kinahanglanon nato, ug unsa ang nagahimo niini nga posible?

⁴ Ang katawhan sa katibuokan nahilayo gikan sa Diyos tungod sa sala sa atong unang mga ginikanan. Apan ang Diyos nagbukas sa dalan alang sa kapasig-ulian ug pakighigala sa iyang kaugalingon pinaagi sa sakripisyo sa iyang Anak. (2 Corinto 5:19-21; Efeso 2:12, 13) Apan, dili pa igo alang kanato karon ang simple nga pag-ingon nga buot kita sa pagpakighigala sa Diyos.

5. Unsa ang atong motibo sa pagpanlimbasug sa pagpakighigala kang Jehova?

⁵ Kinahanglan kita masinugtanon, nga mahinamon pa gani, sa pagpamatuod kaniya nga buot kita niini, ug gumikan sa hustong motibo. Pananglitan, ato bang ginatinguha ang pagpakighigala ni Jehova aron lamang gayod makaikyas sa kalaglagan? Kon ugaling pagahuptan ta ang matarong nga pagbarog uban sa Diyos, dili mahimong alang lamang niining yugtoa sa pagkadinalian sa dili pa ang iyang paghukom ni aron lamang maluwas sa nagasingabut nga “dakung kasakitan.” (Mateo 24:21, 22) Kini kinahanglan alang sa tanang panahon nga magaabut. Ang matuod lamang nga gugma mao ang magahatag kanato niining motibo. Aron nga kita mahimong makapasundayag sa pagkasinsero sa atong tinguha alang sa iyang pakighigala, si Jehova nagapahaluna sa iyang Pulong sa pipila ka butang nga kinahanglan buhaton sa tagsatagsa kanato aron mapasig-uli kaniya.

Usa ka Buhing Pagtuo

6. Sa pagpahimuot sa Diyos, unsang konpiyansa ang kinahanglan batonan ta mahitungod kaniya?

⁶ Si Jehova usa ka Diyos sa kamatuoran. Busa kita magabaton ug absoluto nga konpiyansa sa iyang mga saad. Sa pagkamatuod, “kon walay pagtuo imposible ang pagpahimuot kaniya sa maayo, kay siya nga nagaduol sa Diyos kinahanglan magatuo nga mao siya ug siya nagabalus niadtong kinsa mahinangpong nagapangita kaniya.” (Hebreohanon 11:6) Kon nagahupot ka sa maong pagtuo, nan nahibalo ka nga ang tanang butang ginabuhat sa Diyos dunay matarung nga katuyoan, ug nga kanunay anaa sa iyang kasingkasing ang atong labing maayong interes. Gikan sa iyang mga buhat sa paglalang ug gikan sa iyang sinulat nga Pulong, nakita nimo nga siya dili lamang tanan-maalamon ug tanan-gamhanan apan usab usa ka Diyos sa mahigugmaong-kalolot. Siya, hinuon, bisan kanus-a dili magapadaplin sa iyang matarung mga sukdanan. Apan, bisan pa kita dili hingpit ug makahimog mga sala, kon kita nahigugma sa pagkamatarung, siya adunay paagi sa pagdumala uban kanato nga mosangpot diha sa mga panalangin.

7. Sa unsang paagi ang pagsalig sa pagkahusto ug kaalam ni Jehova nagapanalipud kanato?

⁷ Busa, sa makadawat kita ug pagtul-id gikan sa Diyos, nahibalo kita nga kini alang sa atong walay katapusang kaayohan. Kita sa ingon nakadangat sa pagsalig kang Jehova sama sa usa ka anak nga lalaki o babaye nga nagasalig sa usa ka mahigugmaon, maalamon, ug kusganong amahan. (Salmo 103:13, 14; Proverbio 3:11, 12) Nakabaton sa maong pagtuo, dili kita magaduda sa pagkamaalamon sa iyang tambag ni sa pagkahusto sa iyang mga paagi, bisan kon sa sulod sa usa ka panahon wala kita sa bug-os makasabut sa pipila ka butang. Sa ingon kita nagapahaluna sa atong kaugalingon taliwala niadtong ginahubit sa salmista: “Ang dagayang kalinaw iya niadtong nahigugma sa imong kasugoan, ug alang kanila walay bisan unsang kapangdolan.”​—Salmo 119:165; Proverbio 3:5-8.

8. (a) Ngano ang pagtuo lamang dili pa igo? (b) Sa unsang aksiyon nga gihisgutan sa Buhat 3:19 ang pagtuo kinahanglan magapalihok kanato?

⁸ Apan “ang pagtuo nga walay mga buhat maoy patay,” ang Santiago 2:26 nagapunting. Ang matuod nga pagtuo nagapalihok sa usa ka tawo sa pagbuhat. Ug ang usa sa unang mga butang nga nagapalihok sa usa ka tawo sa pagbuhat mao ang giawhag ni apostol Pedro: “Maghinulsol . . . ug magliso aron mapala ang inyong mga sala, aron ang mga panahon sa kahayahay magaabut gikan sa persona ni Jehova.” (Buhat 3:19) Unsa ang buot ipasabut niini?

Paghinulsol ug Pagliso

9. (a) Unsa ang matuod nga paghinulsol? (b) Sa unsa kita kinahanglan magahinulsol?

⁹ Sa Bibliya, ang paghinulsol nagapasabut sa kausaban sa hunahuna nga inubanan pinaagig kinasingkasing nga pagbasol tungod sa kanhing kurso sa kinabuhi o dautang mga buhat. (2 Corinto 7:9-11) Apan kon buot kita magbaton sa gisaad nga “mga panahon sa kahayahay” gikan sa Diyos, dili lamang kita makahinulsol sa mga sayup sa nangagi. Hinuon, kita kinahanglan magapakita sa paghinulsol tungod kay kita nagaila nga, ingon nga kaliwat ni Adan, ang atong mismong kinaiya makasasala. Sama sa ginapahayag ni apostol Juan: “Kon kita magaingon: ‘Kami walay sala,’ kita nagapasalaag sa atong kaugalingon . . . kita nagahimo sa [Diyos] nga usa ka bakakon, ug ang iyang pulong wala kanato.” (1 Juan 1:8, 10) Kinahanglan kita hustong magabanaag sa atong Maglalalang, nagasumbaliksilaw sa ‘iyang dagway ug kasama.’ Apan ang gipanunod nga sala nagapugong kanato sa pagbuhat niini sa usa ka hingpit nga paagi. Busa, kita ‘nasipyat sa marka,’ nga mao ang kahulogan sa pulong “sala” diha sa Bibliya.​—Genesis 1:26; Roma 3:23.

10, 11. (a) Kang kinsa kita may utang sa kinabuhi, ug ngano? (b) Busa, sa unsang paagi atong gamiton ang atong mga kinabuhi?

¹⁰ Busa kita nagakinahanglan sa pagpasaylo sa Diyos. (Mateo 6:12) Kita nagaila nga kita nakautang sa atong kinabuhi kaniya ingon nga atong Maglalalang. Apan karon atong natun-an nga pinaagi sa sakripisyo sa Anak sa Diyos, ang katawhan usab “gipalit uban sa usa ka bili” nga daku kaayo ug balor. Busa kinahanglan kita dili mahimong “mga ulipon sa mga tawo,” dili ngani sa atong kaugalingon hakug nga mga tinguha. (1 Corinto 7:23) Apan, una sa atong pagtuon ug pagdawat sa kamatuoran, dili ba mao kana kitang tanan kanhi?​—Juan 8:31-34.

¹¹ Diha sa imong kasingkasing, nagaila ka ba sa gasa sa Diyos sa iyang Anak ug sa iyang nahimo pinaagi ni Kristo sa pagtaganag kaikyasan gikan sa pagkaulipon sa sala ug kamatayon? Nan dayag nga ikaw sinserong magabasul sa bisan unsang nangaging kapakyasan sa paggamit sa imong kinabuhi sa pagsugot sa imong Maglalalang. Kini magapalihok kanimo ngadto sa kinasingkasing nga paghinulsol tungod sa pagsunod sa usa ka kurso sa kinabuhi nga sama nianang sa kalibutan, nga dili harmonya sa kabubut-on ug mga katuyoan sa Diyos.​—Buhat 17:28, 30; Pinadayag 4:11.

12. Sa unsang paagi ang naghinulsol nga tawo nagapakita nga siya sa matuod nagsalikway na sa iyang kurso kanhi?

¹² Kining matuod nga paghinulsol nagahatud ngadto sa usa ka ‘pagliso,’ nga mao ang kahulogan sa pulong “pagkakabig.” Ang matuod mahinulsulon nga tawo dili lamang nagabasul sa sayup nga paggamit sa iyang kinabuhi. Siya nagasalikway nianang sayup nga kurso ug aktuwal nagadumot sa iyang sayup nga mga paagi. Iyang ginapakita kini pinaagi sa ‘pagliso’ ug sa pagbuhat sa “mga buhat nga takus sa paghinulsol,” nga nagadala sa iyang kinabuhi harmonya sa kabubut-on sa Diyos.​—Buhat 26:20; Roma 6:11.

13. (a) Unsa ang kahulogan sa pahayag ni Jesus nga ang iyang mga sumusunod kinahanglan ‘magalimud sa ilang kaugalingon’? (b) Alang sa unsang katarungan nga kita nagapasakup sa atong kaugalingon kang Jehova, ug sa unsang paagi kini nagaapektar sa atong mga kinabuhi?

¹³ Bahin niining paghinulsol ug pagliso nagalakip sa giingon ni Jesus ang ‘paglimud sa atong kaugalingon.’ (Mateo 16:24) Nga mao, dili na kita nagakinabuhi sumala sa ato lamang kaugalingong hakug nga mga tinguha nga walay kabalaka alang sa kabubut-on ug mga katuyoan sa Diyos. Hinuon, nagaila kita nga si Jehova nga Diyos aktuwal nga duna sa bug-os nga pag-angkon sa atong mga kinabuhi ingong atong Maglalalang ug atong Magpapalit pinaagi sa halad lukat sa iyang Anak. Sama sa pagpahayag niini sa Bibliya, kita ‘dili na sa atong kaugalingon, kay kita gipalit sa usa ka bili.’ (1 Corinto 6:19, 20) Busa, inay kay abusohan ang dakung kagawasan nga gibuksan sa kamatuoran alang kanato, kita nagapasakup sa atong kaugalingon sa bug-os ngadto sa pagbuhat sa kabubut-on sa Diyos. (Galacia 5:13; 1 Pedro 2:16) Ug kita nagabuhat niini dili lamang tungod kay kini husto apan tungod kay kita nahigugma kang Jehova nga Diyos uban sa ‘tanan natong kasingkasing, kalag, hunahuna, ug kusog.’ (Marcos 12:29, 30) Dayag nga kini nagakinahanglan sa matag usa kanato sa pagkinabuhi sa usa ka kinabuhi sa dedikasyon sa Diyos. Inay kay usa ka kabug-at, kining kursoha magpaarang kanato sa pagpahimulos sa kinabuhi nga sukad wala pa mabatoni.​—Mateo 11:28-30.

Nagahimog Publikong Deklarasyon Alang sa Kaluwasan

14. (a) Sa dihang ang usa ka tawo magaila sa hustong pagpanag-iya kaniya ni Jehova, sa unsang paagi siya makapahayag niini sa Diyos? (b) Unsa pa ang iyang tinguhaon nga buhaton, sumala sa ginapakita sa Roma 10:10?

¹⁴ Usa ka maayong butang ang pagpahayag sa pag-ampo sa atong pagtuo diha sa mga tagana sa Diyos, nagaila sa iyang pagpanag-iya kanato. Apan mahimo nato ug buot gayod nga dugang pang himuon ang atong pagpahayag sa pagtuo ingon sa gitug-an kanato sa Roma 10:10: “Uban sa kasingkasing ang usa nagatuo alang sa pagkamatarung, apan uban sa baba ang usa nagahimo sa publikong deklarasyon alang sa kaluwasan.” Kining “publikong” pagpahayag sa atong pagtuo kang Jehova ug sa iyang mga tagana kinahanglang nagagikan nga malipayon sa kasingkasing nga puno sa apresasyon. Ang paghimo niining pagpahayaga nagalangkit ug pagpahinungod sa atong kinabuhi ngadto kang Jehova sa pagbuhat sa iyang kabubut-on ug pagpasimbolo niini pinaagig bawtismo sa tubig.

15. Nganong kinahanglan ugdang ang atong pagpangisip sa bawtismo sa tubig?

¹⁵ Sa dihang si Jesu-Kristo nagsugod sa iyang publikong ministeryo, iyang nahuptan si Juan Bawtista aron ituslob siya sa tubig. Ang Bibliya nagataho nga si Jesus niadto nagsulti sa Diyos: “Ako mianhi sa pagbuhat sa imong kabubut-on.” (Hebreohanon 10:9; Salmo 40:7, 8) Si Jesus naghatag sa instruksiyon nga ang tanan niadtong mahimong iyang mga disipulo kinahanglan usab nga bawtismohan. Ikaw ba disipulo nga sama niana? Nan ang imong bawtismo sa tubig mahimong “publikong deklarasyon” niini.​—Mateo 28:19, 20.

16. (a) Sa unsang paagi matino mo nga andam ka na nga bawtismohan? (b) Sa unsang paagi ang mga magtatan-aw makatabang sa mga indibiduwal sa ilang pagpangandam alang sa bawtismo?

¹⁶ Usa ka dakung pribilihiyo nga mahimong usa ka dedikado, bawtismado nga saksi ni Jehova, ang Soberano sa uniberso. Repasoha karon kon unsa ang nalangkit niini: si Jehova sa mahigugmaon nagbukas sa dalan alang kanimo aron sa pagbaton sa iyang pakighigala. Apan sa paghupot niana, kinahanglan ikaw dunay pagtuo, nga tinuod nagatuo nga ang Bibliya mao ang inspiradong Pulong sa Diyos. (2 Timoteo 3:16, 17) Kinahanglan magatuo ka usab sa halad-lukat ni Jesus ingon nga bugtong paagi nga makabaton sa usa ka madawat nga baruganan uban sa Diyos. (Buhat 4:12) Kinahanglan ilhon nimo ang imong pagsalig kang Jehova ug magpasakup sa imong kinabuhi ngadto kaniya sa pagbuhat sa iyang kabubut-on, dili lamang sulod sa pipila ka tuig, apan sa walay katapusan. Ang maong kurso nagalangkit sa pagkahimong “dili bahin sa kalibutan.” (Juan 17:16; 1 Juan 2:15) Ingon nga ebidensiya nga ikaw naghinulsol ug ‘nagliso’ na, kinahanglan imong nabiyaan na ang mga buhat nga sukwahi sa matarung mga suntoan sa Diyos ug ikaw kinahanglang magabuhat kon unsa ang ginasugo sa Diyos. Ikaw ba nagbag-o na sa imong hunahuna sa pagkaagi nga mao na kini ang imong pagpanglantaw sa kinabuhi? (Roma 12:1, 2) Kon mao, ang Bibliya nagadasig kanimo sa paghimog “publikong deklarasyon” sa maong pagtuo. Ang unang tikang mao ang pagduol sa usa sa mga magtatan-aw sa kongregasyon sa mga Saksi ni Jehova sa imong dapit ug ipahibalo kaniya kon unsa ang imong ginabati. Siya magahikay alang sa usa ka repaso uban kanimo sa sukaranang mga pagtulon-an sa Bibliya sa pagpangandam alang sa bawtismo.

17. Nagagamit sa Bibliya, ipakita sa unsang paagi kinahanglan kita magapadayon sa paghimog ‘publikong deklarasyon sa atong pagtuo.’

¹⁷ Ang tikang sa bawtismo dili magtimaan sa katapusan sa imong paghimog ‘publikong deklarasyon sa imong pagtuo.’ Ingong Kristohanon nga dedikado ngadto kang Jehova nga Diyos, gusto mo nga ipahayag ang imong paglaum pinaagig pagsulti sa imong kaugalingon diha sa publikong asembliya, nga ‘nagadayeg kaniya diha sa dakung kongregasyon.’ (Salmo 35:18; 40:8, 9) Buot mo usab nga moambit diha sa linaing bulohaton sa “pulikong deklarasyon” nga gitudlo ni Jehova ngadto sa tanan nga nagaalagad kaniya​—ang pagsangyaw sa maayong balita sa Gingharian sa tibuok kalibutan ug sa paghimog mga tinun-an sa katawhan sa tanang kanasuran.​—Mateo 24:14; 28:19.

Pagmahal sa Imong Relasyon Uban sa Diyos

18. Unsa ka importante ang personal nga pagtuon sa pagpaneguro sa relasyon sa usa kang Jehova nga malungtaron?

¹⁸ Nan, karon, sa unsang paagi makapaneguro ka nga, sa mabatonan na kana, ang imong relasyon kang Jehova mahimong malungtaron sa walay katapusan diha sa masadyaong kalinaw ug kasegurohan? Alang sa usa ka butang buot nimo magpadayon sa pagtubo sa kahibalo kaniya. Pinaagig personal nga pagtuon imong makaplagan ang matuod nga kahimuot sa pagbaton sa mga bahandi sa kaalam nga natigum diha sa Pulong sa Diyos. Mahimong sama ka sa tawo nga ginahubit sa Salmo 1:2, 3: “Ang iyang kahimuot anaa sa kasugoan ni Jehova, ug sa iyang kasugoan siya nagabasa sa ubos nga tingug adlaw ug gabii. Ug siya piho nga mahimong usa ka kahoy nga gitanum sa daplin sa mga sapa sa tubig, nga nagahatag sa kaugalingong bunga niini sa panahon niini ug ang dahon niini dili malaya, ug ang tagsa ka butang nga buhaton niya magamalampuson.” Oo, ang pagkabaton sa kahibalo sa Diyos, ug pagpadapat niana, magpaarang kanimo sa paglakaw sa “mga dalan sa kahimuot” ug sa ‘mga alagianan sa kalinaw,’ tungod kay kini magahatag kanimo sa kaalam sa pag-atubang sa tanang mga suliran sa kinabuhi. (Proverbio 3:13, 17, 18) Ang imong kauhaw alang sa maong kahibalo sa Bibliya magpasundayag sa imong pagkatakos alang sa kinabuhi sa Bag-ong Kahikayan sa Diyos, tungod kay sa maong panahon “ang yuta piho nga mapuno uban sa kahibalo ni Jehova sama sa mga tubig nga nagatabon sa mismong dagat.”​—Isaias 11:9.

19. Ngano ang regular nga pagtambong sa miting kinahanglanon sa kinabuhi sa katawhan ni Jehova?

¹⁹ Usa pa ka butang nga hinungdanong kinahanglanon nimo mao ang regular nga pagtambong sa mga tigum uban sa ubang mga alagad ni Jehova. Didto makaplagan nimo ang matuod nga pagdasig sa gugma ug maayong mga buhat, nga nagadasig sa pagpadayon sa paghupot sa imong hustong relasyon uban sa Diyos. (Hebreohanon 10:23-25) Ang makapahimuot, sama sa panimalay nga panagkauban sa mga alagad ni Jehova nagatanyag ug makapalig-ong ebidensiya nga ang kalinaw ug kasegurohan nga gisaad sa Bag-ong Kahikayan sa Diyos usa ka kamatuoran.​—Salmo 133:1; 1 Corinto 14:26, 33.

20. Sa unsang paagi ang tigulang nga mga lalaki sa kongregasyon makatabang kanato sa mga panahon sa pagsupak ug personal nga kalisdanan?

²⁰ Sa kongregasyon makabaton ka ug kaayohan gikan sa laing mahigugmaong tagana. Si Jesus, ang ‘Maayong Magbalantay,’ adunay ‘luyoluyong mga magbalantay’ sa yuta. Kini sila mao ang mga magtatan-aw, o sa espirituwal tigulang nga mga lalaki, kinsa nagaatiman sa iyang “mga karnero.” Kini sila usa ka gamhanang butang sa pagpalambo sa kalinaw ug kasegurohan taliwala sa nagtigum nga katawhan sa Diyos sa bug-os nga yuta. (1 Pedro 5:2, 3) Kining mga lalaki “nagapamatuod nga sama sa usa ka dapit tagoanan sa hangin ug usa ka dapit salipdanan sa ulan-bagyo, sama sa mga sapa sa tubig sa usa ka mamalang yuta, sama sa landung sa usa ka dakung pangpang nga bato sa yuta sa kahago.” (Isaias 32:1, 2) Oo, sa mabagyohong mga panahon sa kalisud ug kapig-ut tungod sa kalibutanong pagsupak o sa personal nga kalisdanan, pinaagi sa ilang sama sa dakung bato nga pagtuo ug sa ilang lig-ong pagtaput sa Pulong sa Diyos, kining mga tigulang lalaki sa espirituwal makahatag sa matuod nga pagsuportar. Makahatag sila kanimo sa makapahayahay nga tambag ug pagdasig.

21. Unsa ang magapugong kanato sa pagtugot sa pagkadili hingpit sa uban sa pagdaut sa atong relasyon kang Jehova?

²¹ Matuod ang tawhanong pagkadili hingpit magapadayag sa ilang kaugalingon, bisan taliwala sa mga alagad sa Diyos. Kitang tanan makahimog mga sayup matag adlaw. (Santiago 3:2) Apan tugotan ba nato ang atong kaugalingon nga mapangdol sa pagkadili hingpit sa uban ug tugotan kini sa pagdaut sa atong relasyon uban kang Jehova nga Diyos? Sanglit kay kita, usab, masayup man, dili ba kinahanglan nga kita magapakita sa uban sa samang pagpasaylo nga buot nato alang sa atong kaugalingon? (Mateo 6:14, 15) Kon kita magapamatuod sa atong kaugalingon nga angay nga mga sakup alang sa malinawon Bag-ong Kahikayan sa Diyos, kinahanglan kita karon magapasundayag sa atong katakus sa pagduyog sa uban diha sa kalinaw. Dili kita makahigugma sa Diyos kon dili usab kita magahigugma sa atong espirituwal mga igsoong lalaki ug babaye kang kansa si Kristo nagpakamatay.​—1 Juan 4:20, 21.

22. Unsa ang luna sa pag-ampo sa atong mga kinabuhi?

²² Ang imong hustong relasyon uban sa Diyos naghatag kanimo sa laing dakung pribilihiyo: ang pagduol sa Diyos pinaagi sa pag-ampo uban sa pasalig nga siya nagapamati kanimo. Mahala kanang pribilihiyo ug gamita kini sa matag adlaw, tibuok adlaw. Ang mga suliran magabangon. Ang imong kaugalingong pagkadili hingpit magasamok kanimo. Apan ang Bibliya nagatambag: “Ayaw kabalaka sa bisan unsang butang, apan sa tagsa ka butang pinaagi sa pag-ampo ug pagpangaliyupo uban sa pagpasalamat ipahibalo ang inyong mga petisyon ngadto sa Diyos; ug ang kalinaw sa Diyos nga labaw sa tanang hunahuna magapanalipud sa inyong mga kasingkasing ug sa inyong mga gahum sa hunahuna pinaagi kang Kristo Jesus.”​—Filipos 4:6, 7.

23. Kon atubangon sa mga pagsulay ug mga pagsakit alang sa atong pagtuo, unsa ang makatabang kanato sa pag-antus?

²³ Pinaagi sa pagpili sa pag-alagad kang Jehova ang matuod nga Tuboran sa kalinaw ug kasegurohan, ug sa pagpahaluna sa imong paglaum sa iyang Bag-ong Kahikayan, nakahimo ka sa hustong pagsugod. Karon, sama sa gipahayag sa Bibliya, “kinahanglanon ninyo ang pag-antus, aron nga, human kamo makatuman sa kabubut-on sa Diyos, kamo makabaton sa katumanan sa saad.” (Hebreohanon 10:36) Ingon nga nakatilaw na sa panalangin sa usa ka hustong relasyon uban kang Jehova, mahimong determinado nga bisan kanus-a dili magabiya niini. Bisan kanus-a ayaw ug tugoti ang lumalabay nga kalipay sa kalibutan sa pag-anod kanimo pahilayo. Bisan pa ang mga pagsulay gikan sa kaaway nga kalibutan mahimong mapig-ut, hinumdumi nga kini lumalabay. Itandi sa mga panalangin nga ihatag ni Jehova niadtong nahigugma kaniya, ang maong mga pag-antus sama sa nahot.​—2 Corinto 4:16-18.

24. (a) Sa unsa kita karon labi na dunay katarungan alang sa pagkasadya? (b) Sama sa salmista, sa unsang paagi kita kanunay magabati mahitungod kang Jehova ug sa atong relasyon kaniya?

²⁴ Magpadayon sa kurso sa diyosnong debosyon, masaligon nga kini ang labing maayong paagi sa kinabuhi karon ug nga kini magahatud sa walay katapusang kinabuhi sa Bag-ong Kahikayan sa Diyos. (1 Timoteo 4:8) Magkalipay sa ebidensiya sa pagkahaduol nianang Bag-ong Kahikayan ug sa walay katapusang kalinaw ug kasegurohan nga dad-on niini. Samtang ikaw nagapadayon sa paglig-on sa imong relasyon uban kang Jehova, batia kanunay ang pagbati sama sa inspiradong salmista, kinsa misulat: “Ang Diyos mao ang bato sa akong kasingkasing ug ang akong bahin sa panahong walay katinoan. Kay, tan-awa! ang mga nagpahalayo kanimo mangahanaw. Pihong pahilumon nimo ang tagsatagsa nga nagabiya kanimo sa imoral. Apan alang kanako, ang pagpahaduol sa Diyos maayo alang kanako. Sa Soberanong Ginoong Jehova ako nagpahaluna sa akong dalangpanan, sa pagpahibalo sa tanan nimong mga buhat.”​—Salmo 73:26-28.

[Mga hulagway sa panid 181]

Paghimog Katilingbanong Kapahayagan