Si Jehova Magahatag ug Dagayang Pakigdait ug Kamatuoran
“Ayohon ko sila ug igapahayag kanila ang kadagaya sa pakigdait ug kamatuoran.”—JEREMIAS 33:6.
1, 2. (a) Mahitungod sa pakigdait, unsa ang rekord sa kanasoran? (b) Sa 607 W.K.P., unsang leksiyon ang gitudlo ni Jehova sa Israe
PAKIGDAIT! Pagkatilinguhaon kana, apan pagkatalagsaon kana sa kasaysayan sa tawo! Ang ika-20ng siglo, ilabina, dili malinawong siglo. Hinunoa, nakakita kini ug duha ka labing malaglagong mga gubat sa kasaysayan sa tawo. Human sa unang gubat sa kalibotan, natukod ang Liga sa Kanasoran aron mapadayon ang kalinaw sa kalibotan. Napakyas ang maong organisasyon. Human sa ikaduhang gubat sa kalibotan, natukod ang organisasyong Hiniusang Kanasoran nga may samang tumong. Kinahanglang basahon lamang nato ang inadlaw nga mga mantalaan aron masabtan nga kini nagakapakyas usab gayod.
2 Angay bang matingala kita nga ang tawhanong mga organisasyon dili makapatunghag pakigdait? Dili gayod. Kapig 2,500 ka tuig kanhi, ang piniling katawhan sa Diyos, ang Israel, natudloan ug usa ka leksiyon mahitungod niini. Sa ikapitong siglo W.K.P., ang pakigdait sa Israel nameligro tungod sa nag-usbaw nga gahom sa kalibotan, ang Babilonya. Ang Israel misalig sa Ehipto alang sa pakigdait. Napakyas ang Ehipto. (Jeremias 37:5-8; Ezekiel 17:11-15) Sa 607 W.K.P., gilumpag sa Babilonyanhong kasundalohan ang mga paril sa Jerusalem ug gisunog ang templo ni Jehova. Sa ingon ang Israel naleksiyon sa mapait nga paagi sa pagkakawang sa pagsalig sa tawhanong mga organisasyon. Inay matagamtam ang pakigdait, ang nasod napugos sa pagkabinihag ngadto sa Babilonya.—2 Cronicas 36:17-21.
3. Ingong katumanan sa mga pulong ni Jehova pinaagi ni Jeremias, unsang mga panghitabo sa kasaysayan ang nagtudlo sa Israel sa ikaduhang hinungdanong leksiyon bahin sa pakigdait?
3 Hinuon, sa wala pa mapukan ang Jerusalem, si Jehova nagbutyag nga siya, dili ang Ehipto, ang magdalag tinuod nga pakigdait sa Israel. Pinaagi ni Jeremias siya misaad: “Ayohon ko sila ug igapahayag kanila ang kadagaya sa pakigdait ug kamatuoran. Ug dad-on kog balik ang mga binihag sa Juda ug ang mga binihag sa Israel, ug tukoron ko sila sama ra sa sinugdan.” (Jeremias 33:6, 7) Ang saad ni Jehova nagsugod pagkatuman sa 539 W.K.P. sa dihang ang Babilonya napukan ug ang kagawasan gitanyag ngadto sa Israelinhong mga binihag. (2 Cronicas 36:22, 23) Sa ulahing bahin sa 537 W.K.P., usa ka grupo sa mga Israelinhon misaulog sa Piyesta sa mga Balongbalong sa yuta sa Israel sa unang higayon sa 70 ka tuig! Human sa piyesta, sila misugod sa pagtukod pag-usab sa templo ni Jehova. Unsay gibati nila bahin niadto? Ang talaan nag-ingon: “Sila misinggit sa usa ka dakong pagsinggit sa pagdayeg kang Jehova tungod sa pagpahiluna sa patukoranan sa balay ni Jehova.”—Esdras 3:11.
4. Giunsa pagpukaw ni Jehova ang mga Israelinhon aron mabuhat ang buluhatong pagtukod sa templo, ug unsay iyang gisaad bahin sa pakigdait?
4 Apan, human niadtong masadyaong pagsugod ang mga Israelinhon naluya tungod sa mga magsusupak ug mihunong sa buluhatong pagtukod sa templo. Pila ka tuig sa ulahi, gipatungha ni Jehova ang mga propetang si Hageo ug Zacarias aron pagdasig sa mga Israelinhon nga humanon ang buluhatong pagtukod pag-usab. Pagkamakalilipay gayod nga nakabati sila kang Hageo nga miingon mahitungod sa templo nga pagatukoron: “‘Mamahimong labaw pa ang himaya niining ulahing balay kay sa iya sa una,’ nag-ingon si Jehova sa mga panon. ‘Ug niining dapita igahatag ko ang pakigdait’”!—Hageo 2:9.
Si Jehova Magatuman sa Iyang mga Saad
5. Unsay angay nga matikdan bahin sa ikawalong kapitulo sa Zacarias?
5 Sa basahong Zacarias sa Bibliya, atong mabasa ang daghang dinasig nga mga panan-awon ug mga tagna nga nagpalig-on sa katawhan sa Diyos balik sa ikaunom nga siglo W.K.P. Kining samang mga tagna padayong nagpasalig kanato sa pagpaluyo ni Jehova. Kini naghatag kanato sa bug-os nga katarongan sa pagtuo nga si Jehova magahatag sa iyang katawhan ug pakigdait sa atong adlaw usab. Pananglitan, sa ikawalong kapitulo sa basahon nga nagdala sa iyang ngalan, ang propetang Zacarias sa napulo ka beses nagpahayag sa mga pulong: ‘Mao kini ang giingon ni Jehova.’ Sa matag higayon, ang pamulong nagpailaila sa usa ka balaang kapahayagan nga may kalabotan sa pakigdait sa katawhan sa Diyos. Pipila niining mga saara natuman sa adlaw ni Zacarias. Ang tanan natuman o nagakatuman karong adlawa.
“Ako Mangabugho Alang sa Sion”
6, 7. Sa unsang mga paagi si Jehova ‘abughoan alang sa Sion uban ang dakong kaligutgot’?
6 Ang pamulong unang makita sa Zacarias 8:2, diin atong mabasa: “Mao kini ang giingon ni Jehova sa mga panon, ‘Ako mangabugho alang sa Sion uban ang dakong pangabugho, ug uban ang dakong kaligutgot ako mangabugho alang kaniya.’” Ang saad ni Jehova nga mangabugho, nga magmadasigon kaayo, alang sa iyang katawhan nagpasabot nga siya magmabinantayon nga mapasig-uli ang ilang pakigdait. Ang pagpasig-uli sa Israel ngadto sa iyang yuta ug ang pagtukod pag-usab sa templo maoy ebidensiya sa maong kadasig.
7 Apan, komosta kadtong misupak sa katawhan ni Jehova? Ang iyang kadasig alang sa iyang katawhan matumbasan sa iyang “dakong kaligutgot” diha sa maong mga kaaway. Sa dihang ang matinumanong mga Hudiyo nagsimba diha sa natukod-pag-usab nga templo, sila nakapalandong sa daotang gidangatan sa gamhanang Babilonya, nga niadto napukan na. Sila nakahunahuna usab sa dakong kapakyasan sa mga kaaway nga misulay pagpugong sa pagkatukod pag-usab sa templo. (Esdras 4:1-6; 6:3) Ug sila nakapasalamat kang Jehova nga iyang natuman ang iyang saad. Ang iyang kadasig nagdala kanilag kadaogan!
“Ang Siyudad sa Katinuoran”
8. Sa mga adlaw ni Zacarias, sa unsang paagi ang Jerusalem mahimong usa ka siyudad sa katinuoran nga nalahi sa miaging kapanahonan?
8 Sa ikaduhang higayon si Zacarias misulat: “Mao kini ang giingon ni Jehova.” Unsa ang mga pulong ni Jehova sa maong higayon? “Ako mobalik sa Sion ug magapuyo taliwala sa Jerusalem; ug ang Jerusalem pagatawgon gayod ang siyudad sa katinuoran, ug ang bukid ni Jehova sa mga panon, ang balaang bukid.” (Zacarias 8:3) Sa wala pa ang 607 W.K.P., ang Jerusalem dili gayod siyudad sa katinuoran. Ang iyang mga saserdote ug mga propeta maoy hiwi, ug ang iyang katawhan dili matinumanon. (Jeremias 6:13; 7:29-34; 13:23-27) Niadtong tungora gitukod pag-usab sa katawhan sa Diyos ang templo, nga nagpakita nga sila komitido sa maputling pagsimba. Si Jehova sa espiritu mipuyo na usab sa Jerusalem. Ang mga kamatuoran bahin sa maputling pagsimba gihisgotan na usab diha kaniya, mao nga ang Jerusalem matawag “ang siyudad sa katinuoran.” Ang iyang habog nga puwesto matawag “ang bukid ni Jehova.”
9. Unsang talagsaong kausaban sa kahimtang ang nasinati sa “Israel sa Diyos” niadtong 1919?
9 Bisan pag kining duha ka kapahayagan maoy makahuloganon alang sa karaang Israel, dako usab kinig kahulogan alang kanato samtang nagkatapos ang ika-20ng siglo. Halos 80 ka tuig kanhi, panahon sa unang gubat sa kalibotan, ang pipila ka libong dinihogan nga niadto naghawas sa “Israel sa Diyos” nasugamak sa espirituwal nga pagkabinihag, sama nga ang karaang Israel nahimong binihag sa Babilonya. (Galacia 6:16) Sa matagnaon, sila gibatbat ingong patayng mga lawas nga nagbuy-od sa dalan. Bisan pa, sila may tim-os nga tinguha sa pagsimba kang Jehova “uban sa espiritu ug kamatuoran.” (Juan 4:24) Busa, niadtong 1919, si Jehova nagpagawas kanila gikan sa pagkabinihag, nga nagbanhaw kanila gikan sa ilang kahimtang nga patay sa espirituwal. (Pinadayag 11:7-13) Sa ingon gitubag ni Jehova uban sa malanog nga Oo ang matagnaong pangutana ni Isaias: “Matawo ba ang usa ka yuta uban ang mga sakit sa pagbati sa usa ka adlaw? O mahimugso ba ang usa ka nasod sa dihadiha?” (Isaias 66:8) Niadtong 1919, ang katawhan ni Jehova sa makausa pa naglungtad ingong espirituwal nga nasod diha sa ilang kaugalingong “yuta,” o espirituwal nga kahimtang sa yuta.
10. Sugod sa 1919, unsang mga panalangin ang gitagamtam sa dinihogang mga Kristohanon diha sa ilang “yuta”?
10 Nga luwas sulod nianang yutaa, ang dinihogang mga Kristohanon nag-alagad sa dakong espirituwal nga templo ni Jehova. Sila ginganlang “ang kasaligan ug mabuot nga ulipon,” nga nagdawat sa responsabilidad nga atimanon ang yutan-ong mga kabtangan ni Jesus, usa ka pribilehiyo nga ila gihapong gitagamtam samtang nagkaduol ang ika-20ng siglo sa katiklopan niini. (Mateo 24:45-47) Nakakat-on sila pag-ayo sa pagtulon-an nga si Jehova mao “ang Diyos mismo sa kalinaw.”—1 Tesalonica 5:23.
11. Sa unsang paagi ang relihiyosong mga pangulo sa Kakristiyanohan nagpakita nga sila mga kaaway sa katawhan sa Diyos?
11 Apan, komosta ang mga kaaway sa Israel sa Diyos? Ang kadasig ni Jehova alang sa iyang katawhan gitumbasan sa iyang kaligutgot batok sa mga magsusupak. Panahon sa unang gubat sa kalibotan, ang relihiyosong mga pangulo sa Kakristiyanohan migamit ug dakong pagpit-os samtang sila misulay—ug napakyas—nga laglagon kining gamayng grupo sa nagsultig-kamatuoran nga mga Kristohanon. Panahon sa ikaduhang gubat sa kalibotan, ang mga ministro sa Kakristiyanohan nahiusa sa usa lamang ka butang: Sa duha ka kiliran sa away, sila nag-awhag sa mga gobyerno nga piotan ang mga Saksi ni Jehova. Bisan karong adlawa, sa daghang nasod ang relihiyosong mga pangulo nagahulhog sa mga gobyerno sa pagpig-ot o pagdili sa Kristohanong buluhatong pagwali sa mga Saksi ni Jehova.
12, 13. Sa unsang paagi ang kaligutgot ni Jehova gipahayag batok sa Kakristiyanohan?
12 Dili ingon nga si Jehova wala makamatikod niini. Human sa unang gubat sa kalibotan, ang Kakristiyanohan, kauban sa nahibiling bahin sa Dakong Babilonya, napukan. (Pinadayag 14:8) Ang kamatuoran sa pagkapukan sa Kakristiyanohan nasayran sa publiko sa dihang, sugod sa 1922, ang nagsunod nga simbolikong mga hampak gibubo, nga nagyagyag sa publiko sa patay niyang espirituwal nga kahimtang ug nagpasidaan sa umaabot niyang kalaglagan. (Pinadayag 8:7–9:21) Ingong ebidensiya nga nagpadayon ang pagbubo niining mga hampaka, ang pakigpulong “Haduol na ang Kalaglagan sa Bakak nga Relihiyon” gipahayag sa tibuok kalibotan sa Abril 23, 1995, nga gisundan sa pag-apod-apod sa ginatos ka milyong kopya sa usa ka espesyal nga isyu sa Kingdom News.
13 Karong adlawa, ang Kakristiyanohan anaa sa makaluluoy nga kahimtang. Sa tibuok ika-20ng siglo, ang iyang mga membro nagpatyanay sa usag usa diha sa mabangisong mga gubat nga gibendisyonan sa iyang mga pari ug mga ministro. Sa pila ka nasod ang iyang impluwensiya halos wala na. Siya nagpadulong sa kalaglagan uban sa nahibiling bahin sa Dakong Babilonya.—Pinadayag 18:21.
Pakigdait Alang sa Katawhan ni Jehova
14. Unsang matagnaong kahubitan ang gihatag mahitungod sa usa ka katawhan nga may pakigdait?
14 Sa laing bahin, niining tuig 1996, ang katawhan ni Jehova nagtagamtam ug dagayang pakigdait diha sa ilang napasig-uling yuta, sumala sa gibatbat sa ikatulong kapahayagan ni Jehova: “Mao kini ang giingon ni Jehova sa mga panon, ‘Aduna pa unyay tigulang nga mga lalaki ug tigulang nga mga babaye nga magalingkod sa publikong mga plasa sa Jerusalem, ang matag usa usab may iyang sungkod diha sa iyang kamot tungod sa kadagaya sa iyang mga adlaw. Ug ang publikong mga plasa sa siyudad mismo mangapuno sa batang mga lalaki ug batang mga babaye nga magadula diha sa iyang publikong mga plasa.’”—Zacarias 8:4, 5.
15. Bisan pa sa mga gubat sa kanasoran, unsang pakigdait ang gitagamtam sa mga alagad ni Jehova?
15 Kining nindot nga kahubitan naghulagway sa butang nga talagsaon niining gibungkag-sa-gubat nga kalibotan—usa ka katawhan nga may pakigdait. Sukad sa 1919, ang matagnaong mga pulong ni Isaias nangatuman: “‘Aduna unyay mapinadayonong pakigdait sa usa nga atua sa halayo ug sa usa nga anaa sa haduol,’ si Jehova nag-ingon, ‘ug ayohon ko siya. Apan . . . walay pakigdait,’ nag-ingon ang akong Diyos, ‘alang sa mga tuman-kadaotan.’” (Isaias 57:19-21) Hinuon, ang katawhan ni Jehova, bisan pag dili bahin sa kalibotan, dili makalikay nga maapektahan sa kaguliyang sa kanasoran. (Juan 17:15, 16) Sa pila ka nasod, giantos nila ang grabeng mga kalisdanan, ug ang pipila napatay pa. Apan, ang matuod nga mga Kristohanon adunay pakigdait sa duha ka pangunang paagi. Una, sila adunay “pakigdait uban sa Diyos pinaagi sa [ilang] Ginoong Jesu-Kristo.” (Roma 5:1) Ikaduha, sila adunay pakigdait sa ilang taliwala. Giugmad nila “ang kaalam gikan sa itaas,” nga maoy “una sa tanan putli, unya makigdaiton.” (Santiago 3:17; Galacia 5:22-24) Dugang pa, ilang gipanan-aw sa unahan nga matagamtam ang pakigdait sa labing bug-os nga diwa sa dihang “ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:11.
16, 17. (a) Sa unsang paagi ang “tigulang nga mga lalaki ug tigulang nga mga babaye” ingon man ang “batang mga lalaki ug batang mga babaye” nagpalig-on sa organisasyon ni Jehova? (b) Unsay nagpasundayag sa pakigdait sa katawhan ni Jehova?
16 Aduna pa gihapoy “tigulang nga mga lalaki ug tigulang nga mga babaye” taliwala sa katawhan ni Jehova, mga dinihogan nga nahinumdom sa unang mga kadaogan sa organisasyon ni Jehova. Ang ilang pagkamatinumanon ug pag-agwanta gipabilhan pag-ayo. Ang batan-ong mga dinihogan maoy nanguna sa lisod nga mga adlaw sa katuigang 1930 ug sa Gubat sa Kalibotan II, maingon man sa makapaukyab nga katuigan sa pag-uswag nga misunod. Dugang pa, ilabina sukad sa 1935, ang “dakong panon” sa “ubang mga karnero” napadayag na. (Pinadayag 7:9; Juan 10:16) Samtang ang dinihogang mga Kristohanon nangatigulang ug nagkadiyutay, ang ubang mga karnero maoy miabaga sa buluhatong pagwali ug gipaabot kana sa tibuok yuta. Sa bag-o pang katuigan ang ubang mga karnero nagpanon sa pagsulod sa yuta sa katawhan sa Diyos. Ngani, sa miaging tuig lamang, 338,491 kanila ang nabawtismohan agig simbolo sa ilang pagpahinungod kang Jehova! Ang maong mga bag-ohan maoy batan-on pa gayod, sa espirituwal nga pagkasulti. Ang ilang pagkabag-o ug kadasig gimahal samtang sila nagpadaghan niadtong nag-awit sa mapasalamatong mga pagdayeg “sa atong Diyos, nga naglingkod sa trono, ug sa Kordero.”—Pinadayag 7:10.
17 Karong adlawa, ‘ang publikong mga plasa nangapuno sa batang mga lalaki ug batang mga babaye,’ mga Saksing may kalagsik sa pagkabatan-on. Sa 1995 tuig sa pag-alagad, ang mga taho nadawat gikan sa 232 ka nasod ug kaislahan sa dagat. Apan walay panag-indig taliwala sa mga nasod, walay pagdumot taliwala sa mga tribo, walay dili-angay nga pangabugho, tali sa dinihogan ug sa ubang mga karnero. Ang tanan nagkauban sa pagtubo sa espirituwal, nga nahiusa sa gugma. Ang tibuok-kalibotang panag-igsoonay sa mga Saksi ni Jehova tinuod nga talagsaon sa tibuok kalibotan.—Colosas 3:14; 1 Pedro 2:17.
Lisod Kaayo Alang Kang Jehova?
18, 19. Sa katuigan sukad sa 1919, giunsa pagpalampos ni Jehova ang butang nga mahimong morag lisod kaayo gikan sa tawhanong panglantaw?
18 Niadtong 1918 sa dihang ang dinihogang nahibilin mao lamay pila ka libo nga naluyang mga kalag nga sa espirituwal nabihag, walay nakapanan-aw daan sa dagan sa mga panghitabo. Bisan pa niana, si Jehova nasayod—sumala sa gipamatud-an sa iyang ikaupat nga matagnaong kapahayagan: “Mao kini ang giingon ni Jehova sa mga panon, ‘Bisan pag mopatim-aw nga lisod kaayo sa mga mata sa mga salin sa maong katawhan niadtong mga adlawa, kini ba mopatim-aw nga lisod usab kaayo sa akong mga mata?’ mao ang giingon ni Jehova sa mga panon.”—Zacarias 8:6.
19 Niadtong 1919, ang espiritu ni Jehova nagpabuhi sa iyang katawhan alang sa buluhaton sa unahan. Bisan pa, gikinahanglan ang pagtuo sa pagpabilin sa gamayng organisasyon sa mga magsisimba ni Jehova. Sila diyutay kaayo, ug daghang butang ang dili tin-aw. Bisan pa niana, sa hinayhinay si Jehova nagpalig-on kanila sa organisasyonal nga paagi ug nagsangkap kanila sa pagbuhat sa Kristohanong buluhaton sa pagwali sa maayong balita ug paghimog mga tinun-an. (Isaias 60:17, 19; Mateo 24:14; 28:19, 20) Sa inanay, siya nagtabang kanila nga masabtan ang hinungdanong mga isyu sama sa neyutralidad ug unibersohanong pagkasoberano. Lisod ba kaayo kang Jehova ang pagtuman sa iyang kabubut-on pinaagi niadtong gamayng grupo sa mga Saksi? Ang tubag maoy tinong dili! Gipamatud-an kini sa mga panid 12 hangtod 15 niining magasina, nga nagpakita sa tsart sa kalihokan sa mga Saksi ni Jehova alang sa 1995 tuig sa pag-alagad.
“Ako Mismo Mahimong Ilang Diyos”
20. Unsa ka dako ang pagpanigom sa katawhan sa Diyos sumala sa gitagna?
20 Ang ikalimang kapahayagan dugang nagpakita sa malipayong kahimtang sa mga Saksi ni Jehova karong adlawa: “Mao kini ang giingon ni Jehova sa mga panon, ‘Ania ako nagaluwas sa akong katawhan gikan sa yuta sa sidlakan ug gikan sa yuta sa kasadpan. Ug sila ako gayod nga pasudlon, ug kinahanglang sila magapuyo sa taliwala sa Jerusalem; ug sila mahimong akong katawhan, ug ako mismo mahimong ilang Diyos diha sa katinuoran ug sa pagkamatarong.’”—Zacarias 8:7, 8.
21. Sa unsang paagi ang dagayang pakigdait sa katawhan ni Jehova padayong nahuptan ug napakaylap?
21 Sa 1996 kita makaingon nga walay pagpanuko nga ang maayong balita gikawali na sa tibuok nga kalibotan, gikan sa “yuta sa sidlakan” ngadto sa “yuta sa kasadpan.” Ang mga tinun-an nangahimo na sa katawhan sa tanang nasod, ug sila nakakita sa pagkatuman sa saad ni Jehova: “Ang tanan nimong mga anak maoy mga tawo nga tinudloan ni Jehova, ug ang pakigdait sa imong mga anak magmadagayaon.” (Isaias 54:13) Kita adunay pakigdait tungod kay kita gitudloan ni Jehova. Sa maong tumong, ang literatura ginapatik diha sa kapin sa 300 ka pinulongan. Sa miaging tuig lamang, 21 pa ka pinulongan ang nadugang. Ang magasing Bantayanang Torre karon gipatik nga dungan sa 111 ka pinulongan, ug ang Pagmata! sa 54. Ang nasyonal ug internasyonal nga mga kombensiyon nagtaganag publikong pasundayag sa pakigdait sa katawhan sa Diyos. Ang senemanang mga tigom naghiusa kanato ug naghatag kanato sa pagdasig nga atong gikinahanglan aron magpabiling lig-on. (Hebreohanon 10:23-25) Oo, si Jehova nagatudlo sa iyang katawhan “diha sa katinuoran ug sa pagkamatarong.” Siya nagahatag ug pakigdait sa iyang katawhan. Pagkabulahan nato nga nakaambit sa maong dagayang pakigdait!
Makapatin-aw Ka Ba?
◻ Sa modernong kapanahonan, sa unsang paagi si Jehova ‘abughoan uban ang dakong kaligutgot’ alang sa iyang katawhan?
◻ Sa unsang paagi ang katawhan ni Jehova nagtagamtam ug pakigdait, bisan diha sa gibungkag-sa-gubat nga kanasoran?
◻Sa unsang paagi ‘ang publikong mga plasa nangapuno sa batang mga lalaki ug batang mga babaye’?
◻ Unsang mga tagana ang gihimo aron ang katawhan ni Jehova matudloan niya?
[Chart sa panid 12-15]
1995 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tan-awa ang tomo)
[Hulagway sa panid 8, 9]
Sa ikaunom nga siglo W.K.P., nasayran sa matinumanong mga Hudiyo nga nagtukod pag-usab sa templo nga si Jehova mao lamang ang kasaligang tinubdan sa pakigdait