Ang Semana nga Nag-usab sa Kalibotan

“Dalayegon siya nga nagaanhi sa ngalan ni Jehova!”​—MATEO 21:9.

1. Unsang duha ka magkaatbang nga pundok ang apektado sa mga panghitabo sa miaging Agosto?

“TULO KA MAKAPAGUOL KAAYONG MGA ADLAW NGA MIUYOG SA KALIBOTAN.” Sa Agosto 1991, ang mga ulohan sa peryodiko nga sama niini mipasiugda sa kamatuoran nga ang kalibotan magkaguliyang kaayo sa pila lang ka adlaw. Sa tinuoray, ang kataposang mga adlaw sa Agosto labing halandumon dili lamang alang sa kalibotan apan alang usab sa usa ka pundok nga mahitungod kanila si Jesus miingon: “Sila dili bahin sa kalibotan.” Ang maong pundok nailhan karon nga mga Saksi ni Jehova.​—Juan 17:14.

2, 3. (a) Sa unsang paagi gipasiugda ang kagawasan didto sa Zagreb bisan pa sa dag-om sa gubat? (b) Sa unsang paagi ang lig-ong pagtuo gigantihan sa Odessa?

² Ang unang internasyonal nga kombensiyon sa mga Saksi ni Jehova nga sukad naplano alang sa Yugoslavia naeskedyul sa Agosto 16 hangtod 18. Sumala sa misangpot, kadto usab ang una dakong kombensiyon sa katawhan ni Jehova diha sa usa ka nasod nga naa sa ngilit sa gubat sibil. Ang lokal nga mga Saksi, kauban sa mga boluntaryo gikan sa kasikbit nga mga nasod, naghago sa duha ka bulan aron mahatagan ang HAŠK Gradanski saker estadyum sa Zagreb sa bug-os bag-ong dagway. Kadto labihan ka limpiyo, labing maayong dapit alang sa “Mga Mahigugmaon sa Diyosnong Kagawasan” nga Kombensiyon. Libolibong internasyonal nga mga delegado nagplano sa pagtambong, apil ang 600 gikan sa Tinipong Bansa. Samtang ang dag-om sa gubat sibil mabaharon, mikaylap ang balita: “Dili gayod manganhi ang mga Amerikano.” Apan sila nangabot gayod, kuyog sa mga delegado gikan sa daghan ubang kanasoran. Ang tumatambong nga 10,000 gidahom, apan 14,684 didto sa estadyum sa kataposang adlaw! Ang tanan gipanalanginan sa tugob kay sila wala ‘magbiya sa panagkatigom sa ilang kaugalingon.’​—Hebreohanon 10:25.

³ Sulod sa tulo ka adlaw tapos sa kombensiyon sa Zagreb, gihimo ang wala-molampos nga pagrebelde sa Unyon Sobyet. Niadtong panahona, ang mga mahigugmaon sa diyosnong kagawasan naghimog panapos nga mga pangandam alang sa ilang kombensiyon sa Odessa sa Ukraine. Madayon kaha ang kombensiyon? Uban ang lig-ong pagtuo gihatag sa mga igsoon ang panapos nga mga trabaho alang sa kompletong pagbag-o sa estadyum, ug ang mga delegado nagpadayon sa pagpangabot. Samag usa ka milagro, ang pagrebelde natapos. Ang makapahimuot nga kombensiyon gihimo sa Agosto 24, 25, nga may 12,115 nga mitambong ug 1,943​—16 porsiento sa kinatas-ang ihap sa tumatambong​—nga gibawtismohan! Kining bag-ong mga Saksi, kauban sa karaang mga maghuhupot sa integridad, nalipay nga sila nanambong sa maong kombensiyon uban ang bug-os nga pagsalig diha kang Jehova.​—Proverbio 3:5, 6.

4. Ang mga Saksi sa Silangang Uropa nagsunod sa unsang sumbanan nga gihatag ni Jesus?

⁴ Kining matinumanong mga Saksi nagsunod sa sumbanan nga gihatag sa atong Sulundan, si Jesu-Kristo. Siya wala gayod magpasagad sa pagtambong sa mga piyesta nga gisugo ni Jehova, bisan pag ang mga Hudiyo nagtinguha sa pagpatay kaniya. Samtang siya mitungas sa Jerusalem alang sa iyang kataposang Paskuwa, sila nanagtindog palibot sa templo, nga nangutana: “Unsa ang inyong hunahuna? Nga siya dili gayod moanhi sa piyesta?” (Juan 11:56) Apan siya miadto gayod! Kadto nag-andam sa dalan alang sa usa ka semana nga midangat sa tayuktok sa pagkabali sa dagan sa kasaysayan sa tawo. Angay ba nga sublion nato karon ang pila ka talagsaong panghitabo niadtong semanaha​—Nisan 8 hangtod 14 sa Hudiyong kalendaryo?

Nisan 8

5. Unsay nahibaloan ni Jesus samtang siya mipanaw paingon sa Betania sa Nisan 8, 33 K.P.?

⁵ Niadtong adlawa si Jesus ug iyang mga tinun-an miabot sa Betania. Didto, si Jesus mogugol ug unom ka gabii diha sa balay sa minahal niyang higala si Lasaro, kinsa bag-o pa niyang gibanhaw gikan sa mga patay. Ang Betania duol ra sa Jerusalem. Sa pribado, si Jesus nagpahibalo na sa iyang mga tinun-an: “Tan-awa! Kita mangadto sa Jerusalem, ug ang Anak sa tawo igatugyan ngadto sa mga pangulong saserdote ug sa mga eskriba, ug ilang pagahukman siya sa kamatayon, ug igatugyan siya ngadto sa mga tawo sa kanasoran aron biaybiayon ug hampakon ug ilansang, ug sa ikatulong adlaw siya pagabanhawon.” (Mateo 20:18, 19) Nahibalo gayod si Jesus nga kinahanglan nga moatubang siya karon sa masakit nga mga pagsulay. Bisan pa niana, sa nagsingabot kanang panahon sa kinalabwan nga pagsulay, nanlimbasog gayod siya sa pag-alagad sa iyang mga igsoon. Hinaot nga kita sa kanunay magbaton “niini nga tinamdan sa hunahuna . . . nga diha usab kang Kristo Jesus.”​—Filipos 2:1-5; 1 Juan 3:16.

Nisan 9

6. Sa gabii sa Nisan 9, unsay gihimo ni Maria, ug unsay gisulti ni Jesus kang Judas?

⁶ Tapos sa pagsalop sa adlaw, sa misugod ang Nisan 9, si Jesus nagkalipay sa pagkaon diha sa balay sa kanhi sanlahon nga si Simon. Maoy didto nga ang igsoong babaye ni Lasaro nga si Maria mibubog humot nga lana diha sa ulo ug sa mga tiil ni Jesus ug sa kamapaubsanon gitrapohan ang iyang mga tiil sa iyang buhok. Sa misupak si Judas, si Jesus miingon: “Pasagdi lang siya, aron siya makatuman niini nga pagsaulog alang sa adlaw sa paglubong kanako.” Sa pagkadungog nga daghang Hudiyo ang mangadto sa Betania ug managpanuo kang Jesus, ang pangulong mga saserdote nagsabotsabot sa pagpatay kaniya ug kang Lasaro.​—Juan 12:1-7.

7. Sa buntag sa Nisan 9, sa unsang paagi gipasidunggan ang ngalan ni Jehova, ug unsay gitagna ni Jesus?

⁷ Sayo sa buntag, si Jesus misugod sa iyang panaw paingon sa Jerusalem. Panonpanon sa mga tawo nanggula aron sa pagsugat kaniya, nga nagpakayabkayab sa mga sanga sa palmera ug naninggit: “Luwasa kami, nangamuyo kami kanimo! Dalayegon siya nga nagaanhi sa ngalan ni Jehova, bisan ang hari sa Israel!” Unya gituman ni Jesus ang tagna sa Zacarias 9:9 pinaagi sa pagpaingon sa siyudad nga nagsakay ug asno. Sa nagsingabot siya sa Jerusalem, siya mihilak tungod niini, nga mitagna nga liyokan kinig talinis nga mga ugsok ug gub-on kini sa mga Romano​—usa ka tagna nga magbaton ug talagsaong katumanan 37 ka tuig sa ulahi. (Kini timailhan usab sa kadaot alang sa Kakristiyanohan, nga nahimong apostata sama sa panig-ingnan sa karaang Jerusalem.) Ang Hudiyong mga magmamando dili buot nga si Jesus mao ang ilang hari. Sa kasuko sila mipatugbaw: “Tan-awa! Ang kalibotan nagsunod na kaniya.”​—Juan 12:13, 19.

Nisan 10

8. Sa Nisan 10, giunsa pagpakita ni Jesus ang halalom nga pagtahod alang sa balay sa pag-ampo ni Jehova, ug unsay misunod?

⁸ Si Jesus miduaw na usab sa templo. Sa ikaduhang panahon, iyang giabog ang hakog nga mga magpapatigayon ug mga tig-ilis ug kuwarta. Ang komersiyalismo​—“ang gugma sa salapi”​—dili angay nga magagahom diha sa balay sa pag-ampo ni Jehova! (1 Timoteo 6:9, 10) Si Jesus hapit nang mamatay. Siya naghisgot bahin sa pagtisok ug liso sa pag-ilustrar niini. Ang orihinal nga liso mamatay, apan kini moturok nga magpatubo ug usa ka punoan nga mamungag daghang uhay. Sa susama, ang kamatayon ni Jesus mosangpot sa kinabuhing walay kataposan alang sa kapid-ang mga tawo nga motuo kaniya. Kay naguol sa pagpalandong sa iyang nagsingabot nga kamatayon, si Jesus miampo nga pinaagi niana pagahimayaon ang ngalan sa iyang Amahan. Ingong tubag, ang tingog sa Diyos midahunog gikan sa langit nga ang tanan nga diha nakadungog: “Gihimaya ko na kini ug pagahimayaon ko kini pag-usab.”​—Juan 12:27, 28.

Nisan 11​—Usa ka Adlaw sa Buluhaton

9. (a) Sayo sa adlaw sa Nisan 11, giunsa paggamit ni Jesus ang mga ilustrasyon sa paghukom sa apostatang mga Hudiyo? (b) Sumala sa sambingay ni Jesus, kinsay nawad-an ug talagsaong higayon?

⁹ Si Jesus ug iyang mga tinun-an mibiya na usab sa Betania alang sa bug-os adlaw nga buluhaton. Si Jesus migamit ug tulo ka ilustrasyon sa pagpakita nganong ang apostatang Kahudiyohan gihukman. Gitunglo niya ang usa ka dili-mabungahon nga kahoyng igira, ug ang niadto laya nga kahimtang niana naghulagway sa walay-pagtuo, dili-mabungahong Hudiyong nasod. Sa pagsulod sa templo, gibatbat niya sa unsang paagi ang dili-takos nga mga tig-atiman sa kaparrasan sa usa ka agalon sa kataposan mipatay bisan sa anak ug manununod sa agalon​—nga naghulagway sa pagtalikod sa mga Hudiyo sa gisalig kanila ni Jehova, nga midangat sa tayuktok pinaagi sa ilang pagpatay kang Jesus. Iyang gibatbat ang usa ka kombira sa kasal nga gihikay sa usa ka hari​—si Jehova—​kansang dinapit nga mga bisita (mga Hudiyo) sa pagkamahakogon namalibad sa pagtambong. Busa, ang pagdapit gipaabot sa mga tagagawas​—mga Hentil—​nga pipila kanila misanong. Apan ang usa ka tawong hikaplagan nga wala magsul-ob ug biste sa kasal pagawson. Siya naghawas sa mini nga mga Kristohanon sa Kakristiyanohan. Daghang Hudiyo sa adlaw ni Jesus ang gidapit “apan diyutay ra ang napili” aron mahiapil sa 144,000 tinimrihan nga magapanunod sa langitnong Gingharian.​—Mateo 22:14; Pinadayag 7:4.

10-12. (a) Nganong gisaway ni Jesus ang Hudiyong klero, ug unsang masakit nga pagsaway ang iyang gipahamtang sa maong mga maot? (b) Sa unsang paagi ang hukom sa kataposan napatuman diha sa apostatang Kahudiyohan?

¹⁰ Ang salingkapawng Hudiyong klero nangitag higayon sa pagdakop kang Jesus, apan gitubag niya ang ubay-ubay nilang bitik nga mga pangutana ug gilibog sila atubangan sa katawhan. Ay, kadtong maalsahong relihiyosong mga Hudiyo! Prangka kaayo ang pagsaway kanila ni Jesus! Gitinguha nila ang pagkainila, linaing biste, ug dungganong mga titulo, sama sa “Rabbi” ug “Amahan,” sama sa daghang klerigo sa atong adlaw. Gipahayag ni Jesus ang lagda: “Si bisan kinsa nga magabayaw sa iyang kaugalingon pagapaubson, ug si bisan kinsa nga magapaubos sa iyang kaugalingon pagabayawon.”​—Mateo 23:12.

¹¹ Si Jesus mahaitong nagsaway niadtong relihiyosong mga pangulo. Sa makapito siya mipatugbaw: “Alaot kamo!” nga nagtawag kanila nga mga buta nga giya ug mga maot. Ug sa matag panahon siya mihatag ug tin-awng hinungdan sa pagsaway. Gibabagan nila ang ganghaan sa Gingharian sa mga langit. Sa dihang sila makakabig ug usa ka tawo, siya mahimong duha ka pilo nga angayan sa Gehenna, nga lagmit nahalinya na sa kalaglagan tungod sa nangaging dakong sala o pagkapanatiko. “Mga kuwanggol ug mga buta!” mipahayag si Jesus, kay ang tumong sa mga Pariseo maoy bulawan sa templo inay sa pagpadayon sa putling pagsimba didto. Wala sila magpakabana sa hustisya, kaluoy, ug pagkamaunongon samtang sila nagabayad sa ikapulo alang sa tilinguhaong yerbabuyna, anis, ug sa komino, apan wala magtagad sa bug-at pang mga butang sa Kasugoan. Ang rituwal nga pagpanghugas dili gayod magwagtang sa ilang kahugawan sa kahiladman​—ang kasingkasing lang nga nahinloan pinaagi sa pagtuo diha sa nagsingabot nga halad ni Jesus ang makahimo niana. Ang ilang pagkasalingkapaw sa kahiladman ug pagkamalapason nanghimakak sa bisan unsang “pinaputi” gawas nga dagway.​—Mateo 23:13-29.

¹² Oo, pagkaalaot gayod ang mga Pariseo, nga tinuod nga “mga anak niadtong nagpatay sa mga propeta” sa kakaraanan! Mga bitin, mga anak sa malala nga mga halas sila, nga nahukman sa Gehenna, kay sila magapatay dili lang kang Jesus kondili kadto usab nga iyang igapadala. Kini usa ka paghukom nga ipatuman “niining kaliwatana.” Ingong katumanan, ang Jerusalem bug-os nalaglag 37 ka tuig sa ulahi.​—Mateo 23:30-36.

13. Ang mga gipamulong ni Jesus bahin sa mga amot sa templo gibanaag diha sa unsang mga kahimtang karong adlawa?

¹³ Una mopahawa sa templo, si Jesus nagdayeg sa usa ka kabos babayeng balo nga mihulog ug duha ka diyot sa panudlanan sa salapi​—“ang tanan niya nga kabuhian.” Kaatbang gayod sa hakog nga tawong dato, si kinsa mihulog sa pakita-sa-tawo nga amot! Sama niadtong kabos babayeng balo, ang mga Saksi ni Jehova karong adlawa kinabubut-ong nagasakripisyo sa panahon, kusog, ug salapi aron sa pagsuportar ug pagpauswag sa tibuok-kalibotang buluhaton sa Gingharian. Pagkalahi gikan niadtong imoral nga mga magwawali sa TV nga nagatikas sa ilang mga panon ug nagatukod ug daghan kaayong personal nga katigayonan!​—Lucas 20:45–21:4.

Samtang Talitapos na ang Nisan 11

14. Unsang kasubo ang gipahayag ni Jesus, ug giunsa niya pagtubag ang dugang pagsukitsukit sa iyang mga tinun-an?

¹⁴ Gihilakan ni Jesus ang Jerusalem ug ang iyang katawhan ug nagpahayag: “Dili na kamo makakita kanako sukad karon hangtod nga kamo magaingon, ‘Dalayegon siya nga nagaanhi sa ngalan ni Jehova!’” (Mateo 23:37-39) Sa ulahi, samtang nanaglingkod sila sa Bukid sa mga Olibo, ang suod nga mga tinun-an ni Jesus nangutana bahin niini, ug ingong tubag gibatbat ni Jesus ang ilhanan nga magatimaan sa iyang presensiya diha sa gahom sa Gingharian ug sa konklusyon sa daotang sistema sa mga butang ni Satanas.​—Mateo 24:1–25:46; Marcos 13:1-37; Lucas 21:5-36.

15. Unsang ilhanan ang gihatag ni Jesus mahitungod sa iyang presensiya alang sa paghukom, ug sukad kanus-a kini ginatuman?

¹⁵ Sa pagtumong sa paghukom ni Jehova nga hapit nang ipatuman diha sa templo, gipasabot ni Jesus nga kini naghulagway sa umaabot nga mga panglaglag sa konklusyon sa tibuok sistema sa mga butang. Ang maong panahon sa iyang presensiya pagatiman-an sa pagsilaob sa gubat sa way-ingon nga gidak-on, ingon man sa mga kagutmanan, mga linog, ug mga kamatay, uban ang kawalay-gugma ug kamalapason. Kini tinuod nangatuman sa atong ika-20ng siglo nga kalibotan sukad 1914!

16, 17. Unsang mga panghitabo sa kalibotan ang gibatbat ni Jesus, ug unsay angay nga pagsanong sa mga Kristohanon sa tagna?

¹⁶ Moabot ang tayuktok diha sa “dakong kasakitan nga wala pa sukad mahitabo sukad sa sinugdanan sa kalibotan hangtod karon, wala, ni mahitabo pa kini pag-usab.” Sanglit kini unya malaglagon sama sa Lunop sa adlaw ni Noe, si Jesus nagpasidaan batok sa pagtumong sa hunahuna nganha sa kalibotanong mga pangagpas. “Busa, magpadayon kamo sa pagbantay, kay kamo wala mahibalo unsang adlawa moabot ang inyong Ginoo.” Pagkamalipayon nato nga ang Agalon nagtudlo sa dinihogang “matinumanon ug maalamong ulipon” aron ipahayag ang pasidaan ug itagana ang dagaya espirituwal nga pagkaon alang niining adlawa sa iyang presensiya!​—Mateo 24:21, 42, 45-47.

¹⁷ Sa atong ika-20ng siglo, atong nakita “diha sa yuta ang kagul-anan sa mga nasod, kay wala mahibalo sa lutsanan . . . samtang ang mga tawo panguyapan tungod sa kahadlok ug sa pagpaabot sa mga butang mahitabo sa gipuy-ang yuta.” Apan si Jesus nagtug-an kanato: “Inigsugod sa pagkahitabo niining mga butanga, bumarog kamo nga tul-id ug ihangad ang inyong mga ulo, tungod kay haduol na ang inyong kaluwasan.” Ug siya nagpasidaan kanato: “Bantayi ninyo ang inyong kaugalingon nga ang inyong mga kasingkasing dili gayod mabug-atan sa hinobrang pagkaon ug hinobrang pag-inom ug sa mga kabalaka sa kinabuhi, ug sa kalit modangat kaninyo ang maong adlaw sama sa usa ka lit-ag.” Pinaagi lamang sa pagpadayong nagmata nga kita makabarog nga inuyonan atubangan ni Jesus, “ang Anak sa tawo,” sa iyang presensiya.​—Lucas 21:25-28, 34-36.

18. Unsang pagdasig ang atong makuha gikan sa mga ilustrasyon ni Jesus sa napulo ka ulay ug sa mga talanton?

¹⁸ Aron sa pagtapos sa iyang hanas nga paghulagway sa mga panghitabo karong adlawa, gihatag ni Jesus ang tulo ka ilustrasyon. Nahauna, sa sambingay sa napulo ka ulay, iyang gipasiugda na usab ang panginahanglan nga “magpadayon sa pagbantay.” Dayon, sa ilustrasyon sa mga ulipon ug sa mga talanton, iyang gipakita nga ang pagkamakugihon gantihan sa pagdapit nga ‘mosulod sa kalipay sa Agalon.’ Ang dinihogang mga Kristohanon, kinsa gilandongan diha sa maong sambingay, ingon man ang ubang mga karnero makakuhag dakong pagdasig gikan niining tin-awng mga kabatbatan.​—Mateo 25:1-30.

19, 20. Unsang makapahimuot modernong-adlawng relasyon ang gipaila diha sa ilustrasyon ni Jesus sa mga karnero ug sa mga kanding?

¹⁹ Ang ikatulong ilustrasyon nagatumong sa presensiya ni Jesus nga may gahom sa Gingharian inig-abot niya aron molingkod diha sa iyang mahimayaong trono sa langit. Panahon na kini sa paghukom sa mga nasod ug sa pagbahinbahin sa mga katawhan sa yuta ngadto sa duha ka pundok, ang usa nalangkoban sa maaghop samag-karnerong mga tawo ug ang lain, sa gahig-ulo samag mga kanding. Ang mga karnero nagahimog ekstrang paningkamot sa pagpakita nga sila nagapaluyo sa mga igsoon sa Hari​—ang nahibiling mga dinihogan sa yuta ning panahon sa kataposan sa kalibotan. Ang maong mga karnero gantihan ug kinabuhi, samtang ang dili-mapabilhong mga kanding mangadto sa walay-kataposang kalaglagan.​—Mateo 25:31-46.

²⁰ Kahibulongan gayod nga relasyon ang atong makita tali sa ubang mga karnero ug sa mga igsoon sa Hari niining konklusyon sa sistema sa mga butang! Bisan tuod dinihogang nahibilin ang nagpas-an sa lulan sa kaakohan sa buluhaton sa sinugdanan sa presensiya sa Hari, minilyong masibotong ubang mga karnero karon maoy naglangkob sa 99.8 porsiento sa mga alagad sa Diyos sa yuta. (Juan 10:16) Ug sila usab nagpakita nga sila andam nga moantos sa ‘kagutmanan, kauhaw, kahubo, sakit, ug bilanggoan’ ingong mga kauban sa mga naghupot-sa-integridad nga dinihogan.a

Nisan 12

21. Unsay nagpadayon niadtong Nisan 12, ug sa unsang paagi?

²¹ Ang sabotsabot nga patyon si Jesus nagpadayon. Giduaw ni Judas ang pangulong mga saserdote sa templo, nga misugot nga budhian si Jesus baylo sa 30 ka salapi. Bisan kini gitagna.​—Zacarias 11:12.

Nisan 13

22. Unsang pangandam ang gihimo sa Nisan 13?

²² Si Jesus, kinsa nagpabilin sa Betania, lagmit alang sa pag-ampo ug pamalandong, nagpadala sa iyang mga tinun-an ngadto sa Jerusalem aron pangitaon ang usa ka “Tanpulano.” Sa balay sa maong tawo, sa usa ka dakong lawak sa itaas, ilang giandam ang Paskuwa. (Mateo 26:17-19) Sa pagsalop sa adlaw sa Nisan 13, si Jesus miduyog kanila didto alang sa labing halandumong saulog sa tibuok kasaysayan. Unsay nagpaabot sa Nisan 14? Ang sunod namong artikulo maoy mosugid.

[Footnote]

Unsaon Nimo sa Pagsumaryo?

◻ Unsang pag-abiabi ug pagdawat ang gihatag sa pipila kang Jesus panahon sa Nisan 8 hangtod 10?

◻ Giunsa pagyagyag ni Jesus ang salingkapawng klero sa Nisan 11?

◻ Unsang dakong tagna ang gihatag ni Jesus, ug sa unsang paagi kini ginatuman karong adlawa?

◻ Sa unsang paagi ang mga panghitabo mipadayon ngadto sa tayuktok sa Nisan 12 ug 13?

[Hulagway sa panid 12]

Gidayeg ni Jesus ang kabos babayeng balo nga miamot ug duha ka diyot​—ang tanan nga iyang nabatonan