Alagara si Jehova nga Dili Pabalda

¹ “Malipayon ang katawhan kansang Diyos mao si Jehova!” (Sal. 144:15) Kini bang mga pulonga ni Haring David tinuod gihapon, bisan niining daotang mga adlaw? (Efe. 5:16) Oo! Ang mga Kristohanon nakakaplag gihapon ug kalipay sa pag-alagad kang Jehova. Ang mga butang dili kanunayng sayon alang kanato. Si Satanas nagapahinabo kanato ug mga kalisdanan sulod niining “makuyaw nga mga panahon,” apan wala kita magmasulob-on. ((2 Tim. 3:1, 2) Ang nagakasamot nga mga kahimtang maoy dugang pamatuod nga ang panahon haduol na alang sa Gingharian sa Diyos sa pagwagtang niining nagakaut-ot nga daang kalibotan ug pulihan kana sa usa ka mahinlo bag-ong kalibotan. (2 Ped. 3:13) Ang kangitngit niining kalibotana wala makapalong sa dilaab sa atong malipayong paglaom; hinunoa, ang atong paglaom sa Gingharian nagasidlak nga dugang pa gayong masanagon. Dili ba ikaw malipayon sa pag-alagad kang Jehova ingong nagasidlak niining mangiob nga kalibotan?​—Filip. 2:15.

² Ingong mga indibiduwal, kita kinahanglang padayong magbantay kon sa unsang paagi kita nagaalagad kang Jehova. Ngano man? Tungod kay si Satanas maoy usa ka dakong Tigbalda. Usa ka diksiyonaryo nagahubit sa “distract” (balda) ingong “pagpatipas,” “pagkuha o pagdala (sama sa pagtagad sa usa) ngadto sa usa ka laing butang o sa laing mga tumong sa samang panahon,” ug “pagpalihok o pagpalibog uban sa nagasumpaking mga emosyon o mga motibo.” Sukad sa pagkatambog dinhi sa yuta, si Satanas nagmalamposon sa “pagpahisalaag” sa katawhan. Siya nagagamit sa daghang laraw sa pagpaliso sa pagtagad sa tawo pahilayo sa matuod nga mga gumonhap sa atong adlaw. (Pin. 12:9) Bisan pag ang mga Saksi ni Jehova nanglimbasog sa ilang kaugalingon sa pagwali sa Gingharian sulod sa miaging usa ka gatos ka tuig, unsa man ka daghang tawo ang nagapabili sa hinungdanon-kaayong mga gumonhap sa pagbalaan sa ngalan sa Diyos ug sa pagbayaw sa iyang pagkasoberano pinaagi sa Gingharian sa Diyos? Kon itandi diyutay ra. (1 Juan 5:19) Kon si Satanas makabalda sa binilyon sa katawhan niining yutaa, ang karon-gayod nga kapeligrohan mao nga siya makabalda kanato o makasikop sa atong pagtagad aron nga kita makabiya sa pag-alagad kang Jehova. Makapasubo, ang pipila sa atong mga igsoon nalibog sa mga pagbalda ni Satanas. Ilang gitugotan ang ilang mga hunahuna nga madala ngadto sa laing mga direksiyon. Adunay tanang matang sa mga pagbalda karong adlawa. Tagda ang pipila lamang niana.

³ Ekonomikanhong mga Suliran ug Paghigugma sa Materyal nga mga Butang: Sa kadaghanang nasod sa yuta, ang pagkawaytrabaho ug ang hataas nga bili sa panginabuhi magapahinabog mga kabalaka. Matuod, kita kinahanglang magataganag pagkaon, panapot, ug puy-anan alang kanato ug sa atong mga panimalay. Apan kon tugotan nato ang atong kaugalingon nga sobrang mabalaka maylabot sa mga kinahanglanon sa kinabuhi, kining maong mga kabalaka magdominar sa atong panghunahuna. Ang atong pisikal nga paglungtad mahimong mao ang labing hinungdanong butang sa kinabuhi inay kay sa atong paghatag ug suportar sa gumonhap bahin sa Gingharian. Si apostol Pablo mihatag ug tambag niining bahina sa Hebreohanon 13:5, 6. Si Jesu-Kristo nagapasalig kanato nga kadtong nagapangita pag-una sa Gingharian dili angayng magmabalak-on; si Jehova magatagana kon unsa gayod ang atong gikinahanglan. (Mat. 6:25-34) Ang mga payunir ug ubang bug-os panahong mga alagad sa tibuok kalibotan makapamatuod nga kini tinuod.

⁴ Ang kalibotan ni Satanas nagapasiugda sa paghigugma sa materyal nga mga butang. Ang pagbaton ug dugang mga kabtangan o pagpanalipod niana mao ang nagatukmod nga puwersa diha sa mga kinabuhi sa minilyon. Ang samang mga pagbalda naglungtad sa mga adlaw ni Jesus. Usa ka dato batan-ong magmamando nangutana kang Jesus kon unsa ang kinahanglan niyang buhaton aron makapanunod sa walay kataposang kinabuhi. Si Jesus mitubag: “Kon buot mong mahingpit [o, makompleto], lakaw ibaligya ang imong mga gipanag-iya ug ipanghatag sa mga kabos ug makabaton ka ug bahandi sa langit, ug umari magmahimong akong sumusunod.” (Mat. 19:16-23) Dayag, nga ang iyang daghang materyal nga kabtangan nagbalda niining maong batan-ong tawo sa pag-alagad sa Diyos nga bug-os kalag. Ang iyang kasingkasing naliso ngadto sa iyang mga bahandi. Si Jesus nasayod nga ang batan-ong tawo makabenipisyo kon iyang haw-asan ang iyang kaugalingon niining maong mga kabaldahan. Kadto nagpugong kaniya sa pagkahimong kompleto sa iyang debosyon ngadto sa Diyos. Komusta na man ikaw? Imo bang nakaplagan ang kaugalingon nga nagagugol ug dugang panahon sa sekular nga trabaho aron lang mamentinar ang estilo sa kinabuhi nga imong naandan? Kini ba nakaapektar sa imong pag-alagad kang Jehova? Ang imo bang materyal nga mga kabtangan nagatuok sa intereses sa Gingharian? (Mat. 6:24) Imo bang mapayano ang imong kinabuhi aron makagugol ug dugang panahon sa espirituwal nga intereses?

⁵ Kasarangang mga Kalihokan sa Inadlawng Kinabuhi: Kon kita dili mag-amping, kita mahimong matugob kaayo sa kasarangang mga kalihokan sa kinabuhi nga kita mosugod na sa pagpasagad sa espirituwal nga mga pangagpas. Hinumdomi ang katawhan sa mga adlaw ni Noe. Sila puliki kaayo sa sosyal nga mga kalihokan, nagapangaon ug nagapanginom, nagapangasawa ug nagpaminyo sa ilang mga anak, nga wala sila magmatikod sa pasidaan ni Noe bahin sa umaabot nga Lunop. Una pa nila naamgohan kana, ang Baha miabot ug nagpapha kanilang tanan. Ang mga kabaldahan nagakahulogag kalaglagan alang kanila. Si Jesus miingon: “Mao man usab unya ang pagkaanaa sa Anak sa tawo.” (Mat. 24:37-39) Sa pagkamatuod, ang kadaghanang tawo karong adlawa nalinga kaayo sa ilang kaugalingong mga kinabuhi aron sa paghatag pagtagad sa nagapasidaan nga mensahe nga atong gidala ngadto kanila. Sila nagapakitag makapahinganghang kawalay pagtagad sa espirituwal nga mga butang.

⁶ Ang imo bang kinabuhi napuno kaayo sa sosyal nga mga kalihokan nga ang espirituwal nga mga butang nahatagan na ug nagakamenos nga pagtagad? Sa usa ka higayon, si Jesus gidapit nga mahimong usa ka bisita sa balay ni Marta ug Maria. Si Maria naminaw pag-ayo sa iyang isulti. Sa laing bahin, si Marta “nalinga sa pag-atiman sa daghang gimbuhaton.” Si Marta may hilabihang kahangawa bahin sa pagkahimong maayong tig-abiabi. Siya napakyas sa pagpabili sa panginahanglan sa paggahin ug panahon sa pagpamati kang Jesus. Si Jesus sa maluloton nagpatin-aw kang Marta nga ang daghang tagana dili kinahanglanon; ang dugang pagtagad angayng igahatag ngadto sa espirituwal nga mga butang. Ikaw ba kinahanglang magapadapat nianang tambaga? (Luc. 10:38-42) Si Jesus nagpasidaan usab nga kinahanglang hatagan natog pagtagad ang atong kaugalingon aron nga dili kita maghinobra sa pagkaon ug pag-inom, nga nagahabol sa atong panimuot. Niining makuyaw nga takna sa tawhanong kasaysayan, kinahanglang kita bug-os nga magmaalisto.​—Luc. 21:34-36.

⁷ Pangagpas sa mga Lulinghayaw: Usa sa mga labing dakong pagbalda nga gigamit sa Yawa sa pagpahilayo sa pagtagad gikan sa gumonhap sa Gingharian mao ang pangagpas sa lulinghayaw. Minilyon sa Kakristiyanohan nagbutang sa lulinghayaw puli sa Diyos. Ilang gipalabi nga mahimuot sa pipila ka lingawlingaw inay kay sa pagbaton ug seryosong interes sa Pulong sa Diyos. (2 Tim. 3:4) Hinuon, ang makaayong kalingawan ug lulinghayaw dili man sayop sa iyang kaugalingon. Apan ang paggugol ug sobrang panahon kada semana nianang mga butanga sama sa telebisyon, mga sine, videos, isports, sekular nga pagbasa, o mga lingawlingaw mahimong magtugot sa pag-ugmad ug malimbongong kasingkasing ug magbitad kanato pahilayo kang Jehova. (Jer. 17:9; Heb. 3:12) Sa unsang paagi kana mahitabo? Sa panahon sa Kristohanong mga tigom, imong makaplagan nga ang imong hunahuna nagalatagaw; mahimo ganing tinguhaon nimong matapos na ang tigom aron ikaw makabalik sa pagpangagpas sa mga lulinghayaw. Sa dili madugay, makaplagan nimo ang imong kaugalingon nga nagapangitag mga katarongan sa pagpabilin sa balay inay kay sa pagtambong sa mga tigom o pakig-ambit sa pag-alagad sa kanataran. Karon na ang panahon sa pagtino gayod kon kini bang mga pangagpasa nahimong mga pagbalda sa imong kinabuhi. (Luc. 8:14) Dili kaha mas maayong magamit ang pipila sa bililhong mga oras nga nagugol sa kalingawan alang sa espirituwal nga kaugmaran?

⁸ Nagahurot-Panahong Di-hinungdanong mga Isyu: Ang pipila nagmapuliki diha sa mga paningkamot sa pagsulbad sa kasagarang mga suliran sa modernong sosyedad. Ang mga Kristohanon kinahanglang maglikay sa way-kataposang mga lantugi sa kalibotan bahin sa sosyal nga mga gumonhap o sa way-kapuslanang mga pakigbisog niini sa pagtul-id sa mga inhustisya. (Juan 17:16) Kining tanan maoy bahin sa desinyo ni Satanas sa pagpatipas sa pagtagad gikan sa tambag sa Bibliya ug sa pasukaranang kamatuoran nga may usa lamang ka malungtarong kasulbaran​—ang Gingharian sa Diyos. Kon kita nag-antos ug personal nga kadaot o inhustisya, kita kinahanglang magbantay batok sa pagkahimong masamok kaayo sa emosyonal o mapanimaslon nga malimtan nato kon kinsa kita​—Mga Saksi ni Jehova. Labaw sa tanan, si Jehova mao ang gipakasad-an, ug ang iyang ngalan mao ang kinahanglan natong balaanon.​—Isa. 43:10-12; Mat. 6:9.

⁹ Samtang ang matag usa gustong magamentinar ug usa ka sukod sa maayong panglawas, ang paghatag ug hilabihang pagtagad sa maorag way-kataposang mga teoriya ug mga kahupayan nga gitanyag makapapuliki sa usa diha sa mga butang sa panglawas. Adunay daghang tawo nga nagapasiugdag nagkadaiya kaayong mga diyeta, mga paggalam sa sakit, ug mga panambal alang sa pisikal ug emosyonal nga mga suliran, nga daghan niana nagakasumpakiay sa usag usa. Kon unsa ang gibuhat sa usa maylabot sa panglawas maoy usa ka personal nga desisyon, apan ayawg tugoti nga ang imong panahon ug pagtagad mahurot pag-ayo nianang mga pangagpasa nga kana makapabugnaw sa imong kasibot sa pagsangyaw sa Gingharian sa Diyos ingong ang matuod nga kahupayan sa mga balatian sa katawhan.​—Isa. 33:24; Pin. 21:3, 4.

¹⁰ Magmalig-on, Di-matarog: Samtang ang kataposan nagakahiduol na, si Satanas magapakusog sa iyang mga paningkamot sa pagbalda kanimo gikan sa imong pag-alagad kang Jehova. “Bumarog kamo batok kaniya, nga lig-on diha sa pagtuo.” (1 Ped. 5:9) Sa unsang paagi? Kinahanglan imong pakan-on ang imong kaugalingon sa mga panghunahuna sa Diyos. (Mat. 4:4) Ayawg tugoti ang mga kabaldahan sa kalibotan sa pagkawat kanimo ug sa imong pamilya sa panahon nga imong gikinahanglan sa pagpamalandong ug paghinuktok nga mahilomon sa Pulong sa Diyos. Sa mga pagpangaon sa pamilya, duyog nga hisgoti ang makapalig-ong mga kasinatian ug uban pang espirituwal nga mga butang. Pagtapot ngadto sa usa ka mapinadayonong eskedyol sa personal nga pagtuon ug pagpangandam alang sa mga tigom.

¹¹ Sa dihang ang mga kabalaka nagahulga sa pagpasamok sa imong hunahuna, itugyan kang Jehova ang imong palas-anon diha sa pag-ampo. Salig nga siya magaatiman kanimo. (1 Ped. 5:7) Tugoting ang kalinaw sa Diyos magabantay sa imong kasingkasing ug mga gahom sa panghunahuna. (Filip. 4:6, 7) Ayawg tugoti ang mga kabaldahan sa pagpahanap sa imong espirituwal nga panan-aw. Ibutang kanunay si Jehova sa imong atubangan, sama sa gibuhat ni Jesus. (Buh. 2:25) Hupting nagatumong kanunay ang imong panan-aw nga diretso sa unahan sa imong tumong, ingon sa ginaawhag kanato sa Proverbio 4:25-27: “Itutok ang pagtan-aw sa imong mga mata sa unahan, ug itutok ang imong tabontabon sa atubangan nimo. Pataga ang alagianan sa imong tiil, ug tukora sa matul-id gayod ang tanan mong mga dalan. Ayaw pagliso sa tuo mong kamot ni sa wala.”

¹² Sa pagkamatinumanon tambong sa tanang tigom, ug disiplinaha ang imong kaugalingon aron ikaw magahatag ug pagtagad sa instruksiyon gikan sa Pulong sa Diyos. (Heb. 2:1; 10:24, 25) Ug inay nga mangagpas sa mga lulinghayaw nga gitanyag niining nagakaunlod nga kalibotan, himoang imong tumong sa pagmentinar ug usa ka mabungahong ministeryo. Kini mao ang makapahinabog malungtarong kalipay ug katagbawan. (1 Tes. 2:19, 20) Sa kataposan, ayawg tugoti ang bisan unsang butang o bisan kinsa sa pagbalda kanimo gikan sa imong sagradong pag-alagad. “Magmalig-on, dili-matarog, nga kanunay may daghang buhaton diha sa buluhaton sa Ginoo, nga nahibalo nga ang inyong kahago dili kawang may kalabotan sa Ginoo.”​—1 Cor. 15:58.