Kinabuhi ug Ministeryo ni Jesus

Si Jesus—ang Dugokan sa Kontrobersiya

TAPOS nga giabiabi siya sa balay ni Simon, misugod si Jesus sa iyang ikaduhang paglakbay sa pagmantala sa Galilea. Sa iyang unang paglakbay sa teritoryo, giubanan siya sa iyang unang mga disipulo, si Pedro, Andres, Santiago, ug Juan. Apan karon miuban kaniya ang 12 ka apostoles, ug pipila ka mga babaye. Lakip niini si Maria Magdalena, Susana, ug Joana, kansang bana maoy opisyal ni Haring Herodes.

Sa nagkaokupado ang ministeryo ni Jesus, nagkadako usab ang kontrobersiya mahitungod sa iyang kalihokan. Dihay usa ka tawong giyawaan, buta ug amang usab, nga gidala ngadto kang Jesus. Dihang giayo siya ni Jesus, ug wala na makontrolar sa yawa ug nakakita ug nakasulti na, naukay ang mga tawo. Sila miingon: “Mao na ba kaha kini siya ang anak ni David?”

Daghang tawo ang midugok sa balay nga giabtan ni Jesus nga tungod niana siya ug ang iyang mga disipulo dili na gani makakaon. Gawas pa niadtong nag-isip nga siya tingali ang gisaad nga “Anak ni David,” adunay mga eskriba ug mga Pariseo nga gikan sa Jerusalem aron pakaulawan siya. Dihang nakadungog ang mga paryente ni Jesus sa kagubot maylabot kang Jesus, ilang gikuha siya. Alang sa unsa nga katarongan?

Buweno, ang kaugalingong mga igsoon ni Jesus wala pa motuo nga siya Anak sa Diyos. Dugang pa, ang pagkaukay ug panagbangi nga iyang nahimo sa katilingban lahi kaayo sa Jesus nga ilang nakaila samtang nagdako pa sa Nazaret. Busa nagtuo sila nga may seryosong kadaot sa hunahuna ni Jesus. “Nabuang siya,” sila miingon, ug gusto nilang dakpon ug dalhon siya.

Apan tin-aw ang ebidensiya nga giayo ni Jesus ang tawong giyawaan. Ang mga eskriba ug mga Pariseo nahibalo nga dili sila makalimod sa pagkatinuod niini, ug sa ubang mga milagro ni Jesus. Busa aron maulawan si Jesus ilang gisultihan ang mga tawo: “Kining tawhana dili makapagulag yawa gawas kon pinaagi kang Beelzebub, ang punoan sa mga yawa.”

Nahibalo sa ilang kaisipan, gitawag ni Jesus ang mga eskriba ug mga Pariseo ngadto kaniya ug miingon: “Ang matag gingharian nga mabahin sa iyang kaugalingon malaglag, ug ang matag siyudad ug balay dili mobarog kon kini mabahin sa iyang kaugalingon. Sa samang paagi, kon si Satanas mao man ang nagapagula kang Satanas, nabahin diay siya batok sa iyang kaugalingon; nan, unsaon pa man sa pagbarog sa iyang gingharian?”

Unsa ka makapapukan nga pangatarongan! Sanglit nangangkon ang mga Pariseo nga nakapagulag mga demonyo ang ilang mga kauban, si Jesus nangutana usab: “Kon pinaagi man diay kang Beelzebub nakapagula akog mga yawa, pinaagi ba kang kinsa ang inyong anak nagapagula kanila?” Sa laing pagkasulti, ang ilang akusasyon batok kang Jesus aplikado usab kanila sama sa ilang pag-aplikar nila niini diha kaniya. Dayon mipasidaan si Jesus: “Apan kon pinaagi man sa espiritu sa Diyos ginapagula ko ang mga yawa, ang gingharian sa Diyos nahidangat na diay diha kaninyo.”

Sa pag-ilustrar nga ang iyang pagpagula ug mga yawa maoy ebidensiya sa iyang gahom batok kang Satanas, si Jesus miingon: “Unsaon man sa usa ka tawo sa pagsulod sa balay sa usa ka kusgan ug sa pag-agaw sa mga kabtangan niini, gawas kon iya unang gaposon ang kusgan? Ug niana makahimo na siya sa pagpangawat sa iyang balay. Ang dili dapig kanako batok kanako, ug siya nga dili magapanghipos uban kanako nagapatibulaag.” Dayag nga batok ang Pariseo kang Jesus, nagpakita sa ilang kaugalingon nga mga ahente ni Satanas. Ilang gipatibulaag ang mga Israelitas gikan kaniya.

Busa, nagpasidaan si Jesus batok niining satanasnong mga magsusupak nga “ang magapanamastamas batok sa balaang espiritu dili gayod pasayloon.” Siya mibatbat: “Ang bisan kinsa nga magasultig batok sa Anak sa tawo, siya mapasaylo; apan bisan kinsa nga magasultig batok sa balaang espiritu, dili gayod siya pasayloon, bisan niining panahona karon o niadtong panahon nga palaabuton.” Kadtong mga eskriba ug mga Pariseo nakahimo nianang dili-mapasaylong sala pinaagi sa madinaotong pagsidungong kang Satanas sa butang nga tin-awng usa ka milagrosong paglihok sa balaang espiritu sa Diyos.Mateo 12:22-32; Marcos 3:19-30; Juan 7:5.

◆ Sa unsang paagi lahi ang ikaduhang paglakbay ni Jesus sa Galilea kay sa nahauna?

◆ Nganong misulay ang mga paryente ni Jesus sa pagdakop kaniya?

◆ Sa unsang paagi misulay ang mga Pariseo sa pagpakaulaw sa mga milagro ni Jesus, ug sa unsang paagi gitubag sila ni Jesus?

◆ Sad-an sa unsa ang mga Pariseo, ug ngano?