Panahon na sa Pagtukaw!

“AYAW pagkasayop sa panahon nga kita nagkinabuhi; panahon na alang kanato sa pagmata gikan sa atong pagkatulog.” (Roma 13:​11, Knox) Si apostol Pablo misulat nianang mga pulonga ngadto sa mga Kristohanon sa Roma mga 14 ka tuig una pa ang malaglagong kataposan sa Hudiyohanong sistema sa mga butang sa 70 K.P. Tungod kay sila nagtukaw sa espirituwal, ang Hudiyong mga Kristohanon wala didto sa Jerusalem nianang kritikal nga panahon, busa sila nakaikyas sa kamatayon o pagkaulipon. Apan sa unsang paagi nahibalo sila nga kinahanglan silang magpalayo sa siyudad?

Si Jesu-Kristo nagpasidaan nga ang mga kaaway molikos sa Jerusalem ug ang mga molupyo niini pagalaglagon. (Lucas 19:​43, 44) Human niana, gihatagan ni Jesus ang iyang matinumanong mga sumusunod ug daghag-bahin nga ilhanan nga dili lisod ilhon. (Lucas 21:​7-24) Alang niadtong mga Kristohanon nga nagpuyo sa Jerusalem, ang pagbiya sa siyudad nagkahulogag pagbiya sa mga balay ug mga trabaho. Bisan pa niana, ang ilang pagkamabinantayon ug pagkalagiw nagtipig sa ilang kinabuhi.

Sa dihang gitagna ni Jesus ang kalaglagan sa Jerusalem, ang iyang mga tinun-an nangutana: “Kanus-a man kining mga butanga mahitabo, ug unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Sa iyang tubag, gitandi ni Jesus ang iyang umaabot nga presensiya sa yugto sa wala pa ang tibuok-yutang Lunop sa adlaw ni Noe. Gipunting ni Jesus nga ang Baha nagbanlas sa tanang daotan. (Mateo 24:21, 37-39) Busa gipakita niya nga ang Diyos mosalga na usab sa tawhanong mga kalihokan. Sa unsang gilapdon? Aw, sa punto nga paphaon ang enterong daotang kalibotan, o sistema sa mga butang! (Itandi ang 2 Pedro 3:​5, 6.) Mahitabo ba kana sa atong panahon?

Mao ra ba Gihapon ang Tanan?

Pipila lamang ka unang-siglong mga Hudiyo ang naghunahuna nga ang ilang balaang siyudad, ang Jerusalem, malaglag. Ang susamang pagkadili-matinuohon kasagarang kaylap diha sa mga tawo nga nagpuyo duol sa usa ka bolkan apan kinsa wala makasinati sa pagbuto sa bolkan. “Dili sa akong panahon” mao ang kasagarang reaksiyon sa dihang ipahibalo ang mga pasidaan. “Kasagaran ang mga bolkan mobuto matag duha o tulo ka siglo,” misaysay ang batid sa mga bolkan nga si Lionel Wilson. “Mabalaka ka kon ang imong mga ginikanan kinahanglang mobalhin tungod sa pagbuto sa bolkan. Apan kon nahitabo kini sa imong mga apohan, nan dili kini hinungdanon.”

Apan, ang tukmang impormasyon makapaarang kanato sa pag-ila sa mga ilhanan sa kapeligrohan ug seryosong sundon kana. Niadtong nangalagiw gikan sa Mount Pelée, ang usa sinati sa mga bolkan ug nakasabot sa mga ilhanan sa kapeligrohan. Ang maong mga ilhanan husto usab nga gipasabot wala madugay una pa mibuto ang Mount Pinatubo. Ang mga batid sa mga bolkan nga nagbantay sa wala makitang mga puwersa nga nagpuot sa sulod sa bukid nagkombinsir sa lokal nga mga tawo sa pagbiya sa maong dapit.

Siyempre, ang uban kanunayng dili-manumbaling sa mga ilhanan sa kapeligrohan ug moinsistir nga walay mahitabo. Tingali biaybiayon pa nila kadtong mihukom sa pagbiya. Si apostol Pedro nagtagna nga ang maong panglantaw mahimong kasagaran sa atong adlaw. “Hibaloi ninyo kini nga una,” siya miingon, “nga sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’”​—2 Pedro 3:​3, 4.

Nagtuo ka ba nga kita ania na sa “kataposang mga adlaw”? Sa The Columbia History of the World, sila si John A. Garraty ug Peter Gay nangutana: “Nakita na ba nato ang pagkahugno sa atong sibilisasyon?” Unya kini nga mga historyano nag-analisar sa mga suliran sa gobyerno, ang tibuok-yutang pag-uswag sa krimen ug sibil nga pagkamasupilon, ang pagkahugno sa pamilyahanong kinabuhi, ang kapakyasan sa siyensiya ug teknolohiya sa pagsulbad sa mga suliran sa katilingban, ang krisis sa awtoridad, ug ang tibuok-kalibotang moral ug relihiyosong pagkadunot. Sila mihinapos: “Kon dili kini mao ang mga ilhanan sa usa ka tinong kataposan, sa walay duhaduha sama gayod kini sa mga ilhanan sa usa ka kataposan.”

Duna kitay ugdang nga katarongan nga motuo nga nagkaduol na ang “kataposan.” Dili, dili kita kinahanglang mahadlok sa kataposan sa yuta mismo, kay ang Bibliya nag-ingon nga ang Diyos “nagtukod sa yuta diha sa lig-ong mga dapit niini; dili kini matarog sa panahong walay-tino, o sa walay-kataposan.” (Salmo 104:5) Bisan pa niana, angay kitang magdahom ug sayong kataposan sa daotang sistema sa mga butang nga nagpahinabog dakong kaalaotan sa katawhan. Ngano man? Tungod kay nakita nato ang daghang dayag nga mga bahin nga nagpaila sa kataposang mga adlaw niining sistemaha, sumala sa gibatbat ni Jesu-Kristo. (Tan-awa ang kahon nga “Pipila ka Bahin sa Kataposang mga Adlaw.”) Nganong dili itandi ang mga pulong ni Jesus sa mga hitabo sa kalibotan? Ang pagbuhat niana makatabang kanimo sa paghimog maalamong mga desisyon alang sa imong kaugalingon ug sa imong pamilya. Apan nganong mohimog aksiyon karon dayon?

Tinuod nga Panginahanglan sa Pagpabiling Magtukaw

Bisan tuod ang mga siyentipiko nahibalo tingali kon hapit nang mobuto ang bolkan, dili sila tukmang makasulti kon kanus-a kini mahitabo. Sa susama, mahitungod sa kataposan niining sistema sa mga butang, si Jesus miingon: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.” (Mateo 24:36) Sanglit wala kita mahibalo sa tukma kon kanus-a matapos ang presenteng sistema sa mga butang, gihatagan kita ni Jesus niini nga pasidaan: “Hibaloi ang usa ka butang, nga kon nahibaloan pa sa tag-iya sa balay kon sa unsang yugtoa sa pagbantay moabot ang kawatan, pabilin unta siyang nagmata ug dili itugot nga lungkabon ang iyang balay. Tungod niini kamo usab pamatud-i ang inyong kaugalingon nga andam, tungod kay sa takna nga wala ninyo hunahunaa nga kini mao, ang Anak sa tawo [si Jesus] moabot.”​—Mateo 24:​43, 44.

Ang mga pulong ni Jesus nagpakita nga ang kalibotan makalitan sa malaglagong kataposan niining sistemaha. Bisan pag kita iyang mga sumusunod, kinahanglang atong ‘pamatud-an ang atong kaugalingon nga andam.’ Ang atong kahimtang susama nianang sa usa ka tagbalayng nakalitan ug wala makapangandam tungod kay wala siya mahibalo kon kanus-a lungkabon sa kawatan ang iyang balay.

Sa susama, giingnan ni apostol Pablo ang mga Kristohanon sa Tesalonica: “Kamo mismo nahibalo pag-ayo nga ang adlaw ni Jehova moabot nga sama gayod sa usa ka kawatan diha sa kagabhion. . . . Mga igsoon, kamo wala sa kangitngit, nga sa ingon hiapsan kamo nianang adlawa nga sama sa usa ka kawatan.” Nag-awhag usab si Pablo: “Dili kita mangatulog sama sa ginahimo sa uban, kundili managtukaw kita ug managhupot sa atong panimuot.” (1 Tesalonica 5:​2, 4, 6, potnot) Unsay kahulogan sa ‘pagtukaw ug paghupot sa atong panimuot’?

Dili sama sa pagkalagiw sa unang-siglong mga Kristohanon gikan sa Jerusalem, ang atong pagkalagiw ngadto sa kaluwasan wala maglangkit ug pagbiya sa usa ka siyudad. Human tambagi ang iyang kaubang mga sumusunod sa Roma sa pagmata gikan sa pagkatulog, giawhag sila ni Pablo nga ‘tangtangon ang mga buhat nga iya sa kangitngit’ ug “isul-ob ang Ginoong Jesu-Kristo.” (Roma 13:​12, 14) Pinaagi sa pagsunod pag-ayo sa mga tunob ni Jesus, atong gipakita ang atong kaugalingon nga nagtukaw sa kapanahonan, ug kining espirituwal nga pagkamabinantayon magpaposible nga madawat nato ang balaang panalipod sa dihang ang daotang sistema sa mga butang matapos na.​—1 Pedro 2:21.

Kadtong nagasunod kang Jesu-Kristo nakapahimulos ug makahuloganon ug makapatagbawng kinabuhi. Minilyong mga Saksi ni Jehova nakakaplag nga ang yugo sa Kristohanong pagkatinun-an maluloton ug makapalagsik. (Mateo 11:​29, 30, potnot) Ang unang lakang sa pagkahimong tinun-an mao ang ‘pagkuha ug kahibalo sa Diyos ug sa usa nga iyang gipadala, si Jesu-Kristo.’ (Juan 17:3) Ang mga Saksi nagaduaw sa minilyong balay matag semana aron sa pagtabang sa mga tawo nga makabaton ug “tukmang kahibalo sa kamatuoran.” (1 Timoteo 2:4) Malipay sila nga modumala ug libreng mga pagtuon sa Bibliya uban kanimo diha sa imong balay. Samtang magauswag ang imong kahibalo sa Pulong sa Diyos, sa walay duhaduha ikaw usab makombinsir nga ang atong mga adlaw maoy lahi. Sa pagkatinuod, panahon na sa pagmata gikan sa pagkatulog!

[Box/Mga hulagway sa panid 7]

PIPILA KA BAHIN SA KATAPOSANG MGA ADLAW

“Ang nasod motindog batok nasod”; ‘kuhaon ang pakigdait gikan sa yuta.’ (Mateo 24:7; Pinadayag 6:4)

Ang duha ka gubat sa kalibotan niining sigloha, duyog sa daghang ubang panag-away, nagkuha sa pakigdait gikan sa yuta. “Ang Una​—ug sunod ang Ikaduha​—nga Gubat sa Kalibotan nahimong lahi sa tanang gubat nga gisangka kanhi,” misulat ang historyanong si John Keegan, “lahi sa gidak-on, kagrabehon, kamalukpanon ug kapildihan sa materyal ug sa kinabuhi sa tawo. . . . Ang mga Gubat sa Kalibotan nakapatay ug mas daghang tawo, nakahurot ug mas daghang bahandi ug nakapahinabog dugang pag-antos sa mas dakong dapit sa yuta kay sa bisan unsang nag-unang gubat.” Ang mga gubat karon labi pang nagdaot sa kababayen-an ug kabataan kay sa mga sundalo. Ang United Nations Children’s Fund nagbanabana nga sa milabayng napulo ka tuig, duha ka milyong kabataan ang nangamatay diha sa mga gubat.

“Kakulang sa pagkaon” (Mateo 24:​7; Pinadayag 6:​5, 6, 8)

Sa 1996 ng mga presyo sa trigo ug mais miusbaw pag-ayo. Ang rason? Ang mga pondo sa kalibotan niining mga lugasa mius-os ngadto sa 50-ka-adlaw na lamang nga suplay, ang kinakubsang gidaghanon nga nasulat. Ang nag-usbaw nga mga presyo sa paninugdang mga pagkaon nagpasabot nga gatosan ka milyong kabos sa kalibotan​—kadaghanan kanila kabataan​—matulog nga gutom.

“Mga linog sa usa ka dapit human sa laing dapit” (Mateo 24:7)

Sulod sa milabayng 2,500 ka tuig, dunay siyam lamang ka linog nga ang kada usa mipatay ug kapin sa 100,000 ka tawo. Upat niini nga mga linog nahitabo sukad sa 1914.

“Pag-uswag sa kalapasan” (Mateo 24:12)

Samtang naghinapos ang ika-20ng siglo, ang kalapasan, o paglapas sa balaod, nahimong kaylap. Ang pag-atake sa mga terorista sa mga sibilyan, walay-puangod nga mga mamumuno, ug pinakyawng pagpatay nalakip sa makalilisang nga mga bahin niining mapintas nga kataposang mga adlaw.

“Sa usa ka dapit human sa lain mga kamatay” (Lucas 21:11)

Panahon sa katuigang 1990, lagmit 30 ka milyong tawo ang mangamatay sa tesis. Ang nagdalag-sakit nga bakterya nahimong labi pa ug labi pang dili-madutlan sa tambal. Ang malarya, nga laing makamatayng sakit, mitakboy ug tali sa 300 ug 500 ka milyong tawo kada tuig ug nakapatay sa gibanabana nga 2 ka milyon. Pagkatapos niini nga dekada, gidahom nga 1.8 ka milyon ang mangamatay gumikan sa AIDS kada tuig. “Karong adlawa ang katawhan nakasinati ug pagdagsang sa mga epidemya,” nag-ingon ang State of the World 1996.

“Kining maayong balita sa gingharian igawali sa tibuok gipuy-ang yuta.” (Mateo 24:14)

Sa 1997, ang mga Saksi ni Jehova migugol ug kapin sa usa ka bilyong oras sa pagsangyaw sa maayong balita sa Gingharian. Kapin sa lima ka milyong Saksi ang regular nga nagdala niini nga mensahe ngadto sa mga tawo sa 232 ka kayutaan.

[Credit Lines]

Letrato sa FAO/B. Imevbore

Letrato sa U.S. Coast Guard

[Hulagway sa panid 4, 5]

Ang mga Kristohanon mikalagiw gikan sa Jerusalem tungod kay sila nagtukaw sa espirituwal