Tinuod nga Paglaom Alang sa mga Bata

“Dili na gayod mahitabo nga adunay . . . usa ka masuso nga mabuhi lamag pila ka adlaw . . . Sila dili magbudlay nga kawang o manganak ug mga anak nga modangat sa kaalaotan; kay sila unya maoy usa ka katawhan nga gipanalanginan sa GINOO.”​—Isaias 65:20, 23, New International Version.

BISAN pa sa dalayegong mga paningkamot sa tawo nga mapaarang-arang ang kahimtang, minilyong bag-ong-natawong mga bata sa gihapon “modangat sa kaalaotan.” Dili maingon niana sa kanunay. Ang tagna ni Isaias dili lamang nagpasalig kanato nga may adlaw nga ang matag bata magbaton ug may-kasegurohang kaugmaon kondili nagpatin-aw usab kon sa unsang paagi matuman ang maong tumong.

Sa Isaias 65:17, ang Diyos nag-ingon: “Ako nagalalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni motungha pa kana sila sa kasingkasing.” Aron maatiman sa tukmang paagi ang kabataan sa kalibotan, gikinahanglan ang “bag-ong mga langit” ug “usa ka bag-ong yuta.”

Kining “bag-ong yuta” maoy usa ka bag-ong katilingban sa mga tawo nga nagasunod sa mga prinsipyo nga gitudlo ni Jesu-Kristo. Usa sa maong mga prinsipyo, mipatin-aw si Jesus, mao nga “bisan kinsa nga magadawat sa usa nga ingon niining mga bataa pinasukad sa akong ngalan, nagadawat kanako.” (Marcos 9:37) Ang usa ka katilingban o sosyedad nga nagtagad sa matag bata nga daw siya mao si Kristo mismo tinuod gayod nga “usa ka bag-ong yuta”! Nga nahitabo na, minilyong tawo nagapanlimbasog sa pagbuhat gayod niana, ug sila milampos sa paghatag ug paglaom ngadto sa pipila sa kabataan sa kalibotan.

Kabataan nga Karon Adunay Paglaom

Si Tshepo, uban sa upat niya ka magulang lalaki ug babaye, nagpuyo sa usa ka dapit sa barongbarong sa Habagatang Aprika. Sa dihang siya usa ka tuig pa ang edad, siya nagbaton na sa timailhan sa pagkakulang ug sustansiya nga mao ang pagkadakog tiyan. Ang iyang mga ginikanan nag-usik-usik sa dakong bahin sa ilang gamayng kinitaan diha sa serbesa sa kawang nga paninguha nga lumsan ang ilang mga kaguol. Talagsaon ra nga adunay init nga pagkaon si Tshepo, ug siya pasagdan nga magdula taliwala sa nagpasad nga mga butang ug basiyong mga lata sa serbesa sa balay.

Ang kaugmaon ni Tshepo morag mangiob hangtod nga may nahitabo nga nag-usab sa panghunahuna sa iyang mga ginikanan. Usa ka silingan nga ginganlang George mihatag kanilag libreng kurso sa edukasyon sa Bibliya. Ang sangpotanan makapahingangha​—nahanaw ang suliran sa pag-inom, nahinlo ang balay, ang pamilya nakabaton ug init nga pagkaon kada adlaw, ug si Tshepo ug ang iyang mga igsoong lalaki ug babaye nagsugod sa pagbaton ug hinlo, maayong pamiste, ug malipayong dagway.

Gitabangan ni George ang pamilya ni Tshepo tungod kay, isip usa sa mga Saksi ni Jehova, gibati niya ang usa ka responsabilidad ngadto sa tanan, apil sa timawang katawhan. Siyempre, gikinahanglan ang dakong panahon ug pailob aron tabangan ang pamilya sa pag-usab sa ilang estilo-sa-kinabuhi, tudloan silag bag-ong mga sukdanan nga gipasukad sa Pulong sa Diyos. Apan gibati ni George nga ang paningkamot takos niadto, ilabina sa dihang nakit-an niya ang dakong kalainan nga nahimo niadto ngadto sa mga bata.

Sa Mexicanong lungsod sa San Salvador Atenco nagpuyo ang usa ka mamumuo nga ginganlag José, ang amahan sa siyam ka anak. Siya kusog moinom ug isog nga ilimnon, ug ang iyang mga anak mahadlok kaniya tungod kay siya mabangis kon siya mahubog. Ang ilang balay kanunay nga hugaw, ug ang tugkaran nagsilbing tangkal sa mga asno ug mga baboy sa pamilya, nga mosulod pa sa balay. Ingong sangpotanan, ang mga bata nagmasakiton gumikan sa mga impeksiyon sa tiyan, ug usahay ang ilang mga lawas mapunog mga hubag.

Ang kahimtang nausab sa dihang si José misugod pagtuon sa Bibliya uban sa mga Saksi ni Jehova. Siya mihunong sa kusog nga pag-inom ug nahimong tinuod nga amahan ngadto sa iyang mga anak. “Karon makadula pa kami uban sa akong papa!” usa sa mga bata magarbohong mipatugbaw. Ang ilang balay karon maoy usa sa labing hinlo​—inay kay usa sa labing hugaw​—diha sa lungsod. Ang mga baboy ug mga asno gibutang sa usa ka uma, ug ang pamilya sa regular nagpabukal sa ilimnong tubig. Ang mas maayong panghinlo nagkahulogan nga ang mga bata mas himsog ug mas malipayon.

Sumala sa gipadayag niining duha ka pananglitan, kasagaran ang yawi sa pagtabang sa mga bata mao ang pagtabang sa mga ginikanan. Ang deklarasyon sa Katigoman sa Kalibotan Alang sa Kabataan miila nga “ang pamilya adunay pangunang responsabilidad sa pagmatuto ug pagpanalipod sa mga bata.” Ug kon kaha ang mga pamilya nagmatuto ug nagpanalipod sa ilang mga bata o wala mahimong mag-agad ug dako sa edukasyon maingon man sa kinitaan.

Pagpabag-o sa Bata sa Kalye

Sa Brazil, si Domingos nuybe anyos lamang sa dihang namatay ang iyang amahan. Sa dihang naminyo pag-usab ang iyang inahan, siya sa kalit gipadala ngadto sa usa ka balay-sa-ilo aron mopuyo didto. Ang inisog nga pagtratar nga iyang nadawat sa balay-sa-ilo nagpahinabo nga siya mihukom nga mokuyog sa usa ka grupo nga nagplanong moikyas. Bisan pag siya gipabalik sa iyang inahan sa iyang balay sa dihang nadunggan niya ang iyang mga plano, ang ubay-ubay nga pagbunal gikan sa iyang amaama nagkombinsir kaniya nga siya molayas. Siya nahimong usa sa libolibong bata sa kalye sa São Paulo nga naglimpiya-bota, nagbaligyag mga kendi, o naghatod pag mga droga aron mabuhi.

Sa dihang unang miabot si Domingos sa usa ka Kingdom Hall sa mga Saksi ni Jehova, siya walay salig ug walay batasan​—dili katingad-an tungod sa iyang kagikan. Bisan pa niana, ang hamtong nga mga Saksi nakabaton sa iyang pagsalig, ug pinaagi sa personal nga pagtuon sa Bibliya, ilang gitabangan siya sa pagbaton ug bag-ong hugpong sa mga sukdanan. Sa ngadtongadto nasayran niya nga siya makabutang sa iyang pagsalig diha sa Diyos ug sa uban. Gitabangan siya sa mga Saksi nga makabatog trabaho, sa sinugdan ingong katabang sa usa ka mason ug dayon ingong usa ka masugo sa opisina. Karon, ubay-ubayng katuigan sa ulahi, siya nag-alagad nga bug-os-panahong Kristohanong ministro.

Kining mga panig-ingnana nagpakitang ang matinagdanong katilingban sa katawhan makahupay ug diyutay sa pag-antos sa kabataan sa kalibotan. Siyempre, ang mga Saksi ni Jehova nahibalo nga ang kaalaotan dili gayod bug-os mahupayan sa tawhanong paningkamot. Ang usa ka tinong solusyon sa mga suliran sa kabataan sa kalibotan magkinahanglan ug labaw-tawhanong katakos, way-kinutobang kahinguhaan, ug tibuok-yutang awtoridad.

“Bag-ong mga Langit” Alang sa Mas Maayong Kalibotan

Ang Diyos lamang ang makataganag kompletong solusyon. Tungod niini, ang tagna ni Isaias nagsaysay nga ang “bag-ong yuta” duyogan sa “bag-ong mga langit.” Sa ubay-ubayng beses ang Bibliya nagsaad nga ang “usa ka bag-ong langit” o “bag-ong mga langit” pagatukoron. (Isaias 65:17; 2 Pedro 3:13; Pinadayag 21:1) Sa matag okasyon ang pagkatukod sa maong “bag-ong mga langit” gihulagway ingong usa ka bililhong lakang paingon sa pagpapas sa pag-antos ug pagpatunghag pagkamatarong sa yuta. Unsa sa tukma kining “bag-ong mga langit”?

Ang Bibliya kasagarang naggamit sa pulong “mga langit” ingong usa ka kaamgid nga pulong alang sa pagmando, pinaagi kaha sa Diyos o sa mga tawo. (Itandi ang Daniel 4:25, 26.) Kining bag-ong kagamhanan maoy usa ka langitnong Gingharian, ang Gingharian sa Diyos​—ang gingharian nga gitudloan ni Jesus ang iyang mga sumusunod nga iampo. (Mateo 6:10) Ang Gingharian sa Diyos aduna unyay gahom sa pagpapas sa bisan unsang kaalaotan nga naghulga tingali sa kabataan sa kalibotan, ug kini determinado nga mohimo niana.

Nganong kita makapaneguro gayod niana? Tungod kay ang usa ka kagamhanan nagpasibaw sa personalidad sa mga magmamando niini. Busa, ang Gingharian sa Diyos magmando nga nahiuyon sa mga sukdanan sa Diyos ug sa iyang Anak, si Jesu-Kristo, ang tinudlo sa Diyos nga Hari. Silang duha nagpasundayag ug mainitong interes sa kaayohan sa mga bata.​—Salmo 10:14; 68:5; Marcos 10:14.

Samtang maikagon kitang nagpaabot niining gisaad nga Gingharian, o “bag-ong mga langit,” kita makapanlimbasog nga mapaarang-arang ang kahimtang sa mga bata diha sa atong silinganan. Sumala sa tukmang gihinapos sa Katigoman sa Kalibotan Alang sa Kabataan: “Walay tahas nga mas hamili kay sa paghatag sa matag bata ug mas maayong kaugmaon.”

[Kahon sa panid 11]

Usa ka Praktikal nga Programa sa Pagtabang sa Kabataan

Ang edukasyonal nga buluhaton sa mga Saksi ni Jehova nagtanyag ug praktikal ug malungtarong tabang alang sa kabataan. Pipila ka bahin niining programaha mao:

Edukasyon sa hamtong. Kini naglangkit sa pag-edukar nga kurso alang sa mga ginikanan nga dili makamaong mobasa o mosulat, uban sa mabug-osong pagtudlo bahin sa Bibliya nga gilaraw nga isilsil ang mga prinsipyo nga kinahanglanon alang sa tukmang pag-atiman sa mga bata.

Pamilyahanong giya. Ang Bibliya nagpahimangno sa mga ginikanan​—bisan kadtong kabos kaayo​—sa pag-atiman sa tanan nilang mga anak inay kay papuy-on ang pipila sa mga paryente. Ang librong Paghimo sa Imong Pamilyahanong Kinabuhi nga Malipayon napamatud-ang mapuslanon sa pagtabang sa mga pamilya nga may linaing mga suliran.a

Paglangkit ug pagkamahunahunaon sa bata. Sa dihang ang mga bata mismo malangkit sa edukasyon, pag-atiman sa panglawas, ug sanitasyon, ang sangpotanan labi pang maayo. Ang mga Saksi kasagarang nagtuon sa Bibliya uban sa mga bata, nga nagagamit sa gipahaom nga mga basahon sama sa Akong Basahon sa mga Estorya sa Bibliya ug Mga Pangutanang Gisukna sa mga Batan-on​—Mga Tubag nga Mosaler sa pagtabang kanila sa pagsulbad sa mga suliran sa balay ug pagpauswag sa personal nilang panghinlo.b

Instruksiyon sa panghinlo ug pag-atiman sa panglawas. Ang mga Saksi ni Jehova nagpatik sa magasing Pagmata! diha sa 74 ka pinulongan, ug kining magasina regular nga nagpatik ug mga artikulo mahitungod sa pag-atiman sa panglawas.

Hinabang. Panahon sa emerhensiya, ang mga Saksi ni Jehova nag-organisar ug madaling mga kalihokan sa hinabang nga mohatag ug tabang nga direkta sa dapit sa katalagman.

[Mga footnote]

[Mga hulagway sa panid 10]

Ang usa ka tinong solusyon sa mga suliran sa kabataan sa kalibotan magkinahanglag labaw-tawhanong katakos. Ang Diyos mao lamang ang makatagana sa maong solusyon