Mga Pangutana Gikan sa mga Magbabasa

◼ Aduna bay pipila ka dinihogang mga Kristohanon ang mabuhi latas sa “dakong kasakitan” aron sa pagpuyo sa yuta diha sa bag-ong kalibotan sa dili pa kuhaon ngadto sa langit?

Sa laktod, walay gipahayag ang Bibliya.

Dugay nang interesado ang mga Kristohanon sa mga pribilehiyo nga ipaabot sa Diyos ngadto kanila. (Buhat 1:6) Kana ilabinang matuod sa atong panahon sukad nga natukod ang Gingharian. (Mateo 24:3, 24, 34) Duyog sa kataposan niining daotang sistema nga moabot sa ilang panahon, ang mga Kristohanon nahibulong kon ang ubang mga dinihogan mabuhi pa ba latas sa “gubat sa dakong adlaw sa Diyos” ug mag-alagad sa yuta sulod sa usa ka panahon sa dili pa makadawat sa ilang langitnong ganti. (Pinadayag 16:14) Walay giingon ang Bibliya kon mahitabo ba kini, apan adunay pipila ka sumbanan ug mga tagna nga nagpaila nga kini malagmit mahitabo. Inay kay magmadogmatiko, atong tan-awon kon unsaon sa pag-atiman sa Diyos ang mga butang.

Ang ubang mga hitabo sa Bibliya sa ulahi may mga katumbas diha sa katawhan sa Diyos. Pananglitan, kita nahibalo nga si Jonas diha sa tiyan sa usa ka dakong isda sa tulo ka adlaw ug tulo ka gabii. Isipon kana sa ubang mga tawo ingong yanong pananglitan sa pagluwas sa Diyos, apan si Jesus miingon nga kadto maoy usa ka matagnaong sumbanan kon sa unsang paagi siya mahaadto sa lubnganan sa igong panahon sa dili pa ang iyang pagkabanhaw. (Jonas 1:17; Mateo 12:40) Oo, ang naagoman ni Jonas matagnaon. Busa masabot, ang mga alagad sa Diyos nagtan-aw sa mga tagna ug sa espisipikong mga asoy sa Bibliya sa pagtino kon kini mopaila kon sa unsang paagi si Jehova unya makiglabot kanila.

Ingong pananglitan maylabot sa tagna sa Bibliya, ang The Watch Tower sa Disyembre 15, 1928, nagbatbat sa Miqueas 5:2-15. Ang basahon ni Miqueas naghisgot sa ‘mga Asiryanhon’ nga naglaglag sa Samaria ug sa pagbalik sa mga Hudiyo gikan sa pagkadestiyero sa Babilonya. (Miqueas 1:1, 5-7; 4:10) Apan kini nagpunting usab ngadto sa ulahing mga kaugmaran, sama sa pagkatawo sa Mesiyas sa Bethlehem. (Miqueas 5:2) Nanagna si Miqueas nga human sa ilang kaluwasan gikan “sa mga Asiryanhon,” “ang mga nahibilin ni Jacob” mahimong “sama sa hamog gikan kang Jehova” ug “sama sa usa ka liyon taliwala sa mga panon sa karnero.” (Miqueas 5:6-8) Ang The Watch Tower mikomento: “Kini mahimong dawaton ingong usa ka timailhan nga ang pipila sa mga mahibiling buhi pa sa yuta bisan human sa gubat sa Armageddon ug unya adunay buluhaton nga pagabuhaton diha sa ngalan sa Ginoo ug alang sa iyang pagdayeg ug himaya.” Matikdi ang makasaranganon, makataronganong pulong nga gamiton sa pagpailaila niini nga posibilidad: “Kini mahimong kuhaon ingong usa ka timailhan.”

Komosta ang usa ka asoy sa Bibliya nga mahimong katumbas sa maong pagkaluwas sa yuta? Ang usa ka pananglitan nga gipresentar naghisgot kang Noe ug sa iyang pamilya. Si Noe gilantaw nga naglarawan kang Jesus niining kataposang mga adlaw. (Genesis 6:8-10; Mateo 24:37) Sama nga nanguna si Noe sa iyang asawa ug sa tulo ka anak ug mga umagad latas sa kataposan niadtong karaang sistema, si Kristo manguna usab alang sa mga nahibilin sa iyang pangasaw-onon nga matang ug sa mahimong mga anak sa “Walay Kataposang Amahan,” si Jesus. Ang asawa ni Noe naluwas sa Lunop ug nakigbahin sa pagpabalik sa matuod nga pagsimba diha sa usa ka nahinloang yuta. Ang katumbas tingali mao ang kaluwasan ngadto sa bag-ong kalibotan sa nahibilin sa pangasaw-onon nga matang.—Isaias 9:6, 7; 2 Corinto 11:2; Pinadayag 21:2, 9.a

Ang ubang mga asoy sa Bibliya gilantaw usab ingong nagsugyot nga ang pipila sa mga dinihogan tingali mabuhi latas sa bag-ong kalibotan. Pananglitan, si Jeremias naluwas sa kalaglagan sa Jerusalem; “ang tawo” nga may sudlanan sa tinta sa magsusulat nahibilin sa pagkakita sa buluhaton sa paglaglag sa wala pa siya mobalik sa paghatag sa iyang taho.—Ezekiel 9:4, 8, 11.

Ang mga komento sa posibilidad nga adunay pipila ka dinihogan nga mabuhi latas sa bag-ong kalibotan gihimo nga may maayong mga tinguha ug sumala sa kahayag sa nag-unang mga panig-ingnan sa Bibliya sa pagsulay nga masabtan ang mga tagna o mga sumbanan nga adunay ulahing mga katumbas. Kon pananglit walay usa sa mga dinihogan ang mabilin sa yuta, walay katarongan nga mahigawad. Gidawat na nato nga ang mga butang sa Bibliya labi pang masabtan sa paglabay sa panahon. Pananglitan, ang The Watchtower sa Hulyo 15, 1981, naghisgot sa Miqueas 5:6-9 pag-usab ug nagpatin-aw nga “ang nahibilin sa espirituwal nga mga Israelinhon dili na maghulat hangtod matapos . . . ang Har-Mageddon aron mahimong sama sa ‘hamog’ nga nagapapresko sa mga tawo.” Kini nga paghisgot pag-usab nagtanyag sa posibilidad nga ang nahibilin tingali maluwas sa dakong gubat sa Diyos ug sa makadiyot lamang “magpadayon nga sama ka makapapresko sa hamog ngadto sa ‘dakong panon’ sa ‘ubang mga karnero.’” Hinuon, atong makita, nga ang paglabay sa panahon ug ang pag-uswag sa espirituwal nga kahayag makapadako ug makapausab sa atong pagsabot sa tagna o sa mga drama sa Bibliya.—Proverbio 4:18.

Kita nahibalo nga gilangkit sa Bibliya ang ‘pag-abot sa Anak sa tawo’ uban ‘sa pagpanigom sa mga pinili gikan sa upat ka hangin.’ (Mateo 24:29-31) Lain pa, sa panahon “sa presensiya sa Ginoo” diha sa pagmando sa Gingharian, ang mga dinihogang nangatulog sa kamatayon pagabanhawon ngadto sa kinabuhi sa langit. (1 Tesalonica 4:15, 16) Kining mga tinimrihan atua didto aron mahimong bahin sa asawa sa Kordero. Kanus-a kana mahitabo?

Diha sa basahon sa Pinadayag, human gilayon sa pag-asoy ni Juan bahin sa pagsilot sa Diyos sa relihiyosong bigaon, ang Dakong Babilonya, gihubit niya “ang kaminyoon sa Kordero.” Ang mahugaw, imoral nga “babaye” gikuha gikan sa talan-awon, ug atong makita “ang pangasaw-onon, ang asawa sa Kordero” ‘nga binistihan sa masidlak, putli, manipis nga lino, nga nagabarog alang sa matarong nga mga binuhatan sa mga balaan.’ (Pinadayag 18:10; 19:2, 7, 8; 21:9) Ang kalaglagan sa Dakong Babilonya maoy bahin sa dakong kasakitan. (Mateo 24:21; Pinadayag 7:4) Busa ikapangatarongan nga ang pipila sa pangasaw-onong matang mabuhi sa dakong kasakitan ingong ebidensiya sa pag-uyon ug proteksiyon ni Jehova. (Sofonias 2:3; itandi ang Mateo 24:22.) Kon sila pagaluwason dinhi sa yuta, sila magpabilin dinhi hangtod mopili ang Diyos sa pagkuha kanila ngadto sa langit.

Ugaling, ang presentasyon sa Pinadayag dili bug-os nga pagkasunodsunod. Ug dili kini ingon nga daw ang diyutay nga nahibilin sa mga dinihogan gikinahanglan aron masugdan ang bag-ong kalibotan, kay sila nakabansay na sa minilyong matinumanong mga Kristohanon kinsa mabuhing walay kataposan dinhi sa yuta. Busa, mahimong kuhaon sa Diyos ang iyang mga dinihogan ngadto sa langit dihadiha human sa kalaglagan sa Babilonyang Bantogan, sa pagpangandam alang sa “kaminyoon sa Kordero” nga pagahimoon. Busa tanang mga balaan makig-ambit uban kang Jesu-Kristo sa ‘paggahom sa kanasoran pinaagi sa olisi nga puthaw’ sa nahibilin sa dakong kasakitan. (Pinadayag 2:26, 27; 19:11-21) Kon kana ang paagi sa pag-atiman sa Diyos sa mga butang, ang tanang 144,000 moduyog kang Jesus sa ‘pagmando ingong mga hari uban kang Kristo sulod sa usa ka libo ka tuig.’—Pinadayag 20:4.

Maayo nga ang katawhan sa Diyos may dakong kaikag sa pagtan-aw kon sa unsang paagi iyang pagadumalahon ug gantihan ang iyang mga alagad. (Itandi ang 1 Pedro 1:12.) Kini nagpabanaag sa ilang pagsalig nga ang iyang kabubut-on matuman. Bisan pag kita dili ug kinahanglang dili magmadogmatiko bahin sa mga detalye, kita maikagong magapaabot kon unsay mahitabo.

[Footnote]