Si Jehova—Ang Diyos nga Nagtagna sa Umaabot ug Nagtuman Niana

1, 2. (a) Nganong naghunahuna ang pipila nga dili na kontrolado ni bisan kinsang tawo ang kahimtang karon? (b) Sa unsang paagi gihubit sa 12 ka manalagna ang personalidad ni Jehova?

GIHUNAHUNA sa daghan nga ang ilang kinabuhi dili na nila kontrolado. Ug gumikan sa mga balita nga ilang nabasa, mihinapos sila nga ang katibuk-ang kaliwatan sa katawhan labaw ug labaw pang nawad-an ug paglaom. Ang mga singkamot nga sulbaron ang mga suliran sa kalibotan maorag nakapagrabe hinuon sa desperado nga kahimtang. Mamatikdan nga ang pipila sa 12 ka manalagna nga atong gitun-an nagsagubang ug samang makapasubo nga mga kahimtang, ug sila nagpahayag ug mga mensahe sa paglaom nga makatabang kanato mismo ug magamit nato aron hupayon ang uban.—Miqueas 3:1-3; Habacuc 1:1-4.

² Ang usa ka mahinungdanong punto nga imong makaplagan diha sa maong matagnaong mga basahon mao nga bug-os nga kontrolado ni Jehova ang tawhanong mga kahikayan kay siya mao ang Soberano sa Uniberso ug siya interesado kaayo sa atong kaayohan. Ngani, ang matag usa kanato tinuod makaingon, “Siya interesado sa akong kaayohan.” Madanihong gihubit sa 12 ka manalagna si “Jehova sa mga panon.” Ang Diyos ‘makahikap sa yuta, mao nga kini matunaw,’ apan siya nagpasalig sa iyang katawhan: “Siya nga nagahilabot kaninyo nagahilabot sa kalimutaw sa akong mata.” (Zacarias 2:8; Amos 4:13; 9:5) Dili ka ba malipay nga makabasag mga teksto nga naghulagway kon sa unsang paagi ang mga pagpakiglabot sa Diyos maoy impluwensiyado sa gugma ug kon sa unsang paagi siya nagpakitag kaluoy ug kapasayloan? (Oseas 6:1-3; Joel 2:12-14) Tinuod, ang mga sinulat niining mga manalagnaa wala magtuki sa tanang kinaiya sa Diyos; ang tanang 66 ka basahon sa Bibliya gikinahanglan sa pagtuki niana. Bisan pa niana, kining 12 ka basahon mohatag ug kinamaayohang katin-awan sa makapadaning personalidad sa Diyos ug sa iyang mga pagpakiglabot.

3. Sa unsang paagi gipadayag sa 12 ka manalagna nga si Jehova maoy Diyos nga may katuyoan?

³ Ang mga sinulat sa 12 ka manalagna makadugang sa atong pagsalig kang Jehova ingong Usa nga makatagna sa umaabot ug magtuman sa iyang katuyoan. Kana nagpamatuod nga sa kataposan siya magpatungha ug yutan-ong paraiso ubos sa pagmando sa Diyos. (Miqueas 4:1-4) Ang pipila sa maong mga manalagna naghubit kon sa unsang paagi si Jehova nangandam alang sa pag-abot sa Mesiyas ug sa paghatag sa lukat nga magpahigawas sa katawhan gikan sa sala ug kamatayon. (Malaquias 3:1; 4:5) Nganong mahinungdanon nga kining tanan masayran?

BUG-OS KONTROLADO SA USA KA MAHIGUGMAONG SOBERANO ANG KAHIMTANG

4, 5. (a) Unsang paninugdang kamatuoran bahin sa Diyos ang gipasiugda sa 12 ka manalagna? (b) Sa unsang paagi apektado ka sa pagkalabing gamhanan ni Jehova?

⁴ Hinumdomi ang pagbutangbutang sa Diyos bahin sa iyang katungod sa pagmando, nga gihisgotan sa miaging kapitulo. Tungod sa pagrebelde batok sa awtoridad ni Jehova—ug pagsuspetsa o pagduhaduha sa iyang mga motibo—ang pipila misupak sa Diyos didto sa langit ug sila nagpahinabog kagubot ug kapintasan sa yuta. Busa matin-aw nga ang pagtahod ug pagpasakop sa pagkasoberano ni Jehova gikinahanglan alang sa bug-os nga kahusay sa uniberso ug kalinaw taliwala sa katawhan. Busa angayan nga si Jehova mahimong determinado nga bayawon ang iyang pagkasoberano. Atong repasohon kon sa unsang paagi makatabang kanato ang 12 ka matagnaong mga basahon aron mas tin-aw pa kining masabtan.

⁵ Ingong mga mensahero ni Jehova, gipasiugda sa mga manalagna ang iyang binayawng posisyon. Pananglitan, gigamit ni Amos ang titulong “Soberanong Ginoo” ug 21 ka beses aron himayaon ang ngalan ug pagkasoberano sa Labing Gamhanan. Nagpadayag kini nga ang matuod nga Diyos dako kaayo ug kontrolado niya ang tanang butang. (Amos 9:2-5; tan-awa ang kahong “Si Jehova nga Labing Gamhanan.”) Si Jehova mao lamang ang angayang Soberano sa uniberso, nga labaw kaayo kay sa way-kinabuhi nga mga idolo. (Miqueas 1:7; Habacuc 2:18-20; Sofonias 2:11) Kay si Jehova maoy Magbubuhat sa tanang butang, siya may kinaiyanhong katungod nga gamiton ang soberanong gahom ibabaw sa tanan. (Amos 4:13; 5:8, 9; 9:6) Nganong kana mahinungdanon kanimo?

6. Sa unsang paagi nalangkit ang matag tawo sa pagkatuman sa katuyoan sa Diyos?

⁶ Kon nasinatian nimo ang pagpihigpihig, inhustisya, o pagbatok, mahupayan ka sa pagkahibalo nga ang mahigugmaong Soberano nagtagad sa tanan. May espesyal nga relasyon si Jehova uban sa usa ka nasod sa karaang panahon, apan siya nagpahibalo sa iyang desisyon sa pagpanalangin sa katawhan sa tanang kanasoran ug pinulongan. Siya mao ang “matuod nga Ginoo sa tibuok yuta.” (Miqueas 4:13) Ang Diyos misaad nga ang iyang ngalan “mahimong dako taliwala sa kanasoran.” (Malaquias 1:11) Sanglit ang atong langitnong Amahan nagpaila sa iyang kaugalingon nga walay pagpihigpihig, maikagong gidawat sa ‘mga tawo gikan sa tanang pinulongan sa mga nasod’ ang iyang pagdapit nga mahimong iyang mga magsisimba.—Zacarias 8:23.

7. Nganong undanon ang kahulogan sa ngalan ni Jehova?

⁷ Ang kahibalo bahin sa kinaiyahan sa Diyos ug kon unsay iyang buhaton nalangkit gayod sa iyang ngalan. (Salmo 9:10) Sa panahon ni Miqueas, ang ngalan sa Diyos napakaulawan tungod kay ang daghang nagdala sa Iyang ngalan maoy masupilon kaayo. Ang manalagna giinspirar sa pagpasiugda sa “pagkalabaw sa ngalan ni Jehova” ug sa pagpahayag sa tin-aw nga ‘ang tawo nga may praktikal nga kaalam mahadlok sa ngalan sa Diyos.’ (Miqueas 5:4; 6:9) Ngano? Ang kasaligang paglaom nga imong nabatonan alang sa malungtarong kaugmaon nalangkit sa undanong kahulogan sa maong ngalan: “Siya Nagpahinabo nga Mamao.” Nganong dili basahon ang Joel 2:26 ug hunahunaon kon unsa ka dakong kalipay ang imong matagamtam tungod kay ikaw nagdala sa maong ngalan ug nagsulti sa uban bahin sa bugtong Diyos nga mamao sumala sa gikinahanglang siya mamao sa kaayohan sa iyang tanang linalang? Napamatud-an na sa Diyos nga siya adunay way-kinutbanang katakos sa pagpahinabo kon unsay gikinahanglan. Imong makaplagan ang ebidensiya niana diha sa pagkatuman sa daghang tagna nga gimantala sa 12 ka manalagna.

8. Sa unsang mga paagi ang ngalan ni Jehova nakadasig kanimo?

⁸ Milyonmilyon na ang nakabenepisyo sa pagkahibalo nga si Jehova makapahinabo o makapatuman kon unsay iyang gustong ipahinabo. Kana gipaila ni Joel diha sa iladong mga pulong nga gikutlo sa Kristohanong mga tagsulat: “Ang matag usa nga magatawag sa ngalan ni Jehova maluwas.” (Joel 2:32; Buhat 2:21; Roma 10:13) Moduyog ba kita sa gipahayag ni Miqueas, nga mao, “kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran”? (Miqueas 4:5) Oo, sa mga panahon sa paglutos o sa personal nga kasakitan, kita masaligong ‘makadangop sa ngalan ni Jehova.’—Sofonias 3:9, 12; Nahum 1:7.

9. Sa unsang gidak-on kontrolado sa Diyos ang tawhanong mga magmamando?

⁹ Samtang ikaw magabasa niining matagnaong mga basahon, imong mapalig-on ang imong pagtuo nga bisan ang gamhanang mga politiko o mga negosyante maoy kontrolado ni Jehova. Aduna siyay katakos sa pagpalihok kanila sumala sa iyang pagbuot. (Proverbio 21:1) Tagda ang kahimtang ni Dario nga Bantogan sa Persia. Ang mga kaaway sa matuod nga pagsimba nagpakitabang kaniya sa pagpahunong sa pagtukod pag-usab sa templo ni Jehova sa Jerusalem. Ang kaatbang hinuon maoy nahitabo! Sa mga 520 W.K.P., gipasig-uli ni Dario ang dekreto ni Ciro ug gisuportahan ang pagtukod pag-usab sa mga Hudiyo. Sa dihang mitungha ang dugang kababagan, ang mensahe sa Diyos ngadto sa Hudiyong Gobernador nga si Zorobabel mao: “‘Dili pinaagi sa kasundalohan, ni pinaagi sa gahom, kondili pinaagi sa akong espiritu,’ miingon si Jehova sa mga panon. Kinsa ka ba, Oh dakong bukid? Atubangan ni Zorobabel ikaw mahimong patag nga yuta.” (Zacarias 4:6, 7) Walay makababag sa paglaglag ni Jehova sa daotang sistema sa mga butang karon ug sa iyang pagtukod ug usa ka paraiso nga mapahimuslan sa iyang mga magsisimba.—Isaias 65:21-23.

10. Unsa pa ang kontrolado sa Diyos, ug nganong kana angayng tagdon?

¹⁰ Tagda usab nga ang mga puwersa sa kinaiyahan maoy kontrolado ni Jehova, nga iyang magamit sa paglaglag sa iyang mga kaaway kon kana ang iyang desisyon. (Nahum 1:3-6) Migamit si Zacarias ug masambingayong mga pulong sa pagpasiugda nga si Jehova makapanalipod sa iyang katawhan: “Si Jehova makita sa ibabaw nila, ug ang iyang pana mogula sama sa kilat. Ug huypon sa Soberanong Ginoong Jehova ang budyong, ug siya mokuyog sa unos sa habagatan.” (Zacarias 9:14) Nan, malisdan ba unya ang Diyos sa pagpamatuod sa iyang pagkalabaw ibabaw sa dili-diyosnong mga nasod sa atong panahon? Dili gayod!—Amos 1:3-5; 2:1-3.

KASALIGANG TIGTUMAN SA MGA SAAD

11, 12. (a) Nganong ang Nineve giisip nga dili mabuntog? (b) Unsay gidangatan sa Nineve, sumala sa matagnaong pulong sa Diyos?

¹¹ Handurawa nga ikaw nagkinabuhi sa ikasiyam nga siglo W.K.P. sa dapit nga nailhan karon nga Tungang Sidlakan. Unsang dakong siyudad nga lagmit nimong nadunggan? Siyempre ang Nineve. Kadto maoy inilang siyudad sa Asirya sa silangang tampi sa Suba sa Tigris, mga 900 ka kilometro amihanan-silangan sa Jerusalem. Mahimong nakadungog ka nga kadto dako kaayo—mga 100 ka kilometro ang distansiya kon liboton! Ang mga tawo nga nakaadto sa Nineve miingon nga ang katahom niadto katumbas sa Babilonya—nga may harianong mga palasyo, mga templo, luag nga kadalanan, publikong mga hardin, ug talagsaong librarya. Dugang pa, ang mga batid sa militaryong estratehiya naghisgot bahin sa labihan ka dagko, dili-malutsan nga panggawas ug pangsulod nga mga paril.

¹² “Dili mabuntog!” Kanay gisulti sa daghan nga nagbatbat sa Nineve. Apan ang pipila ka manalagna gikan sa gamay kaayong nasod sa Juda miinsistir nga si Jehova mihukom sa paglaglag sa maong “siyudad nga nagaula ug dugo.” Tungod sa reaksiyon sa katawhan sa mensahe ni Jonas, ang siyudad nakalingkawas sa paghukom sa Diyos sa usa ka higayon. Ugaling lang, ang mga taga-Nineve namalik sa ilang karaan ug daotang mga panggawi. Si Nahum mitagna: “Nineve . . . , usa ka espada maglaglag kanimo . . . Walay kahupayan sa imong katalagman.” (Nahum 3:1, 7, 15, 19; Jonas 3:5-10) Sa maomaong panahon, gigamit sa Diyos si Sofonias sa pagtagna nga ang Nineve mahimong awaawng kamingawan. (Sofonias 2:13) Mapukan ba ang dili-mabuntog nga politikanhong gahom niadtong panahona aron sa pagtuman sa pulong ni Jehova? Ang tubag miabot sa mga 632 W.K.P. sa dihang ang mga Babilonyanhon, mga Sityanhon, ug mga Medianhon miatake sa Nineve. Natumpag ang mga paril tungod sa kalit nga mga pagbaha, ug nakalusot ang mga miatake sa mga depensa niini. (Nahum 2:6-8) Kalit nga nahimong tapok sa kagun-oban ang kanhi gamhanang siyudad. Ang Nineve nagpadayong awaaw hangtod karong adlawa.a Ang “masadyaong siyudad” wala makababag sa pagkatuman sa pulong sa Diyos!—Sofonias 2:15.

13. Unsang ebidensiya sa natuman nga mga tagna ang imong makita diha sa 12 ka manalagna?

¹³ Ang nahitabo sa Nineve maoy usa lamang ka pananglitan sa natuman nga tagna. Tan-awa ang usa ka modernong mapa sa Tungang Sidlakan. Makita mo ba ang Ammon, Asirya, Babilonya, Edom, o Moab? Dili gayod! Bisan pag may higayong ang maong mga nasod maoy inila, gitagna sa 12 ka manalagna nga sila mahanaw. (Amos 2:1-3; Abdias 1, 8; Nahum 3:18; Sofonias 2:8-11; Zacarias 2:7-9) Nagsunod pagkahanaw ang maong mga nasod. Miingon si Jehova nga sila mahanaw, ug nahanaw gayod sila! Ug ang gitagna sa mga manalagna nga ang nahibiling mga Hudiyo mobalik gikan sa pagkabinihag sa Babilonya natuman—kadto nahitabo gayod!

14. Nganong mahimong isentro nimo ang imong pagkinabuhi diha sa mga saad ni Jehova?

¹⁴ Sa unsang paagi naapektohan sa maong ebidensiya ang imong pagsalig sa katakos ni Jehova sa pagpanagna? Makapaneguro ka nga tumanon ni Jehova ang iyang mga saad; siya mao ang Diyos “nga dili makabakak.” (Tito 1:2) Dugang pa, ang Diyos magpahibalo kanato kon unsay kinahanglan natong mahibaloan pinaagi sa iyang Pulong. Mahimong isentro nimo ang imong pagkinabuhi sa pagbuhat sa kabubut-on ni Jehova ug sa pagkakasaligan sa iyang matagnaong mga pulong. Ang mga tagna diha sa 12 ka basahon maoy dili lamang mga pananglitan sa mga tagna nga natuman sa nangaging panahon. Ang daghang tagna nagakatuman karon o hapit nang matuman. Busa, ang rekord niining 12 ka basahon makapalig-on sa imong pagsalig nga matuman ang mga tagna bahin sa atong panahon ug sa umaabot. Isipang seryoso ang maong mga tagna.

USA KA AMAHAN NGA NAGATAGAD

15. Sa dihang ikaw nagsagubang ug personal nga mga suliran, sa unsang paagi ang mga kasinatian ni Miqueas makatabang kanimo?

¹⁵ Ang pagkakasaligan sa Diyos dili lamang masabtan diha sa mga butang may kalabotan sa mahitabo sa mga nasod o sa katibuk-ang kahimtang sa kalibotan. Si Jehova magatagna ug magatuman niana sa mga paagi nga apektado ka sa personal. Sa unsang paagi tinuod kana? Buweno, ikaw mahimong lisdan usahay sa pagsulbad ug personal nga mga suliran. Makaamgo ka nga kini maoy dili lamang pagkadunay tawo nga makasabot kanimo—kinahanglang ikaw adunay tawo nga imong masaligan nga motabang kanimo. Sa ikawalong siglo W.K.P., naghunahuna si Miqueas nga siya nag-inusara gayod samtang nag-atubang sa garbosong katawhan sa Juda. Siya maorag mao ang kataposan nga tawong matinumanon sa yuta mao nga dili gani siya makasalig sa iyang kaugalingong pamilya. Siya nakakitag uhaw-sa-dugo, limbongan, ug hiwing mga tawo sa bisan diin. Bisan pa niana, si Miqueas nagmasaligon tungod sa mga saad sa Diyos nga iyang atimanon ang mga tawo nga magmatinumanon Kaniya bisag unsa pa tingaliy buhaton sa uban. Ikaw mahupayan usab niana, ilabina kon ikaw sakop sa minoriya o nag-inusara ingong magsisimba ni Jehova, nga gilibotan ug mga tawong wala magpasidungog sa Diyos.—Miqueas 7:2-9.

16. Nganong mapaneguro nimo nga mamatikdan sa Diyos ang kahiwian ug pagdaogdaog ug iyang luwason ang mga matarong?

¹⁶ Sama sa kasagarang mahitabo karon, ang mga dato ug gamhanan sa Juda ug sa Israel nahimong hakog ug dili makiangayon. May supak-sa-balaod nga pagpangulipon tungod sa sobrang pagpaningil ug buhis ug pagpangilog ug yuta. Ang mga kabos wala kaayo tagda ug gipintasan pa. (Amos 2:6; 5:11, 12; Miqueas 2:1, 2; 3:9-12; Habacuc 1:4) Pinaagi sa iyang mga mensahero, gipatin-aw sa Diyos nga ang kahiwian ug pagdaogdaog dili niya itugot ug iyang silotan ang mga tawo nga magpadayon sa pagbuhat ug daotan. (Habacuc 2:3, 6-16) Iyang gitagna nga siya “magatul-id sa mga butang labot sa gamhanang mga nasod” ug ang iyang inuyonang mga alagad “manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” (Miqueas 4:3, 4) Pagkatalagsaong kahupayan ang miresulta! Daghan pa ang gitagna ug unya gituman sa Diyos. Dili ba nimo mapaneguro nga matuman usab kining saara?

17, 18. (a) Nganong ang Diyos naghatag ug paglaom sa katawhan? (b) Unsaon nato pag-isip ang disiplina ni Jehova?

¹⁷ Tumanon ni Jehova ang iyang mga saad dili lamang aron ipakita ang iyang katakos sa pagtagna, nga maorag gusto niyang magpadayeg sa mga tawo. Ang iyang mga lihok gitukmod sa may-prinsipyong gugma, kay “ang Diyos gugma.” (1 Juan 4:8) Hinumdomi ang kahimtang ni Oseas, kinsa nagkinabuhi sa ikawalong siglo W.K.P. Ang asawa ni Oseas nga si Gomer nagluib kaniya, sama ra nga ang mga Israelinhon nagluib kang Jehova. Ang ilang idolatriya o pagsimbag diyosdiyos samag pagpanapaw; ilang gisagol ang pagsimba kang Baal sa maputling pagsimba kang Jehova. Sa masambingayong paagi sila “nakighilawas” uban sa Asirya ug Ehipto. Unsay reaksiyon ni Jehova? Kinahanglang tinguhaon ni Oseas nga ang iyang maluibong asawa mobalik kaniya. Gitinguha ni Jehova nga ang iyang katawhan mobalik kaniya tungod sa iyang gugma kanila. “Pinaagi sa mga pisi sa yutan-ong tawo ako nagbutad kanila, pinaagi sa mga pisi sa gugma, . . . ug sa kalumo ako nagdala ug pagkaon sa matag usa.” (Oseas 2:5; 11:4) Kon sinsero silang maghinulsol, pasayloon sila sa Diyos, nga makapasig-uli sa ilang relasyon uban kaniya. (Oseas 1:3, 4; 2:16, 23; 6:1-3; 14:4) Dili ka ba matandog sa dihang mamatikdan nimo ang pagmahal ni Jehova? Pangutan-a ang imong kaugalingon, ‘Kon si Jehova nagpakitag dakong pagmahal sa nangaging panahon, dili ba ako makapaneguro sa iyang gugma, sa iyang malumo, maunongon, way-pagkabalhin, ug dili-molubad nga pagmahal?’—Oseas 11:8.

¹⁸ Ang 12 ka matagnaong mga basahon makatabang usab kanimo sa pagsabot nga ang paghigugma sa Diyos mahimong naglakip ug pagtul-id. Gipasaligan ni Jehova ang iyang masalaypong katawhan nga siya ‘dili maglaglag kanila sa bug-os.’ (Amos 9:8) Sa dihang gikinahanglan ang pagsilot, ang Diyos wala magpugong sa pagsilot, apan makapahupay kaayo ang pagkahibalo nga ang iyang pagsilot maoy temporaryo lamang! Ang Malaquias 1:6 nagpanig-ingon kang Jehova sa usa ka mahigugmaong amahan. Nahibalo ka nga ang usa ka amahan mahimong magdisiplina sa iyang minahal nga mga anak aron matul-id sila. (Nahum 1:3; Hebreohanon 12:6) Bisan pa niana, tungod sa gugma, ang atong langitnong Amahan mahinay sa kasuko, ug ang Malaquias 3:10, 16 nagpamatuod nga siya madagayaong magaganti sa iyang mga alagad.

19. Nganong angay nimong susihon ang imong kaugalingon?

¹⁹ Ang basahon ni Malaquias gisugdan pinaagi sa pagpasalig: “‘Gihigugma ko kamo,’ miingon si Jehova.” (Malaquias 1:2) Sa dihang imong hinuktokan ang maong pagpasalig sa Diyos sa Israel, suknaa ang imong kaugalingon: ‘May ginabuhat ba ako nga mahimong makababag kanako sa pagkasinati sa gugma sa Diyos? Unsa ang mga bahin sa gugma sa Diyos nga buot nakong makat-onan ug masinati sa mas bug-os pa?’ Pinaagi sa bug-os pang pagsabot bahin sa gugma sa Diyos, ang imong pagsalig sa iyang walay-kataposang pagmahal mas modako.

ANG KAPASAYLOAN NAGBUKAS SA DALAN SA KALUWASAN

20. Sa unsang paagi ang pagpasaylo sa Diyos nagbukas sa dalan sa kaluwasan?

²⁰ Sa imong pagbasa niining matagnaong mga basahon, makamatikod ka nga may mga higayong si Jehova mitagna ug mga katalagman. Ngano? Kasagarang gihimo kadto sa pagdasig sa iyang katawhan nga maghinulsol. Sa pagpalampos sa maong katuyoan, iyang gitugotan ang mga langyaw sa paglaglag sa Samaria niadtong 740 W.K.P. ug sa Jerusalem niadtong 607 W.K.P. Ang gitagna sa Diyos natuman, apan sa ulahi iyang gitugotan ang mga naghinulsol nga mobalik sa ilang yuta. Gipasiugda gayod sa maong mga basahon nga ang Diyos maluluy-ong magpasaylo ug magpasig-uli niadtong motalikod sa sala ug moduol kaniya. (Habacuc 3:13; Sofonias 2:2, 3) Si Miqueas nadasig sa pagpatugbaw: “Kinsa ang usa ka Diyos nga sama kanimo, nga nagapasaylo sa kasaypanan ug nagapalabay lamang sa kalapasan sa nahibilin sa iyang panulondon? Siya dili magapabilin sa iyang kasuko hangtod sa kahangtoran, kay siya nahimuot sa mahigugmaong-kalulot.” (Miqueas 7:18; Joel 2:13; Zacarias 1:4) Ang pagkatuman sa tagna nagpamatuod niana.

21. (a) Unsay gipadayag sa 12 ka manalagna bahin sa Mesiyas? (b) Unsang mga tagna bahin sa Mesiyas ang makaiikag kanimo?

²¹ Bahin sa legal ug permanente nga pasikaranan alang sa malungtarong kapasayloan, gitagna ni Jehova ang pag-abot sa Mesiyas, kinsa maghalad sa iyang tawhanong kinabuhi ingong “katugbang nga lukat” alang sa makasasalang katawhan. (1 Timoteo 2:6) Gipunting ni Amos ang kapasig-ulian nga ipahinabo sa Mesiyas, ang anak ni David. (Amos 9:11, 12; Buhat 15:15-19) Gipaila pa gani ni Miqueas ang dapit-natawhan mismo ni Jesus, ang usa nga motungha uban sa nagahatag-ug-kinabuhing mga kaayohan alang sa tanan nga magbutang ug pagtuo sa Iyang halad. (Miqueas 5:2) Ug si Zacarias naghisgot bahin sa “Turok,” si Jesus, kinsa “molingkod ug magamando sa iyang trono.” (Zacarias 3:8; 6:12, 13; Lucas 1:32, 33) Walay duhaduha nga ang imong pagtuo mapalig-on pinaagi sa dugang pagsusi nianang mga tagnaa.—Tan-awa ang kahong “Dagkong mga Tagna Bahin sa Mesiyas.”

22. Sa unsang paagi mapalig-on ang imong pagsalig kang Jehova tungod sa gipadayag sa 12 ka manalagna bahin kaniya?

²² Sa dihang magbasa ka sa mga mensahe sa 12 ka manalagna, modako ang imong pagsalig sa kataposang kadaogan sa Diyos. Si Jehova ang atong Manlalaban, ug iyang ipatungha ang matuod nga hustisya. Ang pulong sa Diyos molungtad hangtod sa hangtod. Siya mahinumdom sa iyang mga kasabotan uban sa iyang katawhan, nagatagad sa iyang mga alagad, ug magluwas kanila gikan sa tanang tigdaogdaog. (Miqueas 7:8-10; Sofonias 2:6, 7) Si Jehova dili mausab. (Malaquias 3:6) Magmasaligon gayod kita sa pagkahibalo nga ang Diyos wala magsagubang ug kalisdanan o kababagan sa pagtuman sa iyang katuyoan! Sa dihang siya moingon nga ang iyang adlaw sa paghukom moabot, kini moabot gayod. Busa, padayong magbantay alang sa adlaw ni Jehova! “Si Jehova mahimong hari ibabaw sa tibuok yuta. Nianang adlawa usa lamang si Jehova, ug usa ra ang iyang ngalan.” (Zacarias 14:9) Kana iyang gitagna; kana iyang tumanon.